Fa’ariro i te mahana sabati ei mahana hina’arohia nā roto i te tusia

Oleni ’e ’o Ana Ngungutau, e nā ta’ata fa’aipoipo-’āpī-hia i Sydney, Auteraria, ’ua ha’amata rāua i tō rāua orara’a ’āmui nā roto i te purera’a nō te ’ite i te mea tā te Fatu i fa’ata’a nā rāua ’ia ha’api’i mai. Tau taime i muri mai, ’ua fa’ari’i ’o Oleni i te hō’ē parau fa’aau e 2 matahiti te maoro nō te ha’uti i roto i te hō’ē taiete fa’ahoro pōpō nō Griffith, hō’ē ’oire na’ina’i e ono hora te ātea ia Sydney. I muri a’e i te mau ’āparaura’a ’e te mau pure e rave rahi, ’ua fa’aoti rāua ’ia fa’ari’i i te reira hōro’ara’a ’e ’ua ’aufau te taiete i te tahi mau tino moni nō te tauturu i te ’utuāfare ’ia haere e fa’aea i roto i te ’oire ’āpī.

’Ua maere teie nā ta’ata i te mea ē, i te ha’amatara’a te mau ha’utira’a, ’ua ’ite a’era rāua ē, e rave rahi ha’utira’a tei fa’anahohia nō te sābati. Tō rāua mana’o mātāmua o te tauturu ïa a te taiete i tō rāua taera’a mai. ’Ua fa’a’ite pāpū te peresideni ē, e fa’aho’i ’o Oleni i tāna tārahu nā roto i te ha’utira’a i roto i te mau ha’utira’a i fa’ata’ahia.

’Ua parau ’o Oleni : « I te tau a ha’uti ai au i Sydney… pauroa tā mātou mau ha’utira’a fa’ahorora’a pōpō, e tupu te reira i te mahana mā’a. E mea ’āpī te reira no’u, ’e ’aita vau e au roa ’ia ha’uti i te sābati. . ’Ua feruri au ē, e mea ti’a iā’u ’ia paraparau i te reira fifi i tā’u taiete.

Tau taime ri’i i muri a’e i te reira ’āparaura’a, ’ua tupu mai te COVID-19 ’e ’ua fa’a’orehia te pu’e tau ha’utira’a nō te reira matahiti. ’Ua ’ite ’o Oleni ē, e pāhonora’a te reira i tāna pure, terā rā, ’ua fa’aroahia tāna parau fa’aaura’a e piti matahiti hau ’ia ti’a iāna ’ia ha’uti hō’ē pu’e tau ha’utira’a tā’āto’a ’e ’ia tūmā i tāna tārahu i te taiete.

Tē ha’amana’o ra ’o Oleni ē, : « A piri noa mai ai te pu’e tau ha’utira’a ’āpī i te matahiti 2021, ’ua fa’aara vau i [te peresideni nō te taiete] ē, ’e’ita vau e ha’uti i te sābati ’e e ’imi au i te hō’ē rāve’a nō te fa’aho’i i tā’u tārahu. ’Ua parau mai ’oia iā’u ē, e piti tā’u mā’itira’a : « E ha’uti » ’aore rā « E ’aufau ». ’Ua ’ite pāpū vau ē, te ’ohipa maita’i e ti’a ’ia rave, ’o te fa’aturara’a ïa i te fa’auera’a a a te Fatu ’e e fa’a’ite mai ’oia iā’u i te ’ē’a.

’Ua fārerei ’oia i tōna ’ēpisekōpo nō te fāri’i i te tāmāhanahanara’a ’e i te mau parau a’o ’e ’ua pāpū ’oia ē, ’ua tāno tāna fa’aotira’a. « ’Ua taniuniu fa’ahou vau i te peresideni ’e ’ua parau vau iāna ē, [e fa’aru’e] au i te taiete ’e e fa’aho’i au i tā’u tārahu. ’Ua hōro’a mai rātou iā’u ’ahuru ’āva’e nō te rave i te reira.

