Jekjōn 42
Revelesōn letok ilo ruo m̧ōttan kōn Josep Smith Rikanaan eo, ilo Kirtland, Ohio, Pāpode 9, 1831. M̧ōttan eo kein kajuon, ekitbuuj eoon kein 1 n̄an 72, kar bōk e im̧aan mejān jon̄oulruo elder im ilo kakūrm̧ool in kallim̧ur eo an Irooj kar kōm̧m̧ane m̧oktaļo̧k bwe “kien” eo naaj kar leļo̧k ilo Ohio (lale jekjōn 38:32). M̧ōttan eo kein karuo ekitbuuj eoon 73 n̄an 93. Rikanaan eo ej kameejļo̧k bwe revelesōn in ej “atbakwōje kien eo an Kabun̄ in.”
1–10, Elder ro kar kūr er n̄an kwaļo̧k naan kōn gospel eo, peptaiji ro rej oktak, im kalōkļo̧k Kabun̄ in; 11–12, Reaikuj in bōk aer kūr im kapit er im ren katakin pedped ko an gospel in loi ilo jeje ko rekwōjarjar; 13–17, Ren katakin im kanaan jān kajoor eo an Jetōb; 18–29, Ro Rekwōjarjar kar jiron̄ er n̄an jab uror, ko̧o̧t, riab, mejkaiie, lōn̄, ak kōnono nana ņae ro jet; 30–39, Kien ko ikijjien wūjlepļo̧k joortak in men ko m̧weiier rej ellaajrak ijin; 40–42, Irooj edike juwa im jowan; 43–52, Rinan̄inmej ro en kōmour er kōn kōjeraam̧m̧an ko im jān tōmak; 53–60, Jeje ko rekwōjarjar rej tōl Kabun̄ in im rej aikuj kabun̄bun̄ļo̧ki n̄an laļ in; 61–69, Ijo im Jerusalem eo Ekāāl naaj pād ie im mennin ittino ko an aelōn̄ eo naaj kwaļo̧k e; 70–73, Bwidej ko em̧ōj ajiļo̧k reaikuj jerbal n̄an rejetake opija ro an Kabun̄; 74–93, Kien ko ikijjien lejān, ļo̧n̄, uror, ko̧o̧t, im kwaļo̧k kōn jero̧wiwi ko rej jakem̧aantak.
1 Eo̧ron̄, O kom̧ elder ro an Kabun̄ eo Aō, ro rekar kobatok ippān doon ilo Eta, em̧ool Jisōs Kraist eo Nejin Anij emour, Rilo̧mo̧o̧r eo an laļ; toun wōt ami lōke ioon Eta im kōjparok kien ko Aō.
2 Bar juon alen Ij ba n̄an kom̧, eo̧ron̄ im ron̄jake im pokake kien eo Inaaj lewōj n̄an kom̧.
3 Bwe em̧ool Ij ba, āinwōt ami kar kobatok ippān doon ekkar n̄an kien eo Iaar jiron̄ kom̧, im kom̧ ar juon wōt bōro ilo men in, im kar kajjitōk ippān Jema ilo Eta, em̧ool āindein kom̧ naaj bōk.
4 Lo, em̧ool Ij ba n̄an kom̧, Ij lewōj n̄an kom̧ kien in m̧oktata, bwe kom̧ naaj etal ilo Eta, aolep kajjojo iaami, ijello̧kun wōt ro rikarejera Josep Smith, Jun., im Sidney Rigdon.
5 Im Ij leļo̧k n̄an erro juon kien bwe ren etal kōn jidik iien, im naaj leļo̧k jān kajoor eo an Jetōb n̄āāt renaaj ro̧o̧l.
6 Im kom̧ naaj ilo̧k ilo kajoor eo an Jetōb eo Aō, kwaļo̧k naan kōn gospel eo Aō, ruo ilo̧k ruo, ilo Eta, im kotak ainikiōmi āinwōt ainikien juon jilel, kwaļo̧k naan eo āinwōt enjeļ ro an Anij.
