E Na’o le Faatekinolosi
O Faamanuiaga ma le Tāua o Talafaasolopito o Aiga—Sāvali Lata Mai Nei mai Perofeta ma Aposetolo
Tagai i mea na aoao mai talu ai nei e perofeta soifua i luga o ala o faasalalauga faaagafesootai e uiga i talafaasolopito o aiga.
Sa aoao soo mai Peresitene Russell M. Nelson e uiga i le tāua o le fesoasoani e faapotopoto Isaraelu i itu uma e lua o le veli. O le auai i talafaasolopito o aiga e tāua i lena galuega tele. E pei ona aoao mai Peresitene Nelson:
O tagata taitoatasi e soifua mai i lenei lalolagi o se suli o tupulaga o mātua. O loo ia i tatou se faanaunauga faalenatura e fesootai atu i o tatou tuaa. O lenei manao e mau i o tatou loto, e tusa lava po o le a le matua.
“Manatunatu i le sootaga faaleagaga lena e maua pe a fesoasoani se tamaitai talavou i lona tināmatua e tuu atu faamatalaga i le komepiuta, po o le vaai o se alii talavou i le igoa o le tamā o lona tamāmatua i faamaumauga o se tusigāigoa. Pe a liliu atu o tatou loto i o tatou tuaa, e i ai se mea i totonu o i tatou e suia. Tatou te lagonaina o i tatou o se vaega o se mea e sili atu nai lo o i tatou lava. O ō tatou faanaunauga faalenatura mo fesootaiga faaleaiga e faataunuuina pe a sosooina atu i tatou i o tatou tuaa e ala i sauniga paia o le malumalu.
“Na saunoa mai le Perofeta o Iosefa Samita, ‘Ua tuuina mai e le Atua i o tatou luga se tiutetauave maoae e saili atu mo ō tatou tagata ua maliliu.’ O le tekonolosi fou ua sili atu ai ona faafaigofie ona faataunuu lena tiutetauave nai lo soo se isi lava taimi.
Ae faapefea la outou na e lē mafai ona faaaoga se komepiuta pe lē mananao foi e faaaoga lenei tekinolosi? Aua le popole! Fai se laa se tasi i le taimi. Amata i le fale. Amata i se atigi pusa pepa malo avanoa, e pei ona fautuaina atu e Peresitene Boyd K. Packer. Tuu i totonu o le atigi pusa faamatalaga tāua e uiga ia te oe ma lou aiga. Faaopoopo i ai faamatalaga mai isi o lou aiga. Ona tuuina atu lea i le fesoasoani mai le fautua o lau uarota po o le paranesi [malumalu ma] talafaasolopito o aiga. …
“O se galuega fiafia lenei. …
“Ao i ai i galuega o le malumalu ma talafaasolopito o aiga le mana e faamanuia ai i latou o i tua atu o le veli, o loo i ai foi le mana lava lea e faamanuia ai e o soifua. O loo i ai se uunaiga faamama ia i latou o loo faia lea galuega. O loo latou fesoasoani moni lava e faaeaina o latou aiga.”1
O faamatalaga nei mai taitai o le Ekalesia i luga o ala o faasalalauga faaagafesootai e mafai ona fesoasoani ia i tatou e aoao atili ai e uiga i faamanuiaga ma le tāua o talafaasolopito o aiga.
Faataitaiga a i Latou o e Sa Faatinoina lo Latou Faatuatua i le Faaola
“‘Faamatala mai ia te a’u se tala’ o se talosaga faifai pea lea mai tamaiti. E ui o tala fatu ma faafagogo e mafai ona malie e faasoa atu, ae mafaufau e faamatala atu i lau fanau tala e faaalia ai le faatuatua ia Iesu Keriso ma tala e fesootai ai i latou i o latou tuaa tamālii. I tausaga ua mavae, sa tonu ai ia i ma’ua ma Kristen e fatu se tusi o tala o lo ma aiga, ua faatumulia i tala mai o ma aiga lautele ma tuaa. Matou te fiafia e faitau faatasi mai ai ma lo matou aiga.
“Matou te valaaulia outou ina ia fatuina la outou lava tuufaatasiga o faataitaiga mai le talafaasolopito o lou aiga o i latou o e sa faatinoina lo latou faatuatua i le Faaola, i Ana taitai, ma i mataupu faavae o Lana talalelei. E mafai ona e toso mai ni tala mai lauga po o talafaasolopito o aiga, pe na o ni tala na e faalogo ai i lou tuputupu ae. Tusifaamaumau i latou, ma faasoa atu. O le faia o lena mea e mafai ona fesoasoani ia te oe ma lou aiga e liliu atu ai o outou loto i ou tuaa.
Peresitene Dallin H. Oaks, Facebook, Ian. 14, 2021, facebook.com/dallin.h.oaks.
O Lau Matafaioi e Faia i Lenei Galuega Tele
“Ua tofu i tatou uma ma se matafaioi e faia i lenei galuega tele. O le auai i talafaasolopito o aiga ma galuega faalemalumalu e faaali atu ai i le Atua e te alofa ia te Ia, Lona aiga, ma Ona faamoemoega. A o e fausia se sootaga ma lou Tama oi le Lagi, o le a Ia fausia se sootaga ma oe.”
Jeffrey R. Holland, Facebook, Fep. 7, 2021, facebook.com/jeffreyr.holland.
Fesootai ma o Tatou Lava Aiga
“Faafetai i lo’u toalua, o Maria, o musika o se vaega tāua i taimi uma o lo matou fale ma le aiga. I ni nai tausaga ua mavae i le taimi o le konafesi a le RootsTech, sa faasoa mai ai e Maria ma nisi o fanau a la’u fanau se pese e tuufaatasia uma ai lo ma fiafia i musika faapea foi lo ma alolofa mo le aiga.
