Lagolagoina o Tagata o le Ekalesia O E Aafia i le Tatalaina o Faaipoipoga

Saunia e Brittany Beattie

Mekasini a le Ekalesia

O le a fesoasoani mai le Tama Faalelagi ia i tatou ia iloa le auala sili e saunia ai se siosiomaga saogalemu ma faafeiloai i a tatou uarota ma paranesi mo i latou ua tatala faaipoipoga pe o loo feagai ma se tatalaga o se faaipoipoga.

Ata

o se fale o loo faaali mai i se ata ua sae lua

Ua nofofua ni alii e toalua i se uarota pe tusa o le taimi lava lea e tasi, i le mavae ai o le tele o tausaga o faaipoipo i a la’ua ava. Ina ua nofofua le alii muamua, sa aapa soo atu le uarota, saunia ni meaai, ma maua ni auala e faamautinoa ai na te le o lagonaina le tuuatoatasi. Mo le tamalii lona lua, sa lei tupu lenei auaunaga, ma sa tuua o ia ma le lagonaina o le tuulafoaiina ma le le tutusa.

O le a le eseesega i le va o ia alii e toalua? O le muamua na oti lona toalua ma lona lua na tete’a. A o faasoa mai e le tamalii ua tatala le faaipoipoga lenei aafiaga ia te au, sa faigofie lana aioiga: e mafai ona tatou fesoasoani i tagata o le Ekalesia ia malamalama atili i le auala e auauna atu ai ia i latou o e ua tatala faaipoipoga ma ia iloa o loo i ai pea so latou nofoaga tutusa, ma taua i totonu o a tatou uarota ma paranesi?

E tele uarota e faia se galuega matagofie o le auauna atu ia i latou o loo aafia i aafiaga o le tatalaina o faaipoipoga, ae o le aioiga a lenei alii e mafai ona taitai atu ai i tatou uma e fesili atu pe o i ai lava se mea e mafai ona tatou faia ia sili atu. O lenei mea o le manaomia o le lagonaina o le taliaina ma le lagolagoina e fesootai i se valaaulia faifai pea mai taitai o le Ekalesia—ia alofa atu i tagata uma o loo i totonu o le lafu a le Atua ma fesoasoani ia latou lagona le taliaina ma le saogalemu i a tatou siteki o Siona.¹

“Soo se taimi lava tatou te siitia ai se isi tagata o loo tatou i ai i le fatuina o nofoaga o le saogalemu mo i latou.”² O a tatou uarota ma paranesi e tatau ona avea ma na nofoaga a o tatou saili e tausi poloaiga sili e lua ia alolofa i le Atua ma alolofa atu i isi e pei o i tatou lava (tagai i le Mataio 22:37–39). O mataupu faavae nei e mafai ona fesoasoani ia i tatou e iloa ai pe faapefea ona sili atu le lagolagoina o i latou i a tatou uarota ma paranesi o e ua aafia pe o loo aafia i le tatalaina o faaipoipoga.

Manatua o le Tatalaina o Faaipoipoga e Aofia ai le Tele o Lagona

Ona ua tatou iloa le aoaoga faavae autu o le faaipoipoga e faavavau ma le mana o le feagaiga o le faamauga i le ata o le faaolataga a le Atua, o le tatalaina o faaipoipoga e mafai ona oo mai ai le lotonutimomoia. Ae e le o tagata uma atonu e tutusa o latou lagona e uiga i le tatalaina o a latou faaipoipoga. Na aoao mai Peresitene Dallin H. Oaks, Fesoasoani Muamua i le Au Peresitene Sili e faapea, o le tatalaina o faaipoipoga “o se mataupu maaleale lenei aua e alia’e ai lagona malolosi mai tagata na aafia ai i auala eseese. O nisi ua manatu o i latou lava po o i latou e pele ia i latou o tagata ua aafia fua i faaipoipoga ua tatalaina. O isi ua manatu o i latou lava o tagata ua faamanuiaina ai. O nisi ua manatu o le tetea o se faamaoniga o le toilalo. Ua manatu isi o se auala tatau e sola ese ai mai le faaipoipoga.”³

Nai lo le mafaufau faapea pe faapefea e se tasi o loo aafia i le tatalaina o faaipoipoga ona vaai atu tulaga o siomia ai, ia avea ma se tasi e naunau e faalogo i soo se taimi ma po o le a lava le taimi ua saunia ai le tagata. Mafaufau tau lava o le fesili atu, “E mafai faapefea ona avea au ma se lagolago i lenei taimi?” po o le “O a ni auala e mafai ona matou lagolagoina ai oe e oo lava i le mavae ai o lau tatalaga o le faaipoipoga?”