7 Im kom̧ naaj ilo̧k peptaij kōn dān, im ba: Kom̧in ukeļo̧k, kom̧in ukeļo̧k, bwe aelōn̄ in lan̄ epaak.
8 Im jān jikin in kom̧ naaj ilo̧k ilo jikin ko iturilik; im jon̄an wōt ro kom̧ naaj lo er im renaaj bōk kom̧ naaj kalōk ļo̧k kabun̄ eo Aō ilo aolep jikin kein—
9 M̧ae iien eo ej itok n̄e naaj kwaļo̧k e n̄an kom̧ jān ijo ilan̄, n̄e jikin kwelo̧k an Jerusalem Ekāāl naaj kōpooje, bwe kom̧in maron̄ aintok ilo juon wōt, bwe kom̧in maron̄ armej ro Aō im Inaaj ami Anij.
10 Im bar juon alen, Ij ba n̄an kom̧, bwe rikarejera Edward Partridge enaaj jutak ilo opij eo Iaar jitōn̄ n̄an e. Im enaaj waļo̧k, bwe eļan̄n̄e ej bōd bar juon naaj jitōn̄ e ilo jikin. Em̧ool āindein. Amen.
11 Bar juon alen Ij ba n̄an kom̧, bwe ej jamin leļo̧k n̄an jabdewōt n̄an ilo̧k n̄an kwaļo̧k naan kōn gospel eo Aō, ak n̄an kalōk ļo̧k kabun̄ eo Aō, ijello̧kun n̄e kapit e jān juon eo ewōr an maron̄, im mennin jeļā kake ilo kabun̄ in bwe ewōr an maron̄ im bwe em̧ōj kar kapit e jān ro rej jeban an kabun̄ in.
12 Im bar juon alen, elder ro, pris ro im rikaki ro an kabun̄ in renaaj katakin kōn pedped ko an gospel eo Aō, ko rej pād ilo Baibōļ eo im Bok in Mormon eo, eo ilo e epād tarlep in gospel eo.
13 Im renaaj kōjparoki bujen ko im kakien ko an kabun̄ in n̄an kōm̧m̧ani, im erkein naaj katak ko aer, āinwōt naaj tōl er jān Jetōb.
14 Im Jetōb eo enaaj lewōj n̄an kom̧ jān jar in tōmak; im eļan̄n̄e kom̧ij jab bōk Jetōb eo kom̧ij jamin maron̄ katakin.
15 Im aolep men kein kom̧ naaj kōjparok n̄an kōm̧m̧ani āinwōt Iaar jiron̄ kom̧ kōn ami katakin, m̧ae iien liwōji tarlep in jeje ko rekwōjarjar Aō.
16 Im ilo ami naaj kotak ainikiōmi jān Rikaenōm̧m̧an eo, kom̧ naaj kōnono im kanaan āinwōt an em̧m̧an n̄an Eō;
17 Bwe, lo, Rikaenōm̧m̧an eo ejeļā aolep men, im ej kam̧ool kōn Jemān im kōn Nejin.
18 Im kiiō, lo, Ij kōnono n̄an kabun̄ in. Kwōn jab uror; im e eo ej uror naaj jamin jeorļo̧k an bōd ilo laļ in, im jab ilo laļ eo ej itok.
19 Im bar juon alen, Ij ba, kwōn jab uror; ak e eo ej uror enaaj mej.
20 Kwōn jab ko̧o̧t; im e eo ej ko̧o̧t im e jamin ukeļo̧k naaj kadiwōjļo̧k e.
21 Kwōn jab riab; e eo ej riab im e jamin ukeļo̧k naaj kadiwōjļo̧k e.
22 Kwōn iakwe lio pāleem̧ kōn aolepān būruōm̧, im naaj eddāp n̄an lio wōt im ejjeļo̧k bar juon.
23 Im e eo ej kalimjek juon kōrā n̄an mejkaiie ilo̧kan lio naaj kaarmejjete tōmak eo, im naaj ban bōk Jetōb eo; im eļan̄n̄e ej jab ukeļo̧k naaj kadiwōjļo̧k e.
