“O Lo’u Faamanuiaga Faavavega.” Liahona, Fep. 2023.
O Leo o le Au Paia o Aso e Gata Ai
O Lo’u Faamanuiaga Faavavega
Ou te faafetai i le iloaina o le mana o le perisitua e tutusa lava i atunuu uma.
Ata pue mai faaaloaloga a le tusitala
I le taufaaiuiuga o lau aoga i Iapani, sa ou malaga ai i Thailand e faatino se sailiiliga ma suesuega mo lo’u faailoga o le matuaofaiva. Sa ou fiafia ae sa ou popole e uiga i le malaga.
Ae ou te lei alu ese, sa ou talosagaina se faamanuiaga faa-perisitua. I le taimi o le faamanuiaga, sa fautuaina au e saili faamanuiaga faa-perisitua i taimi faigata. Sa ta’u mai ia te au: “Manatua i luga o lenei fogaeleele, e leai se nofoaga e lei foafoaina e le mana o le perisitua. O lea, po o fea lava e te alu i ai, saili se tasi e umia le perisitua ma ole atu mo se fesoasoani, ma o le a faamanuiaina oe.”
Sa ou lē iloa pe faapefea ona maua le Ekalesia i Thailand i le taimi ou te taunuu ai. E lei atiina ae le initoneti, o lea sa lē mafai ai ona ou sueina le nofoaga o fale. Sa matou taunuu i le malaevaalele i Bangkok i le aoauli o se Aso Toonai. I totonu o le pasi, sa ou tatalo ai ma le faamaoni, “Tama Faalelagi, o taeao o le Aso Sa. Faamolemole fesoasoani mai ia ou maua le Falelotu.”
Na uma la’u tatalo, ma sa ou vaai atu i fafo. Sa ou te’i, sa ou vaaia se faailoga mo O Le Ekalesia a Iesu Keriso o le Au Paia o Aso e Gata Ai i le gagana Thai ma le Igilisi.
O le taeao na sosoo ai, sa ou aveina ai se taavale pa’u toluotometi i lena fale. Mulimuli ane, sa tuuina mai e tagata o le ekalesia iina ia te a’u le tuātusi o se fale e latalata atu i le nofoaga o la’u galuega maotua lea sa faia ai sauniga a le paranesi. Sa latou tuuina mai foi ia te a’u le numera o le telefoni a faifeautalai faamisiona. O le Aso Sa na sosoo ai, sa ou auai ai i lena paranesi.
Ina ua mavae ni aso o faigaluega mo ni itula uumi i le vevela o le la, sa amata ona ou vaivai. Mulimuli ane, sa ou ma’i.
Sa ou valaau atu i faifeautalai faamisiona, ma sa matou faatulagaina se taimi e feiloai ai i le nofoaga o le paranesi. Ina ua ou taunuu i le aso na sosoo ai, sa leai se tasi na i ai iina. A o o’u faatalitali i fafo, sa ou tatalo, “Tama Faalelagi, ou te iloa e mafai ona e faamaloloina a’u, pe afai o Lou finagalo lena. Faamolemole, fesoasoani mai ia te au.”
E lei umi ae taunuu mai faifeautalai ma le peresitene o le paranesi. Ina ua faaee e nei alii e toatolu e umia le perisitua o latou lima i luga o lo’u ulu, sa ou lagonaina le mana o le Agaga Paia o ulu mai le tumutumu o lo’u ulu e oo atu i o’u tamatamaivae. Sa vave ona faamaloloina a’u.
I se taulaga laitiiti e mamao ese mai lo’u atunuu moni, sa ou sailia ai se fesoasoani mai ē e umia le perisitua. Sa faamanuiaina a’u e le Alii e ala i Lana perisitua ma lo’u faatuatua. I a’u malaga talu mai lena taimi, ua ou talosagaina ai le tele o faamanuiaga mai ē e umia le perisitua i le lalolagi atoa. Ou te faafetai i le iloaina o le mana o le perisitua o loo umia e ē umia ma le agavaa le perisitua e tutusa lava i atunuu uma.