Kapitulo 19

Ang Kabalaan sa Pagserbisyo

Ang labing halangdong tumong sa kinabuhi mao ang pagpaningkamot sa pagpakabuhi aron mahimong mas maayo ug malipayon ang kinabuhi sa uban.¹

Pasiuna

Si Presidente David O. McKay kanunay nga nagtudlo nga ang pagserbisyo ngadto sa uban makahatag og tinuod nga kalipay ug nga ang Ginoo mogiya ug mopanalangin niadtong moserbisyo. Niadtong 1921, usa ka higayon nga ang Ginoo migiya sa Iyang mga sulugoon nahitabo samtang si Elder David O. McKay ug si Brother Hugh J. Cannon mihimo sa usa ka buluhaton gikan sa Unang Kapangulohan sa pagbisita sa mga miyembro sa Simbahan sa tibuok kalibutan. Usa ka bahin sa ilang buluhaton mao ang pagbisita sa mga miyembro sa Simbahan sa Armenia. Tungod sa mga epekto sa Unang Gubat sa Kalibutan ug sa malisud nga mga kahimtang sa rehiyon, gamay ra ang nahibaloan bahin sa kahimtang sa mga miyembro sa Simbahan didto. Mirekord si Elder McKay:

“Niadtong Marso 1921, among nahibaloan nga sa usa ka espesyal nga adlaw sa pagpuasa, ang mga amot sa kantidad nga liboan ka mga dolyares nadawat aron itabang sa mga pobre sa Uropa ug sa nag-antus nga mga Taga-Armenia sa Asya. Nahibaloan usab, namo, nga ang Unang Kapangulohan naghunahuna sa pagpadala og espesyal nga mensahero ngadto sa Syria aron sa pagtabang sa atong mga Santos nga taga-Armenia.”

Tungod kay si Elder McKay ug si Brother Cannon walay iskedyul nga mobisita sa mga miyembro sa Simbahan sa Armenia hangtud sa katapusan bahin sa ilang biyahe, nagpadayon sila sa ilang biyahe, mibisita sa mga dapit sama sa Australia, New Zealand, ug sa daghang mga isla. Sulod sa pipila ka mga bulan, wala sila makadungog bahin sa kahimtang sa Armenia o duna bay tawo nga gipadala sa paghatud sa mga hinabang didto. Sa katapusan, niadtong 2 sa Nobyembre 1921, samtang didto sa Jerusalem, nadawat nila ang balita nga ang usa ka tawo nga ginganlan og J. Wilford Booth gipadala sa punoang buhatan sa Simbahan sa pagpakigkita kanila. Bisan pa niana, walay usa nga nasayud sa iyang iskedyul ug asa na siyang dapita. Nianang adlawa mirekord, si Elder McKay sa iyang diary, “Wala kami makahibalo kon asa na siya, pero mobiya mi sa Jerusalem padulong sa Haifa, agi sa Aleppo [Syria], ugma sa buntag. Nakahukom nga mosakay og awto padulong sa Samaria, mobisita sa mga talanawon sa panahon sa Biblia.” Sa wala pa sila mobiya, si Elder McKay ug si Brother Cannon mitungas ngadto sa Bukid sa Oliba, mipili og hilit nga dapit, ug nag-ampo nga ang Ginoo mogiya sa ilang biyahe.

Human sa pag-ampo, si Elder McKay nakahinumdom, “Sa among pagbalik sa hotel, akong gibati nga kami kinahanglang mosakay og tren ug dili awto padulong ngadto sa Haifa.” Miuyon si Brother Cannon, ug mipadayon sila sa ilang biyahe padulong sa Haifa, naglaum nga makit-an nila si Elder Booth didto. Mirekord si Elder McKay: “Ang dako namong tinguha nga hapit na mahuman kini nga misyon mao ang pagpakigkita ni Elder Booth. Sa pagkatinuod, ingon og walay hinungdan ang among biyahe ngadto sa Syria gawas kon among igkita siya. Mga langyaw kami. Wala kamiy nailhan. … Duna kamiy mga ngalan ug mga address; pero dili kami makamaong mobasa, kay gisulat kini sa pinulongang Turkish.”

