Mataupu 11

Sailia o le Olioli i le Olaga

E tatau i le Au Paia ona saili atu i mea uma e lelei, ma ua fuafuaina e siitia ai le fiafia o le fanauga a tagata.¹

Mai le Soifuaga o Ioane Teila

I le taufaaiuiuga o Iuni i le 1847, sa taitaia se vaega toatele o le Au Paia e Elder Ioane Teila ma Elder Parley P. Pratt ma tuua ai Uinita Kuota ae malaga atu i sisifo. E oo atu ia Setema 1847, ua latou taunuu i le itu i sasae o Mauga Papa, i le va o le 300 ma le 400 maila le mamao mai le Vanu o Sate Leki. I le vaiaso muamua o Setema, ua faitau inisi le mafiafia o le kiona ua toulu, ma sa toatele le Au Paia ua lagona le le fiafia. O le taimi lea, ua toe taliu mai ai Peresitene Polika Iaga ma nisi o le Toasefululua mai le Vanu o Sate Leki, e toe agai atu i Uinita Kuota ma latou fetaiai ai ma le vaega a Elder Teila. I le ogaoga o le kiona ma le faateteleina o le popole o tagata na malaga atu i le Vanu o Sate Leki, sa faamalosiau atu ai Elder Teila i tagata uma ina ia aua le popole, ma sa latou faia ai se fonotaga ma Peresitene Iaga, ma uso o le Toasefululua, ma isi uso sa taitaia lea vaega o le malaga.

A o faia le fonotaga a le usoga, sa taape ao ma e le’i pine ae liusuavai le kiona i le la. Sa o atu loa lava ni tuafafine i se vaega e i ai le mutia ma e siomia i pupuvao, e aunoa ma le ta’uina atu i le isi vaega o le malaga. Sa amata ona latou fatufatu ai ni laulau ma ufiufi i ie papae ma tuu i ai ipu ma mea mananaia e faaaoga i le laulau ‘ai. O loo tusia i se talaaga faasolopito na “fasi le tamai povi peti; sa saunia foi manu ‘aivao ma i’a ua matua tele lava; o fualaau aina suamalie, o sieli ma mea manogi e faaaoga mo taumafataga faapitoa, ua aumai uma ma o se matuai taumafataga faatupu lava.”

Ina ua uma le fono a le aufono, sa taitai atu le usoga sa fono ma le silia i le 100 isi tagata o le malaga, i le nofoaga sa tapena nana ai lea taumafataga ma sa matua faateia ai i latou, ma sa latou olioli ai i se taumafataga matagofie tele. O loo tusia i tala tusitusia e faapea: “Ina ua maea le taligasua ma tapena mea uma, sa faia sauniuniga e fai ai a latou siva; ma e le i umi ae faaopoopo atu i le talie fiafia ma talanoaga fesagisagia’i, le leomalie o vaiolini. …Sa felafoa’i siva ma pese ma le faiga o solo. ‘Sa matou lagona uma le faageetia ma le faamanuiaina,’ sa tusia ai e Elder Teila, ‘sa matou vivii atu i le Alii ma taufai faafetai atu le tasi i le isi.’”²

E talitonu pea lava pea le Au Paia o Aso e Gata Ai i le sailia o le fiafia i le olaga, a le o le sagisagi fiafia i le matagofie naua o le natura, o le faapotopoto mo ni gaoioiga lelei tuufaatasi, po o le manatunatu loloto foi i upumoni o le talalelei. Sa aoao mai e Ioane Teila, “O le ‘olaga ma le tulimatai atu i le fiafia,’ e tatau ona gauai atu i ai tagata atamamai uma.” Talu ai ona e talitonu o ia e mafai ona tatou maua le olioli sili i lenei olaga, o lea sa ia aoao mai ai foi “o le fiafiaga aupito sili e mafai ona tatou maua e maua lea i le mautinoa e faamaonia e lo tatou Tama Faalelagi, e i ai i le mata’u i le Atua, e maua i le tausia o ana tulafono—faatasi ai ma mataupu faavae o le upumoni e faavavau, ma mea tatou te iloa e sili ona siitia ai e le gata i lo tatou fiafia i la le tino, ae faapea foi lo tatou fiafia e faavavau.”³

O Aoaoga a Ioane Teila

E finagalo le Atua ia tatou fiafia i le olaga.

