Faatoilaloina o La’u Vaisu o Fualaau Faasaina e ala i le Malosi ia Iesu Keriso

Ata

o se tamaloa o loo tu i se ala felavasa’i

Sa ou fanau mai i Le Ekalesia a Iesu Keriso o le Au Paia o Aso e Gata Ai, papatisoina e lo’u tama i le valu o tausaga, ma toaga atoatoa i le Ekalesia i lo’u talavou atoa. Ina ua maea la’u misiona, o le isi a’u sini i le olaga o le sailia lea o se afafine filifilia o le Atua e mafai ona ou faaipoipo i ai i le malumalu.

Ae sa amata ona ou sailia ni faafiafiaga le lelei ma gauai atu i faaosoosoga. Sa amata ona ou tafao faamasani i fafo atu o le Ekalesia. Na faasolosolo lava ina amata ona ou fetuunaia o’u tulaga faatonuina patino, ma sa amata ona ou le toaga i le Ekalesia. Na iu lava ina ou faaipoipo i se tasi i fafo atu o le Ekalesia, ma na faamutaina mulimuli ane le ma faaipoipoga i le tatalaina.

Sa faaauau pea ona ou gauai atu i faaosoosoga. I le taele o lo’u loto, sa i ai pea sa’u molimau ma se faananauga ina ia faaipoipo i se tasi i le malumalu, ae sa ou lagonaina le le agavaa mo na faamanuiaga. Sa ou lafoaia le faamoemoe o le a ou faaipoipo i le malumalu pe maua ni fanau, o lea sa ou tanumia ai ou lagona o le tausalaina ma taulimaina ou lagona o le le agavaa e ala i le sailia o le fiafia faalelalolagi.

I se tasi po i le tolusefulu o o’u tausaga, sa lofituina ai a’u i le tausalaina o a’u solitulafono uma o le amio mama. Sa ou faapau ifo i o’u tulivae ma tagi atu i le Alii ma le faanoanoa faaleatua mo agasala na ou faia. Sa ou folafola atu o le a ou ola i le tulafono o le legavia ma suia la’u amio.

Ae sa lē na ona pau lea o la’u tauiviga. Sa faaauau pea ona ou faaaluina le isi fitu tausaga na sosoo ai i le lopala ai i le loloto o le vaisu o fualaau faasaina.

Sa ou lagonaina le tuuatoatasi atoa ma sa maileia i lo’u faalagolago i vailaau faafomai. O le lagonaina o le ma’i tigaina i lo’u ulu, fatu, ma le tino, sa ou lagonaina ai le i ai i le vanu o le oti i le tele o taimi. Sa ou lafoaia le faamoemoe atoa o le a ou saoloto mai filifili o vaisu ma le atuatuvale lea na taotaomia au i lalo.

I se tasi aso sa ou i ai i se ala felavasa’i; Sa tatau ona ou filifili pe o le a ou pau atili atu pe leai i lenei olaga o vaisu ma taumafai e sao mai le ola i luga o auala. Ae sa ou iloaina o lena faaiuga o le a taitai moni atu ai i lo’u oti. Sa ou iloaina afai ou te le faia lena filifiliga, ona manaomia lea ona liliu lo’u olaga ma toe foi atu ia Iesu Keriso.

Sa oo ina ou saofai i la’u loli, ua matua lofituina lava i se atuatuvale i le olaga. Faatasi ai ma la’u telefoni i lo’u lima, sa ou sioa atu i faamatalaga faafesootai a lo’u tama. Sa ou ma’i tigaina i le agaga ma mamafa i le loto ma sa ou le maua ai le malosi e oo lava i le faaleo atu o ni upu. Sa ou lagonaina afai ou te valaau atu ma talosagaina se fesoasoani o le a ou filifilia le ola ma afai ou te le valaau atu o le a ou filifilia moni lava le oti ma le malaia.

Na silia ma se itula faato’ā ou maua ai le lototele e valaau atu ai i lou tama ma fesili atu pe mafai ona ou alu atu. Ina ua ou taunuu iina, sa faia se matou talanoaga umi ma o’u matua ma ina ua uma, na ofo mai lo’u tama e tuuina mai ia te a’u se faamanuiaga faaleperisitua.