Fesili e Mafaufau i ai:

E ono aafia faapefea ni tagata i ni lagona eseese i tulaga eseese i aso taitasi, vaiaso, po o masina? E mafai faapefea ona ou magafagafa ma lagolagosua i le gasologa o na lagona taitasi?
E mafai faapefea ona ou nofouta i faaaliga e uiga i le auala e fesoasoani ai i taimi eseese?
O a ni mafaufauga o loo ou maua atonu ou te ono manaomia ona ou faamatuu ese atu ia saili atili sili ai ma faatino faaaliga e uiga i le ala e fesoasoani atu ai?

Ata

o se fatu o loo opeopea i luga a’e o se lima

Taulai i le Alofa Atu i Isi Nai lo le Faamasino Atu

I tulaga o le tatalaina o faaipoipoga, e seasea lava, pe afai e i ai, o le a tatou iloa auiliiliga uma na taitai atu ai i le tatalaina o le faaipoipoga a se ulugalii—ma e le manaomia ona tatou faia. “A oo ina tatala le faaipoipoga, ua i ai i tagata taitoatasi le matafaioi e faamagalo atu, uunaia, lagolagosua, ma fesoasoani nai lo le tausalaina”;⁴ e moni lenei mea mo le ulugalii ma i latou o siomia i laua. E tatau ona tatou faaeteete e taulai atu i le alofa atu i isi, ae le o le faamasinoina o i latou, e tusa lava po o ai o i la’ua e iai so tatou sootaga malosi atu.

Nai lo le taulai atu i le faamasinoga, e mafai ona tatou taulai atu i le alofa ma le lotogatasi, e pei ona aoao mai e Sister J. Anette Dennis, Fesoasoani Muamua i le Au Peresitene Aoao o le Aualofa:

“O le a le tele tatou te faamasino ai isi e faavae i o latou foliga vaaia ma taga faatino, po o le leai o se faatinoga, pe afai tatou te malamalama atoatoa, tatou te tali atu ma le mutimutialofa ma se manao e fesoasoani nai lo le faaopoopo ia latou avega ma la tatou faamasinoga? …

“Ua poloaiina i tatou e alolofa i isi, ae aua le faamasinoa i latou. Tatou faataatia i lalo lena avega mamafa; e le o sa tatou e tauave. Ae, e mafai ona tatou tauamoina le amo a le Faaola o le alofa ma le mutimutialofa. …

“… E manaomia e tagata uma ona lagona o i latou moni lava o ni itutino ma o loo manaomia i le tino o Keriso.”⁵

Fesili e Mafaufau i ai:

O le a se mea e mafai ona ou faia e taulai atili atu ai i le alofa atu i isi e pei ona faia e Iesu Keriso?
Pe o i ai ni auala o loo ou faamasinoina ai se tasi, e aofia ai le sailia po o le atofaina o mea sese, e ono taofia ai au mai le mafai ona tuuina atu le lagolago manaomia?
O le a se mea e mafai ona ou faia e lagona atili ai le alofa o le Atua mo isi?

Vaavaai mo Auala e Faaaofia ai i Latou

E ala i le tatalaina o faaipoipoga, e tele lava ina le maua ai e tagata taitoatasi ni faauoga na aliae mai i uo po o aiga a o latou taitoalua. Ma o le a le mea e tupu pe a faia ni faauoga i le taimi o le faaipoipoga, ma atonu o le a le toe mafai e uo ona valaaulia uma taitoalua i gaoioiga i le taimi e tasi?

