Te Tamnei e Kaira Te Tia Bwatere ni Kunea te Kawai ae Aki Kantaningaaki

“I moana te batere n te ballet ngke 7 au ririki ibukina bwa I tangiria ni kan riki bwa te natinuea te aine,” e taku Bianca Carnovale, mai Terinr, Aotiteria. Imwiin moanan ana kataneia, e reiakinna bwa te aonaaba ni mwaie e aki motirawa ni kauringa te bong ae te Tabati. E riai n rineia bwa e tei iaa.

Ngkai kaain Ana Ekaretia Iesu Kristo ibukiia Aika Itiaki ni Boong aika Kaitira, e kekeiaki Bianca ni kawakina te Tabati ni inaomata man te mwakuri ao waaki ni kakukurei riki tabeua are e na kairia nako man te nebonebo. Bwa tao te takakaro ke waaki ni kamataku, te rinerine ibukiia Aika Itiaki ni Boong aika Kaitira ni katikui waaki ni kakukurei aikai n te Tabati e kona n tabetai n riki bwa te kakaewenako n te namakin.

N aki tangiria n aki boutokaa temanna, n ataia bwa mwaie ake a reiakinaki n te Tabati a na kateaki kaia n akea ngaia, e inimaki naba iai Bianca. E na kangai ana tia reirei, “Akea te kambwana ae e na tangiriko; bukin tera a na rineiko iaon riki temanna ae e na mwaie n te Tabati?”

Ma e uringa Bianca, ngke e uarereke bwa 7 ana ririki, n taetae ma tinana iaon te mwaie n te Tabati. Ngke e riai n aki ira te ukeuke ao ni kamataku, marooro akanne a buoka Bianca ni mataata bwa kakukureian te Atua a bon rangi ni kakawaki.

E kamatebwai n ana reirei n ana tabo n te Marni’s School of Performing Arts ni karokoa 14 ana ririki, imwiina e tokanikai n reke ana tabo n te Pre-Professional Program n te National College of Dance i Newcastle, are uoua te aoa raroana man mweengana. Ibukin ririki ake teniua imwina, e maeka Bianca i Newcastle nimaua te bong n te wiiki, te taneiai are e katauraoia nakon mwaingina nako New York City, USA ni bon ti ngaia.

E ngae ngke e bon aki te roko ni mwaie n te Tabati, ngke e koro 17 ana ririki, e a butimwaeaki Bianca nakon te Ballet Academy East ae rianako atakina i New York, are e a reke iai ana tai ae kakukurei ni kamatebwaia aron te ballet ae te Balanchine.

E aki kakukurei n tainako. “Iai taai i New York, ae I raroanako mairouia raraou ni kabane ao au utu, I namakinna ae bon ti ngai,” e uringnga Bianca. “N tain tangiu n te tairiki teuana … I uringnga n tataro nakon Tamau are i Karawa ao ni butiia bwa E na [rabwatai]” I aki kona ni mwaninga te abue are e roota babaau. E ngae ngke e karikai bwa na tang riki, ni koauana bon ran ni mata ni kukurei, ao I a aaki namakina ae bon ti ngai.”

Imwiin ae tao uoua te ririki, e a kaina New York te buti n aoraki ae te COVID 19 ao ni kaoka Bianca nakon mweengana, are e a riai iai ni kakaea ana mwakuri, ma n teimatoa ni kataneiai ana mwaie ae te ballet. Imwiina, e a iangoia ma te tataromwaaka ibukin te mition ae bwanin taina, ma e anganaki te namakin bwa e na mwaing nako Melbourne are n ana kantaninga bwa e na rin n te Australian Ballet Company.

Inwiina e a manga moanaki naba te kainiin, ao n te tai ae tawe e a aikoa mwaie Bianca. E a moana mwaiena n te tabo ni kamanganga, bwa e aonga n reke otinakona, ma e tuanga tinana bwa e na kataa te ballet ni kamatakuaia aomata ngkana e a toki te kainiin. N te moan tai, e iango Bianca bwa bon te iango ae buakaka, ma ngke a kaungaa raoraona man te ekaretia, e a kataia ni karaoia.

