Faasoaina Atu o le Talalelei—Savali Lata Mai Nei mai Perofeta, Aposetolo, ma Isi Taitai o le Ekalesia

“Ao faatupulaia lau molimau, o le a oo ina e lagonaina le malamalama ua faatupulaia i lou olaga. O le a le o’o mai e aunoa ma se taumafaiga. Ae o le a o’o mai a o tuputupu a’e lau molimau ma ua e filifili e faafaileleina.

“O le a avea oe ma se malamalama i le lalolagi pe a e faasoa atu lau molimau i isi. O le a e faasusulu atu i isi le malamalama o Keriso i lou olaga. O le a saunia e le Alii auala mo lena malamalama e pa’i atu ai ia i latou e te alofa i ai. O le faatuatua foi ma molimau tuufaatasi a Ona afafine ma atalii, o le a pa’i atu ai le Atua ma Lona malamalama i olaga o le fia miliona i Lona malo i le lalolagi atoa.”

“E suia e le Alii olaga taitasi i le taimi. O le soifua mai o le Faaola o le amataga lea o se galuega musuia faalelalolagi. I Lona soifuaga atoa, sa Ia aumaia ai agaga e le mafaitaulia i le malamalama o le talalelei. Ua Ia talosagaina i tatou ia faia foi faapea. Saili ni auala e faalatalata atili atu ai oe lava ma isi ia Keriso. … O le meaalofa sili lena e mafai ona e tuuina atu.”

“Ou te valaau atu i alii talavou, ma na tamaitai talavou o e mananao e auauna atu i se misiona, ia amata nei loa ona talanoa ma o outou matua e uiga i le auauna atu i se misiona. Ou te valaaulia foi outou e talanoa ia outou uo e uiga i le auauna atu i se misiona ma afai e le o mautinoa e se tasi o au uo pe alu, fautuaina i latou e talanoa i lo latou epikopo.

O la’u galuega faafaifeautalai na saunia ai au ia avea o se tane ma se tamā sili atu, ma ia faamanuiaina i tulaga faapisinisi. Na saunia ai foi au, mo se auaunaga i le olaga atoa i le Alii i Lana Ekalesia.

“I faifeautalai ua toe foi mai i le fale ina ua maea la latou auaunaga, ia manatua e le o faamaloloina oe mai le toaga i le Lotu. Fausia i luga o mausa lelei sa e aoaoina i lau misiona, faaauau e faamalosi lau molimau, galue malosi, tatalo, ma ia usiusitai i le Alii. Faamamalu i feagaiga ua uma ona e osia. Faaauau e faamanuia ma auauna atu i isi.”

“Ou te talitonu e tolu upu o loo i ai le mana e suia ai la tatou auaunaga i le Atua ma uso a tagata. O le ola ai ia o le a suia ai le ala tatou te fegalegaleai ai ma le tasi ma le isi i a tatou faapotopotoga, ma a tatou uo, ma faatasi ai ma fanau uma a le Atua: alofa, fefaasoaai, ma valaaulia.

1) E ao ona avea le alofa ma faavae ma faaosofia o mea uma tatou te fai. E atili ‘anoa ma olioli ai a tatou taumafaiga!

2) Faasoa atu mea e te fiafia ai e uiga i le talalelei a Iesu Keriso. Faasoa pe aisea e te fia avea ai ma se tasi o Le Ekalesia a Iesu Keriso o le Au Paia o Aso e Gata Ai.

3) Valaaulia tagata e o mai ma vaai, o mai ma fesoasoani, ma o mai ma auai.

“Ao e taumafai e savali i le ala o le avea ma so’o, e tusa pe e te tautevateva i nisi taimi, o le a susulu pea lava le malamalama ma le olioli o le talalelei a Iesu Keriso i lou olaga. O le a matau e isi e i ai lava sau mea taua i lou olaga, ma o le a taitai atu ai i avanoa e faasoa atu ai.

“Sa ou aoaoina i lou olaga o le talalelei a Iesu Keriso e aumaia le faamoemoe, fiafia, ma le faamalologa. O so tatou avanoa sili ma faamanuiaga le faasoa atu o lena talalelei i fanau uma a le Atua.”

“Sa ma faasoaina atu ma Harriet lenei vitio i se faigalotu talu ai nei. O loo faaalia ai le fatuina o se atavali matagofie na saunia e Jay Ward. I se auala faapitoa o loo faaalia ai i lenei faagasologa le uiga o le taumafai e ola ai i o tatou olaga i se auala e sili atu ona faapei o Keriso, ma a tatou galuega i aso taitasi o le valaauliaina o isi ia latalata atili atu ia Keriso. Tatou te uunaia tagata i auala masani ma faalenatura e talia le talalelei ma le Ekalesia a Iesu Keriso. Tatou te alolofa, faasoa, ma valaaulia tagata e taumafai ma faalatalata atili atu i le Faaola. Tatou te fai atu ia i latou e o mai ma vaai, o mai ma fesoasoani, o mai ma auai i lenei nuu maoae o le Au Paia o Aso e Gata Ai.

