I te 78 o tōna matahiti, ’ua fa’a’ana’ana ’oia i te māramarama o te ’evanelia

’Ua fa’a’ana’ana te taea’e John William Orth, 78 matahiti, i te māramarama o te ’evanelia noa atu tāna ’arora’a i te ma’i Parkinson. ’Ua riro ’o John ’ei melo ha’apa’o nō te ’Ēkālesia a Iesu Mesia i te Feiā Mo’a i te mau Mahana Hope’a nei i te tā’āto’ara’a o tōna orara’a, ma te amo e rave rahi pi’ira’a, te ti’ara’a ’ēpisekōpo ihoa rā. A pae matahiti i teie nei, i muri a’e i te hō’ē ’arora’a roa i roto i te ma’i, ’ua tītauhia ia John ’ia fa’aea i roto i te mau fare Lutero i Glynde, i Auteraria apato’a, e vāhi fa’aeara’a nō te feiā ruhiruhiā, fa’aterehia ’e te ’Ēkālesia Lutero.

Ta’a’ē noa atu tōna mau fifi i te pae nō te ea, ’ua vai itoito noa ’o John, ’e ’ua ’apiti itoito ’oia i roto i tōna fa’aeara’a Lutero, tei hōro’a mai i te mau purera’a ’e te mau ha’api’ira’a fa’aterehia e te hō’ē ’orometua rave tāmau. Tau taime i muri a’e i tōna tomora’a i roto i taua fa’aeara’a ra, ’ua fa’aro’o ’o John ē, ’e’ita te ’orometua e haere mai nō te tahi tau taime, ’e ’ua parau ’oia ē, e nehenehe te tahi mau ta’ata e fa’aea ra i reira e fa’atere i te mau ha’api’ira’a – e ’oa’oa roa ’o John ’ia fa’atere ’oia i te tahi ha’api’ira’a, mai te mea e tītauhia. ’Ua fa’ari’i te ’orometua i te reira mana’o ’e, mai taua taime ra, ’ua ha’api’i ’o John e rave rahi mau ha’api’ira’a, ’e hō’ē ha’apurorora’a i te hepetoma (mai te mea ’aita ’oia e fifi i te pae nō te ea) i ni’a i te ’āfata teata nō reira iho, ha’apurorohia i mua e rave rahi hanere feiā e fa’aea ra i reira ’e i roto i te ’oire tāpiri mai.

Noa atu ē, e fifi ri’i ’oia i te pae nō te ea, e hōro’a ’o John e rave rahi hora i te hepetoma nō te fa’aineine i tāna mau ha’api’ira’a, ma te fa’a’ite i te tahi mau video ’e i te tahi atu mau materia ha’api’ira’a a te ’Ēkālesia a Iesu Mesia i te Feiā Mo’a i te mau mahana hope’a nei. I te ha’amatara’a, e hi’opo’a te ’orometua i te ha’api’ira’a tāta’itahi hou a vauvauhia ai, terā rā i teie nei, ’aita ’oia e ha’ape’ape’a fa’ahou nō ni’a i te mau ha’api’ira’a a John. Nā roto i te mau ha’api’ira’a a John ’ua ti’a ïa ’ia tu’u e rave rahi mau Buka a Moromona i pīha’i iho i te mau ta’ata e noho ra i reira, ’e e rave rahi o rātou tei ani mai iāna ’ia paraparau i te mau tumu parau pāpū maita’i. E fa’ahiti ’oia ma te here i te hō’ē o te reira mau anira’a, tei fa’ahope’a nā roto i te hō’ē ha’api’ira’a e pae hepetoma nō ni’a i te aroha.

’Ua fa’atupu ato’a ’o John i te tahi atu mau tauira’a i roto i taua fa’aeara’a ra. ’Ua fa’aineine ’oia i te tahi mau tāpura ha’api’ira’a taurainahia nō te hōro’a i te mau ta’ata i te hō’ē fa’a’itera’a poto nō ni’a i tā rātou mau pure. I teie nei, e ha’amaita’i rātou i te mā’a i te taime tāmā’ara’a, ’e e hōro’a i te hō’ē mana’o fa’aitoitora’a pae vārua i roto i tā rātou mau putuputura’a nō te fa’aterera’a ’e nō te mau ta’ata e noho ra i reira. Te ti’aturi nei ’oia ē, e fa’aitoito te reira ia rātou ’ia pure pinepine a’e ’e ’ia ha’amana’o noa i te fa’anahora’a nō te fa’aorara’a.

