O Lo Tatou Tiute Faafaifeautalai

Ua tatou i ai iinei mo se faamoemoega patino; sa faatulagaina le lalolagi mo se faamoemoega patino;…sa folasia mai le talalelei mo se faamoemoega patino i augatupulaga eseese o taimi, ma tagata eseese na faailoa ma fesootai mai i ai, ma o i tatou foi, i ona po nei, ua mulimulitai atu i ai i na faamoemoega. Sa taitaia i tatou e le Alii e pei ona sa ia taitaiina ai Isaraelu, ma e faapei foi ona sa ia taitaiina ai sa Nifae mai le laueleele o Ierusalema, ma ituaiga e sefulu, ma isi tagata na eseese mea na o i ai. Sa ia taitaia foi i tatou ma o le uluai mea lava na ia faia mo i tatou…o le auina mai lea o lana talalelei, ina ua muai faaali atu ia Iosefa Samita, ma ina ua faamaonia o ia e le Silisiliese, ma ina ua maua e ia se tofiga e ala i le perisitua paia o loo i ai i le lagi, ma o lena foi tofiga na faaee atu ai le pule i luga o isi, ma toe faaee atu ai foi i isi, ma faaee atu foi e i latou na i isi, ma oo ai ina auina mai ia te i tatou le talalelei i atunuu eseese o loo tatou nonofo ai.

Ma ina ua o atu nei tagata ma folafola atu lenei talalelei, sa latou o e faapei ona fetalai Iesu, ia le faia o latou “loto ae o le finagalo o le Tama o le na auina atu i latou,” [tagai Ioane 5:30] ma ia lagolagoina i latou o umia le perisitua i le fogaeleele, i le folasia atu o mataupu faavae sa’o. O le ala lea o lo latou o atu i atunuu, ma e faitau afe ma faitau miliona i latou ua faalogologo i a latou molimau; ma e pei ona i ai i aso ua mavae, e faapena foi i aso e gata ai. Na fetalai Iesu—E vaapiapi le faitotoa, e lauitiiti foi le ala e tau atu i le ola, e toaitiiti foi i latou o e maua; e va tele le faitotoa e lautele foi le ala e tau atu i le malaia, e toatele foi i latou o e ui atu ai.” [Tagai Mataio 7:13–14.] O le tulaga lava lea e i ai i nuu uma, po o fea ma pe o le a foi le taimi e talai atu ai ia te i latou.³

Na toefuataiina mai e le Atua le talalelei mo le faamoemoe ia malamalama ai tagata i le ola ma le tino ola pea; ma o le leai o se malamalama i le talalelei, o le leai foi lena o se malamalama i le ola ma le tino ola pea; aua e le mafai ona malamalama tagata i nei mataupu faavae sei vagana ua faailoa atu ia te i latou. … Ina ua matala le lagi ma ua afifio ifo le Tama ma le Alo ma faaali atu ia Iosefa ia mataupu faavae o le talalelei, ma ina ua toefuataiina mai le perisitua ma ua faatuina le Ekalesia ma le malo o le Atua i le fogaeleele, sa i ai faamanuiaga silisili na tuuina ifo i lenei augatupulaga e mafai ona maua e le tagata. Afai e mafai ona latou malamalama i ai, o le faamanuiaga aupito sili ua mafai ona faaee mai e le Atua i le tagata.⁴

O le taimi nei, ua matua naunau le Alii, i lenei taimi, e pei foi ona ia naunau i isi vaitaimi, e faapotopoto mai ia te ia se nuu e faia lona finagalo, e tausia ana poloaiga, e faalogo i ana apoapoaiga ma faataunuuina ana faatonuga. … O le taimi foi lenei, e faapei o aso ua mavae, e auina atu e le Alii lona finagalo e ala atu i le ua ia filifilia; na te filifili ana lava avefeau ma auina atu i latou i tagata. Ma ina ua o atu toeaina o Isaraelu, sa ia fetalai atu ia te i latou i se faaaliga patino—“Ina o atu ia, o le a muamua atu a’u agelu ia te outou, ma o le a i ai foi lo’u agaga ma outou.” [Tagai MFF 84:88.] Ma sa latou o atu, ma sa faamaoni le Atua i lana upu, ma e toatele outou i le taimi lena i nisi atunuu mamao, sa outou faalogo ai i upu o le ola, ma ina ua outou faalogo ai, sa outou iloaina ma malamalama i ai, e pei lava ona fetalai Iesu—O a’u mamoe e faalogo mai i latou i lo’u leo, ua ou iloa foi i latou, ua latou mulimuli mai foi ia te au, ae le mulimuli atu i latou i se tagata ese, aua latou te le iloa le leo o se tagata ese.” [Tagai Ioane 10:5, 27.] Ua outou faalogo i le leo o le upumoni o aumaia e le agaga o le Atua, ma o le ala foi lena tou te maua ai lagona loloto faaleagaga ina ua iloa le mea moni ma gauai atu e usitaia. …