Sa dihang si Elder McKay ug si Brother Cannon miabut sa estasyunan sa tren, nalangan sila sa pagbiya sa estasyunan kay nangutana pa sila og asa ang maayong hotel. Sa ilang pagkalangan, si Elder McKay mipaingon sa pultahan sa estasyunan samtang adunay laing tawo nga nagpaingon usab. Gigunitan ang iyang abaga sa tawo ug miingon, “Dili ba ikaw si Brother McKay?”

Girekord ni Elder McKay ang mga resulta niining panagkita ingon sa mosunod: “Dili ikahulagway ang akong katingala nga tawagon sa pangalan diha sa lungsod nga dili pamilyar, milingi ko, ug akong nailhan si Elder Wilford Booth, ang tawo labaw sa tanang laing tawo nga gusto kaayo namong ikakita. Nagkita pa gayud mi sa angay nga oras ug lugar. … Mas maanindot pa unta kadto kon amo pa kining giplano! Samtang nag-istoryahay kami sa among mga kasinatian, wala kami magduhaduha nga ang among panagkita resulta sa balaang tabang. … Sa pagkatinuod, kon wala pa kami magkita sa Haifa, ang among biyahe ngadto sa Armenian Mission, sumala sa kaalam sa tawo, pakyas unta. Sama kaniadto, uban sa among daghang mga katungdanan ug mga kasinatian, gi-organisar namo ang Armenian Mission.”²

Mga Pagtulun-an ni David O. McKay

Kabubut-on sa Ginoo nga magserbisyo kita sa usag usa.

Ang kabubut-on sa Dios mao [nga kamo] moalagad sa inyong isig ka tawo, makahatag og kaayohan, maghimo niining kalibutan nga mas maanindot kay kamo anaa magpuyo niini. Gihatag ni Kristo ang tanan sa pagtudlo kanato niana nga baruganan. Ug mihimo siya og pamahayag: “Nga maingon nga gibuhat ninyo kini ngadto sa usa sa mga labing gagmay niining akong mga igsoon gibuhat usab ninyo kini kanako” (Mat. 25:40.) Mao kini ang mensahe nga gihatag sa Dios kanato. Kini nga Simbahan mao ang Simbahan sa Dios, nga hingpit kaayong na-organisar nga ang matag lalaki ug matag babaye, matag bata, adunay kahigayunan sa paghimo og butang nga maayo alang sa laing tawo. Obligasyon sa atong mga miyembro sa priesthood, responsibilidad sa mga organisasyon sa auxiliary ug sa matag miyembro sa pagserbisyo ug sa pagbuhat sa kabubut-on sa Dios. Kon buhaton nato, ug kon buhaton nato pirme, labaw kitang makombinser nga mao kini ang buhat sa Dios, tungod kay gisulayan nato kini. Dayon, pinaagi sa paghimo sa kabubut-on sa Dios, makaila kita sa Dios ug masuod ngadto kaniya ug mobati nga ang kinabuhi nga mahangturong atoa. Atong bation ang paghigugma sa katawhan bisan asa, ug makasinggit kita uban sa mga apostoles sa karaan, “Kita nasayud nga kita nakalabang na gikan sa kamatayon ngadto sa kinabuhi, tungod kay kita nagahigugma man sa mga igsoon.” (1 Juan 3:14.)³

Ginaingon nga “ang kaliwat sa mga tawo mahanaw kon sila mohunong sa pagtinabangay sa usag usa.” Usa ka tawo, nga akong kutloon, miingon nga “gikan sa panahon nga giputos sa inahan ang ulo sa bata hangtud sa higayon nga adunay moabut nga panabang aron mopahid sa mabugnaw nga singot gikan sa agtang sa himatyon, dili kita mabuhi kon walay pagtinabangay.” … Ang Simbahan, uban sa tanang mga korum ug mga organisasyon niini, mao ang plano sa Dios sa pagtinabangay.⁴

Dihay miabut sa hunahuna sa pipila … nga gusto nakong pasalamatan. … Sila ang mga lalaki ug mga babaye sa tibuok Simbahan nga mihatag sa ilang panahon ug kwarta aron makapadayon ang kamatuoran—dili lamang sa pagtudlo, pero sa tinud-anay nga pagserbisyo sa daghang mga paagi. Ang pipila niini nakigbisog sa ilang pagpakabuhi. Ang pipila kanila adunahan nga mga lalaki ug mga babaye kinsa miretiro ug adunay minilyon nga kwarta. … Ang Dios mopanalangin niadtong kinsa naghatag sa maong pagserbisyo, ug mopanalangin kaninyong tanan, kay ako nagtuo nga kita makaingon alang sa Simbahan, “Aron silang tanan mausa; maingon nga ikaw, Amahan, ingon nga ikaw ug ang imong Anak usa.”⁵

