Ua Na’o Tusiga Faatekinolosi: Autalavou Matutua
O le Aoaoina o le Manatu Faatauvaa o le Tagata Lava Ia e le o le Meafaigaluega lea a le Faaola
Sa umi se taimi na ou aoao ai e lei finagalo le Atua ou te inoino ia te a’u lava ia ona o a’u mea sese.
Sa ou faaaluina le tele o taimi e faitioina ai a’u lava ia. O le taunuuga, o le faatiga ia te a’u lava ia e le faaleleia moni ai a’u.
Sa ou faaipoipo laitiiti, ma e ui o la’u faaipoipoga sa avea pea ma se sootaga manuia ma fiafia, ae sa ou feagai ai ma o’u uiga vaivai. I le pito i luga o lena mea, sa tonu ai ia i ma’ua ma lo’u toalua e fai se ma fanau i le taimi lava lena, ma o lo’u maitaga muamua lava o le aafiaga aupito sili lea ona matautia sa ou oo i ai. Sa ou feagai ma luitau faaletino ou te le’i mafaufauina lava. Sa fesuisuiai o’u lagona, ma o le atuatuvale na avea ma se tauiviga moni ma fou tele.
Sa ou taumafai e avea ma se ava lelei, tina lelei, ma se tamaitiiti aoga lelei, ae ou te le’i lelei tele i ou lava tulaga faatonuina. I se taimi, o le otegiaina o a’u lava na avea ma a’u uluai tali.
Sa ou malamalama o poloaiga sili e lua ua fai mai ia “alofa atu i le Alii lou Atua” ma ia “alofa atu i le lua te tuaoi epei o oe lava ia te oe” (Mataio 22:37, 39; faaopoopo le faamamafa), lea e ta’u mai ai e tatau ona tatou alolofa ia i tatou lava. Ae sa ou lagonaina le le agavaa mo le alofa.
Sa ou mafaufau, “Afai ou te agasala ma alofa pea ia te a’u lava ia, pe le o le tuuina mai ea lena ia te a’u o le faatagaga e faia ai pea se mea sese? O le mea moni lava, e tatau ona tatou ofoina atu se loto momomo ma se agaga salamo, e le tatau ea la ona tatou faanoanoa seia tatou lelei?”
I lea taimi semanu ou te taliina ai le “ioe,” ae o le mea moni o se “leai.”
Na aoao mai Elder S. Gifford Nielsen o le Fitugafulu: “E finagalo lo tatou Tama Faalelagi ia tatou alolofa ia i tatou lava … ia vaai ia i tatou lava e pei ona Ia silasila mai ia i tatou: o i tatou o Ana fanau faapelepele. A oo ina magoto ifo lenei upumoni i o tatou loto, ona tuputupu a’e ai lea o lo tatou alolofa mo le Atua.”1 Ma a tuputupu ae lo’u alofa mo le Atua, o le a ou lelei atili. Pe a ou alofa i le Atua, ou te iloa le meaalofa a lo’u Faaola ua mafai ai ona faamagaloina a’u agasala ma faatoilalo ai o’u vaivaiga. Pe a ou alofa i le Atua, e faigofie atu ona alofa ia te au lava ia.
O le faitioina o isi e le fesoasoani ia i latou e alualu ai i luma; ae na ona faalotovaivaia ai i latou. Faatasi ai ma faasa’oga, latou te manaomia foi le faamalosiauga. Ae aisea la sa ou ese ai? E mafai faapefea ona ou ofoina ia te au lava lea agaalofa e tasi?
Mauaina o le Lagolago
Ina ua ou ta’u atu i lo’u toalua e uiga i lenei tauiviga, sa ou lagonaina le faavauvau. Sa sili atu ona ou toafimalie i le faaauauina pea o lo’u mausa o le tautala le lelei faaletagata lava ia, o lea sa tatau ai ona ou lototele ma talia le tautino leotele atu o’u vaivaiga. Ae o le faamatalaina o lo’u faafitauli i se isi tagata na fesoasoani ia te au e maua ai le manino atili ma vaifofo.