24 Kwōn jab lōn̄; im e eo ej lōn̄, im jab ukeļo̧k, naaj kadiwōjļo̧k e.
25 Ak e eo ej lōn̄ im ukeļo̧k kōn aolepān būruōn, im eļļo̧k jān e, im jab bar kōm̧m̧an e, kwōn jeorļo̧k an bōd;
26 Ak eļan̄n̄e ej bar kōm̧m̧ane, e naaj jab jeorļo̧k an bōd, ak naaj kadiwōjļo̧k e.
27 Kwōn jab kōnono nana ņae riturum̧, ak kōm̧m̧an jabdewōt n̄an kōmetak e.
28 Kwo jeļā kien ko kōn men kein kar liwōj ilo jeje ko rekwōjarjar Aō; e eo ej jero̧wiwi im jab ukeļo̧k naaj kadiwōjļo̧k e.
29 Eļan̄n̄e kwōj iakwe Eō kwo naaj jerbal n̄an Eō im kōjparok aolep kien ko Aō.
30 Im lo, kwōn keememej ro rijeram̧ōl, im wūjlepļo̧k jān men ko mweiōm n̄an rejetake eo aer men ko kwōj liļo̧k n̄an er, kōn juon bujen im peba in kōmaron̄ eo jab maron̄ in rupe.
31 Im toun wōt ami liļo̧k men ko mweiōmi n̄an ro rejeram̧ōl, kom̧ naaj kōm̧m̧ane n̄an Eō; im naaj likūti im̧aan bisop eo an kabun̄ eo Aō im rikōkapilōklōk ro an, ruo ian elder ro, ak pris utiej ro, āinwōt e naaj jitōn̄ ak eaar jitōn̄ im kōjenolo̧k er n̄an un in.
32 Im enaaj waļo̧k, bwe ālikin kar likūti im̧aan bisop eo an kabun̄ eo Aō, im ālikin an kar bōk naan in kam̧ool ko kōn wūjlepļo̧k eo an m̧weiuk kein an kabun̄ eo Aō, bwe rejjab maron̄ bōki jān kabun̄ in, ilo errā n̄an kien ko Aō, aolep armej naaj uwaak n̄an N̄a, juon ribōk eddo ioon men ko m̧weiien make, ak men ko eaar bōki jān wūjlepļo̧k, jon̄an wōt eo e bwe n̄an e im baam̧le eo.
33 Im bar juon alen, eļan̄n̄e ewōr m̧weiuk ko ilo pein kabun̄ in, ak jabdewōt kajjojo ro ie, eļapļo̧k jān rejetake eo aer ālikin wūjlepļo̧k eo m̧oktata, eo ej bwe eo naaj wūjlepļo̧k n̄an bisop eo, e naaj pād wōt n̄an ro ejjeļo̧k aer, jān iien n̄an iien, bwe aolep armej eo ewōr an aikuj en maron̄ bwe kakke im bōk ekkar n̄an kōņaan ko an.
34 Kōn menin, bwe eo enaaj pād ilo im̧ōn ko̧koņ eo Aō, n̄an jaketo-jaketak n̄an ro rejeram̧ōl im riaikuj, āinwōt naaj jitōn̄e jān ko̧o̧njeļ eo eutiej an kabun̄ in, im bisop eo im ko̧o̧njeļ eo an;
35 Im kōn kōttōpar eo n̄an wiaik bwidej ko n̄an em̧m̧an eo n̄an an aolep kōjerbale ilo kabun̄ in, im ekkal im̧ōn kabun̄-jar ko, im kalōk ļo̧k Jerusalem Ekāāl eo ej tok ālik naaj kwaļo̧k e—
36 Bwe armej in bujen eo Aō ren maron̄ kuktok ilo juon ilo raan eo n̄e Inaaj itok n̄an tampeļ eo Aō. Im men in Ij kōm̧m̧ane n̄an lo̧mo̧o̧r an armej ro Aō.
37 Im naaj ālikin men kein, bwe e eo ej jero̧wiwi im jab ukeļo̧k naaj kadiwōjļo̧k jān kabun̄ in, im e jamin bar juon alen bōk men eo eaar wūjlepļo̧k n̄an ro rejeram̧ōl im ro riaikuj ilo kabun̄ eo Aō, ak ilo bar jet naan, n̄an Eō—
38 Bwe toun wōt ami kōm̧m̧an e n̄an rein reddik tata, kom̧ij kōm̧m̧ane n̄an Eō.
39 Bwe enaaj waļo̧k, bwe men eo Iaar kōnono jān lo̧n̄iin rikanaan ro Aō enaaj kūrm̧ool; bwe Inaaj wūjlepļo̧k jān m̧weiie ko an ro rej atbo̧kwōje gospel eo Aō ilubwiljin ro riAelōn̄ ko n̄an ro rejeram̧ōl ilubwiljin armej ro Aō ro rej jān m̧weo im̧ōn Israel.