Andam ba kamong moserbisyo? Aduna ba kamoy panan-aw sama ni Haring Benjamin sa dihang miingon siya, “… kon kamo anaa sa pag-alagad sa inyong isig ka tawo, kamo anaa lamang sa pag-alagad sa inyong Dios”? (Mosiah 2:17.) Ang tinuod nga Kristiyanismo mao ang gugma nga naglihok. Walay laing maayong paagi sa pagpakita og gugma alang sa Dios kay sa pagpakita og dili hinakog nga gugma alang sa isig ka tawo. …

… Uban sa hugot nga pagtuo, uban sa kamabination, pun-a ang inyong mga kasingkasing sa tinguha sa pagserbisyo sa tanang mga katawhan. Ang espiritu sa ebanghelyo nagagikan sa pagserbisyo alang sa kaayohan sa uban.⁶

Ang pagserbisyo makahatag og kalipay ngadto sa naghatag ug sa nagdawat.

Ang kalipay mao ang katapusang tumong, sa tinud-anay, sa atong pagpakabuhi. Kana nga kalipay moabut nga labing epektibo pinaagi sa pagserbisyo sa atong isig ka tawo.⁷

Ang tanang mga tawo nagtinguha og kalipay. Daghan usab ang naningkamot pag-ayo sa paghimo kutob sa ilang mahimo. Bisan pa niana, makapatingala nga pipila lamang ang nakaamgo nga ang sigurado nga giya sa maong kalampusan mahimong makita sa mosunod nga pamahayag ni Jesus ang Nazaretnon: “Bisan kinsa nga buot magpatunhay sa iyang kinabuhi, mawagtangan hinoon siya niini: Ug bisan kinsa nga magawagtang sa iyang kinabuhi tungod kanako makakaplag siya niini” [Mateo 16:25.] Kining importante nga tudling adunay usa ka sekreto nga mas angay panag-iyahon kay sa kabantog o dominyon, butang nga mas bililhon kay sa tanang mga bahandi sa kalibutan.

Usa kini ka baruganan nga ang paggamit niini nagsaad sa paghulip sa pagkawala sa paglaum ug kasubo uban sa paglaum ug kalipay; sa pagpuno sa kinabuhi uban sa kalipay ug kalinaw nga walay katapusan. Tinuod gayud kini nga ang pagdawat niini usa gayud ka kaayohan karon niining masamok, nasugamak sa depresyon nga tibuok kalibutan. Ngano, gayud, nga ang mga tawo ug mga nasud mosalikway sa usa ka butang nga bililhon kaayo?

Ang kamatuoran ba sa mga pamahayag nga nagkasumpaki, ang magawagtang sa iyang kinabuhi makakaplag ra niini, makalibog kaayo nga ang mga tawo wala makasabut niini? O wala ba kini mahisupak sa pagpakigbisog sa pagpakabuhi nga giisip kini sa mga tawo nga impraktikal?

Bisan pa, ang kamatuoran nagpabilin nga Siya kinsa mao “Ang Dalan, ang Kamatuoran ug ang Kinabuhi” [tan-awa sa Juan 14:6] dinhi mihatag og dili mausab nga balaod. …

Pihong gipahayag, kini ang balaod mao nga, “Nakapuyo kita og kinabuhi nga labing kompleto kon kita naningkamot sa paghimo sa kalibutan nga mas maayo ug mas malipayon.” Ang balaod sa kinaiyahan, maningkamot pag-ayo aron mabuhi, mao ang pagpreserbar sa kaugalingon sa pagsakripisyo sa tanan; pero sa pagtandi niini ang balaod sa tinuod nga espirituhanong kinabuhi mao ang, pagbaliwala sa kaugalingon alang sa kaayohan sa uban. …

