“Pe o Faamoemoe Moni Mai Ea Le Tama Faalelagi ia Tatou Atoatoa?,” Liahona, Fep. 2023.
Sau, Mulimuli Mai ia te A’u
Pe o Faamoemoe Moni Mai Ea Le Tama Faalelagi Ia Tatou Atoatoa?
I Lana Lauga i luga o le Mauga, na aoao mai ai le Faaola, “O lenei, ia atoatoa ona lelei o la outou amio, e pei o lo outou Tamā o i le lagi e atoatoa ona lelei o ia” (Mataio 5:48). Ae e mafai faapefea lenei mea? O lenei poloaiga e mafai ona foliga lofituina, ma e mafai ona tatou lotovaivai pe afai tatou te lē tutū e manatua pe faapefea ma pe o afea foi tatou te maua ai le atoatoaga.
Gaoioiga: Paso Atoatoa
Vaega 1
Na aoao mai Elder Jeffrey R. Holland o le Korama o Aposetolo e Toasefululua: “Pau le tatou faamoemoega mo le atoatoa moni o le taliaina lea e avea ma se meaalofa mai le lagi—e lē mafai ona tatou ‘mauaina’”.1
I le avea ai o se aiga, pe na o oe lava, tagai i le faauigaga o le atoatoa i le Taiala i Tusitusiga Paia i le polokalama o le Potutusi o le Talalelei po o le ChurchofJesusChrist.org. Faitau mau faasino o loo i ai faatasi ma le faauigaga. E mafai foi ona e mafaufau e faitau le saunoaga a Russell M. Nelson “Atoatoaga o loo Faatalitali” mai le konafesi aoao o Oketopa 1995.2
O le a sou malamalama i le atoatoa i le taimi nei? Talanoa ma lou aiga pe tusi i lau api talaaga pe faapefea e lou malamalama i nei fuaiupu ona suia i le faauigaga o le talalelei o le atoatoa.
Vaega 2
I le avea ai o se aiga, fatu se paso faigofie e ala i le tipiina o se pepa i ni fasi paso se tele. A o lei tuufaatasia le paso, aveese se fasi paso se tasi ina ia lē atoatoa le paso pe a uma ona tuufaatasia. Tuu atu i tagata taitoatasi o le aiga vaega o totoe o le paso ma tuu atu ia i latou e faaigoa fasi vaega i mea e mafai ona latou faia e galulue ai agai i le atoatoaga.
A faailogaina vaega, tuufaatasi le paso e aunoa ma le vaega na e aveesea i le amataga. O le taimi lava e tuufaatasia uma ai le paso, faaali mai le vaega mulimuli. A o lei faapipiiina, talanoa i auala e fesoasoani ai sui o le Aiga Atua ia i tatou e faaleleia atili ma tusi nisi o nei mea i luga o le fasi paso mulimuli.
E ala i le mana togiola o Iesu Keriso ma Lana Togiola, e mafai ai ona tatou atoatoa mulimuli ane.3