Pasiuna

Ang Unang Kapangulohan ug ang Korum sa Napulog Duha ka mga Apostoles mihan-ay sa Mga Pagtulun-an sa mga Presidente sa Simbahan sa sunod-sunod nga paagi aron sa pagtabang sa mga miyembro sa Simbahan nga modako ang ilang pagsabut sa doktrina sa ebanghelyo ug makapaduol ngadto ni Jesukristo pinaagi sa mga pagtulun-an sa mga propeta niini nga dispensasyon. Kini nga libro naghisgot sa mga pagtulun-an ni Presidente David O. McKay, kinsa nag-alagad isip Presidente sa Ang Simbahan ni Jesukristo sa mga Santos sa Ulahing mga Adlaw gikan niadtong Abril 1951 hangtud pagka Enero 1970.

Unsaon Paggamit Kining Libroha

Kada kapitulo niining libroha adunay upat ka mga seksyon: (1) usa ka pangbukas nga kinutlo nga naghatag og mubong pasiuna mahitungod sa hilisgutan sa kapitulo; (2) usa ka “Pasiuna, ” nga naghulagway sa mga mensahe sa kapitulo uban sa usa ka istorya o tambag gikan ni Presidente McKay; (3) “Mga Pagtulun-an ni David O. McKay, ” nga nagpresentar sa mga doktrina gikan sa iyang daghang mga mensahe ug mga sermon; ug (4) “Mga Sugyot alang sa Pagtuon ug Panaghisgutan, ” nga adunay mga pangutana nga makaawhag og personal nga pagribyu ug pagpakisayud, paggamit sa mga baruganan sa ebanghelyo, ug panaghisgutan diha sa panimalay ug sa simbahan. Ang pagribyu sa mga pangutana sa dili pa magtuon sa mga pulong ni Presidente McKay makahatag og dugang pagsabut sa iyang mga pagtulun-an. Usab, isip kabahin sa mga kapanguhaan alang sa dugang pagtuon ug panaghisgutan, ang matag kapitulo adunay usa ka mubo nga listahan sa may kalabutan nga mga kasulatan.

Kining libroha pagagamiton sa mosunod nga mga kahimtang:

Alang sa personal ug pangpamilya nga pagtuon. Pinaagi sa mainampoong pagbasa ug mapalandungon nga pagtuon, ang tagsa-tagsa makadawat og personal nga pagsaksi sa mga kamatuoran nga gitudlo ni Presidente McKay. Kini nga libro nagdugang sa mga basahon sa ebanghelyo sa matag miyembro ug mahimong usa ka importanting kapanguhaan alang sa pagtudlo sa pamilya ug sa pagtuon diha sa panimalay.

Alang sa panaghisgutan sa mga miting sa Dominggo. Kining libroha mao ang teksto alang sa mga miting sa Dominggo sa mga grupo sa mga high priest, sa mga korum sa mga elder, ug sa Relief Society, sa kasagaran sa ikaduha ug ikatulo nga mga Dominggo sa matag bulan. Kining mga miting sa Dominggo kinahanglang maghisgot lamang mahitungod sa mga doktrina ug mga baruganan sa ebanghelyo. Ang mga magtutudlo kinahanglang mopokus sa sulod sa teksto ug sa may kalabutan nga mga kasulatan ug kinahanglang mopahaum niining mga pagtulun-an ngadto sa mga panghitabo nga pamilyar sa mga sakop sa klase. Mahimong mogamit sila sa mga pangutana sa katapusan sa matag kapitulo aron madasig ang klase sa paghisgutanay. Kon angay, ang mga miyembro kinahanglang mopamatuod ug mopakigbahin og personal nga mga ehemplo nga may kalabutan sa mga leksyon. Kon ang mga magtutudlo mapainubsanong magtinguha sa Espiritu sa pagpangandam ug pagtudlo sa mga leksyon, ang tanang moapil malig-on sa ilang kahibalo sa kamatuoran.

Ang mga lider ug ang mga magtutudlo kinahanglan moawhag sa mga miyembro sa pagbasa sa mga kapitulo agig pagpangandam alang sa mga miting sa Dominggo ug sa pagdala sa libro nganha sa simbahan. Kinahanglang ilang tahuron ang mao nga pagpangandam pinaagi sa pagtudlo gikan sa mga pulong ni Presidente McKay. Kon ang mga miyembro nakabasa nang daan sa kapitulo, andam silang motudlo ug molig-on sa usag usa.

