Nō te mau ta’ata ato’a te ’evanelia ’e te tāra’ehara o Iesu Mesia

I teie mahana, te ora nei tātou i roto i te hō’ē ao tei mo’e e rave rahi o tōna mau tāpa’o. Tē fa’aha’amana’o pāpū mai nei te mau pāpa’ira’a mo’a ia tātou ē :

« e tae mai te mahana e tāpū-’ē-hia atu ai rātou mai rotopū atu i te mau ta’ata, ’oia ho’i ’o rātou ’o tē ’ore e fa’aro’o i te reo o te Fatu, ’e ’o tē ’ore ato’a ho’i e fa’aro’o i te reo o tōna mau tāvini, ’e ’o tē ’ore ato’a e ha’apa’o i te mau parau a te mau peropheta ’e te mau ’āpōsetolo ; nō te mea, ’ua fāriu ’ē atu rātou i tā’u mau ’ōro’a, ’e ’ua ’ōfati ho’i i tā’u fafaura’a mure ’ore ; ’Aita rātou e ’imi i te Fatu nō te fa’atupu i tāna parauti’a, tē haere nei rā te ta’ata tāta’itahi i tōna iho ra haere’a, ’ia au i te hōho’a o tōna iho atua, ’o tei au ho’i tōna hōho’a i te hōho’a o te ao nei » (Te Ha’api’ira’a Tumu ’e te mau Fafaura’a 1:14-16).

E arata’i te ’evanelia ia tātou i te parau mau mure ’ore, te hau ’e te ’oa’oa. Tē ha’api’i mai nei te ’evanelia ia tātou ē, e mau tamari’i here tātou pā’āto’a nā tō tātou Metua i te ao ra, tei hāmanihia ’ia au i tōna hōho’a. ’Ia māramarama ana’e tātou i tō tātou ihota’ata hanahana, e ’ite tātou i te hō’ē here fāito ’ore o tē nā ni’a roa a’e i tā tātou mau hape ’e tō tātou mau paruparu.

’Ei melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei, ’ua ha’amaita’ihia tātou i te ’ite i te ’īra’a o te ’evanelia ’e i te tāra’ehara a tō tātou Fa’aora o Iesu Mesia, tei riro ’ei rā’au nō tō tātou ao. Nō reira te Fatu e fa’aitoito ai ia tātou tāta’itahi—tei fa’ari’i ’ia rave i tōna i’oa i ni’a ia tātou i roto i te pāpetitora’a—nō te poro i te tāna ’evanelia. ’Ia riro tātou ’ei mau ti’a hau nō tāna ’evanelia i tō te ao nei, ’e nō reira e tītauhia ai ia tātou ’ia ora i tāna ’evanelia. Te ’evanelia a Iesu Mesia o te hō’ē ïa parau poro’i nō te here ’e nō te fa’aorara’a nō te mau ta’ata ato’a.

Tō tātou pūpūra’a ia tātou i te ’ohipa misiōnare, o te hō’ē ïa fa’a’itera’a faufa’a o tō tātou ti’aturira’a i te « aura’a o te ’evanelia nō te ao ato’a nei ». Tē fa’a’ite nei tō tātou mau misiōnare i te vārua o te fa’aterera’a a te Mesia, ma te toro i te rima i te feiā i vaiihohia i te hiti ’e te fa’ari’i ma te here i te feiā ato’a tei ineine ’ia fa’aro’o ia rātou. Tē hōpoi nei rātou i te māramarama o te parau poro’i o te ’evanelia nā te mau ta’ata ato’a, ma te ha’apāpū ē, e roa’a i te mau ta’ata ato’a te here o te Atua ’e te tāra’ehara a Iesu Mesia.

Tē fa’ahōho’a nehenehe nei te 2 Néphi 26:33 i teie parau mau :

« … ’Ua ani ’oia[te Fatu] ia rātou ato’a ’ia haere mai iāna ra ’e ’ia fa’ari’i i tōna maita’i ; ’e ’aita roa ’oia e pāto’i i te hō’ē ’ia haere mai iāna ra, te ’ere’ere ’e te ’uo’uo, te tītī ’e te ti’amā, te tāne ’e te vahine ; ’e ’ua ha’amana’o ato’a ’oia i te feiā ’ētene ; e hō’ē ana’e rātou ato’a i mua i te Atua, te ’āti Iuda ’e te ’Ētene ato’a ho’i ».

