“Matag Miyembro usa ka Misyonaryo”

“Busa panglakaw kamo ug himoa ninyong mga tinun-an ang tanang kanasuran, magbunyag kanila sa ngalan sa Amahan, ug sa Anak, ug sa Espiritu Santo:

“Nga magatudlo kanila sa pagtuman sa tanan nga akong gisugo kaninyo: ug tan-awa, ako magauban kaninyo sa kanunay hangtud sa katapusan sa kapanahonan. … ” (Mat. 28:19–20.)

Ingon niana ang pahimangno nga gihatag ngadto sa unang napulog duha. Ingon niana ang pahimangno nga gihatag sa mga katawhan niining panahona diha sa Doktrina ug mga Pakigsaad nga mahimong kahayag ngadto sa kalibutan. “Ug bisan pa niana Ako nagpadala sa akong walay katapusan nga pakigsaad ngadto sa kalibutan, nga mahimo nga kahayag ngadto sa kalibutan, ug mahimo nga sukaranan alang sa akong mga katawhan, ug alang sa mga Hentil sa pagpangita niini, ug mahimo nga sinugo sa akong atubangan sa pag-andam sa agianan sa dili pa ang akong pag-abut.” [Tan-awa sa D&P 45:9.]

Ang Simbahan ni Jesukristo sa mga Santos sa Ulahing mga Adlaw bag-o lang miabut og usa ka tuig sa dihang kana nga deklarasyon gihatag pinaagi sa inspirasyon ngadto ni Propeta Joseph Smith. Siya mismo nag-edad og baynte sais anyos. Talagsaon kaayo ang paghimo sa mao nga pamahayag, dako ang potensyal niini, masangkaron ang tumong niini. …

… Mormonismo, ang tawag niini, nakapataas og usa ka bandila ngadto sa mga nasud ug, uban sa mga pulong nga masangkaron sama niadtong akong nabasa sa pinadayag, nagdapit sa kalibutan ngadto sa kalinaw, sa pagpahulay, sa pagkakontento.³

Ang teksto … “panglakaw kamo sa tibuok kalibutan” mao gayud ang misyonaryo nga sugo nga gihatag sa nabanhaw nga Kristo ngadto sa iyang mga Apostoles. Agig sangputanan siya miingon:

Isipa kining trabahoa nga wala mahuman hangtud nga ang tanang mga nasud modawat sa ebanghelyo ug magpalista sa ilang mga kaugalingon isip akong mga tinun-an. …

Uban sa samang direkta nga sugo gikan sa nabanhaw nga Ginoo kinsa kauban sa Amahan nga nagpakita sa sinugdanan sa ika-disenuybe nga siglo, ang pagpahayag sa ebanghelyo gihimo sa Simbahan ni Jesukristo sa mga Santos sa Ulahing mga Adlaw ngadto sa “matag kanasuran, kaliwatan, pinulongan ug katawhan” kutob sa maabut ug sa mga tawo nga mopadayon niini.⁴

Kon akong ipasabut pag-ayo ang duha sa labing lig-ong pagtuo sa mga kasingkasing sa mga Santos sa Ulahing mga Adlaw, akong hinganlan ang: Una, usa ka malungtarong kasiguroan nga ang ebanghelyo, sama sa gitudlo sa Manunubos sa dihang nagpuyo pa siya uban sa mga tawo ug sa wala madugay giilisan, giusab ug gihugawan sa mga tawo, gipahiuli na sa Manunubos diha sa kalunsay ug kahingpitan niini; ug ikaduha, natural nga mosunod sa una, mao ang pagtuo diha sa kasingkasing sa matag miyembro niini nga Simbahan nga ang responsibilidad anaa sa mga miyembro sa Simbahan sa pagsangyaw sa gipahiuli nga ebanghelyo ngadto sa matag kanasuran, kaliwatan, pinulongan ug katawhan.⁵