’Ua ’ite pāpū ’o John ē, tāna misiōni, o te fa’a’itera’a ïa i te ’evanelia i tōna mau ta’ata e fa’aea ra i roto i te fa’aeara’a nō te feiā ruhiruhiā, nō te fa’aineine ia rātou nō te tahi atu mau ha’api’ira’a ’e ’ia fa’atupu i te mana’o ti’aturi i te feiā e mata’u nei i te mau mea e tupu mai i ni’a ia rātou. Tē hina’aro nei ’oia ’ia tupu te mana’o maita’i i roto ia rātou nō ni’a i te orara’a i ’ō mai i te pāruru, ’e ’ia ’ite rātou i te here ’o tō tātou Metua i te ao ra. ’Ia pohe ana’e te hō’ē ta’ata i reira, e fa’aineine ’o John i tōna ’ā’amu ’utuāfare ’e e fa’atae atu ’oia i tāna mau i’oa ’ia ti’a i te ’ohipa nō te hiero ’ia ravehia, mai te mea e ti’a i te reira.

Ma te hitimahuta ’ore, tāna pāpa’ira’a mo’a au roa, o te Mosia 2:17 ïa : « ’E inaha, e fa’a’ite atu vau ia ’outou i teie mau mea, ’ia ha’api’i mai ’outou i te pa’ari ; ’ia ’ite ho’i ’outou ē, ’a tāvini ai ’outou i tō ’outou mau ta’ata tupu, tē tāvini ra ïa ’outou i tō ’outou Atua ».

I te matahiti 2023, ma te mana’o ’ore-hia,’ua fa’ari’i ’o John ia Paul Whippy, nō te Hitu ’ahuru, nō te Ārea nō Pātifita nō te ’Ēkālesia. ’Ua maere ’o Elder Whippy i te hi’ora’a o te here ’e te tāvinira’a o John ’e ’ua fa’a’ite ’oia i te reira ia Elder Taniela B. Wakolo, ti’a fa’atere nō te autahu’ara’a i roto i te peresidenira’a o te Ārea.

I te fa’a’ite-ra’a-hia ia John ē, tē hina’aro ato’a ra te taea’e Wakolo e fārerei iāna, ’ua tītau ’oia i te mau tū’ati ma’i nō te ha’apāpū ē, e nehenehe ’oia e ti’a i ni’a ’e ’ia ’o’omo i tōna ’ahu ’ekālesia, ma te ineine nō te fārereira’a. I roto i taua nā fārereira’a ra, ’ua fa’a’ite ’o John i tōna ’itera’a pāpū i te mau peresibutero ’e i te tahi mau ha’api’ira’a tāna i ’apo mai i roto i te roara’a o te mau matahiti tōna tāvinira’a i te ’Ēkālesia ma te itoito.

E mea here-rahi-hia ’o John nā tōna hoa fa’aipoipo, ’o Diana ’e nā tāna nā tamaiti e pae : Benjamin, John William Junior, David, Andy, Sam ’e tō rātou ’utuāfare. E mea ha’apeu ho’i nā rātou tāna tāvinira’a tāmau mai te Mesia te huru ’e tē pe’e nei rātou i tōna hi’ora’a i roto i tō rātou iho mau pi’ira’a i roto i tā rātou mau paroisa ’e tā rātou mau titi.

I te matahiti 2018, ’ua parau Russell M. Nelson : « Tē ha’ape’epe’e nei te Fatu i tāna ’ohipa nō te ha’aputuputura’a ia Iseraela. Taua haʼaputuputuraʼa ʼo te ʼohipa faufaʼa rahi roa ïa ʼo tē tupu nei i niʼa i te fenua nei i teie mahana. ’Aore hō’ē ’ohipa rahi atu e fa’aauhia i te reira, ’aore hō’ē ’ohipa faufa’a atu e fa’aauhia i te reira, ’aore e ’ohipa hanahana atu e fa’aauhia i te reira ».¹

’Ua fa’ari’i te taea’e John Orth i te fa’ahitira’a parau a te peresideni Nelson ’e tē rave nei ’oia i te mau mea ato’a e ti’a iāna ’ia rave nō te ha’aputuputu ia Iserala i nā pae e piti o te pāruru. E hi’ora’a fa’ahiahia ’oia nō ni’a i te vaiihora’a i tōna māramarama ’ia ’ana’ana ’e ’ia tāmau noa e tae atu i te hope’a, noa atu te mau tāmatara’a ’e te mau fifi o te orara’a.