40 Im bar juon alen, kwōn jab juwa ilo būruōm̧; kōm̧m̧an bwe aolep ballim ren ļam waan, im aer karbōb ren karbōb eo jān jerbal ko an pā ko peim make;
41 Im aolep men otemjeļo̧k ren kōm̧m̧an ilo erreo Im̧aō.
42 Kwōn jab jowan; bwe e eo ej jowan ej jamin m̧ōn̄ā pilawā ak jamin kōņak nuknuk ko ballin rijerbal eo.
43 Im jabdewōt ro ilubwiljimi rej nan̄inmej, im ejjeļo̧k an tōmak bwe en mour, ak lōke, naaj naajdik e kōn aolep meoeo, kōn mar ko im m̧ōn̄ā ko rej jab bwil, im en jab jān pein rikōjdat eo.
44 Im elder ro an kabun̄ in, ruo ak elōn̄ļo̧k, naaj kūr er, im naaj jar kake er im likūt pā ko ioer ilo Eta; im eļan̄n̄e rej mej renaaj mej n̄an Eō, im eļan̄n̄e rej mour renaaj mour n̄an Eō.
45 Kom̧in mour ippān doon ilo iakwe, jon̄an kom̧ naaj jan̄ kōn jako eo an er ro rej mej, im eļapļo̧k tata n̄an ro ejjeļo̧k aer kōjatdikdik kōn juon jerkakpeje eo eaiboojoj.
46 Im enaaj waļo̧k bwe ro rej mej ilo N̄a rej jamin nemake mej, bwe enaaj tōn̄al n̄an er;
47 Im er ro rej jab mej ilo N̄a, wo n̄an er, bwe aer mej ej meo̧.
48 Im bar juon alen, enaaj waļo̧k bwe e eo ewōr an tōmak ilo N̄a n̄an kōmour e, im ej jab m̧ōj kar jitōn̄e n̄an mej, naaj kōmour e.
49 E eo ewōr an tōmak n̄an lo enaaj lo.
50 E eo ewōr an tōmak n̄an ron̄ enaaj ron̄.
51 Riakā eo ewōr an tōmak n̄an ekkāke enaaj ekkāke.
52 Im er ro ejjeļo̧k aer tōmak n̄an kōm̧m̧ani men kein, ak lōke ilo N̄a, ewōr aer kajoor n̄an erom ro nejū m̧aan; im toun wōt aer jab rupi kien ko Aō kwo naaj ineeki m̧ōjņo̧ ko aer.
53 Kwōn jutak ilo jikin am eddo.
54 Kwōn jab bōk ballin jeiūm̧ im jatūm; kwōn kōļļāik men eo kwo naaj bōke jān eo jeiūm̧ im jatūm.
55 Im eļan̄n̄e kwōj bōke eļapļo̧k jān jon̄an eo n̄an rejetake eo am, kwōn leļo̧k e ilo im̧ōn ko̧koņ eo Aō, bwe aolep men otemjeļo̧k ren kōm̧m̧an ekkar n̄an men eo em̧ōj Aō kar ba.
56 Kwōn kajjitōk, im jeje ko rekwōjarjar Aō naaj lewōj āinwōt Iaar jitōn̄e, im renaaj oņaake ilo kōjparok;
57 Im emennin aikuj bwe kom̧in ikōn̄ wōt kake er, im jab katakin er m̧ae em̧ōj ami kar bōk er ilo dipiio.
58 Im Ij lewōj n̄an kom̧ juon kien bwe n̄e kom̧ naaj katakini n̄an aolep armej; bwe naaj katakini n̄an aolep laļ ko, bwij ko, lo ko im armej.
59 Kom̧in bōk men kein ko kom̧ ar bōki, ko kar liwōji n̄an kom̧ ilo jeje ko rekwōjarjar Aō n̄an juon kien, bwe en Aō kien n̄an tōl kabun̄ in Aō;
60 Im e eo ej kōm̧m̧an ekkar n̄an men kein e naaj mour, im e eo ej jab kōm̧m̧ani naaj jako eļan̄n̄e ej āindein wōnm̧aanļo̧k wōt.