Tatou te mananao e fiafia iinei. E sa’o lelei. Ua fuafua e le Atua ina ia tatou fiafia lava i tatou. Ou te le talitonu i se lotu e le fiafia ai tagata, e faauu, faasiasia ma leai ni mea e fiafia ai. …E le tatau ona ou mafaufau e i ai se mea sili pe lelei foi e maua ai i lena mea, ae o la e siomia e mea uma e pei o laau, o manu felelei, fugalaau, ma laufanua lanulauava, e ese le matagofie, o iniseti ma pi uu ma felelea’i solo, o tamai mamoe e taaalo fiafia. Afai e fiafia isi mea uma i le olaga, aisea la tatou te le fiafia ai? Peitai, tatou te mananao foi ina ia faia ma le sa’o, ma ia aua lava nei o ese mai i se tasi o nei mataupu faavae ua tuuina mai e le Atua i le fanauga a tagata.⁴

Pe i ai ea se mea e faapogisa i galuega na faia e le Atua? Soo se mea lava tatou te liliu i ai, tatou te vaaia lava le toafimalie, o le matagofie, matafiafia, ma le lalelei.

O faamanuiaga a le Atua na faia mo le tagata, ma lona fiafia; na tuu le tagata i le faauluuluga o le foafoaga. Ua tumu le lalolagi i le anoanoai o le tamaoaiga; o fatu mo meaai gaosi, o fualaau aina suamalie, ma vine mo le tagata; ua i ai foi mo ia o laau po o laulaau faivai, o fugalaau o loo faamatagofie ai le fogaeleele, e sasala faafagusausau lo latou manogi, ma faaalia ai lo latou matagofie a’ia’i;…Ua faia foi mo ia, o laau fai pa ma fuga o vine ua taufuifui, ua ofu foi le natura po o le fogaeleele i ona laei aupito sili ona taugata; o galugalu o vaitafe laiti, o le punavai mama, o le vaitafe manino e tafe mo ia, o mea uma lava o le natura, ua soona lalelei faatosina, ma o loo valaaulia ai le tagata ina ia tofo i lona fiafia, o le matagofie, ma le lotomama, ma tapuai atu ai i lona Atua.

O i latou e faapea mai e lagona le faanoanoa i le mata’u i le Atua, ma lana galuega! O faiga pi’opi’o a le lalolagi, e afua ai ona faanoanoa tagata; ma faiga pi’opi’o a lotu, e faasiasia ai: o faanoanoaga nei e matua’ia lava e tagata, ae le o faamanuiaga a le Atua. Tatou talanoa i le faasiasia! E i ai se faasiasia i le tausagi o manufelelei, o le osooso o le solofanua, o le taalo a le tamai mamoe, po o le tamai ‘oti; o le matagofie o fugalaau, o soo se mea matagofie o le Natura, po o le Atua na faia ia mea, po o ana galuega foi?⁵

O fiafiaga lautele e mafai ona ogatasi ma le talitonuga moni faalelotu.

E i ai nisi tagata ua manatu o le laau ‘ili, mo se faataitaiga, o se mea faigaluega a le tiapolo, ma o se mea sese pe a faaaoga. Ou te le manatu e sa’o, ou te manatu o se mea manaia tele e siva ai. Peitai, e i ai nisi tagata ua manatu e le tatau ona tatou sisiva. Ioe, e tatau ona tatou fiafia i le olaga i soo se mea tatou te mafaia. E i ai nisi tagata e tetee i musika. Aisea, e i ai musika i le lagi, faapea foi i manu felelei! Ua faatumulia ai i latou e le Atua. E leai se isi mea e sili atu ona faamalie loto ma matagofie nai lo le alu i le togavao i le taeao po, ma faalogologo ai i le tausagi leomalie o manu felelei, ma o se uiga faanatura lo tatou talisapaia o ia mea.

Tatou te le malamalama i le matagofie o musika o le a i ai i le lagi. Atonu e faapei ona ta’ua e se tasi Aposetolo e faatatau i se isi e ese ai—“O mea e le i vaaia e mata, e le i lagona foi e taliga, e le i oo foi i le loto o se tagata, o mea ia ua saunia e le Atua mo i latou o e alolofa ia te ia.” [Tagai 1 Korinito 2:9.] Tatou te le malamalama atoatoa i le, matagofie, toafilemu ma le leomalie o musika i le lagi.

