Jekjōn 41
Revelesōn letok kōn Josep Smith Rikanaan eo n̄an Kabun̄ in, ilo Kirtland, Ohio, Pāpode 4, 1831. Revelesōn in ej tōl Rikanaan eo im elder ro an Kabun̄ in n̄an jar n̄an bōk “kien” eo an Anij (lale jekjōn 42). Josep Smith ej kab kar jikrōkļo̧k ilo Kirtland jān New York, im Leman Copley, juon uwaan Kabun̄ in ilo Thompson, Ohio, juon jikin epaakeļo̧k ijin, “ekar kajjitōke Brother Josep im Sidney [Rigdon] … ren jokwe ippān im enaaj kar na imweer im na kappijeer.” Revelesōn in ijin ilal ej kalikkar ia eo Josep im Sidney reakuij jokwe ie im ej kūr barāinwōt Edward Partridge bwe en bisop eo m̧oktata an Kabun̄ in.
1–3, Elder ro renaaj tōl Kabun̄ in jān jitōbōn revelesōn; 4–6, Rikaļooran ro rem̧ool renaaj bōk im kōjparok kien eo an Irooj; 7–12, Edward Partridge kar kūr e āinwōt juon bisop n̄an Kabun̄ in.
1 Eo̧ron̄ im ron̄jake, O kom̧ armej ro Aō, Irooj im ami Anij ej ba, kom̧ ro im I m̧ōņōņō in kōjeraam̧m̧an kōn aolep kōjeraam̧m̧an ko reļļaptata, kom̧ ro rej ron̄jake Eō; im kom̧ ro rej jab ron̄jake Eō Inaaj kaliaik, ro rekar kōmmejāje kōn Eta, kōn aolep kalia ko reddotata.
2 Eo̧ron̄, O kom̧ elder ro an Kabun̄ eo Aō im Ikar kūr er, lo Ij lewōj n̄an kom̧ juon kien, bwe kom̧ naaj kobatok ippān doon n̄an errā ioon naan eo Aō;
3 Im jān jar an tōmak eo ami kom̧ naaj bōk kien eo Aō, bwe kom̧in maron̄ jeļā wāween tōl kabun̄ eo Aō im kōm̧m̧an bwe aolep men otemjeļo̧k ren jim̧we Im̧aō.
4 Im Inaaj ami ripepe n̄e Ij itok; im lo, em̧ōkaj Aō itok, im kom̧ naaj lale bwe kien eo Aō en kōjparoke.
5 E eo ej bōk kien eo Aō im kōm̧m̧an e, ejja in wōt ej Aō rikaļoor; im e eo ej ba bwe ej bōk e im jab kōm̧m̧an e, ejja in wōt ej jab Aō rikaļoor, im naaj joļo̧k jān ilubwiljimi;
6 Bwe ej jab ekkar bwe men ko rej an ajri in aelōn̄ eo ren liļo̧k n̄an er ro rej jab tōllo̧ki, ak n̄an kidu ko, ak bōōr ko n̄an juļo̧k im̧aan piik.
7 Im bar juon alen, ej juon men ekkar bwe rikarejera Josep Smith, Jun., en kalōk juon em̧, eo enaaj jokwe ie im ukok.
8 Im bar juon alen, ej juon men ekkar bwe rikarejera Sidney Rigdon en jokwe āinwōt an em̧m̧an n̄an e, toun wōt an kōjparok kien ko Aō.
9 Im bar juon alen, Ikar kūr rikarejera Edward Partridge; im Ij lewōj juon kien, bwe en bōk ijjitōn̄ jān ainikien kabun̄ in, im ekkapit juon bisop n̄an kabun̄ in, n̄an likūt m̧weiuk ko an im joļo̧k aolep an iien ilo jerbal ko an kabun̄ in;
10 N̄an lale bwe aolep men āinwōt naaj kappe n̄an e ilo kien ko Aō ilo raan eo Inaaj liļo̧ki.
11 Im men in kōnke būruōn ej erreo Im̧aō, bwe e ej āinwōt Natanael in etto, eo ilo e ekar ejjeļo̧k m̧oņ.
12 Naan kein liwōji n̄an kom̧, im er ro rej erreo Im̧aō; kōn menin, ekkōl wāween ami watōki, bwe renaaj uwaaki ioon jetōb ko ami ilo raan in ekajet eo. Em̧ool āindein. Amen.