N Akean Ana Boki Moomon, N Aki Kona n Ataia

E ngae ngke I aki rangi ni kakaonimaki n te Ekaretia ngke 14 au ririki, I kaoaki bwa N a ira te tieminari. Man aron te waaki mai ieta e kakabwaiaai te Uea ni kaekaan te tataro ae bebete uoua te bong mai imwaina ao I katauraoaki bwa N a butimwaea te kakao. N te ririki anne, ti kamatebwaia Ana Boki Moomon. Rinanon te boutoka mai iroun te tia reirei ae tatangira ao kaain au kiraati, I butimwaea te kakao ni wareka Ana Boki Moomon n te ririki anne. Ae kakawaki riki, I butimwaea ana kakao te burabeti Moronaai ni butiia te Atua ngkana e koaua te boki (taraa Moronaai 10:3–5).

N aki maan imwiin waakinan te tieminari, I a manga nakon Tamau are i Karawa, ma te nano ae koaua ma nanou raoi, ni kan ataia i bon irou ngkana e bon koaua Ana Boki Moomon, ao ngkana e a tia Iotebwa Timiti n rairia man te bwaintangira ao mwaakan te Atua n aron are e taekinna. Te namakin anne are I a tia n rinanona mai imwaina e roko i aou. Te namakin n te tangira ae itiaki anne e taonai nako, ao I ataia—I bon ataia ni koaua—bwa Ana Boki Moomon bon ana taeka te Atua.

N te tai naba anne I ataia bwa ngkai e koaua Ana Boki Moomon, Iesu Kristo bon au Tia Kamaiu, Iotebwa Timiti bon Ana burabeti, are e a kaman katabuaki bwa e na kaoka Ana Ekaretia te Uea ae koaua i aon te aba, ao bwa te burabeti ae maiu i aon te aba e anga reirei ao kairiiri ake I kainanoia ni irii ngkai I kataia ni maiuakin tuua ao kainibaire n te Ekaretia. Aikanne bon bwaai aika a kakawaki atakiia iroun te ataeinimwaane ae 14 ana ririki.

Te atatai anne e bitai. I tangiria bwa n a nakoraoi. I tangiria ni karaoi baika a eti, ao ngkana I karaoa te kairua I namakina te nanokawaki n te bwai are I karaoia, I raira nanou, ao ni katan iaon te Uea ni buokai ni karaoa ae tamaroa. Au onimaki iaon Iesu Kristo e rikirake ni katoa bong rinanon kakorakoraakin au koaua ao matatau n te reirei inanon Ana Boki Moomon.

E tuangiia membwa n te Ekaretia Beretitenti Russell M. Nelson bwa a na iangoi teniua titiraki: “Te moan, a na aekakira aron maium ngkana akea Ana Boki Moomon? Te kauoua, tera ae ko na aki ataia? Ao te kateniua, tera ae a na akea iroum”?¹

Ngkana ko tuai karaoia, I kaoko bwa ko na tataromwaaka ni iangoi titiraki akanne ao kaekai ma te nano ni koaua. Ngkana I kaekai, au tangira ao au kakaitau ibukin Ana Boki Moomon, ao Iesu Kristo are e kaota koauana, e rikirake ni korakora.

N na bon aki ataa taekan te babaire ni kabooaki, te anga karea ni kamaiu ao Ana akoi Iesu Kristo, ke aia reirei burabeti aika maiu. E riki aron maiu aei bon ibukin Ana Boki Moomon. Tuua ake inanona a buokai n tiku i aon kawain te berita n te aonaaba ae e a rikirake buakakana.

E berita Beretitenti Marion G. Romney, te kauoman ni kauntira ngkoa n te Moan Beretitentii:

“I namakinna bwa ngkana, inanon mweengara, a na wareware kaaro man Ana Boki Moomon ma te tataromwaaka ao ni katoa tai, i bon irouia ao ma natiia, tamnein te boki anne e na roko ni kaona mweengara ao iaoia naake a maeka iai. Tamnein te karinerine e na rikirake; te uaia ni karinerine ao tabeakinaia i bon imaretaia e na rikirake. E na akea tamnein te kakauntaeka. A na anga taeka n reirei kaaro nakoia natiia n te tangira ao n te wanawana ae korakora. A na waekoa ataei ni kaeka ao n ongotaeka nakon reirei mai irouia aia karo. E na rikirake te raoiroi. Te onimaki, te kantaninga ao te tangira ae kororaoi—ana tangira ae itiaki Kiristo—e na kaona mweengara ao maiura, n uota n rokoia te rau, te kimwareirei, ao te kukurei.”²

Ngke a reke niman natira aika a uarereke, e korakai ara utu ni iriira te reirei ni burabeti aio. Ti anaa te maan ae tao 18 namwakaina ni kabanea warekan Ana Boki Moomon. Teuana te iteraniba ae ti warekia n angiin te tai. Ngaira n tatabemaniira ti wareka teuana te kibu ao ti buoka natira te aine ae te bina, aua ana ririki, ni kaokioka te kibu imwiin temanna ae wareka te kibu nakoina. Ni katekeraoia ti bane n nako n amwarake i tinaniku, ao n ara tai n tekateka n te taibora I titirakiniia au utu bwa tera te karaki n Ana Boki Moomon ae a tatangiria. Karaki aikai iai karakin Aramwa ibuakoia Tioromwaite, mwanangaia ana utu Riaai nakon te aba ni berita, Ereman ao tanga ni buaka rorobuaka n ataei, Moomon ao Moronaai, ana mwakuri ni mitinare Amon, ao rairakin Aramwa te Tei. N tokina, natira te aine ae aua ana ririki e anga bwanaana. E taku, “Bon ti Iesu!” E reireiniira te reirei ae korakora n aia onimaki ataei n te bong anne.

E reirei Beretitenti Nelson:

“Ngkana I iangoa Ana Boki Moomon, I iangoa te taeka ae mwaaka. Koauan Ana Boki Moomon iai te mwaaka iai ni kamarurung, karaunano, ni kaokiko, buokiko, kakorakora, karaunano, ao kaungaa tamneira. . . . I berita bwa ngkana ko tataromwaaka ni kamatebwaia Ana Boki Moomon ni katoa bong, ko na karaoi rinerine aika tamaroa—ni katoa bong. I berita bwa ngkana ko iangoi baike ko kamatebwai, a na uki wintoon karawa, ao ko na karekei kaeka nakon am titiraki ao kairiiri ibukin oin maium.”³

E kaineti ana berita Moronaai nakoia ni kabane ake a wareka Ana Boki Moomon, bwa tao ai tibwa moan warekana ke ai te kanimabui n tai. Uringa te onimaki ao te tataro, te nano ae koaua, ma nanom raoi n reirei. N raonaki ma nanomatoam ni kamatebwai, ni iango, ao tataro, ngkoe naba ko na karekea te kakoaua ao ni butimwaea te kakabwaia ae tamaroa are e roko mai iai. E na kakorakoraaki aio ngkai ko tibwa te boki ao am koaua ma aomata tabeman.

I kaoko bwa ko na karika Ana Boki Moomon bwa mwakoron maium ni katoa bong. Reiakin reirei ake iai, kukurei ni karaki ake iai, ao iriiri bannaia ni katooto taan iriira raoi Iesu Kristo. I berita, bwa ngkana ko karaoia am onimaki iroun Kristo e na kakorakoraaki, ko na rinanon te kantaninga ae rikirake, ao rinanon ana nanoanga te Uea aika mwaiti, ko na namakina ana tangira te Atua ae e itiaki ni kaona nanom.