Aotelega Faasolopito

1808, Novema 1

Soifua mai i Milenitopa, Westmoreland, Egelani, o le lona lua o le fanau e toa 10 a James ma Agnes Teila.

1819

Siitia ma lona aiga i Hale (latalata i Milenitopa), lea sa galue fesoasoani ai i se tamai faatoaga a lona tama na aumai i sona uso (11; o numera o loo faapuipui o tausaga na o le matua o Ioane Teila).

1822

Galue faataitai i le faiga o atigipaelo i Livapulu. E le i atoa se tausaga ae gau le pisinisi a lona pule sa faigaluega ai, ona ia toe taliu ai lea i lona aiga (14).

1824

Tuua le Ekalesia Egelani ae auai i le Metotisi. Sa faaaluina le tele o ona taimi avanoa e suesue ai i le Tusi Paia, ma faitau galuega faafaifeau, ma tatalo (16).

1825

Avea ma se “failauga,” po o se aoao fesoasoani o le ekalesia Metotisi. Sa ia maua se uunaiga malosi o le a alu i Amerika e folafola atu le talalelei (17).

1830

Na malaga ona matua ma le aiga atoa e nonofo mau i Toronto, i Kanata, ae nofo ai na o ia i Egelani e faamaea fuafuaga o le pisinisi faaleaiga (21 po o le 22).

1832

Na tuua Egelani mo le Aai o Niu Ioka. Sa amata ona talai atu i Kanata (23 po o le 24).

1833–36

Auauna atu o se faifeau i le Ekalesia Metotisi i Toronto. Sa faaauau pea ona ia suesue i tusitusiga paia (24–27).

1836, tautotogo

Sa taunuu Elder Parley P. Pratt i Toronto e folafola atu le talalelei toefuataiina (27). Sa valaauina Elder Pratt i le Korama a Aposetolo e Toasefululua i le 1835.

1836, Me 9

Sa papatisoina e Parley P. Pratt (27).

1836–37

Auauna atu o le taitai pulefaamalumalu o le Ekalesia i Kanata (27–28).

1837, Mati

Malaga i Katelani e feiloai ma le Perofeta o Iosefa (28).

1838

Na faauuina e avea ma Aposetolo i Sisifo Mamao, Misuri, i le aso 19 Tesema, e Polika Iaga ma Heber C. Kimball, i lalo o le taitaiga a Iosefa Samita, lea sa i le Falepuipui o Liperate (30).

1840

Sa taunuu ai o se faifeautalai i Peletania Tele. O le uluai faifeautalai na folafolaina atu le talalelei toefuataiina i Aialani ma le Motu o Tagata. Sa ia vaaia le sauniuniga ma le lolomiina o le uluai lomiga o le Tusi a Mamona lea na lomia i fafo atu o le Iunaite Setete; ma sa fesoasoani foi i le sauniaina o le tusipese ma lomia le tele o tamaitusi faafaifeautalai (31).

1841

Sa toe taliu mai i le Iunaite Setete ma le tele o isi Aposetolo (32).

1842

Tofia e Iosefa Samita e faasa’osa’o le Times and Seasons, o se lomiga a le Ekalesia. Na ia faasa’osa’oina foi le Wasp (1842–43) sosoo ai ma le pepa na sui ai o le Nauvoo Neighbor (1843- -45), o nusipepa uma a Navu.

1842

Na filifilia ai e avea ma sui o le Aufono o le Aai o Navu, ma se sui o le au faatonu o le Iunivesite o Navu, ma Faamasino Faufautua i le Au Navu (33).

1844, Iuni 27

Na vaaitino ai i le tagatavaleina o Iosefa ma Ailama Samita i le Falepuipui o Karefasi, ma sa matua manu’a tuga ai i le osofaiga (35).

1846

Na fesoasoani ai e faatulaga le Autau a Mamona i Council Bluffs. Na toe malaga ai i Peletania Tele mo se misiona lona lua faatasi ai ma Parley P. Pratt ma Orson Hyde (37).

1847

Na toe taliu atu ai mai Egelani i Uinita Kuota. Sa ia taitaia se vaega toatele o le Au Paia i Iuta, ma taunuu ai i le masina o Oketopa (38).

1850–51

Sa auauna atu ai i Falani o se faifeautalai. Sa ia fofogaina se tatalo e latalata i Boulogne, e faapaia ai le atunuu mo le folafolaina atu o le talalelei. Sa ia amatalia ma faasa’osa’o le lomiga faavaitaimi a le Ekalesia i Falani, e ta’ua o le Étoile du Déseret (Fetu o le Tesareta). Sa fesoasoani ai i le faaliliuina o le Tusi a Mamona i le faa-Falani. Na ia lomiaina le uluai lomiga faavaitaimi a le Ekalesia i Siamani, o se nusipepa i masina taitasi e ta’ua o le Zion’s Panier (Tagavai a Siona). I lalo o lana taitaiga na lomia ai le uluai Tusi a Mamona i le faa-Siamani. Na ia tusia le The Government of God (41–42).

1854

Na filifilia e fai ma faipule o le Itumalo o Iuta (45).

1854–56

Sa auauna atu i se misiona i Niu Ioka, lea na ia vaaia ai ma faafoe mataupu a le Ekalesia, i setete o le itu i sasae. Sa ia lomia se nusipepa sa faaigoaina o le The Mormon (46–48).

1857

Toe taliu mai i Iuta. Sa filifilia e fai ma Fofoga Fetalai o le Maota i le Fono a Faipule Faaitumalo o Iuta, ma o se tiutetauave na ia faatinoina mo le tele o tausaga—e faaopoopo i ona tiute i le Ekalesia (49).

1868–70

Sa tautua ai o se Faamasino mo Esetete ma Mavaega i le Itumalo o Iuta (59–61).

1877, August 29

1877, Aokuso 29 Na tuumalo ai Polika Iaga. Mo isi tausaga e tolu na sosoo ai, sa taitaia ai e Ioane Teila le Ekalesia a o avea ma Peresitene o le Korama a le Toasefululua (68–71).

1878

Na faatuina ai le faalapotopotoga o le Peraimeri (69).

1880, Oketopa

Sa lagolagoina ai o se Peresitene o le Ekalesia, faatasi ai ma George Q. Cannon ma Iosefa F. Samita e fai ma ona fesoasoani (71).

1882

Na pasia ai e le Konekarasi a le Iunaite Setete le tulafono a Etimani, ma avea ai le tele o ava ma se solitulafono matuia, ma faasaina ai ni e fai au taunonofo mai faigapalota, o le umiaina o tofi lautele, po o le tauaveina o tiute fesoasoani i le faiga o faaiuga o faamasinoga. (73).

1882

Lomia le The Mediation and Atonement (73).

1884, Me

Faapaiaina le Malumalu o Logan Iuta (75).

1885

Maua le tala i le taimi o lana asiasiga i Kalefonia, ua faatonuina e taitai o le malo ina ia pueina o ia ma molia i le faia o ana au taunonofo. Na ia toe taliu ai i le Aai o Sate Leki i le aso 27 o Ianuari. I le aso 1 o Fepuari, na ia fofogaina ai lana toe saunoaga faalauaitele, ma ona o lona faamoemoe ia faaitiitia ai sauaga o le Ekalesia e taitai o le malo, o lea na ia lafi ai (76).

1887, Iulai 25

I le 78 o tausaga o lona soifua, sa tuumalo ai i le maota o Thomas Roueché i Kaysville, Iuta. I le taimi o lana taitaiga, sa oo atu le faitau aofai o le Ekalesia i le silia ma le 150,000.