Amio Sa’o

Ia avea i tatou o tagata o le upumoni, mamalu ma le amio sa- ’o—tagata e taulagi o latou mamalu ma ola ai, tusa lava po o a taunuuga—o tagata e tumau e faavavau feagaiga e fai. …Tatou te taumafai e faatupuina se nuu e avea ma tagata o le Atua, o tagata o le upumoni, o tagata o le amio sa’o, o tagata amioatua, tagata e alagatatau ona mafuta ma Atua i lalolagi o le faavavau.³

E faamoemoe le Atua ia i ai se nuu o tagata e lima mama ma loto mama, o e e le taliaina mea faatogafalea po o mea e faatau ai le amiotonu, …o e o le a avea ma tagata o le upumoni ma le amio sa’o, o le mamalu ma le amioatua, ma o le a latou tulimatai atu i le ala e faamaonia e Atua i lalolagi o le faavavau, e le gata i lea a o tagata faamamaluina uma ma le tonu na soifua ai po o loo soifua nei foi, ma taliaina le talitonuga o i tatou o tagata paia, o loo faamoemoe o ia ia avea i tatou ma Tagata Paia, ia le na o le igoa, ia le na o teori, ae i o tatou manatu, upu, ma amioga.⁴

O le mea e sili ona faigata ia i tatou, o lo tatou mananao tele lea e faamalie le vaaiga a le lalolagi, ma ua tele naua ai mea o le lalolagi ua ofi mai i o tatou loto; o le agaga o le loto matau’a ma le faaloloto, ma—o le a la sa’u tala a fai?—ua sosolo le le faamaoni e pei o se mala i le umi ma le lautele o le lalolagi i soo se itu, ma ua tatou feinu ai foi i lena agaga. E faapei foi o se faama’i ua aafia ai vaega uma o nuu; ma nai lo le pulea ai e mataupu faavae mamalu o loo i le fatafata o le Atua, a ua tatou ua’i atu i le ‘oa, lea o loo ta’ua o le pogai o mea leaga uma [tagai 1 Timoteo 6:10]; ma ua tatou le ua’i atu o tatou loto i le Atua, ae ua ua’i atu i mea o le lalolagi, o mea e le auga ma ua faavalea i ai. …Ia faaalia ma faamaonia atu i le lalolagi, i agelu ma le Atua o loo e i ai i le itu o le upumoni ma le mea sa’o, o le faamaoni, mama atoatoa ma le amio sa’o, ma e te lagolagoina le Atua ma Lona Malo.⁵

Aua le popole fua i le lalolagi po o mea foi e mafai ona tautala mai ai ma fai, aua ua na o mea lava e faatagaina i latou e le Alii e mafai ona latou faia. …O le a tatou talai atu le talalelei ia te i latou, ma faaauau pea le fautua atu i ai i mataupu faavae o le upumoni, ma faatulagaina i tatou lava e tusa ai ma le faatulagaga a le Atua, ma saili atu ina ia tasi i tatou—a le tasi i tatou e le ni o le Alii i tatou, ma o le a le mafai lava, ona avea ma tupulaga e faavavau. Faafofoga i ai, outou na le Au Paia o Aso e Gata Ai! Ma aua tou te fuafua na o outou lava ma lo outou tamaoaiga; ae ia outou lagona le faapea ifo i o outou loto, “O le a se mea e mafai ona ou fai e fesoasoani ai e fausia Siona. O lea ou te iinei, ma o a’u mea uma lava o loo i luga o le fata faitaulaga, ma ua ou saunia e fai le finagalo o le Atua tusa lava pe o le a, pe o fea foi na te auina i ai au, po o tuluiga o le lalolagi pe leai foi.” Ae peitai, tatou te le o faia lena mea; ua tatou matele i le faiga o a tatou lava mea ma feinu i le agaga o le lalolagi, ma tatou faamatuu atu ai e fetuutuunai i lena lagona ma faatosinaga. I le taimi nei, a tatou faamanu atu i le lalolagi ma mananao e siitia lo latou fiafia, e le mafai ona pulea i tatou i a latou faiga, pe malo mai foi a latou faatosinaga. O le Atua o le Alii lo tatou Atua; o ia o lo tatou tupu ma le faitulafono, ma e tatau ona pule o ia ia te i tatou.⁶

