Uunaiga i le Malumalu

A o ou auauna atu o se tagata faigaluega i sauniga i le Malumalu o Houston Texas, sa liliu mai se vaega o tagata tietie pasika i le matou pakaga taavale ma fesili mai pe mafai ona latou o mai i totonu o le malumalu. Sa faamalamalama atu e le peresitene o le malumalu, o Richard Sutton, i le vaega le faamoemoega o le malumalu ma le manaomia o se pepa faataga o le malumalu e ulufale atu ai i le fale. Sa faapitoa lava le gauai atu o le taitai o tagata tietie uila ma lana soa.

“Sa ou lagonaina se mea ina ua matou pasia lou fale,” o lana tala lea. “E le mafai ona ou faamatalaina, ae o se uunaiga iloga na ou manao e saili po o le a se mea atonu na mafua ai.”

Sa fia iloa atili e le ulugalii, o lea na faatulaga ai e Peresitene Sutton faifeautalai e asiasi atu ia te ia.

E silia ma le tausaga ma le afa mulimuli ane, ae tuitui mai e se tasi le faitotoa o le ofisa o Peresitene Sutton i le malumalu. “O le a e le iloaina au, ae o sina taimi talu ai na ou sau ai iinei ma ni isi o a’u paaga i a matou uila afi. I lena taimi, sa na o fafo sa mafai ona ou tilotilo mai ai.” Uuina i luga o se pepa faataga o le malumalu, sa ia faaauau ai, “O le asō o le a ou tilotilo mai ai mai totonu.”

Ata

tamaitai o loo savali i fafo o se malumalu

O Se Gagana Lona Lua

Ina ua valaauina Dean ma Bonnie Hill e auauna atu o ni faifeautalai matutua i le Malumalu o Cochabamba Polivia, sa le fiafia Bonnie. Na te lei suesueina muamua lava le faaSipaniolo ma sa le mautonu e uiga i lona tomai e faatino ia sauniga e tatau ai pe fesootai ma isi i se gagana e le masani ai. Sa folafola atu ia te ia e se faamanuiaga faaleperisitua o le a mafai ona ia fesootai atu i le gagana e lua, tautala ma le faaleagaga i le faaSipaniolo.

“E le mafai ona ou tautala faaSipaniolo tele i fafo atu o le malumalu,“ o lana tala lea. “Ae i totonu o le maota o le Alii, e foliga mai e faigofie ona oo mai ia te au.”

E oo lava ina ua la toe foi atu ma lona toalua i le fale ma auai i sauniga faaSipaniolo i le Malumalu o Ogden Iuta, sa fai mai tagata ulu i lana tautala maoae.

Sa faapea mai Peresitene Russell M. Nelson: “E mafai ona musuia i tatou i le aso atoa e uiga i aafiaga o le malumalu ma talafaasolopito o aiga na maua e isi. Ae e tatau ona tatou faia se mea ina ia tatou maua moni ai e i tatou lava le olioli.”¹

O le olioli ma musumusuga faapea foi ma uunaiga ma faamautinoaga o loo faatalitali mai mo i tatou i totonu o le malumalu. O loo i ai se gagana faalelagi e tautalagia ma malamalama ai iina e le o maua i se isi lava mea i luga o le fogaeleele. Tatou te maua faaaliga e finagalo le Alii e tuuina mai ia i tatou i totonu o le malumalu pe a le gata ina tatou auai atu i le malumalu ae tatou te o foi iina ma le faamoemoe e maua faaaliga. O nisi nei o faataitaiga o musumusuga na maua:

• Sa sailia e Matini Goury o Cote d’Ivoire le taitaiga i le malumalu i se mataupu taua o le olaga ma sa i ai se faamautinoaga ofoofogia ua uma ona ia maua tali i ana tatalo e uiga i ai. O le mataupu faavae lenei na aoao atu e le Alii ia Oliva Kaotui: “Tuu atu lou mafaufau i le po na e tagi mai ai ia te au i lou loto. … Ou te lei tautala atu ea le filemu i lou mafaufau e uiga i le mataupu?” (Mataupu Faavae ma Feagaiga 6:22, 23).

• O Randy Bronson e nofo latalata i le Malumalu o Payson Iuta ma sa faaaluina le tele o tausaga e faia ai sailiga o talafaasolopito o aiga. “Ae e i ai so’u atalii e le toaga i le lotu, ma ou te le o mautinoa i taimi uma po o le a se mea e mafai ona ou faia mo ia. O lea ou te le na o le tuuina o lona igoa i luga o lisi mo talosaga, ae ou te tatalo faatauanau i le malumalu, ma taumafai e saili po o le a se mea e mafai ona ou faia mo ia. Ou te maua ni mea e mafai ona ou tautala atu ai pe faia mo ia.”

• “O oe o se tina lelei,” na fai atu ai Stephanie Fackrell Hill i se tagata ese i le Malumalu o Logan Iuta. “E faapefea ona e iloa?” sa fesili atu ai le tina talavou ma le lē faatuai. Sa fai mai Sister Hill, “Sa ou vaai i le vali a lau fanau i luga o ou lima, ma a o ou faia, sa ou lagonaina le uunaiga a le Agaga e ta’u atu ia te oe.” Sa taumafai le tina talavou e nana ona lima. I le toafilemu, ua ia lagona ai nei le taliaina nai lo le iloagofie.

O le malumalu o se nofoaga e le gata e fesoasoani ai e laveai o tatou tuaa ae ia maua foi le ituaiga o faaaliga lea e mafai ona taialaina ai i tatou ma isi i luga o le ala o feagaiga. Na saunoa Peresitene Nelson faapea, “E manaomia e i tatou taitoatasi le faamalosiauga ma le aoaoina faifai pea faaleagaga lea e na o le maota o le Alii e mafai ai.”² O nei uunaiga ma lagona na maua i Lona maota paia ua aoao ai i tatou ia vaai e pei ona vaaia mai e Iesu, faalogo e pei ona Ia faafofoga mai, ma ola e pei ona ia soifua ai.