Nakahinumdom ako nga sa dihang si Kristo dinhi pa sa yuta, miingon Siya ngadto sa pipila ka mga tawo kinsa nakahibalo usab sa Iyang pagkabalaan, nga adunay obligasyon ang tanan kinsa adunay kahibalo sa pagkaanaa sa Dios ug sa mga kamatuoran sa ebanghelyo ni Kristo. “Siya nga wala masayud niini, ug nagbuhat sa angay sa bunal, mahiagum sa diyutay nga pagbunal. Ang matag usa nga gikahatagan og daghan, pagapangayoan og daghan; ug kaniya nga sa mga tawo gikapiyalan og daghan, kinahanglanon nila ang labaw pa.” [Lucas 12:48.] Mao nga niini nga kahibalo nga anaa sa mga Santos sa Ulahing mga Adlaw nag-uban ang dakong obligasyon. Ang mga katawhan sa Dios gihisgutan diha sa kasulatan, sa karaan ug moderno, isip usa ka kaliwatan nga pinili, ang kahugpungan sa mga harianong sacerdote, ang katawhan nga iyang kaugalingon sa Dios, isip usa ka kahayag nga anaa sa usa ka bungtod. “Kamo mao ang kahayag alang sa kalibutan. Ang siyudad nga nahimutang sa ibabaw sa bungtod dili gayud mahisalipdan. Ang mga tawo dili usab magdagkot og suga aron ibutang kini sa ilalum sa gantangan; kondili sa ibabaw sa tungtunganan; ug kini magaiwag kanilang tanan nga anaa sa sulod sa balay. Pasigaa ninyo ang inyong kahayag sa atubangan sa mga tawo aron makita nila ang inyong maayong mga buhat ug dayegon nila ang inyong Amahan nga anaa sa langit.” [Tan-awa sa Mateo 5:14–16].⁶

Pagkadako nga responsibilidad … sa paggiya sa maayong mga lalaki ug maayong mga babaye niining tibuok kalibutan nga makaila sa Dios, ug makahibalo unsa ang ilang misyon dinhi sa yuta! Mga amahan ug mga inahan, isig ka trabahante, nakaamgo ba gayud kamo karon unsay gipasabut sa pag-abaga sa responsibilidad sa pagdala sa mensahe sa kalinaw ug maayong kabubut-on ngadto sa tanang mga tawo?⁷

Ang kalibutan mas gihidlaw kaayo nga makadungog sa kamatuoran sukad masukad sa kasaysayan niini. Kita aduna niini. Makahimo ba kita sa buluhaton––sa responsibilidad nga gihatag sa Dios kanato?⁸

Ang matag miyembro sa Simbahan kinahanglang makabig ug makabaton og kahibalo sa ebanghelyo, lakip sa kahibalo sa mga kasulatan. Pagkanindot kaha kon ang matag miyembro sa Simbahan makahimo, sama ni Pedro sa karaan, “sa inyong kasingkasing katahai ninyo ang Ginoong Dios: ug kinahanglan nga andam kamo kanunay sa pagtubag kang bisan kinsa nga mangutana sa hinungdan sa paglaum nga anaa kaninyo. … ” (1 Ped. 3:15.) …

Ang responsibilidad sa Simbahan mao ang pagsangyaw sa ebanghelyo ni Jesukristo ingon nga gipahiuli ngadto ni Propeta Joseph Smith, dili lamang sa pagsangyaw niini ug sa pagpahayag niini pinaagi sa pulong, pinaagi sa pag-apud-apud sa basahon, pero labaw sa tanan pinaagi sa pagsunod sa ebanghelyo diha sa atong mga panimalay ug diha sa atong pagpakigsabot sa negosyo, magbaton og hugot nga pagtuo ug pagpamatuod diha sa atong mga kasingkasing, ug mopasanag niini bisan asa kita moadto. … Walay bisan unsa nga makababag sa kauswagan sa kamatuoran gawas lamang sa atong mga kahuyang o kapakyasan sa paghimo sa atong katungdanan.⁹

Ang matag miyembro usa ka misyonaryo. Siya adunay responsibilidad sa pagdala og tawo: usa ka inahan, usa ka amahan, usa ka silingan, usa ka isig ka trabahante, usa ka kauban, usa ka tawo nga matudloan sa mga mensahero sa ebanghelyo. Kon ang matag miyembro motuman niana nga responsibilidad ug kon sabutan nga ang inahan o ang amahan o usa ka tawo makigkita sa gitugutan nga mga representante sa Simbahan, walay gahum dinhi sa yuta nga makapugong niini nga simbahan sa pagtubo. Ug personal nga pagkontak maoy makaimpluwensya niadtong mga investigator. Kanang personal nga pagkontak, ang matang niini, ang epekto niini mag-agad kaninyo. Ug kana ang gusto nakong ipasabut. Adunay usa ka responsibilidad nga dili malikayan sa tawo, mao kanang responsibilidad sa personal nga impluwensya. … Mao kana ang imong pagkaikaw, dili ang imong pagpakaaron-ingnon ang makaaghat sa mga tawo sa pag-imbestigar¹⁰