E ti’a ia tātou ’ia ha’amana’o ē, e tamari’i nā te Atua te mau ta’ata tāta’itahi tā tātou e fārerei, e ti’a ia fa’ari’i i te here, te fa’atura ’e te ti’ara’a ’ia fa’aro’o i te parau poro’i o te ’evanelia. I roto i te Alama 16:16, tē fa’aha’amana’ohia mai nei ia tātou ē, ’e nīni’i te Fatu i « tōna Vārua i ni’a i te fenua tā’āto’a nō te fa’aineine i te mana’o o te mau tamari’i a te ta’ata, ’oia ho’i, nō te fa’aineine i tō rātou ’ā’au ’ia fāri’i i te parau e ha’api’ihia ia rātou i te taime nō tōna taera’a mai ».

Te tahi ato’a huru faufa’a o tā tātou ha’api’ira’a tumu, o te ti’aturira’a ïa i te huru mure ’ore o te mau ’utuāfare ’e i te ti’ara’a o te mau u’i ato’a ’ia fa’aorahia. I roto i tā tātou mau hiero, tē rave nei tātou i te mau ’ōro’a nō tō tātou mau tupuna i pohe. Nā teie ’ohipa mo’a e ha’apāpū i tō tātou ti’aturira’a ē, e roa’a te fa’aorara’a i te mau ta’ata ato’a, tae noa atu i te feiā tei ’ore i fāna’o ’ia fa’aro’o i te ’evanelia a ora ai rātou.

’Ua riro tō tātou hōro’ara’a i tō tātou taime i roto i te ’ohipa nō te hiero ’ei fa’a’itera’a ē, e tae roa te here o te Atua i ’ō atu i te mau ’ōti’a o teie orara’a. Te aura’a ra, tē ta’a ra ïa tātou ē, tē hōro’a nei te tāra’ehara o Iesu Mesia i te tīa’ira’a ’e te fa’aorara’a ’eiaha i te feiā ora ana’e, i te feiā ato’a rā i ’ō mai i te pāruru.

Te tāra’ehara ’o Iesu Mesia, o te niu ïa o tō tātou fa’aro’o. Nā roto i tāna tusia tāra’ehara, ’ua rave ’oia i ni’a iāna i tā tātou mau hara, tō tātou mau mamae ’e tō tātou mau ’ati, ma te hōro’a ia tātou i te ti’ara’a ’ia tātarahapa ’e ’ia fa’ari’i i te fa’a’orera’a hara hanahana. E hōro’a te reira nō te tā’āto’ara’a, e roa’a i te feiā ato’a e fa’ari’i i te Fatu ma te ha’eha’a roto i tō rātou orara’a.

E ti’a ana’e ma te ’aueue ’ore i roto i te parau mau ē, nō tātou pā’āto’a mau te ’evanelia ’e te tāra’ehara a Iesu Mesia. E parau poro’i nō te tīa’i, nō te fa’aorara’a ’e nō te ha’amaita’ira’a mure ’ore, tei hōro’a-tāmoni-’ore-hia i te mau vārua ato’a e hina’aro e ha’api’i hau atu ā. E toro ana’e i te rima ma te here, te aroha ’e te aumauiui i tō tātou mau taea’e ’e mau tuahine, ma te ’ite ē, ’o tātou te mau mauha’a nō tāna fa’anahora’a hanahana, nō te hōro’a i te fa’aorara’a i te mau ta’ata ato’a.

’Ei ’ōpanira’a, tē fa’a’ite pāpū nei au ē, e parau mau te ’evanelia a Iesu Mesia ’e te mana nō tōna tāra’ehara. E pure tātou ’ia hō’ē tātou i roto i tā tātou fafaura’a ’ia pe’e i te Mesia ’e ’ia ha’apuroro i teie parau ’āpī maita’i i te mau tamari’i ato’a a te Atua, noa atu tō rātou huru orara’a ’e tō rātou tupura’a. E hina’aro mau tō te ao i te ’evanelia ’e i te tāra’ehara a Iesu Mesia i roto i tō rātou orara’a. E fa’aora ’āmui ana’e ia rātou. Nā roto i te i’oa mo’a ’o Iesu Mesia, ’āmene.