E reiakin kaai ni mwaie Bianca n ana auti, imwiina e a otinako nakon taian kaawa ni kamataku iai. “N te moan tai, bon ti iai au bwai n ongoraa i atuu, ma I bon moana naba mwaieu. Imwiina e a reke au tibiika. Mai ikanne, I reiakin ni kabane aekan nako waaki ao aanga ni kamatakuaia aomata, ni kabonganaan bwai n totoko ao roobu n oona te tabo ni kamataku . . . ni katamaroa katean te mwaie . . . [ni kaira] te mwaiti n aomata. Kamatakuaia aomata bon te aonaaba ae boou.”

E bon teimatoa Bianca ni miia ae e na rin n te bootaki ni ballet. Ngkai e kamatakuia aomata, e teimatoa ni kataneiai ao ni karekeia kaain ana bootaki aika boou. Teuana te kambwana ae e nano irouna e titiraki, “Bukin tera ko aki … kamataku n te Tabati, ao imwiina ko nako n taromauri?” Man aron Bianca n tangiria ni kaotia ae te Tabati e riaon riki ae ti te nako n taromauri, e aki rereke taina n taekinna.

“I rangi n tangiria nikan mwaie ao n rangi ni bwakuaku,” e uringa Bianca. N ana tataro e bon tuanga Tamara are i Karawa bwa e na rangi n anaa te nano irouia taan mwaie ake a uarereke ngkana e reke nakon te kambwana ni ballet ao n aki mwakuri n te Tabati. “Ni manga taratara rikaaki, I bon ngare ngke I kataia n tuanga Tamara are i Karawa bwa tera ae e tamaroa.”

E uringa te reirei Bianca are e reiakinaki iroun Unimwaane D. Todd Christofferson: “Ti riai n aki iangoa ana babaire te Atua bwa te mitiin ni bobwai ae e tei n akea tokina are (1) ti rinea te kakabwaia are ti bon tangiria, (2) karina mwaitin te mwakuri ae tamaroa, ao (3) e a waekoa naba ni roko ara oota.”

“I ataia bwa Tamara are i Karawa e tangirai bwa n a mwaie,” e taku. “I ataia bwa E tangirai ni keiakina ae Nna rin nte kambwana ni ballet, ma n tain wakin nako te ririki e a mataata atakina ae E aki anganai te berita bwa ae N na bon rin n te kambwana teuana.”

Ririmwiian nanon miina ni kan mwakuri n te kambwana e a tia ni karika Bianca bwa te tia kamataku ae koro aron rabakauna, ma inanon Maati 2022, e a tia ni bon boutokaia ibon irouna man ana kamataku—te kawai are e a tia n aki ataaki mwiina.

N te taina ngke e mwaie n te bong teuana, e uringnga, “E a reke naba ae I nora ubun te teinaine ae 13 ana ririki n rangi n tokatoka. . . . I a tia n riki kanga aron te teinaine arei mai imwaina, ao I ataa te aeka n namakin anne. I kona ni karika te moangare ao te tang imoaia aomata; N n a bon aki onea mwiin te bwai anne n te bwai riki teuana … I aki toki n tangiria ni beku ibukiia tabeman . . . ngkai Tamau are i Karawa e katauraoa te tai ibukiu ni beku n te kawai ae onoti!”

“Te rin n te kambwana teuana e na kaunga te nano,” e reitia, “ma I taku bwa e na anaa riki te nano bwa N a kawakina Ana tua.”

E taku n te taina Beretitenti Russell M. Nelson, “Te ongotaeka e uota te tokanikai. Te ongotaeka ae matoa e uota te kakai.”

Ni manga taekina ana taeka, e taekinna Bianca: “E a tia Tamara are i Karawa n tuangai, ‘Ngkana ko kawakin au tua, N a kaotikakai nakoim ’.

“I onimakinna? Eng!”