Filemu, Ia FIlemu: Faatoafilemuina o a Tatou Afā

Ua ta’u mai e Mareko ia i tatou o le vavega muamua o nei vavega e lua na tupu ina ua uma ona faaalu e Iesu se vaega tele o le aso e aoao ai le motu o tagata i tafatafa o le Sami o Kalilaia. Sa saofafai le motu o tagata i luga o se maupuepue e iloa atu ai le sami ma sa saofai le Faaola i totonu o se vaa. I le afiafi, sa o atu ai le Faaola ma Ana Aposetolo i totonu o se vaa e sopoia ai le itu i sasae o le sami.

Peitai, e lei umi, ae lofituina le vaa i se afā matautia. A o tofa filemu le Faaola, sa galulue malosi Ona soo e faasaoina o latou ola. Sa faamata’uina e matagi ma galu maualuluga le goto ifo o le vaa. Mulimuli ane, i le atuatuvale tele, na fagua ai e Aposetolo le Faaola i a latou upu ita, “Le aoao e, e te lē manatu mai ea ia te i matou a fano?” Ona oo lea i le vavega sili:

“Ona tulai lea o ia, ma na vavao atu i le matagi, ua fetalai atu foi i le vai, Faalologo ia, ina malū ia. Ona mate lea o le matagi, i le ua matuā malū.

“Ona fetalai atu lea o Ia ia te i latou, Se a le mea tou te fefefe ai faapea? Se a le mea tou te lē faatuatua mai ai?” (Mareko 4:38–40).

O le faataatiaga tulaga ese o le Sami o Kalilaia ua faigofie ai ona aafia i matagi. I le 13 maila le umi ma le 8 maila le lautele, e taoto le sami i le maualuga o le 690 futu i lalo ifo o le sami, ma mauga o loo siomia ai. O nisi o mauga e maualuga atu ma le 2,000 futu i luga ae o le sami. I le afiafi, e masani ona alu aʻe le ea mafanafana ma le susu i luga aʻe o le vai, ae o le ea malulu mai mauga e vave ona alu ifo, ma faʻaosofia ai le saosaoa o le matagi i luga o le vai. E lē gata i lea, o le Sami o Kalilaia e papaʻu, ma e 250 futu le loloto, lea e masani ona maua ai galu tetele pe a malosi le savili.

E ui ina ua tele le agaigai i luma o tulaga faataitaia ma le valoiaina o afā, ae e lē o i ai i tagata soifua le gafatia e pulea ai. Ua na o le seneturi ua tuanai ua tatou aoaoina ai le auala e mafai ona tatou faaaafia uma ai le tau o le aso ma le tau masani. O ao fatu ua faaaogaina e amatalia ai timuga, ma o loo i ai faamaoniga e mafai e siosiomaga o le taulaga ma le otaota ona suia le tau i le lotoifale ma le lalolagi. Peitai, o le tomai e faamuta ai se afā, ae maise i se taimi puupuu lava, e lē oo i ai le gafatia o le tagata. O le matagi e maua mai le eseesega faafanua o le vevela ma le malosiaga. O le a faamutaina se matagi pe afai o le a i ai le paleni i le vevela ma le malosiaga.

O se tasi o lesona ua ou aoaoina mai lenei vavega o le, e i ai i le Faaola le mana e pulea ai elemene. O le Faaola na foafoaina le laueleele, vai, siosiomaga, ma mea uma i luga o le fogaeleele (tagai i le Ioane 1:3). I le Foafoaga, sa ia te Ia le mana e faatonu ai elemene ma sa latou usiusitai (tagai i le Aperaamo 4:18). O le vavega o le faafilemuina o le matagi na faaalia ai e tutusa lava Lona mana i le taimi o Lana galuega i le olaga nei.

Ou te talitonu sa aoao mai le Faaola e uiga i le mana faaola ma le puipuiga ua ia te Ia. O matagi o le tiapolo e mafai ona mafua ai ituaiga uma o galu malolosi i o tatou olaga (tagai i le Helamana 5:12). A o tatou vaai atu i le Faaola, e mafai ona puipuia i tatou mai mea leaga ma ona aafiaga. E mafai ona faasaoina i tatou mai le faatafunaga faaleagaga. (Tagai i le Mataio 7:24–27.)

E i ai moni lava i le Faaola le mana e faatoafilemu ai afā i o tatou olaga. O nisi taimi e vave lava ona toafilemu afā, ma o isi taimi e tatau ona tatou onosaia afā mo se vaitau. Ae ia manatua o matagi faapena e mafai ona āfua ai ni galu tetele atu i luga o vai papau pe a faatusatusa i vai loloto. A o tatou faalolotoina lo tatou faatuatua i le Faaola, o le a tatou iloa ai ua faaitiitia lo tatou aafia ai i matagi ma galu faaleagaga ia semanū e faamatauina ai le lofituina o i tatou.

