E Manaomia e Tagata uma le Talalelei

Saunia e Joy Teresa M. Moises

Sa ou fuafua e auauna atu i se misiona, ae ina ua uma le kolisi sa ou manatu ou te le manaomia ona auauna atu—seia oo ina ou maua se galuega e galulue faatasi ai ma teineiti na sauaina. Ona ou vaaia ai lea e manaomia e tagata uma le talalelei.

Ata

o le fafine o loo uuina se tupe

The Lost Coin (O Le Tupe Na Leiloa), saunia e Harold Copping © Providence Collection / licensed from GoodSalt.com (laiseneina mai le GoodSalt.com)

A o ou i ai i le Peraimeri, ou te le manatua pe faafia ona fesili mai ou faiaoga po o ai o i matou o le a auauna atu i se misiona talai. I lo’u mafaufau talavou sa masani ona ou fai atu o le a ou faia.

Sa faaali mai e lou tina ia te au le taua o le faapotopotoina o Isaraelu e ala i le fesoasoani i faifeautalai faamisiona e aoao atu ma faasoa atu le talalelei. I se tasi taimi sa ou auai atu ai ma ia e sue le fale o se uso i le uarota ua umi e le o toe auai mai i le lotu. Na toeitiiti lava a ma leiloloa ona ma te lei iloa tonu le mea sa nofo ai o ia. Nai lo le lē fiafia, sa saili ma le filiga lo’u tina mo le fale o lena uso. E pei o le fafine i le faataoto i le tupe na leiloa (tagai i le Luka 15:8–10), sa ia maua le uso ma olioli ai.

O le auala na tuuina atu ai e lo’u tina le mea sili mo le galuega a le Alii, e le gata i le faasoaina atu o le talalelei ae faapea foi i isi valaauga o le Ekalesia, na fesoasoani ou te iloa ai e tatau i tagata uma ona auauna atu i le Alii, e oo lava i ni auala itiiti.

A o mavae atu tausaga, sa ou faauu mai le seminare, maua la’u pine a Tamaitai Talavou, faauu mai le kolisi, ma amata ona faigaluega. I sina mea itiiti i lea taimi ma lea taimi, o le lagona o le avea ma se faifeautalai faamisiona na faaitiitia ona avea ma se faamuamua. E ui lava sa ou toaga pea ma faalauteleina ou valaauga i le Ekalesia, sa ou faapea ifo ia te au lava, “E le afaina le le auauna atu i se misiona talai aua e le o sa’u matafaioi. O au o se tuafafine, ma e mafai ona ou auauna atu i le Alii i le tele o isi auala.”

O le Mea na Suia Lo’u Mafaufau

Ina ua 22 o’u tausaga, sa ou maua se avanoa e faigaluega ai i se nofoaga autu lea sa ou auauna atu ai i teineiti o e sa aafia i sauaga faatautala ma le teenaina. Sa ou popole alofa lava mo i latou. Sa ou vaaia le ala na gausia ai e le sauaina o latou loto ma faatamaia ai lo latou alolofa mo i latou lava. O nisi o i latou sa taumafai e pule i le ola. O nisi o i latou sa lei mananao e faatuatuaina se tasi. O le toatele o i latou sa leai se faamoemoe i le olaga ma sa lei lagonaina le alofa o le Faaola.

Sa masani ona ou fesili ifo ia te au lava, “Mata sa mafai ona taofia nei sauaga faatautala? Ae faapefea pe afai na talia e tagata na faatinoina nei sauaga le talalelei? Ae faapefea pe ana faapea na avea o latou matua ma tagata o le Ekalesia a o lei fananau mai nei teineiti?” Sa ou iloaina atonu e le oo nei teineiti i nei tofotofoga pe ana faapea na maua ma ola ai o latou matua ma tagata na faia nei sauaga i le talalelei.

O le tomanatu ai i nei fesili ma le galulue ai i le nofoaga autu na fesoasoani ou te iloa ai e manaomia e tagata uma le talalelei. E pei lava ona tau le autau a Helamana i le Tusi a Mamona e puipuia lo latou faatuatua ma aiga, e manaomia e le Alii faifeautalai faamisiona e faasoa atu Lana talalelei ma puipuia Lona malo.

O aafiaga na ou maua ma teineiti i le nofoaga autu na musuia ai au e savali i le ala lea na finagalo le Alii ou te savalia. Sa ou filifili e tatau ona ou auai i le autau a faifeautalai a le Alii. Sa ia vaaia lenei manao, ma sa valaauina au e auauna atu i le Misiona a Filipaina Cauayan.

Auauna atu i se Misiona

I lau misiona, sa ou vaai ai i tagata ua suia a o latou aoaoina le talalelei. Sa ou aoaoina tagata o e sa leiloa le auala e faamagalo atu ai, o e sa ulaula ma inu ava malosi, o e sa faamaualuga, o e sa le iloa pe faapefea ona tatalo. Ona o le talalelei, sa latou tuua ai o latou ala tuai ina ia agavaa mo mea ua folafola mai e le Atua: o le ola e faavavau.

Ona o le Togiola a le Faaola, sa ou aoaoina ai e mafai e soo se tasi ona amata pe toe foi i le ala sa’o ma le vaapiapi pe afai latou te salamo. O le a fesoasoani le talalelei a Iesu Keriso ia i tatou e suia ma alualu i luma agai i le atoatoa ma ia agavaa mo faamanuiaga sili ua saunia e le Tama Faalelagi mo i tatou. O nei suiga atonu e mai le faanoanoa i le fiafia, mai le gaogaosa i le filemu, mai le ita i le faamagaloga, mai vaivaiga i le malosi, mai le inoino i le alofa.

Ou te matua faafetai i le avea ai o au o se tagata o Le Ekalesia a Iesu Keriso o le Au Paia o Aso e Gata Ai. E fesoasoani le talalelei a Iesu Keriso ia ou malamalama i lo’u taua o se afafine o ni matua faalelagi, e oo lava i tulaga leaga. E faamafanafanaina au e lo tatou Tama oi le Lagi i taimi uma e ala i le Agaga Paia. O tusitusiga paia o la’u tapasa pe a ou le mautonu ma manaomia ona faia ni faaiuga.

O loo matou taumafai ma lo’u aiga ia tumau faamaoni e oo i le iuga. Ou te faafetai i le faaipoipo atu i se alii o loo umia le perisitua ma o loo i ai se molimau malosi o le talalelei toefuataiina a Iesu Keriso. O la’u feagaiga ma le Alii e le mo na o a’u lava ae mo lo’u aiga ma mo Lona Malo.

E alala le tusitala i Filipaina.