E Le o le Usiusitai ea e Taitai Atu ai i Faamanuiaga?

E mafai ona faigata ona i ai se vaaiga lautele i le lotolotoi o tofotofoga, ae o le toe tepa i tua, e mafai ona ou iloa ai o ala moni o le Alii e lē o ō tatou ala ia (tagai i le Isaia 55:8). I le avea ai ma tagata e iai le mutaaga i lenei lalolagi faaletino, o nisi o i tatou e fiafia e faamalie vave, fiafia e aunoa ma se taumafaiga, ma ia toafimalie i taimi uma.

Ae e finagalo le Tama Faalelagi ia sili atu mo i tatou. I Lona poto e lē i’u, e malamalama o Ia i mea e manaomia e Ana fanau taitoatasi ia maua ai le olioli e faavavau, fiafia tumau, ma le faamafanafanaga paia.

O le mea lea, e lē o taimi uma tatou te mauaina ai faamanuiaga tatou te ole atu ai ona e lē mo lo tatou manuia e faavavau. Na aoao mai Elder D. Todd Christofferson o le Korama a Aposetolo e Toasefululua: “E malamalama sese nisi i folafolaga a le Atua faapea o le usiusitai ia te Ia e fua mai ai ni taunuuga patino i se taimi patino. Latou te ono mafaufau, ‘Afai ou te auauna atu ma le filiga i se misiona tala’i, o le a faamanuiaina a‘u e le Atua i se faaipoipoga fiafia ma ni fanau,’ ‘po o le ‘Afai ou te lē faia a’u meaaoga i le Sapati, o le a faamanuiaina au e le Atua i ni togi lelei,’ … Afai e le tupu tonu i le ala lea pe tusa ai ma se taimi na faamoemoeina, latou te ono lagonaina le faalataina e le Atua. Ae e le tutupu fua ni mea i auala faalelagi. E lē tatau ona tatou mafaufau i le fuafuaga a le Atua o se masini faifaatau faalevāteatea tatou te (1) filifili ai se faamanuiaga moomia, (2) tuu i totonu se aofaiga o galuega lelei, ma (3) vave ai loa ona tiliva mai le oka.”¹

Na fetalai mai le Alii e faapea “o le tulaga e oo i ai la outou tausiga o a’u poloaiga o le a outou manuia i le laueleele” (2 Nifae 4:4). O le manuia silisili ua faamoemoe i ai le Tama Faalelagi mo lana fanau o le “tino ola pea ma le ola e faavavau” (Mose 1:39). Ma ona o Lona alofa loloto mo i tatou, ua Ia valaaulia ai i tatou e faaaoga lo tatou faitalia e faia ai filifiliga o le a taitai atu ai i lena tulaga. Ae e leai se mea i tusitusiga paia o loo tau mai ai o le a Ia tuuina mai ia i tatou le mea tonu tatou te mananao ai. E sili atu Lona silafia nai lo tatou i le mea e sili ona lelei mo i tatou. O lea la, pe tatou te mauaina faamanuiaga o loo tatou faamoemoe i ai pe leai, ua talosagaina i tatou e talitonu e mo lo tatou lelei (tagai i le Mataupu Faavae ma Feagaiga 122:7).

O le faaaliga patino e auauna atu i se misiona o se tasi lea o tali sili ona manino i tatalo ua ou mauaina. O le mea moni, sa ou lē fiafia i le faamoemoe e tuua lo’u aiga mo le 18 masina, ae sa lē mafai ona ou faafitia le tali na ou mauaina. O lea, sa ou mulimulitaia ai ma le usiusitai le valaauga.

Sa i ai ni vaega matagofie o la’u misiona, ae sa ou oo foi i le tele o luitau na tofotofoina ai lo’u faatuatua ma mafua ai ona ou mafaufau pe aisea na uunaia ai a’u e auauna atu i se misiona! Peitai, i lo’u toe tepa i tua i le taimi nei, e mafai ona ou fai atu ma le faamaoni o aafiaga faigata i la’u misiona na faamalosia ai a’u i le tele o auala, ma sa latou saunia a’u ia maua faamanuiaga mulimuli ane.

O nisi taimi o lo tatou usiusitai e taitai atu ai i tatou i se afi a le tufuga (tagai i le Malaki 3:2), ma e lē o se aafiaga toafimalie lena. Ae afai tatou te faatagaina lena afi e suia i tatou, mai le lefulefu o le taunuuga e oo mai ai le tuputupu ae fou ma le matagofie (tagai i le Isaia 61:3).

O le liua moni ia Keriso e aofia ai le i ai o le faatuatuaga atoatoa e finagalo uma o Ia ma le Tama Faalelagi ia tatou maua na o mea e sili ona lelei mo i tatou i le fuafuaga e faavavau. A tatou talitonu ma le loto atoa i lena mea, e mafai ona tatou faaiuina ma le faamaoni a tatou tatalo uma i le “Ia faia Lou finagalo, le Alii e, ae lē o lo matou loto” (Mataupu Faavae ma Feagaiga 109:44). Faatasi ai ma lenei tautinoga e fai e pei ona faatonuina ai e Peresitene Russell M. Nelson ma “ia faamuamua le Atua i o tatou olaga,”² tatou te malamalama ai o le a tatou lē maua mea uma tatou te mananao i ai pe mafaufau tatou te manaomia. O le a tatou lotomalie ma fiafia i faamanuiaga ua oo mai ia i tatou e ala i le usiusitai i poloaiga a le Atua e aunoa ma le faatusatusaina o i tatou lava i le ala tatou te vaai atu ai i isi tagata o soifua ma le ala o loo faamanuiaina ai i latou e le Atua.

