Te parau poro’i a te Fa’aora no’u

Tē ’aro nei au i te mana’o pe’ape’a a hitu matahiti i teie nei, ’e ’ua ’ite au i tō’u Fa’aora i pīha’i iho iā’u i te mau ta’ahira’a ato’a o te ’ē’a. ’Ua fa’aitoito ’oia iā’u i roto i tō’u fa’aorara’a ’e tē pāturu tāmau nei ’oia iā’u i roto i tō’u mau mahana ’ino. ’E’ita ’oia e vaiiho noa iā’u ma te tāmāhanahana ’ore ’e e rave rahi mau ’itera’a tā’u e nehenehe e fa’a’ite nō ni’a i te huru o tō’u ha’afātatara’a iāna.

’Ua tupu te hō’ē ’ohipa faufa’a roa i roto i tā’u matahiti mātāmua nō te ha’api’ira’a ’evanelia. Tē tuatāpapa ra mātou i te Buka a Moromona ’e e mea fifi roa taua matahiti ra nō’u i te pae nō te ea o te ferurira’a. Terā rā ’ua fa’aitoito vau ’ia tāpae i te ’opuara’a tā tō’u ’orometua i fa’ata’a, ’e ’ia tai’o i te Buka a Moromona mai te ha’amatara’a ’e tae atu i te hope’a (nō te taime mātāmua). E au te tai’ora’a i te reira mai te hō’ē māramarama i roto i te pōiri ’ārepurepu, ’e i te hō’ē pō, ’ua tae au i ni’a i te 3 Néphi 13:31-34. Tē paraparau ra Iesu i te ’ati Nephi, i te nā-’ō-ra’a ē :

« Nō reira ’eiaha e tapitapi tō ’outou mana’o, i te nā-’ō-ra’a ē : E aha tā mātou e ’amu ? ’e ’aore rā, E aha tā mātou e inu ? ’e ’aore rā, E aha tō mātou ’ahu ’ia ’ahu ?

« ’Ua ’ite ho’i tō ’outou Metua i te ao ra ē, ’ua ti’a roa ’ia noa’a teie mau mea ato’a ia ’outou.

’A ’imi na rā ’outou nā mua roa i te bāsileia o te Atua ’e te parauti’a nāna ; ’e e ’āmuihia mai teie mau mea ato’a ia ’outou na.

« Nō reira ’eiaha e tapitapi tō ’outou mana’o i tō ananahi ra, nā ananahi ho’i e feruri i te mau mea nōna iho ».

Ua tae mai te vārua i roto iā’u a tai’o ai au i te reira mau ’īrava, ma te ha’amāramarama i te pāpa’ira’a i ni’a i tā’u niuniu—ma te ha’ame’ume’u i te reira, ma te huti i te rēni i raro a’e, ma te parau mai iā’u, e ti’a ia ’oe ’ia fa’aro’o i teie—’e ’ua tupu te māhanahana i roto iā’u, mai te huru ē, ’ua hōro’ahia mai te hō’ē ’ahu ta’oto iā’u, ma te fa’aro’o i te mau parau mai te huru ē, te Fa’aora iho teie e paraparau mai nei iā’u. E hōtaratarahia vau i te mau taime ato’a e tai’o vau i te reira mau ’īrava nō te mea e mea mana te reira ’ia fa’aro’o.

Maoti teie mau pāpa’ira’a mo’a, ’ua ’ite au ē, ’ua ’ite te Metua i te ao ra i tō’u mau hepohepo ato’a. ’Ua ’ite ’oia i taua taime ra ē, ’ua tūtava vau i e mau mahana ato’a, ’ua ’ite pāpū ’oia i te mea tā’u i hina’aro ’ia fa’aro’o nō te fa’ari’i i te tāmāhanahana. Mai te huru ra ē, ’ua fa’atu’atihia te tuha’a hope’a o te hō’ē puzzle, ’e mai taua taime ra, e mā’iti au ’ia ’imi i te bāsileia o te ao ma te hau atu te itoito, mai tā Iesu Mesia i fa’ata’a, nō te fa’a’ī i te toe’a o te hōho’a. ’Ua rave au i tē mara’a iā’u nō te ha’amana’o tāmau noa iāna, ’e mai taua taime ra, ’ua tupu marū noa i te rahi tō’u ’itera’a pāpū.

’Ei ha’apāpūra’a, ’aita tō’u mana’o hepohepo i ’ore. ’Aita vau i ora temeio i te reira iho taime—e mea ’ōhie a’e tō’u fa’aorara’a i teie nei, terā rā, te haere noa ra. Terā rā, nā roto i tō’u ’atira’a i te Fa’aora, ’ua ha’amāmā ’oia i te hopoi’a tā’u i amo. ’Ua ora mai au. E ha’amāuruuru vau ia Iesu Mesia nō te mau mea ato’a, ’e tē tāmau noa nei au i te hi’o ’e i te ’aro nō te bāsileia o te Atua. ’Ua riro te tai’ora’a i taua mau ’īrava ra ’ei taime faufa’a roa i roto i tō’u orara’a—’ua fāriu atu vau i ni’a iāna ’e ’ua ’imi au iāna, ma te ’ite ē, te mau mea ato’a tā’u i ha’ape’ape’a, e ’āfaro ïa i te hō’ē mahana.