Kean̄ Jān Kabun̄ 1
Baibōļ eo im Bok in Mormon rej katakin bwe pāleek juon ej jon̄o̧k eo an Anij kōn mare mae An kean̄ ke eāinjuon (lale 2 Samuel 12:7–8 im Jekab 2:27, 30). Ālkin wōt juon revelesōn n̄an Josep Smith, lore mareik elōn̄ļo̧k jān juon kar jinoe ilubwiljin ro uwaan Kabun̄ in ilo jinoin 1840 ko (lale jekjōn 132). Jān 1860 ko n̄an 1880 ko, kien eo an United States ekar kōļļāik kakien ko n̄an kōm̧m̧an bwe imenene in an kabun̄ en juon eo ej jum̧ae kien. Kakien kein āliktata rekar bōk rie eo an Jikin Ekajet eo eutiejtata an U.S. Ālkin ebbōk revelesōn, President Wilford Woodruff ekar kadieojļo̧k Manifesto in ijin ilaļ, eo me Kabun̄ ekar bōke āinwōt mālim im ben eo ilo Oktoba 6, 1890 eo. Men in eaar tōlļo̧k n̄an jemļo̧k in kōm̧m̧ane marreik elōn̄ ilo Kabun̄ in.
N̄an Jabdewōt Emaron̄ Jelōte:
Kōnke ripoot ko rekāāl em̧ōj jilkinto-jilkintak n̄an jibadbad ko ikijjien politics, jān Salt Lake City, im rekanooj ajeeded, im rej ba bwe Utah Commission eo, ilo ripoot eo aer ilo iien ko repaak n̄an Secretary eo an Interior, ko rej ba ke m̧areik elōn̄ rej kōm̧m̧an wōt im kōjeraam̧m̧ani im bwe en̄oul ak elōn̄ļo̧k m̧are rot in em̧ōj kōm̧m̧ani ilo Utah jān Juun eo ļo̧k ak ilo iiō eo ej jem̧ļo̧kļo̧k, barāinwōt bwe ilo bwebwenato ko ilo meļaaj an armej ritōl ro an Kabun̄ in rekar katakin, rōjan̄ im lipjerjer e wōnm̧aanļo̧k in kōm̧m̧an m̧areik elōn̄ kōrā—
N̄a, kōn menin, āinwōt President eo an Kabun̄ eo an Jisōs Kraist im Armej ro Rekwōjarjar ilo Raan ko Āliktata, jān wōt men in, ilo jekjek eo em̧ooltata, ij kean̄ bwe naan in ketake kein rej jab m̧ool. Kōmij jab katakin m̧areik elōn̄ kōrā ak m̧areik elōn̄ļo̧k, im jab kōmālim jabdewōt armej n̄an deļo̧n̄e pād rot in, im ij kariab ke en̄oul ak jabdewōt oran m̧are elōn̄ rekar ilo tōre jab eo kōjeraam̧m̧ani ilo Tampeļ ko am ak ilo jabdewōt jikin ilo Āneo.
Juon case kar ripoote tok, eo me ro raar bōk kuņaer rekar ba bwe m̧are eo ekar kōm̧m̧an ilo Im̧ōn Mennin Letok Ekwōjarjar eo, ilo Salt Lake City, ilo jinoin rak in 1889, ak ij jan̄in maron̄ in jeļā wōn eo eaar kōm̧m̧an m̧are eo; jabdewōt men kar kōm̧m̧ane ilo jekjek in ekar jab kōn jeļā eo aō. Jān wōt men in ba kake Im̧ōn Mennin Letok Ekwōjarjar eo e kar, jān naan in tōl ko aō, rup ilo ejjeļo̧k bar kōttar.
Toun wōt an kakien ko kar kajutak in Congress kōmo̧ik m̧areik elōn̄, ko kakien kein em̧ōj kar kōmlet ke rekkar n̄an jemān-āe eo jān jikin ekajet eo ilōn̄tata, ij kean̄ ijin bwe jibadbad eo aō n̄an ļoori kakien kein, im n̄an kōjerbale maron̄ eo aō ippān ro uwaan Kabun̄ in eo ij tōl e bwe ren kōm̧m̧an āinwōt.
Ejjeļo̧k jabdewōt ilo katak ko aō n̄an Kabun̄ in ak ilo ko an ro im ij jerbal ippāer, ilo iien in kōnono kake, ko remaron̄ kar watōki ak ukōti n̄an iuunm̧aanļo̧k ak rōjan̄ m̧areik elōn̄; im n̄e jabdewōt Elder an Kabun̄ in ekar kōjerbal kajin eo me eaar waļo̧k āinwōt n̄an kōjādeļo̧k jabdewōt katak rot in, em̧ōj kauweik e ilo wōt iien eo. Im ij kiiō im̧aan armej kean̄ bwe aō kapilōk n̄an Ro Rekwōjarjar ilo Raan Ko Āliktata ej n̄an bōjrak jān deļo̧n̄e jabdewōt kōm̧are ko kōmo̧iki jān kakien eo an aelōn̄ in.
