Faaolataga

I le aoaoga faavae o Le Ekalesia a Iesu Keriso o le Au Paia o Aso e Gata Ai, o upu “faaolaina” ma le “faaolataga” e i ai ni uiga eseese. E pei ona faaaogaina i le Roma 10:9–10, o upu “faaolaina” ma le “faaolataga” e faailoga ai se faiā faalefeagaiga ma Iesu Keriso. E ala i lenei faiā faalefeagaiga, ua faamautinoa atu ai i soo o Keriso le faaolataga mai taunuuga e faavavau o agasala pe afai latou te usiusitai. O le “faaolataga” ma le “faaolaina” o loo faaaogaina foi i tusitusiga paia i isi anotusi ma nai isi faauigaga eseese.

Afai e fesili atu se tasi pe ua faaolaina se isi tagata, o le a faalagolago le tali i le agaga o loo faaaogaina ai le upu. O le tali atonu o le “Ioe” pe atonu foi o le “Ioe, ae i ai ona tuutuuga.” O faamalamalamaga nei o loo faataatitia atu ai ni faauigaga eseese e ono o le upu faaolataga.

Faaolataga mai le Oti Faaletino. E ui ina oti tagata uma. Ae e ala mai i le Togiola ma le Toetu o Iesu Keriso, o le a toetutu ai tagata uma ma—laveaiina mai le oti faaletino. Na molimau Paulo, “Aua e faapei ona oti uma ia Atamu, e faapea foi ona faaolaina uma ia Keriso” (1 Korinito 15:22), I lenei uiga, e faaolaina tagata uma, e tusa lava po o a filifiliga sa faia i lenei olaga. O se meaalofa fua lea mai le Faaola i tagata uma.

Faaolataga mai le Agasala. Ina ia faamamaina mai agasala e ala i le Togiola a le Faaola, e ao i se tagata ona faaali le faatuatua ia Iesu Keriso, salamo, ia papatisoina, maua le meaalofa o le Agaga Paia (tagai Galuega 2:37–38). O i latou ua papatisoina ma ua maua le Agaga Paia e ala i le pule tatau o le perisitua ua faaolaina i tuutuuga mai le agasala. I lenei agaga, o le faaolataga e i ai ona tuaoi, e faalagolago i le faamaoni faifaipea o se tagata, po o le tutumau seia oo i le iuga i le tausiga o poloaiga a le Atua (tagai 2 Peteru 2:20–22).

E le mafai ona faaolaina tagata taitasi i a latou agasala; e le mafai ona latou maua le faaolataga le faatuaoia i le na’o le folafola atu o se talitonuga ia Keriso ma le malamalama e faapea, o le a iu ina latou solia agasala i le aluga o aso o totoe o o latou olaga (tagai Alema 11:36–37). E ui i lea, e ala i le alofa tunoa o le Atua, e mafai ai ona faaolaina tagata uma mai a latou agasala (tagai 2 Nifae 25:23; Helamana 5:10–11) pe a latou salamo ma mulimuli ia Iesu Keriso.

Toe Fanauina. E tele taimi o loo tau mai ai i tusitusiga paia le mataupu faavae o le toe fanaufouina faaleagaga. O le Feagaiga Fou o loo i ai aoaoga a Iesu e faapea, e ao i tagata uma ona toe fanaufouina ma o i latou e le “fanau … i le vai ma le Agaga, e le mafai ona sao o ia i le malo o le Atua” (Ioane 3:5). O loo faamautuina mai lenei aoaoga i le Tusi a Mamona: “E ao i le fanauga uma a tagata, ioe, o tane ma fafine, o atunuu uma, ituaiga, gagana eseese ma nuu, ona toe fanauina; ioe, fananauina i le Atua, ma suia mai lo latou tulaga faaletino ma paʼū, i se tulaga o le amiotonu, ua togiolaina e le Atua, ma avea ma ona atalii ma afafine; ma faapea ona avea ai i latou ma tagata fou; ma vagana ai ua latou faia lenei mea, e leai se ala latou te mafai ai ona fai mo latou tofi le malo o le Atua” (Mosaea 27:25–26).