O lenei, ua tatou potopoto faatasi e fesoasoani, mo le a le faamoemoe? E vaavaai mea tatou te fiafia i ai i tatou lava? E leai. Ina ia faateleina le tamaoaiga? E leai. Ina ia maua ma faalologo ai i mea lelei o le olaga? E leai, ae ia faia le finagalo o le Atua ma tuuina atu atoatoa i tatou lava, o a tatou taleni ma tomai, o lo tatou poto ma faatosinaga i soo se ala e faataunuuina ai fuafuaga a Ieova, ma fesoasoani ai e faatupuina le filemu ma le amiotonu i le fogaeleele. O lenei, e pei ona ou malamalama i ai, o le ala lea o lo tatou i ai iinei, ae le o le faia o mea a le tagata lava ia ae faitalia ai le Atua ia ma lona malo. Tatou te naunau uma lava i le galuega tele a le Atua i nei aso e gata ai, ma e tatau ona tatou taufai galulue ai.⁵

Sa faauuina au e avea ma se Toeaina e i latou ua i ai le pule sa’o, ma sa ou alu ma talai atu lenei Talalelei. Sa o atu foi isi Toeaina e pei ona ou faia i malo malamalama, e talai atu ai ia lava aoaoga faavae ma ofoina atu ia te i latou ia lava folafolaga. O nisi o i latou e faale lava le malamalama; o nisi e le maualuluga ni aoaoga. Tatou te auina atu ni ituaiga tagata e tulaga ese pe a auina atu o tatou Toeaina. O nisi taimi, o se faifeautalai o se faioloa, o nisi taimi o se faipule, o se fai u’amea, o se fai piliki, o se fai sima, o se faifaatoaga, o se leipa, po o le a lava. Peitai, o i latou uma lava, i lalo o le faatosinaga lava e tasi ma le agaga, e o atu o ni faifeautalai e talai le Talalelei o le malamalama, o le ola ma le faaolataga. Ua latou mauainia oa o le ola e faavavau, ma ua latou maua le tomai e aoao atu ai na upumoni i isi; ma e tutusa lava folafolaga latou te ofoina atu.

Outou na o loo faalogo mai i lo’u leo i lenei afiafi, faapea foi le afe ma afe o isi, ua faalogo i na mataupu faavae, ua ofoina atu ia te outou na folafolaga; ma afai tou te usitai i le Talalelei, tou te mauaina lenei lava agaga e tasi; ma o outou o a’u molimau o le moni o mea ua ou folafola atu nei i o outou luma faapea foi ma le Agaga ma le mana o le Atua e o mai faatasi ma le usitai i le Talalelei, ma o le a outou le faafitia lava. O le a le faafitia e lenei faapotopotoga. Pe afai na outou usitai i tulafono a le Atua, ma usitai i Ana poloaiga, ma papatisoina mo le faamagaloina o a outou agasala, ma faaee atu lima i luga o outou ulu mo le taliaina o le Agaga Paia, ua outou mauaina; ma o outou o molimau ola i luma o le Atua. O se mealilo lenei e le o malamalama i ai le lalolagi. … Ua ia te i tatou mataupu faavae o le ola faavavau, ma o loo faaaogaina mo le faavavau; ona tatou galulue ai lea e fausia le Siona o le Atua, lea e mafai ona aoaoina ai le amiotonu, ma mafai ai ona puipuia tagata, ma mafai ai ona folafola mai le saolotoga i tagata uma o soo se ituaiga, o soo se talitonuga ma malo uma.⁶