“Uo pele, aua lava nei fiu i le faia o le galuega paia a le Faaola. O au taumafaiga tuuto o le a e fesoasoani ai e fatu se ata e sili atu ona atoatoa e ala i le fesoasoani i tagata e faalatalata atili atu ia Iesu Keriso ma Lana Ekalesia. O le faaaogaina o nei mataupu faavae o le a aumaia ai le fiafia sili atu i le lalolagi.

“E manaomia ai le tele o galuega—itiiti, laiti, toetoe lava a le mavaaia tosi o vali ia o le a fesoasoani e sili atu ai ma atoatoa le ata. E iloa lelei lava e le valiata le mea e manao o ia e ausia. O tosi o vali e ono foliga mai e lei fuafuaina pe fenumiai i nisi o tagata ese, ae ua tuuina atu ma le faamoemoe mo le faamaeaina o le galuega o le atamai. O le tatalo, popole, ma le aapa atu ma le onosai i tagata o siomia ai i tatou o le a fesoasoani ia i tatou uma ia latalata atili atu ai ia Keriso. O a outou faatinoga laiti i aso taitasi o le agalelei, agaalofa, ma le alofa mo le Atua ma Ana fanau o le a aumaia ai tagata i aao alofa o le Atua.

“E taua tosi taitasi. E taua oe. E manaomia oe, e manaomia lau galuega, e leai se mea e laitiiti tele pe le taua.”

“E faagaeetia le auala o loo aoaoina ai e a tatou faifeautalai pele le auala e faaaoga ai ma le atamai ma le mataalia ia meafaigaluega mamana o tekinolosi—le ala a le Alii. E pei lava ona faaatoatoaina e faifeautalai i latou lava i lo latou faaaogaina o tekinolosi ma ala o faasalalauga faaagafesootai, e tatau foi ona tatou faia lea lava mea e tasi mai o tatou aiga ma i a tatou uarota ma paranesi. Afai e te le o mautinoa pe faapefea ona amata, tuu atu i faifeautalai e aoao oe. O le a latou fiafia e fesoasoani atu!

“Uo pele, o loo soifua le Atua ma e alofa ia te oe. Ua taitaiina e Iesu Keriso Lana Ekalesia. … Manatua, o au taumafaiga o ala o faasalalauga faaagafesootai ma tekinolosi e le faapea e tatau ona atoatoa pe faapolofesa. E manaomia ona latou faamaoni ma i ai se faamoemoega.

“Valaaulia au uo ma e pele e o mai ma vaai, o mai ma fesoasoani, ma o mai ma auai. Faaaoga mataupu faavae o le ‘alofa,’ ‘faasoa,’ ma le ‘valaaulia.’ …

“I nei mea uma, o Keriso o le totonugalemu. E ala ia te Ia ma e ala mai ia te Ia, e mafai ai ona tatou aumaia le fiafia i le lalolagi.”

“Pe a oo mai i le faasoaina atu o le talalelei, o le mamanu faigofie o le ‘alofa, faasoa, ma le valaaulia’ e aumaia ai le taulaiga sili atu i vaega uma o le galuega a le Alii. E masani lava o le ola ai i nei mataupu faavae autu o le talalelei o le a mafai ai e i tatou ona fesoasoani i isi ia o mai ia Keriso e ala i le osia ma le tausia o feagaiga. Atonu foi tatou te le o iloaina o loo tatou faasoaina atu le talalelei, aua o le faasoa atu ma le valaaulia o se faailoaga masani lea o lo tatou alofa faamaoni mo isi. Ua na o se vaega o le tagata ua i ai i tatou!

“Ua fai mai tusitusiga paia ‘e onosai le alofa’ ma ‘onosai i mea uma’ (1 Korinito13:4, 7). E leai se taimi faasolo po o se aso e uma ai le alofa. A faaosofia la tatou faasoa ma le valaaulia e le alofa, e le uma lo tatou onosai. Tatou te taumafai pea, ma tatou faalagolago i le Alii a o tatou aapa atu i isi.”

“A o tatou faapotopotoina i tatou lava ia Iesu Keriso e ala i le mulimuli i Ana aoaoga, tatou te maua le saolotoga ma le faitalia lea e na o Lana talalelei lava e mafai ona tuuina mai—saolotoga e maua ai faaaliga faaletagata lava ia ma le faitalia e avea ai ma tagata e finagalo le Tama Faalelagi e avea ai i tatou.

