Motabang sa Pag-usab sa mga Kinabuhi Pinaagi sa mga Giving Machine sa #Dan-agiAngKalibotan

Sulod sa sunod-sunod nga walo ka tuig, ang Simbahan mipaluyo sa #Dan-agiAngKalibotan nga inisyatiba sa pag-awhag sa tanan aron mahayagan ang panahon sa Pasko pinaagi sa pagsunod sa ehemplo ni Jesukristo ug sa pagpakita og gugma sa uban. Sama sa miagi nga tuig, kita makahimo niini pinaagi sa mga Giving Machine sa Dan-agi ang Kalibotan sa Manila ug sa Cebu.

Kining espesyal nga mga vending machine, makatugot sa mga tawo sa pagpakatap sa kamabination kon sila mopalit og mga butang nga maadto sa mga tawo nga anaa sa panginahanglan, gilunsad niadtong Nobiyembre 9 didto sa Trinoma Mall sa Quezon City ug sa miagi nga Nobiyembre 16 didto sa Ayala Center sa Cebu. Ang duha ka makina anaa hangtod sa Enero 3, 2024.

Ang Giving Machine sa Trinoma mokolekta og mga donasyon alang sa Mabuhay Deseret, HERO Foundation, ug Caritas Manila, samtang ang usa sa Cebu mobenepisyo sa UNICEF Philippines, Feed the Children, ug Cebu Caritas. Sa miagi nga tuig, ang samang unom ka organisasyon midawat sa 100% sa mga donasyon nga nalikom pinaagi sa mga makina, nga may donasyon nga P500,000.00 gikan sa Simbahan. “Ako nasayod nga ako namulong alang sa uban nga mga organisasyon sa dihang nagsulti ko kon unsa ka lawom sa atong pasalamat nga mapili pag-usab isip kauban nga mga benepisaryo sa mga Giving Machine sa Dan-agi ang Kalibotan niining tuiga,” mipahayag si MGEN Victor Bayani, Executive Director sa HERO Foundation.

Ang matag kauban nga organisasyon adunay gitakda nga hut-ong sa menu sa mga gasa ug mga serbisyo nga mapalit sa mga tigdonar. An mga butang naglakip sa mga antipara alang sa depektoso sa panan-aw, human sa operasyon nga mga tambal sa katarata, mga kit sa pag-opera sa mata, pang-load nga allowance sa estudyante, mga kit para pagpang-ayo sa pinuy-anan, mga kapanguhaan nga suporta sa psychosocial, mga kit sa prosthetic nga batiis, pangpaeskwela alang sa mga ilo, pangpabakuna sa mga bata, mga pakete sa bitamina, ug daghan pang uban. Ang galastohan sa pagpadagan sa mga makita giabaga sa Simbahan, ug ang tanan nga mga donasyon nga gihatag pinaagi sa mga makina madawat nga tibuok sa benepisyaryo nga mga organisasyon.

“Sa 2022, ang mga pundo gikan sa mga Giving Machine nakatabang sa pagsuporta sa mga programa sa UNICEF sa pagpanalipod sa bata. Usa niini nga mga inisyatiba naglakip sa paghatag og legal, medikal ug psychosocial nga mga serbisyo alang sa mga bata kinsa nahimong mga biktima sa pagkabiyolente ug pagpang-abuso,” mipasabot si Maida Salcedo-Mission, Major Donor Officer sa UNICEF Philippines. “Ang Dan-agi ang Kalibotan ug ang Latter-day Saint Charities nahimong bililhon nga tigtampo ngadto sa mga programa sa UNICEF alang sa mga bata ug mga pamilya. Ang kapuangod ug pasalig sa Simbahan nagpadayon sa pagdasig sa buhat nga among gihimo,” midugang siya.

“Ang Ginoo nag-ingon, “…tan-awa, Ako ang kahayag nga nagdan-ag sa kangitngit (D&P 11:11),”” namahayag si Elder Yoon Hwan Choi, ang Ikaduhang Magtatambag sa Kapangulohan sa Area sa Pilipinas, nagpasabot ngadto sa kaimportante sa tinuig nga inisyatiba sa Pasko ug sa pagtutok sa Manluluwas. Siya mipasabot sa tambag sa Ginoo nga “Ipadan-ag ang inyong kahayag atubangan sa mga tawo aron makita nila ang inyong mga maayong buhat ug daygon nila ang inyong Amahan nga atua sa langit (Mateo 5:16)” ug mipasabot nga kita motabang sa pag-usab sa mga kinabuhi kon kita modan-ag sa kalibotan dili lang pinaagi sa mga giving machine apan sa ato usab nga mga pulong, mga buhat, ug serbisyo gikan sa atong kasingkasing.

Matod pa ni Kim Morrison, Presidente sa Mabuhay Deseret Foundation, ang mga donasyon nagtugot sa matag kauban nga organisasyon sa “pagtabang og mas daghang indibidwal nga anaa sa panginahanglan aron mapalambo ang ilang mga kinabuhi ug mamahimong makabarog sa kinaugalingong paningkamot.” Mapasalamaton siya niadtong midonar sa miagi nga tuig ug gusto nga modapit sa tanan sa makausa pa sa pagpakatap sa gugma pinaagi sa Dan-agi ang Kalibotan nga mga giving machine “sa pagtabang niadtong anaa sa panginahanglan nga makabaton og mas hayag nga mga pahiyom, makahimo sa unang mga lakang, ug motin-aw ang mga panan-aw.”

Dan-agi ang Kalibotan karong Pasko ug paghimo og kalainan diha sa mga kinabuhi sa daghan kaayong tawo!