Uban niini nga pagsabut, [liboan sa] mga lalaki ug mga babaye, nag-alagad nga walay suweldo, nagtanyag nga motudlo ug mogiya matag semana ngadto sa [linibo] ka mga bata ug mga batan-on sa pag-ugmad sa kinaiya ug espirituhanong pagtubo. Dugang niining kasundalohan sa mga opisyal ug mga magtutudlo, … ang mga lalaki nga gi-ordinahan ngadto sa priesthood midawat sa obligasyon sa paghalad sa ilang panahon ug mga talento kutob sa mahimo sa pagpakaylap sa kalipay, kamaya ug kalinaw ngadto sa ilang mga isig ka tawo.⁸

Dugang pagkaespirituhanon ang gipahayag sa paghatag kay sa pagdawat. Ang pinakaimportante nga espirituhanong panalangin nagagikan sa pagtabang sa usag usa. Kon kamo gustong mahimong makalolooy, pagbaton lang og pagdumot sa usa ka igsoon, ug kon kamo gustong modumot, pasakiti lang ang inyong igsoon. Pero kon gusto mong magmalipayon, pagserbisyo sa uban, lipaya ang uban.⁹

Himoa nga ang sinserong mga lalaki ug mga babaye sa kalibutan magkahiusa sa matinguhaong paningkamot sa paghulip sa mga pagbati sa kahakog, kasilag, pagdumot, kadawo, sa balaod sa pagserbisyo ngadto sa uban, ug sa ingon mopasiugda og kalinaw ug kalipay sa katawhan.¹⁰

Kinahanglan kitang mosunod sa ehemplo sa Manluluwas sa paghatag og serbisyo.

Sa dihang ang Manluluwas hapit na mobiya sa iyang mga Apostoles, mihatag siya kanila sa maayo kaayong ehemplo sa pagserbisyo. Nahinumdom mo nga iyang gitapis ang toalya ug mihugas sa mga tiil sa iyang mga tinun-an. Si Pedro, nga mibati nga kini usa ka ubos nga buhat alang sa usa ka sulugoon, miingon, “… ikaw bay mohugas sa akong mga tiil? … Dili ako pahugas kanimo sa akong mga tiil.”

Ang Manluluwas mitubag, “Kon dili ka pahugas kanako, nan, ikaw walay bahin kanako.”

“Kon mao, ” miingon ang labawng Apostol, “Dili lang ang mga tiil ko ra, kondili hasta ang akong mga kamot ug ang akong ulo!”

“Ang nakaligo na dili kinahanglan manghugas pa gawas sa iyang mga tiil, hinoon mahinlo na ang iyang tibuok nga lawas.

“Sa karon dili pa ikaw makasabut niining akong gibuhat, apan unya ugaling makasabut ra ikaw.” [Tan-awa sa Juan 13:6–10.]

Ug dayon iyang gihugasan ang mga tiil ni Pedro, ug sa uban usab. Miuli sa planggana ngadto sa kilid sa pultahan, mitangtang sa toalya, ug misul-ob sa iyang kupo, mibalik sa iyang dapit uban sa Napulog Duha, ug miingon:

“Nagtawag kamo kanako nga Magtutudlo ug Ginoo: ug husto kamo kay mao man kana ako.

“Ug kon ako nga inyong Ginoo ug Magtutudlo nanghugas man gani sa inyong mga tiil, nan, kamo usab kinahanglan nga maghinugasay sa inyong mga tiil.” [Juan 13:13–14.]

Pagkamaayong ehemplo sa pagserbisyo ngadto sa maayong mga sulugoon, mga sumusunod ni Kristo! Siya nga labing gamhanan, himoa nga siya nga mao ang labing ubos. Mao nga nakita nato ang obligasyon nga makaserbisyo ngadto sa mga miyembro sa Simbahan, sa paghalad sa atong mga kinabuhi sa kauswagan sa gingharian sa Dios dinhi sa yuta.¹¹