O lo tatou tiute o le folafola atu lea o le Talalelei i tagata uma. … Ma o loo tatou faia tusa lava pe o le a le tetee o tagata, ma o le suafa o le Atua tatou te faia ai. … Ma afai e sili lo latou alofa i le tiapolo nai lo le Atua, e mafai ona latou faia ma latou aumaia ai le faaletonu ma le faanoanoa ma puapuaga ma taua ma le toto masaa. Aua o le a fevataua’i malo, o atunuu foi i atunuu; ma o le a lafoina i lalo nofoalii; ma o le a faataapeapeina malo e matamatagi e fa, o le a luluina foi mana o le lalolagi i soo se tulimanu; ma o le a afio mai le Alii ma taitasi ona ia faamasinoina o malo; ma e tatau ai ona tatou iloa pe o a tatou mea o fai, ma a o tatou faapea atu o i tatou o le au paia a le Atua, e le tatau ona tatou faagutugutulua, ae ia atoatoa i le mea moni ma ia tumu i le amio sa’o, ma faalauteleina o tatou valaauga ma faamamalu i lo tatou Atua.

O le mea lena o loo faamoemoe le Atua tatou te faia. Ona fausia ai lea o malumalu, o le a la le isi mea e fai? Ia auauna atu ai. Auina atu le talalelei i atunuu o le lalolagi. Ona faapotopoto ai lea o tagata. Ona a lea? Toe fausia nisi malumalu. Ona a foi lea? Ia auauna atu ai tagata.⁷

E tele naua le eseesega i le faasalalauina o le talalelei, ma mea o loo tulimataia e le lalolagi. O le toatele o nei tagata … atonu e le o ni meafaigaluega mo le folafolaina atu o le talalelei e tusa ai ma manatu taatele; peitai, o le eseesega tele i le va o i tatou ma i latou, ona e tatou te o atu i le suafa o le Atua o Isaraelu, e lagolagoina i Lona mana, poto ma le atamai, e folafola atu mataupu faavae o upumoni e faavavau na tuuina mai ia i tatou e Ia; ae o i latou, latou te o atu e folafola mea sa latou aoaoina mai kolisi.

E o atu o tatou Toeaina i le vaivai. … Pe a [latou] o atu, e leai ni a latou sauniuniga i luga atu o elemene faavae o aoaoga ia sa latou aoaoina; ae e le o ni upu latou te o e aoao atu, o mataupu faavae. Ma e ui lava o nisi o potopotoga o ni tagata atamamai i tulafono a le Atua, atonu latou te lagona le fefefe ma le matamumuli e taumafai e tautala atu ai, ae, pe a latou o atu ma tutu i luma o faapotopotoga i le lalolagi, o le a faatasi le Agaga o le Alii ma i latou, o le a lagolagoina e le Alii i latou ma avatu ia te i latou le poto “e leai so latou o e finau mai na te mafaia ona tali mai, pe tetee.” [Tagai Luka 21:15.] O le folafolaga lena o loo fai i auauna a le Alii o e o atu ma lo latou talitonu ia te Ia.⁸

E pei lava nei alii talavou o i tatou uma: ua latou maua le agaga o le ola, malamalama ma le poto, o le meaalofa o le Agaga Paia, ma o i latou o avefeau a le Ieova Silisiliese, o le na Ia filifilia, faamanuia, ma faauuina e talai Lona finagalo i atunuu o le lalolagi. Latou te le o i o latou lava igoa po o le malosi, ae o le suafa, malosi ma le mana o le Atua o Isaraelu. O lo latou tulaga lena, ma afai latou te pipiimau i le Atua ma faalauteleina o latou valaauga, ma ola ai i mataupu faavae o le upumoni, ma aloese mai tofotofoga ma mea leaga uma o soo se ituaiga, o le a i ai le mana o le Atua ia te i latou, ma o le a tatalaina e le Atua o latou gutu, ina ia mafai ai ona latou faafememea’i le poto o e atamamai, ma o le a latou tautala atu ai i mea latou te maofa ai i latou lava, ma i latou e faalogologo atu.