Ang matag miyembro sa Simbahan kinahanglang mahimong usa ka misyonaryo. Tingali wala siya tuguti, nga mobisita sa kada balay, pero siya gitugutan, tungod sa iyang pagkamiyembro, sa pagpakita og husto nga ehemplo isip usa ka maayong silingan. Ang mga silingan nagbantay kaniya. Ang mga silingan nagbantay sa iyang mga anak. Usa siya ka kahayag, ug iyang katungdanan mao nga dili itago kana nga kahayag ilawom sa gantangan, kondili ibutang sa ibabaw sa tungtunganan aron ang tanang mga tawo magiyahan niini. …

… Kon kamo magsunod sumala nianang maayong mga baruganan ubos sa mga pakigsaad nga inyong gihimo sa daplin sa tubig, ug sukad nianang higayona sa mga miting sa Sakramento, ug kadaghanan kaninyo sulod sa Balay sa Dios, makahimo kamo og halangdong misyon, ug ang Dios moganti kaninyo.

Hinaut nga ang matag miyembro sa Simbahan makasinati niining kausaban dinhi niining kinabuhia, ug magpuyo aron ang uban, nga makakita sa iyang maayong mga buhat, mosangpot ngadto sa pagdayeg sa atong Amahan sa langit.¹¹

Ang Ebanghelyo mao ang atong kasandigan. Nasayud kita unsay gibarugan niini. Kon kita magpuyo niini, mobati niini, ug mosulti og maayo bahin sa Ebanghelyo, sa Priesthood, sa mga awtoridad niini, mosulti og maayo bisan sa atong mga kaaway, mas magmalipayon kita sa atong mga kaugalingon, ug kita magasangyaw sa Ebanghelyo ni Jesukristo. Ang tanan makahimo niini. Posible kini. Ang Dios wala magsugo kanato sa paghimo niini ug dayon hikawan kita sa gahum sa paghimo niini.¹²

Sa seksyon 4 sa Doktrina ug mga Pakigsaad, si Propeta Joseph Smith nakadawat og pagpadayag nga “tan-awa usa ka kahibulongan nga buhat hapit na moabut diha sa mga katawhan.

“Busa, O kamo nga anaa sa pag-alagad sa Dios, tan-awa nga kamo moalagad kaniya sa tibuok ninyo nga kasingkasing, gahum, hunahuna ug kusog, nga kamo magbarug nga walay mansa sa atubangan sa Dios sa katapusan nga adlaw.” (D&P 4:1–2.) …

[Usa] ka importanting bahin niining pagpadayag, ug sa uban nga gihatag sa susamang higayon, mao ang paghingalan sa mahinungdanong mga kwalipikasyon niadtong kinsa moapil sa pagpatuman niining kahibulongan nga buhat. Kini nga mga kwalipikasyon dili ang pagpanag-iya og bahandi, dili ang sosyal nga pagkainila, dili ang politikal nga pag-uswag, dili ang kalampusan sa pagkamilitar, dili ang pagkahalangdon sa pagkatawo; pero ang tinguha sa pagserbisyo sa Dios uban sa inyong tibuok “kasingkasing, gahum, hunahuna ug kusog”––espirituhanong mga hiyas nga makatampo sa pagkahalangdon sa kalag. Usbon ko: Dili pagkainila, dili bahandi, dili teyolohikanhong pagbansay sa panggobyerno sa simbahan––apan “usa ka kahibulongan nga buhat hapit na moabut diha sa mga katawhan.”¹³

Adunay pipila ka mga sumbanan diin ang [mga bishop ug mga presidente sa stake] kinahanglang magiyahan sa pagtawag sa atong mga misyonaryo. Una, ayaw pagtawag og [misyonaryo] tungod sa tuyo sa pagluwas kaniya. Ang batan-ong lalaki nahisalaag ug sa inyong pagtuo nga ang usa ka misyon makaayo kaniya. O makaayo kaniya. Pero dili kana mao nganong inyo siyang ipadala. Pagpili og [mga misyonaryo] kinsa takus morepresentar sa Simbahan, siguroha nga sila may igong kahingkod, ug, labaw sa tanan, nga sila adunay maayong kinaiya.¹⁴

Maayo nga dili kaayo nato ibutang sa hunahuna unsay kaayohan nga madawat niadtong mga representante kaysa sa ilang pagkaandam ug pisikal nga kasarang sa pagtuman sa mga responsibilildad sa usa ka misyonaryo nga tawag. Sa pagpili og usa ka misyonaryo atong ibutang sa hunahuna ang mga pangutana nga mosunod:

Takus ba siyang morepresentar sa Simbahan?