E i ai le mataupu faavae tele ou te manatu, e tatau ia i tatou uma ona faatino i a tatou tapuaiga, ia sili atu i lo isi mea uma o loo tatou feagai ai i le olaga, ma o le faamaoni lea o le faamoemoega. O loo faapea mai Tusitusiga Paia—“Afai e tuu saoloto outou e le upumoni, o le a faasaolotoina lava outou, o fanau a le Atua e le pona i luma o tupulaga amio faapiopio ma le finau vale.” [Tagai Ioane 8:32, 36; Filipi 2:15.] O loo toe ta’u mai foi ia i tatou e manaomia e le Atua le faamaoni i le loto [tagai Salamo 51:6]. O le mea tatau le faamaoni o tagata ia i latou lava, e tatau ona faamaoni le tasi i le isi i a latou upu, o mea e fai, [o talanoaga], o fesootaiga, o fuafuaga faapisinisi ma soo se mea lava; e tatau foi ona pulea i latou i le tautala sa’o, faamaoni ma le amio sa’o, ma o le matua valea lava o se tagata pe a le faamaoni ia te ia lava, ma le faamaoni i ana tautinoga ma lagona e tusa ai ma mataupu faalelotu.

Atonu e mafai ona tatou taufaaoleole le tasi i le isi … pe a fepasia’i tupe taufaasese mo mea moni ma taua i tagata. Peitai, e saili le Atua i loto ma taumafai e pulea le fanauga a tagata [tagai Ieremia 17:10]. Na te silafia o tatou mafaufauga ma malamalama foi i o tatou faanaunauga ma lagona; na te silafia a tatou mea e fai ma faamoemoega e mafua ai ona tatou faia. Ua masani o Ia i mea uma e fai ma faatinoga a le fanauga a tagata, ma o mafaufauga faalilolilo uma foi ma amioga, e manino uma i ona luma, ma o le a faamasinoina i latou i ia mea.⁷

E tatau ona tatou matua faamaoni a’ia’i, o le tasi i le isi, ma tagata uma; ia faamaoni a’ia’i mea ou te tautala ai e pei foi o feagaiga tusitusia; ia aloese mai le faaalia o le faamaualuga ma le faasausili; ae ia agamalu, ia tausaafia, ma lotomaualalo; ia tumu i le amio sa’o ma le mamalu; ma ia faamaoni ma amiotonu i a outou fegalegaleaiga ma tagata uma.⁸

Afai e nono mai e se tagata se lima tala, e tatau ona ia avatu se mea e faamau ai, aua e popole le tagata e ona ia le tupe ne’i olegia o ia. E le talitonu tagata i faaupuga a isi. Ou te le taitai ona ou avatua se mea e oo lava i se vaomago i se tagata, pe a le mafai ona ou talitonuina sana upu. E leai sona aoga, leai se faavae, leai se mea e ono faalagolago ai se tagata ia te ia. Ae, o tagata tonu lava nei na saunoa mai ai le perofeta, o le a ola i aso e gata ai. Latou te osia feagaiga ae leai se mafaufau e faataunuuina. O le selo lava a latou upu, e le faavaea foi la latou amio sa’o.

Ua ou ta’ua nei mea ina ia outou iloa ai, aua o le tulaga lea o i ai le lalolagi. Pe o tatou saoloto mai ai ea? E le taitai—ma’imau e pe ana faapea o tatou saoloto mai ai. Ma’imau pe ana toatele atu ni e faamaoni, amioatua, amio sa’o ma amiotonu, ma toatele atu foi i tatou ua fuafua e siitia ma faaeaina i isi mataupu faavae. Ou te tautala atu i nei mea, o se tulaga e maasiasi ai le fanauga a tagata; ma afai latou te i ai faatasi ma le Au Paia, o se tulaga e matua maasiasi ai, ma e tatau ona tatou inoino i ai; aua afai e i ai ni tagata i le lalolagi e tatau ona amio sa’o, amiotonu, ma faamaoni, o tatou lava ia, i soo se mea ma soo se tulaga. Ma afai tatou te tautala i se mea, e tatau ona taua e tusa ai ma le talitonuga, e pei ua tatou tauto ai, ma e pei ua noatia ai i tatou e sautuaafe ina ia ausia.⁹