Wala kinahanglana o girekomendar nga ang mga miyembro mopalit og dugang mga komentaryo o mga teksto nga pakisayran aron dugangan ang materyal niining libroha. Alang sa dugang pagtuon sa doktrina, ang mga miyembro giawhag sa paggamit sa mga kasulatan nga naghisgot bahin niini nga gilakip sa katapusan sa seksyon sa “Mga Sugyot alang sa Pagtuon ug Panaghisgutan.”

Tungod kay kining libroha gihimo alang sa personal nga pagtuon ug pakisayran sa ebanghelyo, daghan ang mga kapitulo nga naghisgot og daghang mga butang nga dili mahisgutan sa mga miting sa Dominggo Busa, ang pagtuon diha sa panimalay importante kaayo aron mas makaangkon og kaayohan gikan sa mga pagtulun-an ni Presidente McKay.

Ang Pagtudlo sa mga Leksyon gikan sa mga Kapitulo Niining Libroha

Ang mga kapitulo niining libroha adunay daghang impormasyon kay sa mahimong matudlo sa hapit tanang mga magtutudlo sa usa lang ka klase. Ang mga magtutudlo kinahanglang magampo para sa panabang, mangita sa giya sa Espiritu Santo, ug magtrabaho sa makugihong paagi samtang sila mopili og mga kinutlo, mga pakisayran sa kasulatan, ug mga pangutana nga labing maayong makatubag sa mga panginahanglan sa mga sakop sa klase.

Ang Pag-andam og Leksyon

Ang mosunod nga mga sugyot naghulagway og posibling paagi sa pagtabang sa mga magtutudlo sa pag-andam ug sa pagtudlo sa mga leksyon niining libroha (kini nga mga sumbanan magamit usab sa mga ginikanan sa pag-andam og mga leksyon sa family home evening):

Tun-i sa mainampoong paagi ang kapitulo. Mahimong markahan ang mga tudling nga labing makapadasig kanimo.
Tinoa unsay angay mahitabo sa mga kinabuhi niadtong imong gitudloan isip usa ka resulta sa mga pagtulun-an sa kapitulo. Tinguhaa ang giya sa Espiritu Santo samtang ikaw mamalandong sa mga panginahanglan niadtong imong gitudloan.
Hunahunaa unsay itudlo. Basaha pag-usab ang kapitulo, magpili sa mga tudling nga mas makatabang niadtong imong gitudloan.
Hunahunaa unsaon sa pagtudlo. Pagplano og mga paagi sa pagtudlo sa mga tudling nga imong gipili. Ang mosunod mao ang pipila ka mga sugyot.
- Pagpasiugda og mga panaghisgot base sa mga pangutana diha sa “Mga Sugyot alang sa Pagtuon ug Panaghisgutan” sa katapusan sa matag kapitulo.
- Hisguti ang gipili nga mga tudling sa kasulatan gikan sa may kalabutan nga mga kasulatan nga gilista sa katapusan sa matag kapitulo.
- Pagplanog paagi nga makuha ang atensyon sa mga miyembro sa sinugdanan sa leksyon. Sama pananglit, mahimo kang mopakigbahin og usa ka istorya gikan sa pasiuna sa kapitulo, magsulat og pangutana diha sa pisara nga makapukaw sa hunahuna, o mogamit og praktikal nga paghulagway sa leksyon.
- Paggamit og mga himno ug mga kanta sa Primary aron sa pagtabang sa mga miyembro nga mobati sa Espiritu.
- Pagpamatuod sa higayon nga ang Espiritu modasig kanimo, dili lamang sa katapusan sa leksyon.
- Pagdapit og usa o duha ka mga miyembro sa pag-anha sa klase nga andam nga mohatag og mubo nga pagpamatuod bahin sa mga baruganan sa kapitulo.
- Kon angay, ipaambit ang mga kasinatian nga may kalabutan ngadto sa mga baruganan sa kapitulo. Dapita ang uban sa pagbuhat sa ingon.
Alang sa mga sugyot kon unsaon sa paggamit niini ug sa ubang mga pamaagi sa pagtudlo, gamita ang Teaching, No Greater Call (36123); ang Giya nga Basahon sa Pagtudlo (34595 853); ug ang “Pagtudlo sa Ebanghelyo ug Pagpangulo, ” seksyon 16 sa Tamdanan nga Basahon sa mga Panudlo sa Simbahan, Basahon 2: Mga Pangulo sa Pagkapari ug Kaabag (35903 853). Usab aron sa pagtabang kanimo nga magmalampuson sa imong calling, ikaw giawhag sa pag-apil sa 12 ka semana nga kurso sa Pagtudlo sa Ebanghelyo sa inyong ward o branch, ingon man usab sa kwarterly nga miting sa pagpalambo sa magtutudlo.
Han-aya ang imong mga ideya. Mahimong magsulat ka og outline aron sa paggiya kanimo sa panahon nga itudlo ang leksyon.