O lo tatou faamoemoega o le pipiimau atu lea i mea uma e lelei, ae tetee atu i mea uma e leaga. O se tasi o mafuaaga e tetee ai tagata lotu i le lalolagi i musika ma tala faatino, ona o mea leaga o loo filogia ai. E faaaoga e tagata amioleaga ma le pi’opi’o nei mea, ma ta’ufaatauvaaina ai i latou; ae pe o se mafuaaga ea lea e le tatau ai ona fiafia le Au Paia i meaalofa a le Atua? Pe o se mataupu faavae sa’o ea lena? E leai. E tatau ona latou saili atu i mea uma e lelei, ma ua fuafuaina e siitia ai le fiafia o le fanauga a tagata. …

O a tatou gaoioiga faapasitaimi uma lava, e tatau ona tatou mautinoa o loo sa’o ona fai, ma e le tatau lava ona galo ia i tatou ona amio faatamalii, ma e tatau ona tatou aloese mai le faalogogatata [po o le le usiusitai] ma le le feavata’i, ia feagaleleia’i, ia tausaafia ma faaaloalo.⁶

O fiafiaga lautele ma gaoioiga faapasitaimi e le faapea e le ogatasi ma amioga sa’o ma talitonuga faalelotu moni. Nai lo le faasaina o tala faatino ma le toe faatagaina, ua faamoemoe le Au Paia o Aso e Gata Ai e taofiofia ma pulea, ma ia leai ni faatosinaga ‘alu’alua, ma ia tausisia o se mea e mafai ona feiloai uma ai mo ni fiafiaga mama. O le mea lea, na o atu ai o tatou taitai i nei nofoaga ma le manatu, afai e i ai, o le a taofia faiga uma ma faatosinaga faatamai i le augatupulaga talavou faia’e. E le mafai ona avea le soona faaeteete e faapea ai, o le a taofia ai le saolotoga mai le faia o mea leaga, ma ia aua ai le liua mea e tatau ona maua ai le olioli ma si fiafia e avea ma auala e tula’i mai ai ni fiafiaga eleelea po o ni amioga pi’opi’o… .O tagata e i ai i komiti, ma taitai e vaaia, e tatau ona silasila toto’a i soo se ituaiga siva e fai, ia fai i auala tausaafia ma le lelei, ma ia le faatagaina ni amioga e tata’i atu ai i aga faatiapolo e faatiga ai i le agaga.⁷

O le lotogatasitasi i le talalelei e aumaia ai le olioli.

O se mea lelei tele i le Au Paia a le Atua le manatunatu loloto i mataupu faavae o upumoni e faavavau, ua aoaoina ai i latou. Afai e i ai se mea e fesootai ma le fiafia ma le tagata soifua, afai e i ai se mea e fuafua e faalautele ai le vaaiga ma lagona o le fanauga a tagata, e siitia ai o tatou faamoemoe ma faanaunauga, ma maua ai le filemu, olioli, ma le mautinoa, o le mafaufau lea ua faaalia mai e le Atua mataupu o upumoni e faavavau; ua Ia totoina i o tatou loto ma ua tatou maua ai lagona mautinoa e tusa ai ma na mea tatou te folafola atu ua tatou talitonu i ai, ma ua tatou iloa.⁸

E le mafai ona ou vaai faalemafaufau i se isi mea e sili atu ona matagofie ma faalelagi nai lo se usoga e tutu faatasi, e faatulagaina i le faatulagaga ua faataatia mai i le Mataupu Faavae ma Feagaiga; pe a galulue tagata uma mo le manuia o tagata uma— pe a tatou alolofa i le Atua ma o tatou loto atoa, ia tatou alolofa foi i o tatou tuaoi e pei o i tatou lava; o o tatou taimi, o a tatou meatotino, o a tatou taleni, o o tatou malosi faalemafaufau ma faaletino e faaaogaina mo le lelei o tagata uma; e leai se tasi na te fai faamalosi pe na ona faaaogaina foi o se isi; e tutusa mea e fiafia i ai tagata, e i ai punaoa masani mo mea tautupe, o mea masani e maua ai tupe; e faapei ona latou faia i lenei konetineta, sa ta’ua faapea “ua faamaoni tagata uma o le tasi i le tasi,” ma sa galulue tagata uma mo le soifua sololelei o isi, “pe a mafai ona feiloai tagata uma i soo se nofoaga i se uso ma se uo,” pe a faataunuuina uma faatosinaga agalelei ma le agaalofa ma lagona o lo tatou natura, ma manumalo ai i le lotomatau’a, faasausili, inoino, ma le faamaualuga, ma mealeaga uma ae gauai atu i le finagalo o le Agaga o le Atua. E matagofie tele nei mataupu faavae ma o le a faagaeetia loto i se nuu, o se itumalo, o se setete, atunuu, po o le lalolagi.⁹