“O lena pese o loo faasoa mai ai se sāvali o le ’[liliuina] o loto o le … fanau i [o latou] tamā (Mataupu Faavae ma Feagaiga 110:15), lea na sili ona tāua i fanau a ā tatou fanau. O le konafesi a le RootsTech na faaosofia ai se fiafia i fanau a le ma fanau ina ia aafia atili i le iloaina ma fesootai atu i o latou lava tuaa.
“Ua ia i tatou uma se tiutetauave i augatupulaga na muamua atu ia i tatou ma augatupulaga o le a mulimuli mai ia i tatou. Ou te tatalo o le a faaauau pea e i tatou taitoatasi ona saili se auala e fesootai ai ma o tatou lava aiga.”
Elder Quentin L. Cook, Facebook, Fep. 19, 2021, facebook.com/quentin.lcook.
O Mea Laiti ma Faatauvaa
“E masani ona faamatalaina e le Faaola Lana galuega e ‘tele ma le ofoofogia’ (Mataupu Faavae ma Feagaiga 12:1) po o ‘se galuega ofoofogia ma le mea e ofo ai’ (2 Nifae 27:26). Ae e matagofie ia te a‘u le auala na Ia faataunuuina ai lena galuega e ala i mea laiti ma faatauvaa—e aofia ai oe ma au.
“Po o a lava isi o tatou tiutetauave, tatou te maua uma lava le avanoa e valaaulia ai fanau a le Tama Faalelagi e fusi i latou lava i le Faaola e ala i le osia ma le tausia o feagaiga.
“Na saunoa Peresitene Russell M. Nelson e faapea ‘soo se taimi lava e te faia ai soo se mea e fesoasoani ai i soo se tasi’ e osia ma tausia feagaiga, i itu uma o le veli, o loo e faapotopotoina Isaraelu (‘Faamoemoe o Isaraelu,’ faigalotu a le autalavou i le lalolagi atoa, 3 Iuni, 2018). O le mafuaaga aupito silisili lea i le lalolagi, ae e mafai foi ona fai. E tafe mai lava faalenatura i le fuasia lea o i tatou lava i le Faaola.
“Atonu e te le manatu i ai, ae e mafai e i tatou taitoatasi ona i ai moni lava se faatosinaga tele i le fesoasoani atu i isi ia faateleina lo latou faatuatua ia Iesu Keriso. Ou te valaaulia outou ia mafaufau i mea e mafai ona outou faia i le asō.”
Elder Quentin L. Cook, Facebook, Iul. 19, 2021, facebook.com/quentin.lcook.
Faamanuiaga o le Iloaina o Tala a Tagata Taitoatasi
“I le 1999, sa lava lo‘u faamanuiaina e auai ai i le amataina o le uepisaite a le Ekalesia o le FamilySearch. O Gordon B. Hinckley, i lena taimi o le Peresitene o le Ekalesia, na faasoa mai nisi o upu o fautuaga sa ou iloaina i taimi uma le ofoofogia. Sa ia fai mai, ‘O le aoaoga faavae o le natura e faavavau o le aiga o se tasi lea o aoaoga e sili ona tāua ma paia o a tatou aoaoga. O le saili ia malamalama i o tatou talafaasolopito o aiga e mafai ona suia ai olaga. E fesoasoani e aumaia ai le lotogatasi ma le lototoa i aiga. E i ai se mea e uiga i le malamalama i le taimi ua tuanai lea e fesoasoani e tuuina atu ai i o tatou tagata talavou se mea e ola ai, o se talatuu e faaaloalo i ai.’
“O loo moni pea nā upu i le asō, ma i le 22 tausaga talu ona ou faalogo muamua i ai, sa ou maofa i faamanuiaga faaagafesootai ma faaleagaga ua tatou fiafia uma lava i ai mai le sailia o ō tatou tuaa, e lē na o le sailia o mea moni o gafa, ae mai le mauaina o tala a tagata taitoatasi. O nei tala o le a tele se mea e faia e faamautu ai ia i tatou uma se lagona o le nofoaga, faamoemoega, ma le fesootaiga ia i latou o e ua saunia le ala i o tatou luma.”
Elder D. Todd Christofferson, Facebook, Fep. 23, 2021, facebook.com/dtodd.christofferson.
Mai Le Ifea ma le O Ai Na E Sau Ai
“A o e saili ia iloa ma tuufaasolosolo ifo po o ai oe, ma mai le mea na e sau ai, o le a e iloa ai po o ai o Ia—lou Faaola o Iesu Keriso; ma ou te folafola atu ia te outou o le a outou maua le mama a’ia’i ma le filemu, vaaiga ma faamoemoega, ma o le a outou maua le mana ma le nofoaga i le aiga o le Atua.”
Elder Ulisses Soares, Facebook, Mat. 5, 2022, facebook.com/soares.u.
O Se Tuufaatasiga o le Taimi ua Tuanai ma le Taimi Nei
“O a tala o le aiga e te maua mai ai le malosi? O a tu ma aga masani o loo e faaolaolaina pea? Afai e leai se mea e oo mai i le mafaufau, aua le lotovaivai. Matou te uunaia outou ia iloa; ma ia manatua, o talafaasolopito o aiga e lē faatatau uma i le taimi ua tuanai. O se tuufaatasiga o le taimi ua tuanai ma le taimi nei ua tulaga ese ai oe.”
Ulisses Soares, Facebook, 2 Mati, 2022, facebook.com/soares.u.