Toko 53
Nohomboana tamin’ny Hazo Fijaliana i Jesoa
Maro ireo olona nanaraka ireo miaramila rehefa nentin’izy ireo teny amin’ny havoana iray akaikin’i Jerosalema i Jesoa. Nasain’izy ireo nitondra ny hazo fijaliany Izy. Nofantsian’izy ireo teo amin’ny hazo fijaliana ny tanany sy ny tongony ary dia natsangany izany. Nisy lehilahy roa hafa koa, izay jiolahy, nohomboan’izy ireo.
Nivavaka i Jesoa. Nangataka ny Ray any an-danitra Izy mba hamela ny helok’ireo miaramila izay namantsika azy teo amin’ny hazo fijaliana. Tsy fantatr’izy ireo fa Izy no Mpamonjy.
I Maria renin’i Jesoa, dia nijoro teo akaikin’ny hazo fijaliana. Teo ihany koa i Jaona Apôstôly. Nasain’i Jesoa mba karakarain’i Jaona tsara ny reniny. Nentin’i Jaona nody ny renin’i Jesoa.
Rakotra haizina ny tanàna. Nijaly nandritra ny ora maro teo amin’ny hazo fijaliana ny Mpamonjy. Farany dia niala ny vatany ny fanahiny, ary dia maty Izy.
Rehefa maty Izy, dia nisy horohoron-tany izay nampitresatresaka ny vatolampy. Ny lamba tao amin’ny tempoly, izay nantsoina hoe voaly, dia nitriatra roa. Natahotra ireo miaramila Romana.
Nisy iray tamin’ireo mpianatr’i Jesoa nanala ny vatan’ny Mpamonjy teo amin’ny hazo fijaliana. Norakofany lamba izany ary nataony tao am-pasana, izay toerana handevenana ny maty. Nisy vato nakodiadia teo anoloan’ny fasana.