Hunahunaa lang! Ang bugtong rason nga ang kalibutan nakahibalo bahin kanila [mga Apostoles ni Jesus] mao nga human makakita sa Manluluwas, ilang gihimo Siya nga ilang giya sa kinabuhi. Kon wala pa kini nila buhata, wala untay makahibalo karon nga ang maong mga tawo diha diay kaniadto. Nagpakabuhi sila ug namatay ug nakalimtan sama sa liboan ka laing mga tawo sa ilang panahon nga nagpakabuhi ug namatay ug walay usa nga nakaila o nagpakabana sa bisan unsa mahitungod kanila; sama sa liboan ug liboan nga nagpakabuhi karon, nag-usik-usik sa ilang panahon ug kalagsik sa walay kapuslanan nga pagpuyo, nagpili og dili maayong mga tawo nga ilang ehemplo, misimang ngadto sa dalan sa Kalingawan ug Katagbawan imbis ngadto sa dalan sa Pagserbisyo. Sa dili madugay makaabut sila sa katapusan sa ilang panaw sa kinabuhi, ug walay makasulti nga ang kalibutan mas maanindot tungod sa ilang pagpuyo diha niini. Sa paghuman sa matag adlaw ang maong mga tawo mibiya sa ilang dalan nga walay pulos sama sa ilang pagkakita niini—wala mananom aron makahatag og landong ngadto sa uban, ni mga buwak aron mahimong mas maanindot ug mas masanagon ang kalibutan niadtong mosunod—walay maayong mga binuhatan, walay halangdong pagserbisyo—walay pulos, walay bunga, sama sa dalan sa desierto, natamnan tingali og tunok ug mga sampinit.

Dili ingon niini kini mao ang mga tinun-an kinsa mipili ni Jesus nga sa ilang Giya. Ang ilang mga kinabuhi sama sa mga tanaman sa mga rosas diin ang kalibutan mahimong makapu-pu og matahum nga mga buwak sa kahangturan.¹²

Ang pinakatakus nga katungdanan sa kinabuhi … mao nga ang tawo makaserbisyo pag-ayo sa iyang isig ka tawo … Ang labing halangdong tumong sa kinabuhi mao ang pagpaningkamot sa pagpakabuhi aron sa paghimo sa mga kinabuhi sa uban nga mas maayo ug mas malipayon.¹³

Mga Sugyot alang sa Pagtuon ug Panaghisgutan

Ngano nga ang Ginoo misugo kanato sa pagserbisyo sa usag usa? (Tan-awa sa mga pahina 219–22.) Unsa ang pipila nato ka mga kahigayunan sa pagserbisyo diha sa Simbahan? Unsang mga matang sa pagserbisyo ang atong mahimo sa gawas sa pormal nga mga katungdanan sa Simbahan?
Ang Ginoo nagtudlo nga “bisan kinsa nga buot magpatunhay sa iyang kinabuhi, mawagtangan hinoon niini: ug bisan kinsa nga magawagtang sa iyang kinabuhi makakaplag niini” (Mateo 16:25). Unsay kalabutan niini nga kasulatan sa pagserbisyo? Unsa nga mahangturong mga panalangin ang moabut gikan sa dili hinakog nga pag-alagad sa uban? Unsa ang kalainan tali sa pagserbisyo tungod kay kita gisugo ug sa pagserbisyo tungod kay gusto nato? (Tan-awa usab sa D&P 58:26.)
Unsay inyong nasinati sa dihang gihatag ninyo ang inyong kaugalingon sa pagserbisyo sa uban? Sa unsa nga paagi nga ang kalipay ug pagserbisyo may kalabutan sa usag usa? Sa unsa nga paagi nga ang pagserbisyo makatabang kanato sa pagbuntog sa mga pagbati sa kahakog, pagkawalay kalipay, o depresyon? (Tan-awa sa mga pahina 220–22.) Sa unsa nga paagi nga ang pagserbisyo sa uban makatabang kanato nga makabuntog sa dili maayong mga pagbati ngadto kanila?
Unsay nakapadani kaninyo sa daghang mga ehemplo ni Jesus sa pagserbsiyo. (Tan-awa sa 222–24.) Unsa ang atong makatunan gikan Kaniya samtang kita maningkamot sa pag-alagad sa uban? Ngano nga importante ang pagtinguha sa balaang giya samtang kita moserbisyo?
Ngano nga usahay malisud ang pagtugot sa uban sa pagserbisyo kanato? Ngano nga importante nga malipayon kitang modawat sa pagserbisyo? Sa unsa nga paagi nga kamo ug ang inyong pamilya napanalanginan tungod sa pagserbisyo sa uban?

May Kalabutan nga mga Kasulatan:Mateo 25:40; Marcos 8:35; Mga Taga-Galacia 5:13; Mosiah 4:15; D&P 18:10, 15–16