O Lo Tatou Valaauga e Faasoa Atu le Talalelei a le Faaola

Ata

vaega o faifeautalai i Egelani

Taumatau: ata pue mai faaaloaloga a le tusitala

O Lo Tatou Valaauga o ni Auauna a le Atua

I le avea ai ma tagata o Le Ekalesia a Iesu Keriso o le Au Paia o Aso e Gata Ai, o i tatou o auauna a le Atua. I le avea ai ma Ana auauna, o la tatou misiona o le faasoa atu lea i isi—e pei o i latou sa ou aoaoina i Egelani—o le faamoemoe ua ofoina mai e le Faaola e ala i Lona soifuaga, aoaoga, Togiola, ma le talalelei toefuataiina (tagai i le 3 Nifae 27:13–14). E le o se galuega faigofie lena i se lalolagi ua faatumulia i le masalosalo, faanoanoa, ma le pogisa, ae ua ofoina mai e le talalelei toefuataiina le malamalama tonu lava lea e manaomia e fanau a le Atua i taimi faigata.

Na folafola mai e Russell M. Nelson e faapea ua sili atu ona manaomia e le lalolagi le talalelei a Iesu Keriso i le taimi nei nai lo se isi lava taimi: “O Lana talalelei, e na’o le pau lea o le tali i taimi ua toatele tagata i le lalolagi ua faate’ia i le fefefe. Ua faamamafaina e lenei mea le manaoga faananati mo i tatou ia mulimuli i le faatonuga a le Alii i Ona soo ia “o atu ia … i le lalolagi uma, ma talai atu le talalelei i tagata uma,’ [Mareko 16:15, faaopoopo le faamamafa; tagai foi i le Mataio 28:19]. Ua ia i tatou le tiutetauave paia e faasoa atu le mana ma le filemu o Iesu Keriso i tagata uma o le a faalogo ma ē o le a faamuamua le Atua i o latou olaga.” Na faaopoopo mai Peresitene Nelson, “E tofu i tatou ma se matafaioi e fai i le faapotopotoina o Isaraelu.”¹

Ata

tamaitai faifeautalai ma se ulugalii o loo tilotilo i se telefoni

O se tasi o auala tatou te faataunuuina ai lena matafaioi o le taliaina lea o valaauga e auauna atu o ni faifeautalai faamisiona. Ua tatou iloa, e pei ona faamamafaina talu ai nei e Peresitene Nelson, o le tiutetauave o le galuega faafaifeautalai faamisiona e pau muamua lava i alii talavou o e ua faapolopoloina mo le faapotopotoina i aso e gata ai. Mo i latou, o le galuega faafaifeautalai o se “tiutetauave faaleperisitua.” E ui e tuu i le faitalia le galuega faafaifeautalai mo tamaitai talavou, ae ua talosagaina i latou e Peresitene Nelson e fesili atu i le Alii pe finagalo o Ia latou te auauna atu foi. “O le mea ua outou saofagā ai i lenei galuega e maoae!” ua ia ta’u atu ia i latou. Ma, ioe, e manaomia e le Alii ulugalii matutua e auauna atu e pei ona faatagaina ai e o latou tulaga. “O a latou taumafaiga,” i upu a Peresitene Nelson, “e le masuitulagaina.”²

O le isi auala tatou te faataunuu ai la tatou matafaioi i le faapotopotoina o Isaraelu o le manatua lea o la tatou feagaiga e ”tutu o ni molimau a le Atua i taimi uma ma i mea uma, ma i nofoaga uma” (Mosaea 18:9). Tatou te le manaomia se valaauga faafaifeautalai faamisiona e tutu atu o se molimau. A o tatou ola i le talalelei, alolofa ma auauna atu i isi, tutu malolosi i le feagai ai ma faaosoosoga ma sauaga, ma molimau atu i upu ma galuega, o le a tatou aumaia isi ia Iesu Keriso.

O le faasoaina atu o le talalelei e mafai ona taufaafefe, e oo lava ia i latou ua uma ona auauna atu i misiona. Ae a i ai sa tatou molimau malosi e uiga i le Faaola ma le Toefuataiga, e le mafai ona tatou taofiofia ae molimau atu i mea ua tatou iloa.

Ata

tamaitai o loo soisoi

O le Taua o le Molimau

E faapefea ona tatou faamalosia a tatou molimau ina ia mafai ai ona avea i tatou ma ni faifeautalai mataalia? E manaomia lava ona tatou mulimuli i le fautuaga a lo tatou perofeta soifua. E tuputupu ae a tatou molimau a o tatou:

• Faatelevave lo tatou malosi faaleagaga.³

• Faaavanoa se taimi mo le Alii.⁴

• Faamalosia lo tatou faavae faaleagaga.⁵

• Faamuamua le Atua i o tatou olaga.⁶

• Faalogo ia te Ia.⁷

A o tatou suesue i upu a Peresitene Nelson ma usitai i ana fautuaga, o le a tatou faamalosia a tatou molimau i le Faaola ma Lana talalelei, le matafaioi a le Perofeta o Iosefa Samita na faatinoina i le Toefuataiga, le moni o le Tusi a Mamona, ma le valaauina o perofeta ma aposetolo o aso nei. O se molimau ua faamalosia o le a saunia ai i tatou—ma faateleina ai lo tatou manao—ia usitai i le valaau faaperofeta a Peresitene Nelson e faapotopoto Isaraelu i itu uma e lua o le veli.