Sa ou taliaina le ofo ma nofo i lalo, ma lagonaina le lotomaualalo moni ma le salamo faamaoni. Sa ou faaaogaina lo’u faatuatua i le mana o le Atua ma Lana perisitua. Sa ou sailia moni lava le fesoasoani a lou Tama Faalelagi. I le taimi o le faamanuiaga, sa liliu atu o’u mafaufauga ia te Ia, ma aioi atu o le a Ia faamanuiaina a’u i le malosi ma le mana a o ou taumafai e faatoilalo lenei vaisu. “Faamolemole, ou te le toe fia ola faapenei,” sa ou tatalo le leoa ai. “Faamolemole fesoasoani mai ia te au e a’e i fafo mai lenei pu o loo ou i ai. Faamolemole fesoasoani mai ia te au aua e le mafai ona ou faia na o au.”

Sa gatete lima o lou tama a o ia saunoa atu ma le mana ma le talitonuga maumaututu a o faatautaia le faamanuiaga faaleperisitua. Sa ia fai mai sa galue malosi Satani ia te au e taofia au mai lo’u gafatia tele. Sa ou lagonaina o a’u faaiuga sa taofia ai foi a’u mai faamanuiaga ma le faagaeetiaina o isi o e e mafai ona faamanuiaina mai ia te a’u i le faia o se faataitaiga amiotonu ma se faatosinaga. Sa faamanatu soo mai foi e le faamanuiaga ia te au ua ou maua le avanoa e faatoilalo ai ou vaisu.

Sa ou iloa e leai se agasala na ou faia e le mafai ona ou toe foi mai ai. E pei ona aoao mai e Peresitene Boyd K. Packer Peresitene (1924–2015):

“Ou te le iloa ni agasala e fesootai ma le tulaga faatonuina o le amio mama lea e le mafai ona faamagaloina ai i tatou. …. O loo ta’ua le fuafaatatau i upu e fasefulu:

“’Faauta, o ia o lē ua salamo i ana agasala, o ia lava lea ua faamagaloina, ma o Aʼu, o le Alii, e lē toe manatuaina lava i latou.

O le mea lenei e mafai ai ona outou iloa pe afai ua salamo se tagata i ana agasala—faauta, e ta’uta’u atu e ia i latou ma lafoai i ai’ Mataupu Faavae ma Feagaiga 58:42–43].”¹

I le faamanuiaga na tuuina mai e lo’u tama ia te a’u, sa faamanuiaina foi a’u i le mana ma le malosi e faatoilalo ai o’u puapuaga. Ou te iloa sa musuia moni lava lo’u tama ma sa talanoa i le pule a le Atua.

Ina ua uma le faamanuiaga, sa ou tu ma opo mai lo’u tama. Sa ma opoina le tasi ma le isi, ma feopoai mo se taimi umi lava. Sa faatasi mai lo’u tina ma fusiina i ma’ua uma a o ou tagi masusu i le tauau o lo’u tama, ma le lagonaina o le tele naua o le alofa ma le lotofaafetai i lo’u loto.

Sa mou ese atu o’u lagona uma o le leai o se faamoemoe. Sa amata ona ou lagonaina le faananau faaletino o le vaisu ma le mamafatu o le atuatuvale ma le le atoatoa lea na ou malaia ai mo se taimi umi ua fufuluina ese atu. Sa vave ona ou lagonaina se fiafiaga ma se naunautaiga fou mo le olaga ma mo avanoa uma mo le olioli e mafai ona ou maua pe afai ou te filifili le mea sa’o ma gauai atu i le finagalo o lo’u Tama Faalelagi. Sa ou manao e ola ma le uiga na faaalia e Iesu Keriso i mea uma: “Aua le faia lo’u loto, a o lou finagalo” (Luka 22:42).

Sa ou agai i luma i lo’u ala agai atu i le Tama Faalelagi ma Iesu Keriso ma se naunautaiga ma le malosi faafouina.

I se taimi mulimuli ane, sa faaauau ai e le fili ana faaosoosoga; sa taumafai pea se tasi e latalata mai ia te a’u e tauanau a’u ou te sau ma inu pia faatasi ma ia. Sa ia faatauanauina au i le pepelo faapea o le inu pia e le o se mea tele pe afai e le o sau vaisu. Sa ou lagonaina le tauiviga i totonu—i le tasi itu sa ou manao ia maua lena sootaga ma le tulaga tutusa ma lena tagata, ae i le isi itu sa ou manao e faaali atu i le Tama Faalelagi lo’u alofa ma le lotofaafetai e ala i le tausia o le Upu o le Poto. A o ou tauivi ai ma nei manatu, sa tatagi lau telefoni ma mumu mai i le isi itu o le potu. Sa ou alu e vaai po o le a—o se faasilasilaga i le Facebook ma se upusii mai le saunoaga a Peresitene Thomas S. Monson “Mataupu Faavae ma Folafolaga”:

“O le Upu o le Poto … a aumai ai se faatonuga maoti e faatatau i meaai tatou te aai ai, ma faasaina ai le faaaogaina o mea e faaleagaina ai o tatou tino.