61 Eļan̄n̄e kom̧ naaj kajjitōk, kom̧ naaj bōk revelesōn ioon revelesōn, jeļāļo̧kjeņ ioon jeļāļo̧kjeņ, bwe kom̧in maron̄ jeļā mennin ittino ko im mennin aenōm̧m̧an ko—men ko rej bōktok m̧ōņōņō, men eo ej bōktok mour indeeo.
62 Kwōn kajjitōk, im e naaj waļo̧k n̄an eok ilo iien eo Aō make ia eo Jerusalem Ekāāl e naaj ekkal.
63 Im lo, enaaj waļo̧k bwe naaj jilkinļo̧k ro rikarejera n̄an rear im n̄an rilik, n̄an iōn̄ im n̄an rak.
64 Im em̧ool kiiō, e eo ej etal n̄an rear en katakin er ro renaaj oktak n̄an ko n̄an rilik, im men in ej kōnke men eo ej itok ioon laļ, im waļo̧k in jerbal ko rettino.
65 Lo, kwōn kōjparok aolep men kein, im eļap naaj woņeam̧; bwe n̄an kom̧ em̧ōj lewōj n̄an jeļā mennin ittino ko an aelōn̄ eo, ak n̄an laļ in kar jab leļo̧k n̄an jeļā kaki.
66 Kom̧ naaj kōjparoki kien ko me kom̧ ar bōki im kom̧in tiljek.
67 Im kom̧ naaj tok ālik bōk bujen ko an kabun̄ in, ko me renaaj bwe n̄an kajutak kom̧, jim̧or ijin im ilo Jerusalem eo Ekāāl.
68 Kōn menin, e eo elikjab ilo mālōtlōt, e en kajjitōk e jān Eō, im I naaj leļo̧k n̄an e im wūjlepļo̧k im jab eno̧ik e kake.
69 Kotak būruōmi im lan̄lōn̄, bwe n̄an kom̧ aelōn̄ eo, ak ilo bar jet naan, ki ko an kabun̄ in em̧ōj liwōji. Em̧ool āindein. Amen.
70 Pris ro im rikaki ro enaaj wōr eddo ko aer, em̧ool āinwōt ro uwaan.
71 Im elder ro ak pris utiej ro ro kar jitōn̄ er n̄an jipan̄ bisop eo āinwōt rikōkapilōklōk ro ilo aolep men ko otemjeļo̧k, baam̧le ko aer reaikuj bōk rejetake jān ilo m̧weiuk eo em̧ōj wūjlepļo̧k n̄an bisop eo, n̄an em̧m̧an eo an ro rejeram̧ōl, im n̄an un ko jet, āinwōt kar ba m̧oktaļo̧k;
72 Ak ren bōk juon wōņāān eo ejim̧we kōn aolep jerbal ko aer, men̄e juon eddo ak bar juon jekjek, āinwōt em̧m̧antata ilo ļōmņak ak kar kāālet jān rikōkapilōklōk ro im bisop eo.
73 Im bisop eo, barāinwōt, enaaj bōk an rejetak, ak juon wōņāān ejim̧we kōn aolep jerbal ko an ilo kabun̄ in.
74 Lo, em̧ool Ij ba n̄an kom̧, bwe jabdewōt armej ro ilubwiljimi, ro rekar joļo̧k ro pāleer kōn un in lejān, ak ilo bar jet naan, eļan̄n̄e renaaj kam̧ool im̧aami ilo aolep ettā in bōro bwe en̄in ej wāween eo, kom̧in jab naaj kadiwōjļo̧k er jān ilubwiljimi;
75 Ak eļan̄n̄e kom̧ naaj lo bwe jabdewōt armej rekar likūt ro pāleer kōn wōt lōn̄, im er make rej ro elōn̄ ruweer, am ro pāleer rej mour wōt, naaj kadiwōjļo̧k er jān ilubwiljimi.
