Jekjōn 46
Revelesōn letok kōn Josep Smith Rikanaan eo n̄an Kabun̄ in, ilo Kirtland, Ohio, M̧aaj 8, 1831. Ilo iien in im̧aan ilo Kabun̄ in, juon jon̄ok ealikkar n̄an kajeikik iien kabun̄-jar ko ejjan̄in kar kōm̧m̧an. Ijoke, juon m̧antin kadeļo̧n̄tok ro wōt uwaan im ro rej kanooj etale katak ko n̄an kwelo̧k in kwōjkwōj ko im koba ko jet an Kabun̄ in eaar bwe an emmakijkij an bōk jikin. Revelesōn in ej kwaļo̧k ankilaan Irooj kōn wōt tōl im kajeikik kwelo̧k kein im An tōl kōn kappukot im jeļā mennin letok ko an Jetōb.
1–2, Elder ro ren kajeikik kwelo̧k ko āinwōt an Jetōb Kwōjarjar tōl er; 3–6, Ripukot m̧ool ro e jab aikujin kadiwōjļo̧k er ilo iien kwōjkwōj ko; 7–12, Kajjitōk jān Anij im kappukoti mennin letok ko an Jetōb; 13–26, Juon ellaajrak in jet ian mennin letok kein letoke ijin; 27–33, Ritōl ro an Kabun̄ em̧ōj leļo̧k kajoor n̄an aer jeļā mennin letok ko an Jetōb.
1 Eo̧ron̄, O kom̧ armej in kabun̄ eo Aō; bwe em̧ool Ij ba n̄an kom̧ bwe men kein kar kōnono kaki n̄an kom̧ n̄an ļapļo̧k im jeļā eo ami.
2 Ak jekdo̧o̧n men ko me kar jei, e kar iien otemjej leļo̧k n̄an elder ro an kabun̄ eo Aō jān jinoin, im enaaj āindein, n̄an kajeikik aolep kwelo̧k ko āinwōt aer bōk tōl jān Jetōb Kwōjarjar.
3 Mekarta ej jiron̄ kom̧ n̄an jab kadiwōjļo̧k jabdewōt jān kwelo̧k ko an aolep, ko rej kōm̧m̧an im̧aan laļ in.
4 Em̧ōj barāinwōt jiron̄ kom̧ n̄an jab kadiwōjļo̧k jabdewōt eo ej pād ilo kabun̄ in jān kwelo̧k in kwōjkwōj ko ami; ijoke, eļan̄n̄e jabdewōt eaar bōd, e en jab bōk kuņaan m̧ae iien eo ej kōm̧m̧an kajim̧we.
5 Im bar juon alen Ij ba n̄an kom̧, kom̧ ban kadiwōjļo̧k jabdewōt jān kwelo̧k in kwōjkwōj ko ami ro im rej kanooj kappukot aelōn̄ eo—Ij kōnono kake men in kōn ro rej jab jān kabun̄ in.
6 Im bar juon alen Ij ba n̄an kom̧, kōn kwelo̧k in kapen ko ami, bwe eļan̄n̄e ewōr jabdewōt rej jab jān kabun̄ in, im rej kanooj kappukot ilo̧kan aelōn̄ eo, kom̧in jab naaj kadiwōjļo̧k er.
7 Ak ej jiron̄ kom̧ ilo aolep men n̄an kajjitōk jān Anij, eo ej wūjlepļo̧k; im men eo me Jetōb ej kam̧ool n̄an kom̧ em̧ool āindein I kōņaan bwe kom̧in kōm̧m̧an ilo aolep ekwōjarjar in bōro, etetal jim̧we Im̧aō, im watōk jem̧ļo̧k eo in lo̧mo̧o̧r eo ami, kōm̧m̧ani aolep men kōn jar im kam̧m̧oolol, bwe kom̧in maron̄ jab po jān jetōb ettoon ko, ak katak ko an devil ko, ak naan in jiron̄ ko an armej raņ; bwe jet rej jān armej, im ko jet rej jān devil ko.
8 Kōn menin, ekkōl n̄e kom̧ ab po ilo m̧oņ; im bwe kom̧in maron̄ jab po ilo m̧oņ kom̧in kanooj kappukot mennin letok ko rem̧m̧antata, keememeje iien otemjej n̄an ta rekar litoki;
9 Bwe em̧ool Ij ba n̄an kom̧, rekar liwōji n̄an jeraam̧m̧an eo an ro rej iakwe Eō im kōjparok aolep kien ko Aō, im eo ej kappukot āindein n̄an kōm̧m̧an e; bwe aolep ren maron̄ jeraam̧m̧an ro im rej kappukot ak ro rej kajjitōk jān Eō, rej kajjitōk im jab kōn juon kakōļļe bwe ren maron̄ oran̄ļo̧k e ilo jurjurmelea ko aer.