Ou te fia fai atu i nei uso, ia outou saunia ma le filiga e faataunuu a outou misiona. Aua le popole fua i le lalolagi; aua le popole i tala ma sene, o pauni, ma seleni, ma pene. Ia outou faatuatua i le Atua, ola i o outou talitonuga faalelotu, faalautele o outou valaauga, ia faalotomaualaloina outou i luma o le Atua, valaau atu ia te Ia i mealilo ona Ia tatalaina lea o lou ala i ou luma.⁹

Ou te fia fai atu ia i latou e o i misiona, ina ia latou suesue i le Tusi Paia, Tusi a Mamona, Tusi o Mataupu Faavae ma Feagaiga, ma a tatou tusitusiga paia uma lava, ina ia mafai ai ona latou masani i mataupu faavae o le tatou lotu. Ou te fia fai atu foi i isi alii talavou e le o i ni misiona, ae atonu lava o le a o i se taimi i le lumanai, e sili atu le taua o nei mea ia i latou nai lo latou iloa i le taimi nei. E ao ona tatou atina’e ma saunia ma faamalolosia i le upumoni. E ao ona tatou masani i mataupu faavae, o aoaoga faavae, ma sauniga o le Ekalesia ma le Malo o le Atua.

Ua faatonuina i tatou i le Tusi o Mataupu Faavae ma Feagaiga e saili le poto e faapei o loo tatou sailia ni oa natia, e le gata i le suesue ae faapea foi i le faatuatua; ina ia tatou masani i le talafaasolopito ma tulafono o le atunuu o loo tatou ola ai, ma malo o le lalolagi [tagai MFF 88:78–80, 118]. Ou te iloa, pe a galulue alii talavou iinei, pe a latou o i le ana, pe o e galulue i le faatoaga, pe o i le faletifaga, ma isi mea faapena, e faale alu o latou mafaufau i nei mea; ae a tofia loa e auai i le faatinoga o le galuega faafaifeautalai, e toatele lava i latou o le a moomoo maimau pe ana matua gaua’i atu i aoaoga sa tuuina atu, ma latou matuai masani i le Tusi Paia, Tusi a Mamona, ma le Tusi o Mataupu Faavae ma Feagaiga.¹⁰

O ituaiga tagata matou te manano e tauaveina le savali o lenei talalelei, o tagata ia e faatuatua i le Atua; o tagata e i ai le faatuatua i le latou lotu; o tagata e faamamalu i o latou perisitua; o tagata e iloa e tagata e i ai lo latou faatuatua ma talitonuina e le Atua. … Matou te mananao i tagata e tutumu i le Agaga Paia ma le mana o le Atua. … O tagata e tauaveina upu o le ola i atunuu, e tatau ona avea o ni tagata o le mamalu, amio sa’o, amioatua ma le mama atoatoa; ma o le poloaiga lenei a le Atua ia i tatou, ma e tatau ona tatou faataunuuina.¹¹

Ua oo mai se taimi matautia i malo o le lalolagi, … e sili atu ona leaga nai lo le mea ua malamalama i ai le tagata—o taua, o le faamaligi toto, ma le faatafunaga, o le tagitu’i ma le faanoanoa, o faama’i, o le oge, ma mafuie, ma puapuaga uma na tautala i ai perofeta, o le a faataunuuina lava. … Ma e tatau ia i tatou, o le Au Paia o Aso e Gata Ai, ona malamalama i o tatou tiutetauave ma a tatou matafaioi. …

… E i ai ni mea e matua faigata ai i alii i nisi taimi ona fai ituaiga misiona na latou faia i lo latou talavou, ona o tausaga o le matua, o tulaga faaletonu o le tino, ma tulaga o i ai. Ae, e masani ona ou lagona le maasiasi, pe a ou vaai i mea e fai a le tele o nei korama ia e faatatau i ai, pe a valaauina e o i ni misiona. O se mea e ‘alofaga i ai lea, ma lea, ma lea. Sa faigofie atu i le luasefulu tausaga talu ai ona maua se luaselau pe toluselau ni tagata e ofo mai e o i misiona nai lo le taimi nei i le faitau afe ma afe i Isaraelu [Ekalesia]. E faapefea ona e tali atu i lenei mea? E le o faatauaina ma e le o manatu mamafa foi i ai.¹²

E anoanoai alii e malolosi tino, pe ana faapea e faatuatua teisi atu lava i le Atua, ma mafai ona iloa puapuaga ma mafatiaga o le a oo mai i le fogaeleele, ma tiutetauave o lena perisitua na faaee atu i ai e le Atua i o latou luga, semanu ua latou saunia e lepeti papupuni uma ma faapea atu, O a’u lenei, auina atu au; Ou te manao ia manuia le fanauga a tagata. Afai na afio mai Iesu e laveai ma faasaoina i latou ua leiloloa, ia tuu mai ia te au lena lava agaga e tasi.¹³