E tupu lenei toe fanaufouina pe a papatiso tagata ma maua le meaalofa o le Agaga Paia. E oo mai o se taunuuga o se lotomalie “e ulu atu i se feagaiga ma lo matou Atua e fai lona finagalo, ma usiusitai i ana poloaiga i mea uma e poloaiina ai i matou e ia, i o matou aso uma o totoe” (Mosaea 5:5). E ala i lenei faagasologa, “ua liua o [latou] loto e ala i le faatuatua i Lona suafa; o lea, ua fanauina ai [latou] e Ia” (Mosaea 5:7). O i latou uma o e ua salamo moni, ma papatisoina, ma maua le meaalofa o le Agaga Paia, ma osia le feagaiga ia tauave i o latou luga le suafa o Iesu Keriso, ma lagonaina Lana faatosinaga i o latou olaga, e mafai ona faapea mai ua toe fanaufouina i latou. O lena toe fanaufouina e mafai ona faafouina i Sapati taitasi pe a latou taumamafa i le faamanatuga.

Faaolataga mai le Valea. E toatele tagata e ola i se tulaga o le pogisa, e le o iloa le malamalama o le talalelei toefuataiina. O loo “taofia i latou mai le upumoni ona ua latou le iloa le mea e maua mai ai“ (Mataupu Faavae ma Feagaiga 123:12). O i latou ua i ai se malamalama e uiga i le Atua le Tama, Iesu Keriso, le faamoemoega o le olaga, le fuafuaga o le faaolataga, ma o latou gafatia e faavavau ua faaolaina mai lenei tuutuuga. Latou te mulimuli i le Faaola, o le na tautino mai, “O A’u nei o le malamalama o le lalolagi; o le mulimuli mai ia te au, e le savali o ia i le pouliuli, a e ia te ia le malamalama o le ola” (Ioane 8:12).

Faaolataga mai le Oti Faalua. O nisi taimi e talanoa mai ai tusitusiga paia e uiga i le faaolataga mai le oti faalua. O le oti faalua o le oti faaleagaga mulimuli lea—o le vavae ese mai le amiotonu ma teenaina se nofoaga i soo se malo o le mamalu (tagai Alema 12:32; Mataupu Faavae ma Feagaiga 88:24). O le a le oo mai le oti faalua seia oo mai le Faamasinoga Mulimuli, ma o le a oo mai i na o nai tagata toalaiti (tagai i le Mataupu Faavae ma Feagaiga 76:31–37). E toetoe lava o tagata uma o e na ola i le lalolagi ua faamautinoaina le faaolataga mai le oti faalua (tagai i le Mataupu Faavae ma Feagaiga 76:40–45).

Ola e Faavavau po o le Faaeaga. I tusitusiga paia, o upu faaolaina ma le faaolataga e masani ona faatatau i le ola e faavavau, po o le faaeaga (tagai Aperaamo 2:11). O le ola e faavavau o le iloa lea o le Tama Faalelagi ma Iesu Keriso ma nonofo faatasi ma i Laua e faavavau—e mautofi i se nofoaga i le tikeri aupito maualuga o le malo selesitila (tagai Ioane 17:3; Mataupu Faavae ma Feagaiga 131:1–4; 132:21–24). O lenei faaeaga e manaomia ai e alii ona maua le Perisitua Mekisateko, ma ia osia ma tausia e tagata uma o le Ekalesia feagaiga paia i le malumalu, e aofia ai le feagaiga o le faaipoipoga e faavavau. Afai e faaaoga le upu faaolataga i le faauigaga lea, e leai se tasi e faaolaina i le olaga faitino. O lena meaalofa matagofie na pau le taimi e oo mai ai o le mavae ai o le Faamasinoga Mulimuli.

Tusifaamaumau Ou Lagona Uunai