’Ua fa’aoti ’o Ngungutau mā ē, e rave itoito rāua i te ’ohipa nō te fa’aho’i i tā rāua tārahu ’e e tāvini itoito atu ā rāua i roto i tō rāua pi’ira’a ’ei mau ’orometua nō te ha’api’ira’a ’evanelia. ’Ua pāpū roa ia rāua ē, mai te mea ē, e ha’apa’o rāua i tā rāua tuha’a, e hōro’a mai te Fatu ia rāua i te hō’ē rāve’a.

« I muri a’e i tā’u fa’aotira’a ’ia ha’amo’a i te mahana sābati… ’ua ha’amaita’i mai tō tātou Metua i te ao ra ia māua nā roto i te mau rāve’a e rave rahi. ’Ua matara te mau ’ūputa ’e ’ua fāri’i au i te hō’ē ha’amara’ara’a o te moni ’āva’e i roto i tā’u ’ohipa », te parau ïa a Oleni. Tau ’āva’e i muri mai, ’ua ha’amau ’o Oleni i tāna iho taiete ’ohipa ’e ’ua ti’a iāna ’ia fa’aho’i ’oi’oi a’e i te tārahu a te taiete. E nehenehe ïa i teie nā ta’ata fa’aipoipo ’ia ho’i i Sydney.

I taua taime ra tō Oleni fa’ari’ira’a i te hō’ē niuniu nō te fārerei i tōna peresideni titi, tei ani iāna ’ia riro ’ei ’ēpisekōpo nō te pāroita nō Griffith, te titi nō Riverina. « Ua riro mau ’ei hitimahutara’a » tē ha’amana’o ra oia. « ’Ua riro te tere ho’ira’a i te fare ’ei taime māniania ’ore ’e te ta’i ». I tō rāua taera’a i te fare, ’ua tūturi ’o Oleni ’e ’o Ana nō te pure, ’e ’ua ani i te tāmāhanahana i tō tātou Metua i te ao ra.

Tē ha’amana’o ra ’o Oleni : « I taua taime ra tō te vārua ha’apāpūra’a mai iā’u ē, ’aita vau i fa’aru’e ia Sydney nō te ha’uti i te fa’ahoro pōpō. ’Ua arata’i mai tō tātou Metua i te ao ra iā’u i ’onei nō te tāvini i tāna mau tamari’i ’e ’ia riro ’ei mauha’a i roto i te patura’a i tōna bāsileia i roto i teie tuha’a ’o tāna ’ovine. I teienei, ’aita māua e mana’o nei e ho’i i Sydney, e tāvini rā ma tō māua ’ā’au ato’a, tō māua mana ato’a, tō māua vārua ’e tō māua pūai i roto i teie pi’ira’a. Tae roa mai i teie taime, ’ua ’ite au i te rima o te Fatu i roto i tā’u tāvinira’a ’e e here rahi tō’u i tā’u pāroita ’e i teie ’ohipa rahi.

« ’Ua ’ite au ē, ’ua fa’atusia te Fa’aora i tōna ora no’u, ’e te mau mea ato’a tā’u e nehenehe e rave nō te fa’aho’ira’a, o te fa’aitoitora’a ïa ’ia ha’apa’o ’e ’ia fa’atura i tāna mau fa’auera’a. ’Ia hi’a ana’e au, ’ua ’ite au ē, e nehenehe tā’u e fāriu i ni’a i tōna tāra’ehara nō te ti’a i ni’a ’e nō te fa’aitoito iā’u nō te haere tāmau i mua. E ha’amaita’ira’a te fa’aturara’a i te mahana sābati. ’Ua ’ite au ē, ’ia ha’apa’o ana’e tātou i teie fa’auera’a, ’e fa’a’īhia tō tātou orara’a i te māramarama ’e i te pa’ari nō te ha’amaita’i ia vetahi ’ē i roto i te hepetoma ».