76 Im bar juon alen, Ij ba n̄an kom̧, bwe kom̧ naaj ekkōl im kōjparok, kōn aolep kajitūkin, bwe kom̧in jab bōk juon armej rot in ilubwiljimi eļan̄n̄e er rim̧are;
77 Im eļan̄n̄e rej jab rim̧are, renaaj ukeļo̧k jān aolep jero̧wiwi ko aer ak kom̧ jamin naaj bōk er.
78 Im bar juon alen, armej otemjej ej pād ilo kabun̄ in an Kraist, enaaj lale bwe en kōjparok aolep kien ko im bujen ko an kabun̄ in.
79 Im enaaj waļo̧k, bwe eļan̄n̄e jabdewōt armej ro ilubwiljimi renaaj uror naaj jibwewaj er im naaj jerbal ippāer ekkar n̄an kien ko an āneo; bwe keememej bwe e ejjeļo̧k an jeorļo̧k bōd; im naaj kam̧ool e ekkar n̄an kien ko an āneo.
80 Im eļan̄n̄e jabdewōt em̧m̧aan ak kōrā renaaj lōn̄, ļeo ak lio enaaj ekajet im̧aan ruo elder an kabun̄ in, ak elōn̄ļo̧k, im naan otemjeļo̧k naaj jutak ņae ļeo ak lio jān ruo rikam̧ool an kabun̄ in, im jab jān rikōjdat eo; ak eļan̄n̄e elōn̄ļo̧k jān ruo rikam̧ool ej em̧m̧anļo̧k.
81 Ak ļeo ak lio naaj liaakeļo̧k e jān lo̧n̄iin ruo rikam̧ool; im elder ro renaaj door case eo im̧aan kabun̄ in, im kabun̄ in enaaj kotak peier ņae ļeo ak lio, bwe en maron̄ jerbal ippāer ekkar n̄an kien an Anij.
82 Im eļan̄n̄e emaron̄, emennin aikuj bwe bisop eo en pād barāinwōt.
83 Im āindein kom̧ naaj kōm̧m̧an ilo aolep case ko renaaj itok im̧aami.
84 Im eļan̄n̄e juon em̧m̧aan ak kōrā enaaj rakim, ļein ak liin naaj bōkļo̧k e n̄an kien eo an āneo.
85 Im eļan̄n̄e ļeo ak lio enaaj ko̧o̧t, ļein ak liin naaj bōkļo̧k e n̄an kien eo an āneo.
86 Im eļan̄n̄e ļeo ak lio enaaj riab, ļein ak liin naaj bōkļo̧k e n̄an kien eo an āneo.
87 Im eļan̄n̄e ļeo ak lio ej kōm̧m̧an jabdewōt nana, ļein ak liin naaj bōkļo̧k n̄an kien eo, em̧ool kien eo an Anij.
88 Im eļan̄n̄e ļeo jeiūm̧ im jatūm ak lio jeiūm̧ im jatūm ej kainepataik eok, kwōn bōk ļeo ak lio ikōtaan wōt ļein ak liin im kwe make; im eļan̄n̄e ļein ak liin rej kwaļo̧k bōro kom̧in kajejjet doon.
89 Im eļan̄n̄e ļeo ak lio jeiūm̧ im jatūm ej jab kwaļo̧k bōro kwōn bōkļo̧k ļein ak liin n̄an kabun̄ in, ej jab n̄an ro uwaan, ak n̄an elder ro. Im naaj jerbal e ilo juon kwelo̧k, im jab im̧aan laļ in.
90 Im eļan̄n̄e ļeo ak lio jeiūm̧ im jatūm ej kainepataik elōn̄, naaj kauweiki ļein ak liin im̧aan elōn̄.
91 Im eļan̄n̄e jabdewōt ej kainepataik ilo kanooj alikkar, ļeo ak lio naaj kauweik e ilo alikkar, bwe ļeo ak lio en jook. Im eļan̄n̄e ļeo ak lio ej jab kwaļo̧k bōro, naaj bōkļo̧k ļeo ak lio n̄an kien eo an Anij.
92 Eļan̄n̄e jabdewōt ej kainepataik ilo ittino, naaj ļeo ak lio kauweik e ilo ittino, bwe ļein ak liin en wōr an iien em̧m̧an n̄an kwaļo̧k bōro ilo ittino n̄an ļeo ak lio ļein ak liin e kar kainepataiki, im n̄an Anij, bwe kabun̄ in en jab maron̄ kōnono kajjirere kake ļein ak liin.
93 Im āindein enaaj ami jerbal ilo aolep men.