Pagpasiugda og Makahuluganon nga mga Panaghisgutan

Maanaa man sa pamilya o sa lawak-klasehanan, ang mga kapitulo niining libroha makahatag og talagsaong kahigayunan sa tagsa-tagsa sa paglig-on sa usag usa pinaagi sa pag-apil sa mga panaghisgutan sa ebanghelyo. Ang mosunod nga mga sumbanan makatabang kanimo nga makapasiugda og makahuluganong mga panaghisgutan:

Paggamit og mga pangutana nga makapahunahuna ug makapahisgot kay sa mga pangutana nga matubag lang og oo o dili. Ang mga pangutana nga magsugod og unsa, unsaon, ngano, kinsa, o diin sa kasagaran maoy labing epektibo alang sa pagawhag og panaghisgutan.
Awhaga ang uban sa pagpakigbahin og mga kasinatian nga magpakita kon sa unsa nga paagi nga ang mga baruganan sa ebanghelyo magamit sa adlaw-adlaw nga kinabuhi. Awhaga usab sila sa pagpakigbahin sa ilang mga pagbati mahitungod sa unsay ilang nakat-unan. Paminaw pag-ayo ug pasalamati sila sa ilang mga salmot.
Pagmabinantayon sa impluwensya sa Espiritu Santo. Motabang siya kanimo unsay ipangutana, kinsa ang tawagon, o unsaon sa pagpaapil sa uban sa panaghisgutan. Kon imong gibati nga ang mga komentaryo nagkalayo na sa hilisgutan, sa maayong paagi ipabalik ang panaghisgutan sa saktong direksyon.
Pag-amping nga dili undangon dayon ang maayong pagpanaghisgot aron lang mahuman ang tanang materyal nga imong giandam. Unsay importante mao nga ang mga partisipante mobati sa Espiritu, madugangan ang ilang pagsabut sa ebanghelyo, mogamit sa mga baruganan sa ebanghelyo sa ilang mga kinabuhi, ug molig-on sa ilang pagpasalig sa pagsunod sa ebanghelyo.

Impormasyon sa mga Tinubdan nga Gikutlo Niining Libroha

Ang mga pagtulun-an ni Presidente McKay niining libroha gikolekta gikan sa nagkalain-laing mga tinubdan. Ang mga kinutlo mipabilin sa punctuation, spelling, ug capitalization sa orihinal nga mga tinubdan gawas kon ang editoryal o tipograpikal nga mga kausaban gikinahanglan aron sayon basahon. Tungod niini nga katarungan, ang mga magbabasa makamatikod og ginagmay nga kausaban diha sa teksto.

Si Presidente McKay sa kasagaran mogamit og mga pulong sama sa mga tawo, o katawhan nga nagpasabut ngadto sa tanang mga katawhan, lalaki ug babaye. Kanunay usab siyang mogamit sa pronoun nga siya nga nagpasabut sa lalaki o babaye. Komon kini nga lingguwahe sa iyang panahon. Bisan pa sa mga kalainan tali niining mga kauyunan sa lingguwahe ug sa bag-ong gamit, ang mga magbabasa makahibalo nga ang mga pagtulun-an ni Presidente McKay parehang magamit ug bililhon ngadto sa mga babaye ug mga lalaki.

Usab, si Presidente McKay himasa kaayo, ug kanunay siyang mokutlo sa ubang mga tagsulat samtang siya magtudlo. Sa kasagaran sa orihinal nga mga tinubdan, ang mga marka nga kinutlo [quotation marks] nagpakita kanus-a si Presidente McKay magkutlo og laing tawo, pero ang ngalan sa tagsulat panagsa ra ihatag. Kay sa magkayagaw ang mga kapitulo niining libroha sa daghang mga higayon sa “[wala mailhi nga tagsulat], ” ang libro nagpakita sa orihinal nga marka sa kinutlo aron sa pagpakita nga si Presidente McKay nagtudlo sa mga pulong sa laing tawo.