40 Aika Itiaki—40 Kakabwaia—Akea te Maninanti!

Te ware ae 40 bon te kanikinaa ae kakawaki nakoia IEbera rimoa. Inanon koroboki aika tabu e taekinaki 146 te tai ao e kona n tei ibukin ‘te tai ae e rangi ni maan’. Te katooto, e maeka Mote i Aikubita 40 te ririki, imwiin 40 te ririki n te rereua ngke e kairiia ana aomata ni kaotinakoia man te tautoronaki. E aki mamatam te Tia Kamaiu 40 te bong imwiin kaririana iroun te riaboro, ao a mwaiti riki. Irouia kaain te Ekaretia n te Cook Island, e koaua bwa a bon tataninga n te tai ae maan ni karekea aia kakabwaia n tamanuea—ao n Eberi 2023, 40 kaain te aro a karekei aia kakabwaia. A mwaiti kakai ae e kaota koauan aei inanon te wiiki ae onoti aei.

N te ririki ae nako, ngke taan kairiiri n te Mition i Nutiran a bairea kawarakin te aba ae tionako n te Cook Island ibukin te kauatai ni maungatabu n te mwakoro, a kaoa te Tamanuea man te Harbour Titeiki , Auckland Nutiran, ae Steven Stebbings, n raoniia ni karekea te tai ibukiia membwa ikekei ni karekea aia kakabwaia n tamanuea.

Te tamanuea ae Stebbings ao kainabana, Kathy, are bon ngaia naba ana tia koroboki, a roko n te aba inanon tain bwakan te karau ae rangi ni korakora. Tao e na iangoia temanna bwa anne e na kabwarai nanoia aomata ni mwananga. . . . E bon aki. Mitinare aika uoman aika kairake a kukurei n anga aia kaa nakon Te Tamanuea Stebbings ao Titita Stebbings bwa a na kabonganaa ngkai a tiku n te aba. Mitinare aikai a rangi ni kukurei ni kabongana te bwatika inanon te wiiki anne.

A roko Aika Itiaki iaan te karau ae korakora . . . a roko ma nanoia ae on n te kakaitau ao te iangainga nakon te bwai ae e nang riki. A roko bwa a na ongo ao n namakina ana tangira Tamaia are i Karawa ao Natina, Iesu Kristo. A roko bwa a na reiakina riki aroia are a kona n riki nako iai ao ana kakabwaia te Uea are e katauaroi ibukiia n tatabemaniia nako. A inenei n roko aomata—e korakora namakinan te tamnei, ao tangaia Stebbings a rinanon te kimwareirei ae tamaroa are e roko man te beku ibukin te Uea.

E taneiai te Tamanuea ae Stebbings n anga aua te kakabwaia n te wiiki; e kantaningaia bwa e na intawiuniia ao ni kakabwaiaia 15–20 te aomata, ngaia are e rangi ni kubanako bwa 40 kaain te aro aika man 12–74 te ririki aika a roko man abamwakoro nako Rarotonga ni karekei aia kakabwaia.

E taku Titita Stebbings bwa a moana aia mwakuri man te moaningabong ao a mwakuri ni karokoa te bong—ao rinanon korakaia, e boutokaia ao ni kakorakoraia te Uea bwa a aonga ni kakoroa nanona are a karaoia.

Te taneiai aei e moanaki inanon Beberuare 2023 ngke a roko Unimwaane Doneal White ao Titita Claudia White n te Cook Island ni beku n te mition are akea iai te Tamanuea n te Titeiki. N tain te kiraati n te tieminari n te moaningabong, a ongo bwa 14 ataein te reirei a tuanga aia tia reirei bwa a tuai karekei aia kakabwaia n tamanuea. E a moanaki te waaki ni mwakuri iaon aei ngaia are e a kariaiakaki te Tamanuea ae Stebbings bwa e na mwananga nakon te Cook Island n anga te kakabwaia are e tangiraki.

A taku Elder ao Titia White bwa a tataro ibukiia te Stebbings bwa a na roko ikekei—n te Cook Island, ao e bon nakoraoi taina—ma te maungatabu n te mwakoro n te tai anne, ao bon tain te motirawa n te reirei—n raonaki ma aia kaboo kairake n te butiboro n te aba n te wiiki anne are e karokoia kurubu aika uoua aika kaain te aro ibukin te kaboo—ao a konaa ni karekei aia kakabwaia.

Te Tamanuea ae Stebbings e anga kakabwaia n tamanuea nakoia kaain te aro ake a tau ao iai inanona taeka n reirei ae onoti mai iroun te Atua. “Te kakabwaia e bon katauaki bwa aiaron te mabe ni kawai are e buoka te aomata ni kairia rinanon maiuia,” e taku

“Ngkai te tamanuea, bon akea te kakabwaia ae I anga,” e taku Stebbings. “Ngkana I katokai baiu iaon atuun te aomata, I karekea te kairi mairoun te tamnei ao kaotioti ibukiia man mwaakan te Tamnei ae Raoiroi, are e a riki bwa aia kakabwaia.”

“Kakabwaia aikai aki riai ni katukaki ni kawakinaki ao n aki uringaki, ao a riai n aki karinaki n te kai n tamnei ke ni kaotaki,” e taku Stebbings. “E riai ni warekaki, ni iriiraki ao n tangiraki, ao e na buoka te aomata rinanon taai ni kangaanga, ao e na kairiia rinanon nako wakin maiuia.”