Wilford Woodruff
President eo an Kabun̄ eo an Jisōs Kraist
im Armej ro Rekwōjarjar ilo Raan ko Āliktata.
President Lorenzo Snow eaar jake m̧aantak pepe in ilaļ:
“Ij pepe bwe, kōnke jej kile Wilford Woodruff āinwōt President eo an Kabun̄ eo an Jisōs Kraist im Armej ro Rekwōjarjar ilo Raan ko Āliktata, im armej eo wōt ioon laļ in ilo iien in ej kabwijer ki ko an kain̄i in sil ko, jej watōk e juon eo ekanooj maron̄ kōn wōt ao̧u in opij eo an n̄an kadiwōjtok Kōjjeļā eo me em̧ōj kar kōnono jān e ilo iien ron̄jake in, im eo kar kōm̧m̧an ilo Jeptōm̧ba 24, 1890, im bwe āinwōt juon Kabun̄ ilo kobatok an Kwelo̧k eo Eļap, jej bōke kean̄ in an kōn m̧areik elōn̄ āinwōt juon ewōr kajoor in im jejjet kūtien.”
Salt Lake City, Utah, Oktoba 6, 1890.
Ennaan Ko Kāāleti Jān Kōnono Ko Jān
President Wilford Woodruff
Kake Kōjjeļā Eo
Irooj ejamin kōtļo̧k eō ak jabdewōt em̧m̧aan eo ej jutak āinwōt President an Kabun̄ in n̄an tōlļo̧k kom̧ n̄an bōd. Ej jab pād ilo karōk eo. Ej jab pād ilo ļōmņak eo an Anij. Eļan̄n̄e in kar kajjion̄ kōm̧m̧an men in, Irooj enaaj kar kōm̧akūt eō jān ijo jikū, im āindein E enaaj kōm̧m̧ane n̄an jabdewōt em̧m̧aan eo ej kajjion̄ tōlļo̧k ro nejin armej raņ n̄an bōd jān revelesōn ko an Anij im jān ijo kuņaer. (Kwelo̧k eo Eļap an Kabun̄ in Kein Kajiljinon̄ouljuon, kōmmane ruo alen ilo kajojo iiō, M̧ande, Oktoba 6, 1890, Salt Lake City, Utah. Kar ripoote ilo Deseret Evening News, Oktoba 11, 1890, p. 2)
Ej jab aorōk wōn emour ak wōn emej, ak wōn eo kar kūri n̄an tōl Kabun̄ in, rej aikuj tōl e jān kōketak an Anij Ekajoor Bōtata. Eļan̄n̄e rej jab kōm̧m̧ane ilo jekjek in, reban maron̄ kōm̧m̧ane n̄an jidik. …
Iaar bōk jet revelesōn ko kiiō epaak, ko im rekanooj aorōk n̄an n̄a, im inaaj ba n̄an kom̧ ta Irooj eaar ba n̄an eō. Kōtļo̧k eō bwe in bōk koļmānļo̧kijeņ ko ami n̄an men eo rej ba kōjjeļā eo. …
Irooj eaar ba n̄an n̄a bwe in kajjitōk juon kajjitōk ippān Ro Rekwōjarjar ilo Raan Ko Āliktata, im Eaar barāinwōt ba n̄an eō bwe eļan̄n̄e renaaj ron̄jake ta ij ba n̄an er im uwaake kajjitōk eo kajitūkin er, jān Jetōb im kajoor eo an Anij, renaaj kar aolep uwaak āinwōt juon, im renaaj kar aolep tōmak āinwōt juon kake men in.
Kajjitōk eo ej en̄in: Ewi wōt iaļ in em̧m̧antata n̄an Ro Rekwōjarjar ilo Raan Ko Āliktata n̄an ļoore—n̄an wōnm̧aanļo̧k wōt im kajjion̄ mour wōt ilo m̧are elōn̄, kōn kakien ko an laļ in ad ņae e im jum̧ae jiljinon̄oul milien armej, im jem̧ļo̧k in ej an kien bōk im jako eo an aolep Tampeļ ko, im bōjrak eo an aolep kain̄i ko ilowaer, jim̧or n̄an ro remour im ro remej, im an kalbuuj Presidency eo Kein Kajuon im ro Jon̄oulruo im ro ijōbbōran nokwe ko ilo Kabun̄ in, im an kien bōk aolep men ko m̧weiien make armej ro (aolep ro er make renaaj kar kabbōjrak men in); ak, ālikin kōm̧m̧an āindein im delm̧ae men ko jekar iiooni kōn wōt ad pokake pedped in n̄an kabbōjrake men in im wūjlepļo̧k n̄an kakien eo, im kōn kōm̧m̧an āindein likūt wōt Rikanaan ro, Rijjilōk ro im ro jemān ilo m̧ōko im̧weer, bwe ren maron̄ katakin armej ro im lali jerbal ko aer ilo Kabun̄ in, im barāinwōt likūt Tampeļ ko ilo pein Ro Rekwōjarjar, bwe ren maron̄ lali kain̄i ko an Gospel in, jim̧or n̄an ro remour im ro remej?