Ina ia faasoa atu ma le mataalia le talalelei, e le manaomia ona avea i tatou ma se failauga talenia. E le manaomia ona tatou iloa iota ma mataitusi taitasi o aoaoga faavae autu o le talalelei. E le manaomia ona tatou taulotoina ni fia tasene o mau o tusitusiga paia. E le manaomia foi ona tatou matua aoaoina maualuga. O na mea e fesoasoani ia i tatou e faasoa atu la tatou savali, ae o le mana moni e liua ai e sau mai se loto maualalo, se molimau malosi, ma se molimau maumaututū mai le Agaga Paia.

“E leai se tagata,” na saunoa ai le Perofeta o Iosefa Samita, “e mafai ona talai atu le Talalelei e aunoa ma le Agaga Paia.”⁸

I le 1830, ina ua uma ona faalogo i faifeautalai o aoao atu le savali o le talalelei toefuataiina, sa manao ai Polika Iaga ia iloa mo ia lava le moni o mea sa latou aoaoina atu. I se faatulagaga lelei, sa ia suesueina ai le Tusi a Mamona faapea foi ma uiga o i latou o e na molimau i ai ma le Perofeta o Iosefa Samita.

O se mea e uiga i na uluai faifeautalai na ootia ai le loto ma le agaga o Polika. “O a latou molimau sa pei o se afi i o’u ivi,” o lana tala lea.⁹

O se tasi o na faifeautalai, o Eleazer Miller, sa na o le fa masina talu ona avea ma se tagata o le Ekalesia.¹⁰ I muagagana a faafaifeautalai o aso nei, o ia o se tagata “fou nei a,” ma sa le o ia o se failauga lelei i nofoaga faitele. Ae o na mea sa lei afaina.

Ata

Eleazer Miller

I tausaga mulimuli ane, na folafola atu ai e Polika Iaga: “A ou vaai i se tagata e le mataina lana tautala, po o ni taleni foi o le tautala i luma o tagata, ae na o lona faapea mai lava, ‘Ua ou iloa e ala i le mana o le Agaga Paia e moni le Tusi a Mamona [ma] o Iosefa Samita o se perofeta a le Alii[,]’ o le Agaga Paia e muamua mai i lena tagata e suluia ai lo’u malamalamaaga, ma sa i o’u luma le malamalama, mamalu ma le tino ola pea.”

Fai mai Peresitene Iaga sa siomia o ia ma faatumulia i lena malamalama ma le mamalu ma sa ia iloaina mo ia lava e moni le molimau a Eleazer.

“O le lalolagi ma lona poto uma ma le mana, faatasi ai ma le mamalu atoa, ma le faaaliga faanenefuina o ona tupu ma ona tofi,” na saunoa ai Peresitene Iaga, “e magoto ifo i se molimau e le faatauaina atoa faatusa i se molimau faigofie, faamalieina a se auauna a le Atua.”¹¹

Sa folafola atu e le Perofeta o Iosefa Samita, “I le maea ai o faamatalaga uma lava ua faia, o le tiute silisili ma matua taua o le talaiina o le Talalelei.”¹²

O le faamamaluina o a tatou feagaiga o ni tagata o le malo o le Atua e aofia ai le faasoaina atu o le talalelei a Iesu Keriso. O le faasoaina atu o le talalelei o se tasi lea o faailoaga aupito maualuga o le alofa atu i o tatou tuaoi e pei o i tatou lava (tagai i le Mataio 22:37–39). O le faasoaina atu o le talalelei o le poloaiga sili lea a le Faaola.

O i tatou o e na fesoasoani e aumaia agaga ia Keriso ua tofo i le olioli e faavavau ua folafola mai ia i latou o e galulue e laveai fanau a le Atua (tagai i le Mataupu Faavae ma Feagaiga 18:15–16). O loo ou toe mafaufau pea i la’u auaunaga faafaifeautalai o se faifeautalai talavou i Egelani—o soa sa matou auauna faatasi, o tagata sa matou feiloai i ai, o atalii ma afafine faapelepele o le Atua sa matou fesoasoani e aumai i totonu o Lana lafu. Sa le’i toe tutusa lava lo’u olaga mulimuli ane.

Mai lo’u aafiaga patino, ou te toe ta’ua ai le folafolaga a le Au Peresitene Sili ia i latou o e “aumaia lana upumoni i le lalolagi,”¹³ pe i le lotoifale po o fafo atu: “O le a tauia ma faamanuiaina tele outou e le Alii a o outou auauna atu ia te Ia ma le lotomaualalo ma le agaga tatalo. O loo tele le fiafia o loo faatalitali mai mo oe lea e te le’i iloaina muamua a o faapea ona e auauna atu i Ana fanau.”¹⁴