Ua fiafia lo’u loto i le Alii, ma ou te faamanu i le suafa o le Atua o Isaraelu, ina ua ou maua lana ekalesia ma le malo i le fogaeleele. O nei lagona, ou te moomoo i taimi uma e teu ai i lo’u loto ma faaaoga i lo’u olaga; ma ou te talitonu e fia selau, pe afai foi e leai, e fia afe na muamua ia te au, o loo i ai foi lea lava agaga ma lagona, ma faanaunauga lava e tasi. …

O le a le mea e faafiafia ai i tatou ma olioli i aso faapenei?…Ona o loo i ai se tuufaatasiga o lagona lelei, o faanaunauga ma faamoemoega lelei, ma o le agaga e tasi e musuia ai tagata uma, ma fatu ai se tino e tasi [po o se tino faatulagaina lelei] o le mana, o le faatuatua, ma le Agaga o le Alii. O le a malamalama se sela se tasi [po o se moliga’o], ma e manaia pe a tilotilo i ai, ae a faitau afe [moliga’o] o lena lava ituaiga, o le a matua susulu le malamalama. A tuu mai ia i tatou, o se taimi o le tuufaatasia, o le malamalama, o le ola, o le atamai, o le Agaga o le Atua soifua; e tasi o tatou lagona, tasi lo tatou faatuatua, ma o le toatele naua o tagata e i ai lea lotogatasi, o le a maua ai se tino e tasi o le mana, o le a le mafai e se malosi o lenei lalolagi ma seoli ona faatoilaloina. …

Tatou te talitonu, o i tatou o se tino o se nuu, ua i ai korama eseese uma o lenei ekalesia ma le malo, ma o loo punouai i lenei galuega tele; ma o le ala lea o loo i ai se lagona o le faatuatua, lotogatasi, ma le malosi, po o le mana, pe a outou mananao ai, o le Agaga o le Atua soifua, lea e faaosofia ai ma faaolaola le mafaufau, ma maua ai e le tino le malosi, ma le olioli i le loto. Tatou te taufai mananao uma e auai i lenei faamoemoe. O loo i ai le Alii iinei e ala i lona Agaga ma le mana, ma ua olioli foi o tatou loto.¹⁰

O le malamalama i mataupu faavae o le upumoni e aumaia ai le fiafia ma le olioli.

Pe a tatou tilotilo sa’o ia i tatou lava—pe a tatou malamalama sa’o i mataupu faavae o le upumoni—o le a se mea o i ai e le mafai ona tatou lafoai pe taulagaina ina ia maua ai le faaolataga? Pe a mamana le pa’i atu o le Agaga i loto o le au paia—pe a faaalia mai le malamalama ma le poto o le lagi lava ia—pe a [susulu] ai le Alii i agaga o le au paia pe a faapotopoto faatasi, o le a se mea sa latou lagonaina? ua faamanuia i latou e le Alii. E faafia ona latou potopoto faatasi i sauniga faapitoa e maua ai faamanuiaga patino mai aao o le Atua, ma oo ifo ai le agaga o faaaliga i o latou luga, ma latou vaaia ai le matagofie o le lumanai, o le mamalu, tamaoaiga, ma le lelei atoatoa; ma pe a faamafanafanaina o latou loto e lena agaga, o le a se tele o lo latou fiafia! O le a se latou vaai i mea o lenei lalolagi, ma faamanuiaga o loo faatalitali mai mo i latou! o o latou avanoa o ni au paia a le Atua Silisiliese; ma le mamalu o le a avea mo latou tofi pe afai latou te faamaoni e oo i le iuga!