Aduna ba siyay igong gahum sa pagpakigbatok sa tintasyon?

Nalimpyohan na ba niya ang iyang kaugalingon samtang diha sa ilang panimalay ug pinaagi niana nga sumbanan nagpakita sa iyang kaugalingon nga makahimo sa pagbatok sa posibling tintasyon didto sa misyon?

Aktibo ba siya sa mga organisasyon sa Simbahan sa ilang dapit?

Siya ba nakakita sa unsay ikatanyag sa Simbahan ngadto sa kalibutan?

Nakakita ba siya nga ang Simbahan mao ang labing mahinungdanong butang sa kalibutan, ug ang bugtong grupo nga gitugutan sa pagrepresentar ni Ginoong Jesukristo sa kaluwasan sa katawhan? …

Siya ba, pinaagi sa pag-ampo, o kasinatian, mibati sa pagkaduol sa Dios nganha kaniya, aron nga siya makaduol sa Ginoo sama nga siya makaduol sa iyang yutan-ong amahan?¹⁵

Busa ang matag elder nga moadto ngadto sa laing dapit aron sa pagsangyaw niini nga ebanghelyo kinahanglan gayud nga mosunod una sa ebanghelyo kutob sa iyang mahimo, ug adunay pagtuo diha sa iyang kasingkasing nga siya nagsangyaw sa kamatuoran. Tinuod, sa sinugdanan kini nga pagpamatuod tingali wala pay klaro; pero ang atong tanang mga anak aduna niini bisag gamay. … Pinaagi sa pagtuon, pagserbisyo, pagpaubos ug pagampo, kini nga pagpamatuod madugangan.

Laing kwalipikasyon mao kini: Ang matag elder kinahanglang usa ka maayong tawo nga Kristiyano sa kanunay. Ang usa ka maayong tawo––kinsa siya? “Bisan kinsa nga madayganon”–– walay gitago, dili magduko-duko tungod kay adunay sala; “bisan kinsa nga maunungon”––maunungon ngadto sa kamatuoran, ngadto sa hiyas, ngadto sa Pulong sa Kaalam––”tinuod, nga mga maloloy-on ug mahigalaon nga kinaiya, madungganon sa iyang kaugalingon ug sa iyang paghukom sa uban, matinud-anon sa iyang pulong sama ngadto sa balaod, ug matinud-anon ngadto sa Dios ug ngadto sa tawo––ang mao nga tawo usa ka tinuod nga maayong tawo, ” ug ang maong tawo nga elder niini nga Simbahan mao ang mogawas aron himoong Kristiyano ang kalibutan.¹⁶

Ang matag deacon, teacher, ug priest, matag elder diha sa Simbahan nakasabut nga aron mahimong takus nga mahimong representante sa Simbahan ni Kristo, kinahanglan nga siya kalma sa iyang mga kinaiya ug limpyo og moralidad. Gitudloan siya nga walay doble nga sumbanan sa kaputli, nga ang matag batan-ong lalaki, ingon man usab ang matag batan-ong babaye, kinahanglang gawasnon ang kaugalingon gikan sa sekswal nga kahugawan. …

Kining batan-ong mga lalaki gitudloan nga sila mogawas isip mga representante sa Simbahan, ug nga ang usa ka representante sa bisan unsang organisasyon––ekonomikanhon o relihiyoso–– kinahanglang maghupot og bisag usa lang ka madungganong hiyas, ug kana mao ang pagkamasaligan. Sakto siya kinsa miingon, “Ang pagkamasaligan mas labaw pa nga komplimento kay sa higugmaon.” Ug kinsa ang girepresentaran niini nga mga misyonaryo? Una, sila nagrepresentar sa ilang mga ginikanan, nagtuman sa responsibilidad nga dili mamansahan ang ilang maayong pangalan. Ikaduha, nagrepresentar sila sa Simbahan, ilabi na sa ward nga ilang gipuy-an. Ug ikatulo, nagrepresentar sila ni Ginoong Jesukristo, nga sila maoy gitugutan nga mga sulugoon.