Ata

Aperaamo ma le lagi i le po i ona tua

Aperaamo, saunia e Robert T. Barrett

O se faataitaiga matagofie o lenei liua moni o le perofeta o Aperaamo. Na ta’u atu e le Alii ia te ia e “vaai nei i le lagi, ma ta’u atu i fetu, afai e te mafaia ona faitaulia i latou: ona fetalai atu lea o ia ia te ia, E faapena lava au fanau” (Kenes 15:5). O lea atonu sa faateia ai Aperaamo ina ua, i lona matua, sa poloaiina ai o ia e le Alii e fasioti ia Isaako, o le atalii o le Atua na faailoa mai o le a Ia faaaogaina e faavae ai Lana feagaiga (tagai i le Kenese 17:19). Atonu na taumanatunatu Aperaamo pe aisea e finagalo ai le Atua ia te ia e lafoai le atalii o le a mulimuli ia te ia i le laina o le feagaiga. Ae sa lei fesiligia lava e Aperaamo le Alii, i le iloaina e silafia e le Alii le iuga mai le amataga ma le talitonuga o le a faataunuuina Lana folafolaga.

I le taimi tonu lava lea o le a fasiotia ai e Aperaamo lona atalii, sa taofia o ia e se agelu ma faamalo atu i lona naunau e usiusitai (Tagai i le Kenese 22:11–12). Mulimuli ane na folafola atu e le agelu upusii a le Alii i le faapea mai: “Ou te matuā faatoateleina lava lau fanau e pei o fetu o le lagi, e pei o le oneone foi i le matafaga” (Kenese 22:17). Sa i ai le faatuatua o Aperaamo o le a faamanuiaina o ia e le Alii, e tusa lava pe lē o le ala lea sa ia mafaufau muamua i ai.

O se faamanatu mamana mai lenei tala o le, e mafai ona tatou filifili pe faapefea ona tatou iloa galuega a le Alii; e mafai ona tatou filifili ia maua le faatuatua. Semanū e tilotilo Aperaamo i le poloaiga a le Alii e fasioti lona atalii e matuā le talafeagai lava ma leai se alofa. Ae sa filifili Aperaamo e ese lana vaai i ai—sa ia filifili e taulai atu i le mana o le Alii, faatuatuaina, ma le agalelei.

O le atiina ae o se vaaiga e pei o Aperaamo e lē faigofie—e alu ai le taimi ma le faataitaiga. E i ai taimi sa ou tetee ai i le atiina ae o le lotomaualalo e manaomia mo le gauai atu o lo’u loto ma le faalagolago i le Alii. Ua ou faatinoina ni lagona ita faalii faaleagaga, lē fiafia ona ou te lē o mauaina le mea ou te manao ai ma faaauau pea ona ou aafia i faigata. I nei tulaga, ou te lei vaai ai e faapea “ina ia [tatou] o ese mai le mea ua [tatou] i ai i le mea o loo finagalo [le Alii] ina ia [tatou] i ai, e manaomia ai le tele o le aapa atu, ma o lena mea e masani lava ona aofia ai le lē mautonu ma le tiga.”³

E lē faapea la e finagalo le Alii ia tatou faanoanoa—ae na o le faafeagai lava. O le faamoemoe o le Alii ia tatou “maua le olioli” (tagai i le 2 Nifae 2:25). Ae o le upu “ono maua” e ta’u mai ai o lo tatou olioli e faalagolago i lo tatou faitalia. Afai tatou te mananao i le olioli moni e faavavau, tatou te filifili e vaai i faamanuiaga i soo se ituaiga ma taimi e oo mai ai. Tatou te filifili e tumau i le usiusitai, e tusa lava pe lē maua ai ni taunuuga vave, auā tatou te alolofa ma faalagolago i le Tama Faalelagi. Ma e tatou te galulue ia malamalama o faamanuiaga silisili o loo i ai i lesona tatou te filifili e aoao mai o tatou tofotofoga, auā o faamanuiaga na e faalatalata atili atu ai i tatou ia Keriso.

Ma e lē o le faalatalata atili atu ea i le Faaola ma avea e faapei o Ia o le faamoemoe atoa lea o lenei olaga?

Sa ou faaaluina le tele o taimi e taulai atu ai i vaega lē lelei o tofotofoga ma le lē fiafia i le lē mauaina o le mea ou te manatu ou te manao ai. O loo i ai pea taimi ou te fesiligia ai pe aisea e masani ona foliga faigata ai lo’u olaga nai lo le toatele o isi tagata. Ma o nisi taimi ou te mafaufau ai pe aisea, e ui lava i lo’u usiusitai maelegā, ae e foliga mai o loo misi faamanuiaga e manaomia. Ae o loo o’u aoao e vaai atu o loo faamanuiaina pea a’u e le Alii pe a ou usiusitai i Ana poloaiga (tagai i le Mataupu Faavae ma Feagaiga 82:10; 130:20–21), e tusa lava pe lē oo mai na faamanuiaga i taimi uma i le taimi po o le ala ou te faamoemoe i ai.

Soo se taimi lava e le tuuina mai ai se faamanuiaga i le ala po o le taimi tatou te faamoemoe i ai, tatou te maua le avanoa e iloilo ai ma le faaeteete auala ua tatou vaai ai i le Tama Faalelagi ma lo tatou Faaola o faaali mai i o tatou olaga, aua e La te faia lava. A tatou malamalama moni i lenei upumoni, o le a tatou maua le vaaiga ma le lototele e folafola atu ai ma le lotomaualalo, “Ia faia lou finagalo.”