Irooj eaar kwaļo̧k n̄an eō jān visōn im revelesōn lukkuun ta enaaj kar bōk jikin eļan̄n̄e jen kar jab kabbōjrake men in. Eļan̄n̄e jen kar jab kabbōjrake, kom̧ ban kar wōr ami aikuj n̄an kōjerbale … jabdewōt ian armej ro ilo tampeļ in ilo Logan; kōnke aolep kain̄i ko renaaj kar bōjrak ilo aolepān āneen Zaion. Pok enaaj kar irooj ilo aolepān Israel, im elōn̄ em̧m̧aan ro renaaj kar rikalbuuj. Apan̄ in enaaj kar itok ioon aolepān Kabun̄ in, im jenaaj kar bōk kipel n̄an kabbōjrake men in. Kiiō, kajjitōk eo ej, n̄e eaikuj in bōjrak ilo jekjek in, ak ilo wāween eo Irooj eaar kaalikkare n̄an kōj, im likūt wōt Rikanaan ro im Rijjilōk ro im ro jemān ro rianemkwōj, im tampeļ ko ilo pein armej ro, bwe ro remej ren maron̄ bōk lo̧mo̧o̧r. Juon oran eļap em̧ōj de an rōļo̧k jān im̧ōn kalbuuj eo ilo laļ eo an jetōb jān armej rein, im jerbal in enaaj wōnm̧aanļo̧k wōt ke ak bōjrak? Kajjitōk eo in ij likūt im̧aan Ro Rekwōjarjar ilo Raan Ko Āliktata. Kom̧ij aikuj in ekajet n̄an kom̧ make. I kōņaan bwe kom̧in make uwaake. I ban uwaake; a ij ba n̄an kom̧ bwe en̄in ej lukkuun ļamļam eo kōj āinwōt juon armej jen kar pād ie eļan̄n̄e jen kar jab bōk kooj eo jekar bōke.
… Iaar lukkuun lo ta eo enaaj kar waļo̧k eļan̄n̄e ejjeļo̧k men en kar kōm̧m̧an. Jetōb in ekar pād ioō ilo juon iien eaetok. A ikōņaan ba men in: In kar kōtļo̧k aolep tampeļ ko jān peid; n̄a in kar etal n̄an kalbuuj, im kōtļo̧k aolep em̧m̧aan bwe ren etal n̄an ijeņ, eļan̄n̄e Anij in lan̄ En kar jab jiron̄ eō n̄an kōm̧m̧ane ta eo iaar kōm̧m̧ane; im ke awa eo eaar itok bwe in kar kōm̧m̧ane men eo jiron̄ bwe in kōm̧m̧ane, ekar alikkar aolep n̄an eō. Iaar ilo̧k im̧aan Irooj, im iaar jeje ta eo Irooj eaar jiron̄ eō bwe in jeje. …
Ij likūt men in ippemi, n̄an ami kejakļo̧kjeņ kake im ļōmņake. Irooj ej jerbal ipped. (Kwelo̧k eo a Cache Stake, Logan, Utah, Jabōt, Nobōm̧ba 1, 1891. Kar ripoote ilo Deseret Weekly, Nobōm̧ba 14, 1891.)
Kiiō inaaj ba n̄an kom̧ ta eo kar kaalikkare n̄an eō im ta eo Nejin Anij eaar kōm̧m̧ane ilo men in. … Aolep men kein renaaj kar waļo̧k, āinwōt Anij Ekajoor Bōtata emour, eļan̄n̄e Kōjjeļā eo en kar jab wōnm̧aantak. Kōn menin, eo Nejin Anij Eaar en̄jake bwe men eo eaikuj jakem̧aantak n̄an Kabun̄ in im n̄an laļ in kōn un ko ilo ļōmņak eo An make. Irooj eaar kean̄ kōn jutak eo an Zaion. Eaar kean̄ kōn dedeļo̧k eo an tampeļ in. Eaar kean̄ bwe lo̧mo̧o̧r eo an ro remour im ro remej ren litok ilo kom̧laļ kein an toļ kein. Im Anij Ekajoor Bōtata eaar kean̄ bwe Devil eban kar bōbrae e. Eļan̄n̄e kom̧ maron̄ meļeļe men in, en̄in ej ki eo n̄an e. (Jān juon ekkōnono ilo lelkan eo kein kajiljino in aje eo an Salt Lake Tampeļ, Eprōļ 1893. Kar jeje ilo taip Jar in Aje Kein, Archives, Church Historical Department, Salt Lake City, Utah.)