Ua ou aoaoina au lava i punaoa faagaeetia ia malamalama ai i mamanu o o’u mafaufauga ma le auala e faaleleia ai. Ua ou aoaoina foi o le faamalositino masani e faia ai se eseesega tele. I le taimi ua tuanai, sa ou faamalositino ona sa ou ita i lo’u tino ma manao e sui. O lea la ua ou faamalositino ona ou te fiafia e lagona le lelei ma maua le malosi sili atu.
Sa sili atu ona aoga a’u suiga aua sa ou faailoa atu sa lagolagoina a’u e le Faaola nai lo le tausalaina o a’u. O le taimi muamua, o a’u suesuega o tusitusiga paia, tatalo, ma le auai i le malumalu sa tumu i le maasiasi ma sa faatapulaaina ai lo’u tuputupu a’e faaleagaga. O lenei ua sili atu ona mafana ma faamaoni a’u tatalo ona ou te le o nanaina a’u lava mai le Alii.
Filifili Po o Le Fea le Leo e Mulimuli Ai
Sa tatau foi ona ou filifili po o le a le mea e taua ma po o ai e faalogo i ai. O lo tatou lalolagi, o o tatou tuaoi, ma o tatou tulaga o ala o faasalalauga faaagafesootai ua tele naua faamoemoega i le auala e faatino ai, vaai, matua, talanoa, ma isi mea faapena. E faigata lava ona ausia le faamaoniga lautele.
Ae ua e iloa po o ai se isi na feagai ma le le taliaina? Iesu Keriso. Sa agalelei, agaalofa, ma atoatoa o Ia, ae Na te lei manumalo i ni tauvaga tautaua. O le mea moni, o le filifili e faaali atu Lona alofa mo ni tagata faapitoa na masani ona tauia ai o Ia i le le faaaloalogia e isi. Sa tatau ona ou taliaina e le mafai ona ou faafiafiaina tagata uma ma e tatau ona ou taumafai e faafiafia le Atua.
O Le i Ai o Se Faamoemoega i O’u Mafaufauga
O le sini o le alofa o le tagata lava ia e le o le ta’uamiotonuina o le le faia, fetuunaia o le agasala, po o le faase’e atu i le nofoa’i. Ou te iloa o lagona le lelei patino e mafai ona fesoasoani ia te au, e pei o le tiga faaleatua—ae e le tatau ona ou lofituina i ai, aua e le o le alualu i luma lena.
Na saunoa Elder Neil L. Andersen o le Korama a Aposetolo e Toasefululua:
“O le tausalaina e i ai sana matafaioi taua ona na te fagua i tatou i ni suiga e manaomia ona tatou faia, ae o loo i ai ni tapulaa i le mamao o le a fesoasoani ai tausalaga ia i tatou.
“O le tausalaina e pei lava o se maa taavale i totonu o se taavale penisini. E mafai ona faaolaina le taavale, faaola le afi, ma faamumu moli, ae o le a ia le tuuina atua le penisini mo le malaga umi o i luma atu. O le maa, na o ia lava, e le lava lea. Ma e faapena foi le tausalaina.”2 E tatau ona i ai ou faamoemoega ia aua nei o’u oo atu i ni mamanu le lelei o le mafaufau ma e tatau ona ou taulai atu i le alofa ia Keriso ma a’u lava ia.
O se faagasologa o le faataatiaina o lenei avega i aao o lo’u Faaola, ae oloo aoga. O suiga laiti ua ou faia, o le tele lava o i totonu o lou lava ulu, o loo faia se eseesega tele ona o le alofa tunoa o le Faaola.
Ou te faafetai ona o le fatu o le talalelei o loo siomia ai le alofa. O le alofa o le Atua, alofa i isi, ma le alofa mo au lava ia.