Sa faasoa mai e se tasi o uso e masani ona la o ma lona toalua i se po o taaloga faalevaiaso ma uo i lana uarota. Ina ua mavae le tatalaina o le faaipoipoga, sa faanoanoa o ia ina ua le toe oo mai ni valaaulia i po o taaloga ona sa na o ulugalii na auai. Sa faasoa mai e se isi uso e faapea, e toatele tagata o le uarota na ono manatu ona ua avea nei o ia ma se tina nofotoatasi, o le a leai sona taimi e auai ai i gaoioiga ma uo e pei ona sa ia faia muamua; o lea, latou te lei valaaulia ai o ia ina ia le lagona e ia le faanoanoa i le le mafai ona sau. Peitai, o lenei mea na atili ai ona ia lagonaina le faaesea ma le tuuatoatasi. Sa faasoa mai e lenei uso e manaia pe ana faaauau pea ona valaaulia (e tusa lava pe le mafai ona auai)—e iloa ai na mananao isi ia iai o ia iina.

E eseese tulaga uma, ae “tatou te manaomia uma le fia lagonaina o le aao mafanafana o le faauooga ma le fia faalogo atu i se tautinoga mausali o le faatuatua.”⁶

Fesili e Mafaufau i ai:

O a ni fetuunaiga i gaoioiga e mafai ona ou faia e fesoasoani ai i tagata o le ekalesia o e nofofua ia lagona le tutusa o le toafimalie i le auai ai o ni ulugalii faaipoipo?
E mafai faapefea e la tatou uarota ona tuuina atu ni avanoa faaopoopo mo le faaaofia ai i gaoioiga e fetaui ma manaoga o tagata o le ekalesia o e ua tatala faaipoipoga?
O a ni gaoioiga e ono fesoasoani i la’u uo e auauna atu ai pe saofaga atu ai, aemaise lava pe afai e manaomia ona toefuatai mai lona talitonuga mautinoa pe a mavae se mafutaga faigata?

Ata

tagata o loo i se lio

“Muamua Matau, Ona Auauna Atu ai Lea”⁷

O i latou o loo aafia i le tatalaina o faaipoipoga o loo fetuunai i suiga i mea tautupe, faatulagana, lagona, tu masani i aso taitasi ma faaletausaga, fuafuaga i le mea e nofo ai, ma isi mea. E moni lenei mea mo tagata matutua faapea foi ma a latou fanau, o e atonu o loo ua tauaveina foi nisi tiutetauave faaopoopo i o latou aiga.

E mafai e aufono a uarota po o paranesi ona mafaufau pe faapefea ona lagolagoina tagata taitoatasi o le aiga, e aofia ai ma tamaiti. I le avea ai ma tagata taitoatasi, tatou te maua foi le tele o avanoa e vaai ai i manaoga ona faatino lea ma le agaga tatalo o faaaliga faaletagata lava ia e fesoasoani ai e faataunuuina.

Sa faamanuiaina se tasi o uso ina ua iloa e se tuaoi e masani lava ona faatino e lana tane muamua le faamamaina o le fanua i le tautoulu faaletausaga, e aofia ai le suiga o fuiina o laau mo le taumalulu, ma ofo atu e faia mo ia pe faaali atu ia te ia le mea e fai. Sa faamanuiaina se tama nofotoatasi ina ua tuuina atu e tuaoi ni manatu mo ni isi e vaavaaia fanau faatuatuaina i lana eria fou.

O isi auala nei na fesoasoani ai tagata o le uarota i aiga:

Ua faia e taitai o uarota, autalavou, ma le Peraimeri ni faataitaiga o faatosinaga faaletama po o faaletina pe a talafeagai ai i olaga o tamaiti.
Sa foai atu meaalofa o le Kerisimasi, e pei foi o tupe e fesoasoani ai i tau o le misiona.
O meaai faaopoopo mai konafesi po o gaoioiga a le autalavou na auina atu i le aiga.
Sa auai tagata o le uarota i gaoioiga o taaloga a tamaiti.
Sa talanoaina e aufono a faiaoga le auala ia mafaufau ai i tamaiti mai se aiga ua tatala le faaipoipoga, aemaise lava i lesona e uiga i aiga po o le, pe na o le tasi i le isi vaiaso e auai ai tamaiti i le uarota pe a latou i ai faatasi ma se matua patino.
Sa ave e se ulugalii matutua le aiga o se matua nofotoatasi i lalo o la la’ua tausiga.

E mafai foi ona tatou manatua o le a manaomia e tagata taitoatasi ma aiga se taimi e fetuunai ai i o latou tulaga fou. Ia agaalofa i le tuu atu ia i latou le avanoa mo le mauaina o le faamalologa ma alualu i luma i le taimi a le Atua ma mo lo latou lava taimi, ae le o taimi a tatou.