Atonu ua outou iloa le lagona, o na ituaiga mafaufauga ma faamoemoega e tutupu fua a’e lava i latou i le loto o le tagata. Aisea e ese ai o tatou lagona i nisi taimi? Aua e galo ia i tatou ona tatalo ma valaau atu i le Atua, ma ofoina atu i tatou lava ia te ia, a le o lena, e mafua ona ua tatou agasala, ua faia se amio leaga, ma le maua ai le Agaga o le Atua, ma galo ai le faamoemoega mamalu o o tatou valaauga; peitai afai e mafai ona tatou vaai ma iloa ma malamalama uma i lo tatou tulaga moni i luma o le Atua, o le a faifai pea lava le saili atu o o tatou mafaufau i mea a le Atua, ma e tatau ona tatou saili ia iloa i le aso atoa, pe o a mea e mafai ona tatou fai e siitia ai le fiafia ma le faaolataga o le lalolagi, po o a foi mea e mafai ona tatou fai e faamamalu ai o tatou valaauga— e faamamalu ai le perisitua o le Alo o le Atua, ma pe o a foi mea e mafai ona tatou fai e faamamalu ai i lo tatou Atua, ma faaleleia atili ai o tatou aso o totoe i luga o le fogaeleele, ma le malosi o o tatou tino aua le faataunuuina o ona faamoemoega, ma le uunaia i luma o lona malo—mo le faalauteleina o ana fuafuaga, ina ia oo i le taimi tatou te tutu ai i ona luma, o le a mafai ona ia fetalai mai ia te i tatou, “Ua lelei ia, le auauna lelei e, ma le faamaoni, ua e faamaoni i nai mea itiiti, ou te tofia oe e pule i mea e tele, ina ulufale mai ia i le fiafia o lou Alii.” [Tagai Mataio 25:21.]¹¹

I lo’u lava iloa, ua ou i ai iinei o se tasi o sui tauva mo le faavavau, mo le lagi ma le fiafia. Ou te manao e faamautinoa i a’u amioga, se filemu i le isi lalolagi, o le a maua ai ai lena fiafia ma le olioli o loo ou sailia nei.¹²

Fautuaga mo Suesuega ma Talanoaga

Sa aoao mai e Peresitene Teila, sa foafoaina e le Atua le lalolagi ma ona matagofie mo lo tatou fiafia. O a ni mea sa e oo i ai, sa e maua ai le fiafia i le matagofie o le lalolagi ma e lagona ai lou latalata i le Alii?
E mafai faapefea e musika lelei, o solo, tala faatino, ma isi ituaiga o faafiafiaga ona tatou maua le olioli? O le a se mea e mafai ona tatou fai e aumaia ai le mana o le olioli i musika faagaeetia loto i o tatou olaga, ma olaga o tagata o o tatou aiga? E mafai faapefea ona tatou lagolagoina ma siitia faafiafiaga lelei?
Aisea e te manatu ai o musika o se vaega taua tele o a tatou tapuaiga faalelotu? Ua faamafanafanaina ma faamalolosia faapefea e viiga a le Ekalesia oe i taimi o faigata?
Ua aumaia faapefea ia te oe le olioli i au faigauo ma isi Au Paia? O le a se mea e mafai ona e fai e uunaia ai le faateleina o le lotogatasi i le au paia o lau uarota po o le paranesi?
O le a le uiga ia te oe o le lagona “olioli i le Alii”? O a ni aoaoga faavae o le talalelei e te maua ai le olioli? A o tatou saili atu i le olioli i lenei olaga, aisea e taua ai foi le mafaufau i le faavavau?
O a ni mea na tutupu i lou olaga na e maua ai le olioli? O le a se mea e mafai ona tatou fai, e faatumauina ai le agaga o le olioli i o tatou olaga, tusa lava po o a faigata? O le a se mea e mafai ona tatou fai e fesoasoani ai i a tatou fanau ia maua le olioli i o latou olaga?

O Mau e Faatatau I Ai: Salamo 118:24; Isaia 12:2–3; Mataio 25:21; 2 Nifae 2:25; Mosaea 2:41; Mataupu Faavae o le Faatuatua 1:13