Mwakoro 53
Kaotioti ae kaotaki rinanon Iotebwa Timiti te Burabeti nakon Algernon Sidney Gilbert, i Kirtland, Ohio, n Tuun 8, 1831. N ana bubuti Sidney Gilbert, te Burabeti e bubutia te Uea ni kaineti nakon ana mwakuri ao mwiokoan te Tari Gilbert n te Ekaretia.
1–3, Wetean ao rinean Sidney Gilbert n te Ekaretia bwa e na katabuaki bwa te unimwaane; 4–7, E na beku naba bwa te tia tei ibukin te bitiobi.
1 Nooria, I tuangko, au tia mwakuri ae Sidney Gilbert, bwa I a tia n ongo am tataro; ao ko a tia ni weteai bwa e na kaotaki nakoim, mai iroun te Uea ae Atuam, ibukin weteam ao arineam n te ekaretia, are Ngai, te Uea, I a tia ni kateia ni boong aika kaitira aikai.
2 Nooria, Ngai, te Uea, are I atauraki ibukin buren te aonaba, I anganiko te tua bwa ko na bkitana bwain te aonaba.
3 Kaaki i aom te katabu are mai irou, are ibukin te unimwaane, n tataekina te onimaki ao te rairannano ao akamaunaan bure, ni kaineti nakon au taeka, ao butimwaean te Tamnei ae Tabu man te katoka bbai;
4 Ao n riki bwa te atia tei naba nakon te ekaretia aei n te tabo are e na rineaki iroun te bitiobi, ni kaineti ma tua ake a na kaotaki rimwi.
5 Ao e koaua ae I a manga tuangko, ko na mwananga ma au tia mwakuri ae Iotebwa Timiti te Ataei ao Sidney Rigdon.
6 Nooria, aikai moan otenanti ake ko na karekei; ao nikiraia a na kaotaki n taai aika a na roko, ni kaineti nakon am mwakuri n au nne ni kurebe.
7 Ao teuana riki, I tangiringkami bwa kam na reirei bwa a tii kamaiuaki naake a ateimatoa ni karokoa te toki. Eng. Amen.