Toko 54
Nitsangana tamin’ny Maty i Jesoa
Nisy vehivavy iray izay nositranin’i Jesoa antsoina hoe Maria Magdalena nandeha tany amin’ilay fasana. Gaga izy nahita fa nisy nanakodia ilay vato. Tsy tao anaty fasana intsony ny vatan’i Jesoa.
Lasa nihazakazaka niteny tamin’i Petera sy i Jaona izy fa nisy olona nangalatra ny vatan’ny Mpamonjy. Tsy fantany izay misy izany.
Nihazakazaka nankany amin’ny fasana i Petera sy i Jaona. Hitan’izy ireo ny akanjo izay nandevenana an’i Jesoa, kanefa dia tsy tao ny vatan’i Jesoa. Tsy hitan’i Petera sy i Jaona izay atao. Nandeha nody izy ireo.
Nijanona teo amin’ny fasana nitomany i Maria Magdalena. Rehefa nijery tao anatin’ilay fasana indray izy, dia nahita anjely roa.
Nanontany ny antony hitomanian’i Maria izy ireo. Nilaza izy fa nisy olona nangalatra ny vatan’i Jesoa. Tsy fantany ny misy izany.
Nitodika izy ary nahita olona iray. Nataony fa ny mpiandry saha izany. Nanontany ny antony hitomaniany izy. Nanontany izy raha mba fantany ny misy ny vatan’i Jesoa.
Hoy ilay lehilahy taminy: “Ry Maria,” ary dia fantany fa i Jesoa Izy. Nangataka azy Izy mba hilaza amin’ny Apôstôly fa efa nitsangana tamin’ny maty Izy.
Nilaza tamin’ireo Apôstôly i Maria Magdalena sy ireo vehivavy hafa fa efa nitsangana tamin’ny maty i Jesoa. Tamin’ny voalohany dia tsy nino azy ireo ny Apôstôly.
Taty aoriana, raha mbola nifampiresaka ireo Apôstôly dia tonga tao amin’ny efitrano i Jesoa. Natahotra ireo Apôstôly. Mbola nieritreritra izy ireo fa maty Izy.
Nasain’ny Mpamonjy nikasika ny tanany sy ny tongony izy ireo. Nitsangana tamin’ny maty Izy—nitambatra indray ny vatany sy ny fanahiny.
Faly ireo Apôstôly nahita Azy. Nangataka sakafo tamin’izy ireo Izy. Nomen’izy ireo trondro sy tantely Izy. Nihinana izany Izy.
I Jesoa Kristy no olona nitsangana tamin’ny maty voalohany. Maro ireo hafa nitsangana tamin’ny maty avy eo ary hitan’ireo olona niaina tao Jerosalema. Nilaza i Jesoa hoe: “Izaho no fananganana amin’ny maty, sy fiainana.” Satria nandresy ny fahafatesana Izy, dia hitsangana amin’ny maty avokoa isika rehetra.