O Loli Samasama ma Tupe Iti a Fafine ua Oti A latou Tane

Ata

tamaitiiti i le maafaamanatu i Okinawa

Ata pue o le atalii o le tusitala i le maafaamanatu i Okinawa mai faaaloaloga a le tusitala

Sa ou tilotilo atu i le tele o laina o maa mora uli o loo tutū ma le lē maluelue i togalaau matagofie o le Paka Faamanatu o le Filemu o Okinawa i Itomani, Okinawa, Iapani. Na vaneina ai le silia ma le 200,000 igoa, o nei maa e faamanatu ai i latou o e na maumau o latou ola i le taimi o le Taua a Okinawa i le taimi o le Taua Lona II a le Lalolagi.

A o ma savavali agai atu i le paka taavale i le faaiuga o le ma asiasiga, sa ma matauina ai ma lo’u toalua ua le toe uuina e le ma pepe lana loli samasama e sili ona fiafia i ai. Ina ua ma fesili atu ia te ia po o fea o i ai, sa ia toe taitai atu i maua i le maafaamanatu autu. Sa ia tuuina faalelei lana loli e sosoo ma se teufugalaau o fugalaau na foai mai e isi tagata asiasi. Faatasi ai ma mata susulu ma se ataata tele, sa faaali mai ai e lo ma atalii ia i ma’ua lona lava sao i le maafaamanatu.

I le tietie atu ai i le fale, sa ma mafaufau loloto ai i lana filifiliga lē manatu faapito. Pe na ia iloaina le agaga faapitoa o lena nofoaga ma lagona le faamalosia e tuuina atu lana meatotino sili ona tāua? O le a le tāua e mafai e se loli palasitika ona faaopoopo i le mamalu ma le faamanatuina o i latou o ē sa maliliu ma maumau o latou ola iinei?

Sa liliu atu o’u manatu i le taulaga togiola a le Faaola. I se togalaau matagofie faapena, sa Ia ositaulagaina Ai Lona soifua ina ia mafai ai ona faasaolotoina i tatou mai le agasala ma le oti ma toe foi atu i le aiga i lo tatou Tama Faalelagi. O le a se mea e mafai ona ou tuuina atu i le Faaola po o o’u uso ma tuafafine o le ’a lava e faaali atu ai lo’u agaga faafetai? O le a le tāua o le a faatusa i ai a’u saofaga i Lana taulaga?

I lena po, sa ou faitau ai i le Evagelia a Mareko e uiga i le fafine na ofoina atu ni tupe iti se lua a o foai atu e tagata mauoa sa siomiaina o ai le tele atu. Sa ootia lo’u loto i upu a le Faaola:

“O mea a lena fafine mativa ua oti lana tane, ua lafo i le mea e teu ai tupe, ua sili ia ia i latou uma na lafo i ai:

“… Sa manao o ia e lafo i ana mea uma sa i ai” (Mareko 12:43–44).

Ou te talitonu e itiiti le popole o le Alii e uiga i mea tatou te saofaga atu ma sili atu ona popole i o tatou manao ma le faamaoni. O le tele o mea e mafai ona ou tuuina atu atonu e foliga mai e itiiti le tāua pe a faatusatusa i saofaga matagofie a isi faapei o le maafaamanatu. Ae “e vaai Ieova i le loto” (1 Samuelu 16:7), o lea la, o se faailoaga faigofie e lagonaina e le loto ma le faamaoni o le alofa, lotofaafetai, po o le auauna atu e mafai ona faauigaina tele e pei ona faamamaluina ai Iesu Keriso ma Lana taulaga togiola.

E pei lava o loli samasama ma tupe iti a fafine ua oti a latou tane.