Ata

O Iesu o loo aapa atu mo Peteru i le vai

Faaatoatoaina o le Faatuatua, saunia e J. Alan Barrett

O Le Vavega (Mataio 14:22–33)

Ina ua mulimuli atu se motu o tagata toatele i le Faaola i se nofoaga tuufua, sa Ia aoaoina i latou ona fafagaina lea faavavega o i latou. I le afiafi, na Ia auina atu ai le au soo i luga o se vaa e muamua atu ia te Ia i le isi itu o le sami. Sa Ia faataape le motu o tagata, ona Ia alu atu lea i luga o se mauga lata ane e tatalo ai.

Sa i ai se matagi malosi i luga o le sami, ma sa itiiti se alualu i luma o le au soo. Mulimuli ane i lena po, sa filifili ai le Faaola e feiloai atu ia i latou i se ala faavavega: e ala i le savali i luga o le vai.

Ina ua vaai atu Peteru ia te Ia, sa ia manao e tuua le saogalemu faatusatusa o le vaa e faataitai ai i le Faaola ma savali i luga o le vai. Sa faamanuiaina muamua Peteru, ae ina ua aafia o ia i le fefe, sa amata ona magoto seia oo ina laveaiina o ia e le Faaola. (Tagai i le Mataio 14:22–33.)

O se tasi o aafiaga faaletino o lenei vavega, o le malamalama o le Faaola i le kalave, malosi femitiai, ma isi mataupu faavae o le fisiki o loo i ai i se tulaga e sili atu nai lo o tatou lava tulaga. O lo tatou malamalama faasaienisi i le kalave, mo se faataitaiga, ua atiina ae i le āluga o taimi. I le vaitau e 1600, sa faamatalaina ai e Sir Isaac Newton le matematika o le kalave o se malosiaga e faatino i le va o ni elemene se lua i le atulaulau. O le saienitisi Igilisi o Henry Cavendish, i le faaiuga o le seneturi lona 18, na faaalia ai o loo i ai se malosiaga fuatia o le kalave. O le vaaiga i le kalave o se malosiaga na suia ina ua lolomiina e Albert Einstein ona manatu lautele i fesootaiga i le 1915. O lana faamalamalamaga o le kalave, lea ua taliaina e le toatele i le taimi nei, o elemene e fatuina se mamanu o le taimi ma le atulaulau.

A o tuputupu ae lo tatou malamalama i le kalave, ua tatou faaaogaina lena malamalamaaga i auala ua suia ai la tatou vaaiga i tapulaa e tuu mai e le kalave i o tatou luga. Mo se faataitaiga, mafaufau pe faape’i le avea ai ma se tasi o le faitau afe i le Aai o Niu Ioka i tafatafa o le Vaitafe o Hudson i le 1909 a o agai atu Wilbur Wright i le vateatea ma lele atu i luga o le vaitafe ma faataamilo i le Faatagata o Liperate. Sa maofa tagata o lena aso a o foliga mai ua faatoilalo e Wilbur Wright le kalave. Sa latou molimauina se vavega—o le vavega o le lele.

O le vavega a le Faaola o loo savali i luga o le Sami o Kalilaia ua faaalia ai e tele mea o loo moomia ona tatou aoao ai e uiga i le kalave ma isi tulafono faaletino. E tele naua mea tatou te lē o malamalama atoatoa ai.

Atonu foi sa aoao atu e le Faaola Ona soo i lena taimi ma le taimi nei e uiga i Lona mana e faamalosia ai, siitia, ma mafai ai. Tatou te feagai uma lava ma matagi ma galu o luitau i lenei olaga. E pei foi o Peteru, e faapena foi ia i tatou. O nisi taimi e le faaitiitia ai afa, ma na o le pau lava le ala e ui atu ai ma agai atu ai i lo tatou taunuuga e faavavau o le laa atu lea i fafo i le afa ma se taulaiga naunautai i le Faaola.

E tatau ona ia i tatou le faatuatua i le mana gafatia o le Faaola e fesoasoani ai ia i tatou e faatoilalo o tatou lava popolega ma tapulaa. O se autu tāua lenei e lalagaina i nei vavega uma e lua.

E tele nauā lesona mai nei vavega o le a fesoasoani ma musuia ai i tatou a o tatou agaigai i luma i la tatou lava faigamalaga. O vavega a le Faaola o loo tutū o se molimau maoae o Lona paia, Lona atamai, ma Lana taulaga togiola maoae mo i tatou taitoatasi. E ala i Lona mana e mafai ai ona tatou maua le filemu pe a taufaamata’u mai galu e lofituina i tatou, ma e mafai ona tatou maua le talitonuga o le a Ia siitia i tatou i se malo maualuga atu i le malo o lo tatou Tama.

E i ai moni lava ia te ia le mana e faatoafilemu ai afā faapea foi ma seila.