Fesili e Mafaufau i ai:

E mafai faapefea ona ou faamalosia se faigauo faifaipea ina ia lagona e i latou o loo faagasolo se tete’aga o se faaipoipoga le toafimalie i le mauaina o le fesoasoani pe a latou manaomiaina, e tusa lava pe le o mo le taimi nei?
O a “mea muamua” atonu e sili ona faigata mo le aiga, e pei o le taimi muamua e le o faatasi ai fanau ma se matua i se aso malolo? E mafai faapefea ona ou tuuina atu se faauoga faaopoopo i na taimi?
O a punaoa e ono manaomia e le aiga e mafai ona ou fesoasoani i ai, pe faapefea foi ona ou faafaileleina se fesootaiga i isi e iai tomai e fesoasoani ai?

A o tatou saili atu ma le agaga tatalo ia malamalama atili ma auauna atu ia i latou o e ua tatala faaipoipoga, faatasi ai ma o latou aiga, e mafai ona tatou lagonaina ma faasoa atu se vaega o le alofa o le Atua mo Ana fanau uma.

Ia i Latou O Ē ua Tatala Faaipoipoga

E ui o se faamanuiaga pe a aapa mai isi ia i tatou, ae e tele mea e mafai ona tatou faia e aapa atu ai e faia ni fesootaiga a i tatou lava. O nisi nei o manatu mo le mauaina o se aafiaga lelei i lau uarota po o le paranesi:

Faailoa atu i taitai po o a ou manaoga ma po o a fesoasoani o le a sili ona aoga.
Fatu ni ou lava avanoa mo fesootaiga. Tuuina atu valaaulia i isi mo gaoioiga faaagafesootai, e oo lava i se mea faigofie e pei o le savalivali faatasi po o le nonofo faatasi o le tasi ma le isi i le lotu. E pei ona aoao mai le Alii i le Mataupu Faavae ma Feagaiga 58:27–28, “E tatau i tagata ona auai ma le naunautai i se faamoemoega lelei, ma fai mea e tele i lo latou lava loto malie, ma aumai le amiotonu tele; aua ua i totonu ia te i latou le mana, lea ua latou pule ai ia te i latou lava.”
Atonu e i ai taimi e fai mai ai e tagata ni upu sese pe le iloa foi le mea e fai. Ia agaalofa ia i latou o loo taumafai e lagolago oe ae atonu e le iloa pe faapefea. E pei ona fautuaina mai e Elder Jeffrey R. Holland o le Korama a Aposetlo e Toasefululua: “Ia agalelei ona o vaivaiga faaletagata—o ou vaivaiga faapea foi vaivaiga o i latou tou te galulue faatasi i se Ekalesia o loo taita’ia e alii ma tamaitai e galulue fua. Vagana ai i le tulaga o Lona Alo Pele e Toatasi e atoatoa, na o tagata lē atoatoa lava sa galue ai le Atua. … A e vaai foi la i ni lē atoatoa, ia manatua o le tapulaa e le o i ai lea i le paia o lenei galuega.”⁸

Sa faasoa mai e se tasi o uso nei manatu na fesoasoani ia te ia e toe fausia ai lona olaga ina ua mavae le tatalaina o le faaipoipoga:

Tumau i le toaga i le talalelei.
Faitau tusitusiga paia.
Tausi i poloaiga.
Talia se valaauga.
Fefautuaai faatasi ma le epikopo.
Auai i le malumalu.
Faalagolago i uso ma tuafafine o auaunaga.
Talisapaia tagata o le uarota.
Atiae ni faigauo fou.
Siomia oe lava i le lalelei.
Tofo i le olioli i le olaga.⁹

A o e taumafai ia maua ni aafiaga lelei i lau uarota po o le paranesi, o le a e lagonaina le malosi lea e oo mai e ala mai i le Alii, o lē e mafai ona “faamāmāina foi avega ua tuu i o outou tau’au, e oo ia te outou tou te lē lagonaina i latou i luga o o outou tua, … ina ia mafai ona outou iloa ma le mautinoa o A’u, o le Alii le Atua, e asiasi atu i o’u tagata i o latou puapuaga” (Mosaea 24:14).