O a mea tatou te talitonu i ai? Tatou te talitonu i le mama atoatoa, o le amioatua, o le faamaoni, o le amio sa’o, o le amiotonu ma le le faamatuu atu i mea pepelo; tatou te talitonu i le faamaoni i tagata uma, ia faia ma le tonu ma le mamalu; tatou te talitonu i le mata’u i le Atua, o le tausia o Ana tulafono ma tausia Ana poloaiga. Pe o tatou faia uma ea? E leai, e le o atoatoa. Maimau e pe ana tatou faia. Ae o le toatele lava o le Au Paia o Aso e Gata Ai o loo latou faia lenei mea; ma afai o i ai nisi e le o faia, ia latou toe iloiloina nei loa. … Ma talu ai ua tatou i ai iinei mo le fausiaina o Siona, o loo faamoemoe mai o Ia ia tatou sa’o ma faamamalu i a tatou fegalegaleaiga uma o le tasi i le isi, ma tagata uma lava.¹⁰

Ua tatou ola nei i se vaitaimi matautia ma le taua. E i ai nisi taimi e maofa ai tagata pe a latou vaai i faiga le tonu, o amioleaga ma le faatiapolo, o le leai o se faamaoni ma le amio sa’o, ma mea leaga ua tulai mai i soo se vaipanoa; ae aisea latou te ofo ai? … Pe le i folafola maia ea ia te i tatou, o malo o le lalolagi o i ai elemene o le faatafunaga ia i latou lava, ma e ao ona nutililiiina? Ma pe afai tatou te vaai atu ua solipala i vae le mamalu, ma taumamao ese mai le amiotonu, ae ua pulea ma taitaia e e amioleaga, ma le le tonu atoa ai ma le au le usitai i ia mataupu, e mafai ona tatou faapea ua tuu nei le matau i le tafu’e o le laau, ma o lena [laau] ua pala ma e le o toe mamao ae pau [tagai MFF 97:7]. Ma o le mea lena o loo tupu i malo i ona po nei. E le tatau ona tatou muimui pe mafaufau e i ai se mea e ese ai, pe ofoofogia ai foi. Sa tatou faamoemoe o le a tutupu nei mea, ma o le a sili atu ona leaga nai lo le taimi nei. Peitai, o loo tatou galulue e aoao atu mataupu faavae sa’o.¹¹

O loo tatou ola i le tisipenisione o le atoaga o taimi, o loo faapotopoto ai e le Atua mea uma ia tasi, ma ua ia aumaia i tatou mai malo eseese, o atunuu, o itu eseese ma tagata. Aisea ua faia ai lea mea? Pe ina ia faatasina ai ea i tatou? Pe o le tatou faamoemoe ea o le ola e pei ona ola ai tagata amioleaga—e avea ma tagata e mananao i tupe, o e loto vii, o e faamaualuga, o e upu leaga, o e le faalogo i matua, o e soona fai, o e faafefeteina, o e inoino i e ua lelei, o e ua peiseai ua amiolelei, ae ua leai se mana o i ai?” [Tagai 2 Timoteo 3:2–5.] E leai, na tatou o mai iinei ina ia mafai ona tatou aoao i tulafono a le Silisiliese, ma saunia ai i tatou ma a tatou fanau mo nofoalii, o alii sili, o malo ma pulega, i le malo selesitila o lo tatou Atua.

E i ai taimi tatou te talanoa ai e uiga i Siona, lea e tatau ona fausia i le Itumalo o Siakisone, e le gata i lea a o le Ierusalema Fou lea e tatau ona sauniuni e faafetaia’i i le Ierusalema o le a alu ifo mai le lagi. E faatusatusa faapefea o tatou olaga ma mea o tatou faia i nei mea? Pe o tulimatai atu ea o tatou loto, o lagona ma faanaunauga i ia mea, pe o tatou loto galo ea ma mua ona pupu o tatou mafaufau i faatosinaga o taimi ma aafiaga?