“O le ola amioletonu e mafai ona taitai atu ai i le nofopologa ma tapulaa, i le faaletino ma le faaleagaga. A o tatou fesoasoani i le faapotopotoina o a tatou uo ma e pele i le talalelei, e aofia ai le fesoasoani ia i latou e osia ma tausia feagaiga paia ma le Atua, e mafai ona tatou fesoasoani ia i latou ia maua le saolotoga mai le tele o ituaiga o pologa.

“A o e ola amiotonu, o le a le gata ina e solaese mai le nofopologa mai le fili, ae o le a avea foi oe ma se faataitaiga o le faamoemoe ma le malamalama i isi.”

“Ou te faailoa atu lo’u agaga faafetai mo a tatou faifeautalai lelei i le lalolagi atoa o e mananao e avatu le savali o le Toefuataiga ma fausia le faatuatua i le Alii o Iesu Keriso.

“E pei lava o nei faifeautalai, ua tofu maua e i tatou taitoatasi le avanoa e alolofa atu ai, faasoa, ma valaaulia isi e auai faatasi ma i tatou ma olioli i faamanuiaga o le talalelei a le Faaola.”

“A o lei lauga atu i se faigalotu a le Peraimeri talu ai nei i Anchorage, Alaska, sa ou fesili atu i nisi o fanau a la’u fanau po o le a se mea e tatau ona ou faasoa atu i isi tamaiti pei o latou.

“’Pa, ta’u atu ia i latou e te iloa Iesu ma e alofa o Ia ia i latou,’ sa latou tali mai ai.

“Sa ou teuina la latou fautuaga i le loto ma faamautinoa e folafola atu i na tamaiti taitoatasi ua silafia i latou i o latou igoa e le Tama Faalelagi, Iesu Keriso, ma le Agaga Paia. Sa ou faasoa atu foi ia i latou e alofa le Atua ia i latou.

“O upumoni na ou faasoa atu i nei fanau faapelepele o upumoni lava ia e tasi ou te faasoa atu ia te outou taitoatasi.

“E alofa tele le Tama Faalelagi ma Iesu Keriso ia i tatou. O i Tatou o Fanau a le Atua. E tatau ona tatou faasoa atu lenei upumoni taua i tagata uma tatou te iloa. E le o tuua lava na o i tatou. I le Tama Faalelagi ma Iesu Keriso, e i ai pea lava la tatou faauoga ma le lagolagosua.”

“E mafai ona avea oe o se malamalama i lenei lalolagi pogisa, e tutu o ni molimau a le Atua ma Lana amiotonu i taimi uma, leai ni tuusaunoaga, ma maua le olioli i le auauna atu. Tau ina ia outou iloa la outou faatosinaga loloto, ma ia outou auauna atu ma le tuuto i lo outou Tama oi le Lagi.”

“I se faigalotu talu ai nei a le BYU, sa ou talanoa ai e uiga i le sootaga i le va o faamanuiaga ma tiutetauave mo tagata O Le Ekalesia a Iesu Keriso o le Au Paia o Aso e Gata Ai.

“Ua ia i tatou le tiutetauave ia valaaulia tagata uma ia talia le talalelei. E faamanuiaina faifeautalai i a latou auaunaga e ala i le lagolago a o latou aiga ma tagata o le ekalesia.

“Ua ia i tatou le tiutetauave e tuufaatasia ai aiga mo le faavavau. Ua faamanuiaina i tatou i malumalu i le lalolagi atoa.

“Ua ia i tatou le tiutetauave e ola i le talalelei a Iesu Keriso. Tatou te maua faamanuiaga e ala i punaoa eseese a le Ekalesia, e aofia ai le Tusi a Mamona—ua i ai nei i gagana e 112.

“Ua ia i tatou le tiutetauave e tausia ai i latou e le tagolima. Ona o le agalelei ma le faamaoni o o tatou tagata, ua tatou faasoa atu ai a tatou faamanuiaga i le lalolagi e ala i le tele o taumafaiga agaalofa.

“O la’u valaaulia ia mafaufau i la tatou matafaioi i le faataunuuina o nei tiutetauave paia ma auai ma le naunautai. A o tatou faia, o le a tatou iloa ma olioli i faamanuiaga e auina mai le lagi.”

“E faigata ona le fiafia i le pese ‘E Manao Iesu ia Ou Fai ma Sulu! O taimi uma lava ou te faalogo ai, e mafai ona ou vaai faalemafaufau i foliga fiafia o tamaiti o loo usuina. Fai mai le fuaiupu lona lua, ‘E manao Iesu ia ou alofa, ma ia agalelei, faailoa ai le fiafia o Ana fanau nei.’

“E tofu i tatou ma se malamalama i totonu o i tatou, ma e finagalo Keriso ia tatou faasusulu atu lena malamalama! Uo, ou te faamoemoe o le a outou faia lenei valaaulia e faasusulu atu le malamalama i le asō, po o fea lava o e i ai.