O a’u foi ia, ua fiaselau afe maila ua ou faimalaga ai, e talai atu le talalelei; e aunoa ma se ato po o se tupe, ae sa tuu atu lo’u faatuatuaga i le Alii. Pe na ia tuulafoaiina ea au? E leai, leai lava. Sa ia saunia mea uma mo au, ma o lea ou te fia vivii ae ai i le Atua lo’u Tama Faalelagi. Sa ou feagai ma lana galuega, ma sa ia fetalai mai ia te au o le a ia tausia lava au. Sa faataunuuina e ia le faatuatuaga sa ou tuu atu ia te Ia; ma afai ou te le’i faataunuuina le faatuatuaga na Ia tuu mai ia te au, ou te faamoemoe o le a ia faamagalo mai ia te au, ma fesoasoani mai ina ia ou faaleleia atili. Peitai, sa tonu ma faamaoni le Alii, ma ou te le’i fia’ai pe fiainu, pe leai foi ni o’u lavalava, ma e le’i i ai foi se mea na taofia ai lo’u femalagaa’i i soo se mea, aua sa i ai lava auala na saunia.¹⁴

E tele atu lo’u talitonuga i tagata o le a tuua lenei sauniga ua lagona o latou vaivaiga ma le le gafatia, nai lo i latou ua manatu ua lava lo latou aoaoina ma e mafai ona latou aoao atu soo se mea ma mea uma lava. Aisea? Aua pe a faalagolago tagata i lo latou lava poto ma le malosi, ua latou faalagolago i se mea noa; ae a latou faalagolago i le Alii, latou te le toilalo lava. … O loo faamalumalu le Alii i mea uma, Na te leoleo i Ona tagata, ma afai e faaauau pea le tuu atu o le faatuatuaga o nei tagata i le Atua …, o le a mafuta Lona Agaga ma i latou, faamalamalamaina o latou mafaufau, faateleina o latou tomai ma avatu ia i latou le poto ma le atamai i le taimi latou te manaomia ai. E leai se mea latou te fefefe ai i le poto o le lalolagi; aua e leai se poto o i le lalolagi e tutusa ma le poto e tuuina mai e le Alii i Ana Au Paia; ma pau lava le mea ia aloese nei uso mai mea leaga, ia ola i o latou talitonuga faalelotu, ma pipiimau i le Alii e ala i le tausia o Ana poloaiga, o le a leai se mea e popole ai; ma e faatatau foi lenei mea i le Au Paia uma faapea foi nei uso.¹⁵

Pe o a lava o latou lagona, e o atu [faifeautalai] e pei o agelu o le alofa tunoa e tauaveina mataupu faavae taua o le talalelei, ma o le a avea i latou ma ala e aumaia ai le toatele mai le pouliuli i le malamalama, mai le sese ma talitonuga e le faavaea i le ola, malamalama, upumoni, ma le atamai, ma le mea mulimuli, o le faaeaga i le malo selesitila o lo tatou Atua.

Pe a o atu nei uso, atonu o se galuega fou ia te i latou. O le a latou faafetaia’ia mea sese na i ai i augatausaga, o le a latou tauva ma manatu faasausili, ma o le a latou faamatalaina atu ia te outou sa matua malolosi a latou faatosinaga; o le a latou talai atu foi ma fefaaalia’i o latou manatu ma tagata e le manatu i le mea moni, o tagata e matua le manatu lava i le faatuatuaga ua tatou talia, ae e o atu lava nei faifeau po o toeaina o ni avefeau ua auina atu e le Alii o Iesu Keriso. Latou te o atu e talai atu ua toe faatuina e le Atua lana galuega i luga o le fogaeleele, ma o loo tulei mai o ia mai le lagi, ma ua tatalaina mai faaaliga a le Silisiliese i o tatou mata; ua faailoa mai le malamalama o le faavavau i auauna a Le Silisiliese, ua aveesea foi le pogisa sa ufitia ai le lalolagi mo le tele o tausaga; ma ua auina atu nei toeaina filifilia o Isaraelu e folafola atu nei tala e lelei o le faaolataga i malo pouliuli ma le pogisa o le lalolagi. … Latou te o atu ma o le a latou toe taliu mai ma le olioli, ma aumaia a latou fusi saito taua [tagata liliu mai], ma o le a latou faamanu atu i le suafa o le Atua o Isaraelu, ina ua latou maua le avanoa e avea ai ma nisi e lapata’ia lenei augatupulaga.¹⁶