10 Im bar juon alen, em̧ool Ij ba n̄an kom̧, I kōņaan bwe kom̧in iien otemjej keememej, im iien otemjej dāpiji ilo ļōmņak ko ami ta mennin letok kan, bwe kar liwōji n̄an kabun̄ in.
11 Bwe aolep jab kar leļo̧k n̄an er aolep mennin leļo̧k; bwe elōn̄ mennin letok kein, im n̄an aolep armej kar leļo̧k juon mennin leļo̧k jān Jetōb eo an Anij.
12 N̄an jet kar leļo̧k e juon, im n̄an jet leļo̧k e bar juon, bwe aolep ren maron̄ ļapļo̧k kake.
13 N̄an jet kar leļo̧k e jān Jetōb Kwōjarjar n̄an jeļā bwe Jisōs Kraist ej eo Nejin Anij, im bwe E eaar debwāāl kōn jero̧wiwi ko an laļ in.
14 N̄an ro jet kar leļo̧k e n̄an lōke ioon naan ko aer, bwe ren maron̄ bar wōr aer mour indeeo eļan̄n̄e renaaj wōnm̧aanļo̧k ilo tiljek.
15 Im bar juon alen, n̄an jet kar leļo̧k e jān Jetōb Kwōjarjar n̄an jeļā oktak ko an m̧akūtkūt, āinwōt enaaj em̧m̧an n̄an ejja Irooj in wōt, ekkar n̄an ankilaan Irooj, im jejjet n̄an tūriam̧o ko an ekkar n̄an jekjek an ro nejin armej.
16 Im bar juon alen, kar leļo̧k e jān Jetōb Kwōjarjar n̄an jet n̄an jeļā ukoktak ko in jerbal ko, n̄e rej ak rej jab jān Anij, bwe waļo̧k ko an Jetōb ren maron̄ liļo̧k n̄an armej otemjej n̄an ļapļo̧k jān e.
17 Im bar juon alen, em̧ool Ij ba n̄an kom̧, n̄an jet em̧ōj leļo̧k, jān Jetōb eo an Anij, naan in mālōtlōt.
18 N̄an bar juon em̧ōj leļo̧k naan in jeļāļo̧kjeņ, bwe aolep ren maron̄ katak n̄an mālōtlōt im n̄an jeļāļo̧kjeņ.
19 Im bar juon alen, n̄an jet em̧ōj leļo̧k tōmak eo n̄an aer kōmour er;
20 Im n̄an ro jet em̧ōj leļo̧k tōmak n̄an kōmour.
21 Im bar juon alen, n̄an jet em̧ōj leļo̧k jerbal in mennin bwilōn̄ ko;
22 Im n̄an bar jet em̧ōj leļo̧k n̄an rikanij;
23 Im n̄an jet kile jetōb raņ.
24 Im bar juon alen, em̧ōj leļo̧k e n̄an jet n̄an kōnono kōn lo ko;
25 Im n̄an bar juon em̧ōj leļo̧k ukok in lo ko.
26 Im aolep mennin letok kein rej itok jān Anij, n̄an em̧m̧anļo̧k eo an ro nejin Anij.
27 Im n̄an bisop eo an kabun̄ in, im n̄an jabdewōt eo Anij ej jitōn̄ e im kapit e n̄an lale kabun̄ eo im n̄an erom elder ro ilo kabun̄ eo, em̧ōj leļo̧k n̄an er n̄an kile aolep mennin letok kein n̄e eab wōr enaaj pād ilubwiljimi ej kōmmejāje ke ej ak e ej jab jān Anij.
28 Im enaaj waļo̧k bwe e eo ej kajjitōk ilo Jetōb enaaj bōk ilo Jetōb;
29 Bwe n̄an jet maron̄ kar leļo̧k n̄an bōki aolep mennin letok kein, bwe en maron̄ wōr juon bōran, bwe aolep ro uwaan ren maron̄ in ļapļo̧k jān e.
30 E eo ej kajjitōk ilo Jetōb ej kajjitōk ekkar n̄an ankilaan Anij; kōn menin ej kōm̧m̧an em̧ool āinwōt ej kajjitōk.
31 Im bar juon alen, Ij ba n̄an kom̧, aolep men reaikuj kōm̧m̧an ilo etan Kraist, jabdewōt kom̧ij kōm̧m̧ane ilo Jetōb;
32 Im kom̧ij aikuj leļo̧k kam̧m̧oolol n̄an Anij ilo Jetōb kōn jabdewōt kōjeraam̧m̧an kom̧ij jeraam̧m̧an kake.
33 Im kom̧ij aikuj kōm̧m̧an jim̧we im kwōjarjar Im̧aō iien otemjej. Em̧ool āindein. Amen.