Kini nga mga ambasador, kay sila mao man, nagrepresentar niining tulo ka mga grupo ug uban nianang pagrepresentar ilang gidala ang usa sa labing dakong responsibilidad sa ilang mga kinabuhi.¹⁷

Kon gusto ninyo nga malig-on ang inyong pagpamatuod, aron kini ikapadayag nganha kaninyo karon sa tagsa-tagsa nga si Kristo nagtabang kaninyo sa inyong trabaho, naggiya sa iyang Simbahan, ang labing maayong paagi sa pagbuhat niana mao ang … paghimo sa inyong katungdanan, … pag-atiman sa misyonaryo nga buhat.¹⁸

Ang paghatag og serbisyo … didto sa natad sa misyon usa ka panalangin ni bisan kinsa. Gipamatud-an kini nga tinuod sa liboan ka mga ginikanan sa tibuok Simbahan kinsa nagpasalamat sa kabililhon sa mao nga trabaho sa ilang mga anak nga lalaki ug babaye, diin kini nga kasinatian nakapapukaw sa ilang pagkamapasalamaton mahitungod sa panimalay ug sa ebanghelyo. Ang mga ginikanan nasayud usab nga ang misyonaryo nga kalihokan makadala ngadto sa kahimtang sa pagkahibalo sa kamatuoran sa ebanghelyo, nga tingali gibati sa batan-ong mga lalaki pero wala mapadayag.¹⁹

Kadaghanan nato wala makaamgo sa kabililhon ug sa dakong mga posibilidad niining mahinungdanong sanga sa kalihokan sa Simbahan ang [misyonaryo nga buhat].

1––Isip usa ka ehemplo sa boluntaryo nga pagserbisyo sa kawsa sa Manluluwas, kini wala matupngi.

2––Isip magdadasig sa limpyo nga pagpuyo diha sa mga kabatanonan, isip usa ka tampo sa paglig-on og kinaiya, ang impluwensya niini dili masukod.

3––Isip usa ka mapanudloon nga gahum ug makabayaw nga impluwensya diha sa atong mga komunidad, ang epekto niini klarong makita.

4––Isip usa ka tampo sa maayong pagsinabtanay sa mga kanasuran, ug sa pagpasiugda sa internasyonal nga panaghigalaay, makapatunhay kini og mahinungdanong impluwensya.

5––Kay ang katuyoan sa Labawng Makagagahum mao ang pagluwas sa tagsa-tagsa, … ang misyonaryo nga pag-alagad naglihok nga mauyunon sa katumanan niining mahangturong plano!

“Hinumdumi ang bili sa mga kalag mahinungdanon sa pananaw sa Dios; …

“Ug kon kini mahimo nga ikaw manlimbasog sa tanan nimo nga mga adlaw sa pagsangyaw og paghinulsol ngadto niini nga mga katawhan, ug magdala, bisan usa ka kalag ngari kanako, unsa ka dako ang imong hingpit nga kalipay uban kaniya diha sa gingharian sa akong Amahan!

“Ug karon, kon ang imong hingpit nga kalipay dako tungod sa usa ka kalag nga imong gidala ngari kanako diha sa gingharian sa akong Amahan, unsa kaha kadako sa imong hingpit nga kalipay kon ikaw makadala og daghan nga mga kalag ngari kanako!” (D&P 18:10, 15–16.)²⁰

Ang mga kasingkasing sa mga tawo kinahanglang mausab. Si Kristo mianhi sa kalibutan alang nianang maong katuyoan. Ang pinakaimportanting rason sa pagsangyaw sa ebanghelyo mao ang pag-usab sa mga kasingkasing ug mga kinabuhi sa mga tawo, ug kamo mga kaigsoonan nga moadto sa stake ug ngadto sa laing stake ug makadungog sa ebidensya ug pagpamatuod niadtong kinsa bag-ong nakabig … makapamatuod kon sa unsa nga paagi nga ang pagkakabig nakapausab sa ilang mga kinabuhi, samtang sila naghatag sa ilang mga pagpamatuod. Sa mao nga pagkakabig sila makahatag og kalinaw ug maayong pagsinabtanay ngadto sa kalibutan imbis panagbangi [ug] pag-antus.²¹

Ang atong mga misyonaryo … karon nagpahayag ngadto sa masamok nga kalibutan nga ang mensahe nga nagmantala sa pagkatawo ni Jesus—“himaya sa Dios sa kalangitan, ug sa yuta panagdait sa mga tawo iyang gikahimut-an” [tan-awa sa Lucas 2:14]––mahimong matinuod dinhi ug karon pinaagi sa pagsunod sa mga baruganan sa ebanghelyo.²²