“O i latou e usiusitai i poloaiga a le Alii ma tausia ma le faamaoni le Upu o le Poto ua folafola atu i ai ni faamanuiaga patino, lea e aofia ai ma le soifua maloloina lelei ma se malosi faaletino e faaopoopoina [tagai i le Mataupu Faavae ma Feagaiga 89:18–21].”²

O la’u molimau e faapea, na silafia e le Tama Faalelagi ua talafeagai le auina mai ia te au o lena savali patino i le taimi tonu sa ou tauivi ai. E ui atonu e le oo mai i taimi uma tali e tuusao mai ma e tatau ona tatou saili e le aunoa e mulimuli i poloaiga, ae sa ou faafetai mo lena faamanuiaga. Sa ou iloa le mea e tatau ona i ai la’u faaiuga ma le ala e tatau ona ou mulimuli ai pea i lo’u olaga. Sa manaomia ona ou ta’uta’u atu ma lafoai a’u agasala ma faaauau pea ona liliuese mai mea uma e le faaleatua. Sa manaomia ona ou faapaiaina e ala i le mana o Iesu Keriso ma Lana Togiola. Sa ou malamalama “o le olaga lenei o le taimi lea mo [a’u] e saunia ai e fetaiai ma le Atua” (Alema 34:32) ma ia “faamaonia [a’u lava] iinei, e vaai pe o le a [ou] faia mea uma o soo se mea e poloaiina ai [a’u] e le Alii [lo’u] Atua” (Aperaamo 3:25). Sa ou malamalama o le taimi lenei e faatoilalo ai au vaisu faaletino, ae o loo i ai pea so’u tino faaletino. Ma sa ou malamalama e tatau ona ou faaali atu i le Tama Faalelagi se liuga tele o le loto (tagai Mosaea 5:2; tagai foi Alema 5:12–14) ma “ua le toe i ai so’u manao e fai mea leaga, ae ia faia mea lelei e le aunoa” (Mosaea 5:2).

E ala i le salamo (e aofia ai le galulue faatasi ma ou taitai perisitua), sosoo ai ma faaiuga amiotonu uma na ou faia talu mai lena taimi, ua ou tatalaina au lava i faitotoa o le lagi ma faatagaina le Tama Faalelagi e liligi mai Ana faamanuiaga i o’u luga.

I ni nai masina talu ona suia lo’u loto, sa oo mai ai lo’u toalua i le lumanai, o Malaina, i lo’u olaga ma amata ai le ma faamasaniga. Sa ou faafetai i le taimi nei ua ou saunia mo lo ma faatasi ai i le lumanai. O tafaoga faamasani ma Malaina sa pei moni lava o se miti faafatusa talafatu ua taunuu! Sa faatiga uma i ma’ua i sootaga ua mavae, ma sa ma maua le alofa ma le malamalama i le tasi ma le isi. Sa ma mananao uma ma o ma loto atoa ina ia agavaa mo se faaipoipoga i le malumalu. I le ono masina talu ona amata ona ma tafafao faamasani, sa faamauina i maua i le Malumalu o Seattle Uosigitone.

Na faamanuiaina au e le Tama Faalelagi i se ava alofa o le e malamalama i le mana o le Togiola a Iesu Keriso ma le uiga o le faamamaina e ala i le salamo. E alofa Malaina ia te au mo le tagata ua ou i ai nei ae le mo mea sese o lo’u olaga ua tuanai. O lana molimau patino ma le alofa o le Faaola e faaauau pea ona aumaia ia te au le malosi ma se manao e faataunuu le fuataga atoa o lo’u foafoaga. O ia moni lava o le soa sa ou moemiti i ai i taimi uma, ma ua faamanuiaina faatasi i maua i se fanau e toalua.

Ou te iloa le ofoofogia o le tele o le liliu atu o lo’u olaga mo le lelei i ni nai tausaga pupuu. Ou te lagona le tu a’e mai le pu sa ou i ai i le mea ua ou i ai nei o se vavega moni lava. O lau molimau patino e faapea, e ala i le salamo faamaoni ma le faatuatua ia Iesu Keriso, e mafai ai mea uma! O a’u o se faamaoniga ola o lena mea.