Pe o tatou saunia ea a tatou fanau mo lea taimi, ma faasalalau atu se faatosinaga i soo se mea tatou te o i ai, e taitai ai tagata i ala o le ola, ma siitia ai i latou i le Atua? Pe o tatou aga’iga’i ese mai ea i le faaeaga—e sau lea aso ma toe mou atu foi, pei lava ona i ai? Ou te manatu ua tatau ona tatou ala ma faatino, ma taumafai e tulimatai se ala e fiafia i ai le Silisiliese ma faamaonia. …

E ao ona tatou saunia o tatou tupulaga talavou e mulimuli i o tatou tulagavae, afai e sa’o o tatou tulagavae, e mafai ona avea i latou ma au paia faamamaluina i nuu, ma a oo ina tatou tuua lenei olaga mo le isi lalolagi, e mafai ona tatou tuua [ni fanau] e tumu i le amio sa’o, ma o le a latou tausia poloaiga a le Atua. E tatau ona tatou aoao a tatou fanau ia agamalu ma lotomaualalo, ia amio sa’o, amioatua ma ia matatau i le Atua, ina ia mafai ona latou aoao atu na mataupu faavae i a latou fanau. … Saili ina ia toto i loto o a outou tupulaga talavou ia mataupu faavae o le a avea ai i latou o ni alii ma ni tamaitai e faamamaluina, aga faatamalii, atamamai, amioatua, tausaafia, mama atoatoa, e tumu i le amio sa’o ma le faamaoni … ina ia mafai ona latou maua faatasi ma outou se tofi i le malo o le Atua.¹²

O nisi taimi e galo ai ia te i tatou, o loo tatou galulue ma le toatele o isi, i le atinaeina o le amiotonu ma le faatuina o le malo o le Atua i le fogaeleele; ma tatou le faia lelei ai isi, ma galo ai ia te i tatou le valaauga mamalu ua tofia i ai i tatou. E toatele i tatou e faamatuu atu i tofotofoga; tatou te tautevateva ma oo atu ai i le pouliuli, ma le toe maua ai le Agaga o le Alii. E galo ia te i tatou o loo leoleo i tatou e le Atua ma agelu; e galo ia te i tatou o loo vaavaai mai le lagi ia i tatou agaga o e ua amiotonu ma faaatoatoaina, atoa ai ma o tatou augatama mai anamua, o e o loo sagisagi mai i le faatuina o le malo o le Atua i le fogaeleele, ma o a tatou amioga ma mea e fai, o loo iloa uma lava e i latou o i le lagi, o e ua faatagaina.

Ma, o le galo o nei mea i nisi o taimi, e pei ai i tatou o ni vale, ona tiga ai lea o le Agaga o le Atua; e aveeseina mai ia te i tatou, ona tuua ai lea na o i tatou e tautagotago lo tatou ala i le pogisa. Peitai, afai e mafai ona tatou ola e tusa ai ma o tatou talitonuga faalelotu, matata’u i le Atua, ma ia faamaoni a’ia’i, ma tausia ana tulafono ma ona tulaga, ma tausi ana poloaiga e faia ai, e tatau ona matua ese o tatou lagona. E tatau ona tatou maua lagona mafanafana ma fiafia. O le a filemu ma fiafia o tatou agaga. Ma o le a mai lea aso i lea aso, mai lea vaiaso i lea vaiaso, ma mai foi i lea tausaga i lea tausaga, o le a faateleina lo tatou olioli.¹³

E tusa ai ma mea o le a tutupu ma ituaiga o tofotofoga, faigata ma mafatiaga o le a tatou feagai, ia te a’u lava ia, o se mea ua na o sina popolega itiiti; o mea nei ua i aao o le Atua. … Afai e maua i tatou e naunau ma usiusitai, ma o loo i ai i le itu a le Alii mo le mea sa’o; mo le mea moni, amio sa’o, mo le amioatua ma le mama atoatoa ma le paia, ma gauai atu i mataupu faavae o le upumoni ma tulafono o le olaga, o lona uiga o le a faatasi le Atua ma i tatou, ma o le a ia tausia i latou uma e ola ai i nei mataupu faavae. … O e mama atoatoa ma amioatua, o e mamalu ma ua tonu, o le a manumalo pea seia oo ina latou faataunuuina uma mea na fuafuaina e le Atua latou te faia i lenei lalolagi.¹⁴

Ia outou faamaoni ia te outou lava, ia faamaoni i luma o le Atua. Ia amioatua, ia faamaoni ma ia tumu i le amio sa’o, ma ia outou matatau i le Alii lo outou Atua i o outou loto, ona i ai lea o ana faamanuiaga ia te outou, ma o le a mafuta lona Agaga faatasi ma outou, ma augatupulaga e mulimuli mai ia te outou, o lalolagi e faavavau. Amene¹⁵