Katanoata ae Kariaiakaki 1
Te Baibara ao Ana Boki Moomon a reirei bwa te mare ma ti temanna bon ana kai ni baire te Atua ibukin te mare ma ti ngkana E taekinna bwa tiaki (taraa 2 Tamuera 12:7–8 ao Iakobwa 2:27, 30). I mwin reken te kaotioti nakon Iotebwa Timiti, karaoakin te mare ae riaon temanna te bu e bon wakinaki i marenaia kaain te Ekaretia n te 1840 tabun (taraa mwakoro 132). Man te 1860 tabun nakon te 1880 tabun, te tautaeka n te United States e katei taian tua ni katabua i an te tua te waaki aei irouia aro. N tokina tua aikai a kamatoaki n te Kabowi are te Kabanea n Rietata n te U.S. I mwin karekean te kaotioti, Beretitenti Wilford Woodruff e anga te Katanoata ae kaotaki ikai, are e butimwaeaki iroun te Ekaretia bwa te bwai ae kariaiakaki ao e na iraki nanona n Okitobwa 6, 1890. Aio are e karika tokin karaoan te mare ae riaon temanna te bu n te Ekaretia.
Nakon are Tabena Aei:
Ibukina bwa a tia ni kanakoaki rongorongo man te tabo ni kaongora ibukin kakoroan nanon waaki n te tautaeka, mai Salt Lake City, ake a a tia ni butanako, are e taekinaki iai bwa te Komitin i Utah, n aia ribooti ae tibwa nako nakon te Minitita ibukin Aaba Inanoa, e kamatoa bwa mareakin te mwaane nakoia aine ae riaon temanna e bon teimatoa ni karaoaki ni botaki aika tabu ao bwa angaun ke a mwaiti riki aekan maare aikai aika tia ni karaoaki i Utah man Tuun ae nako ke i nanon te ririki ae nako, ni ikotaki ma ae a tia taan kairiiri n te Ekaretia n aia marooro nakon te botanaomata n reirei, ni boutoka ao ni kaunga bwa e na reitinako karaoan ae riaon temanna te aine buun te mwaane—
Ngaia are, ngkai I Beretitenti n Ana Ekaretia Iesu Kristo ibukiia Aika Itiaki ni Boong aika Kaitira, I kaotia ikai, ma nanou ni koaua, n taekinna bwa a kewe bukibuki aikai. Ti aki reirei ae e na riaon temanna te aine buun te mwaane ke mareakin te mwaane nakoia aine ae riaon temanna, ke ni kariaia te aomata temanna bwa e na karaoa te waaki aei, ao I kakewea ae angaun maare ke te mwaiti riki teuana ae karaoaki n te botaki ae tabu imarenan te mwaane ma aine ae riaon temanna n te tai anne i nanon ara Tembora nako ke n taabo riki tabeua n te Aba.
Iai teuana te mare ae e a tia n ribootinaki, are taekinaki iai irouiia naake a ribooti bwa e karaoaki te mare n te Auti ibukin te Entaumente, i Salt Lake City, n Tain Bwebweraken Aroka n te 1889, ma I tuai ataia bwa antai ae karaoa te mare; tera are e karaoaki n te itera aei e karaoaki n akea au atatai. N tokina ibukin te bwai are aongkoa e riki, te Auti ibukin te Entaumente, man taian kaetieti mai irou, e uruakaki n te tai naba arei.
Ibukina bwa a tia ni kamatoaki tua irouia taan karao tua n te tautaeka ni katabua mareakin te maane ma aine ae riaon temanna, ao tua aikai a tia ni katanoataki bwa a ira nanon ao a butimwaeaki i an tuan te aba iroun te bowi are te kabanea mai eta, I taekina ikai au baire bwa N na ira nano tua akekei, ao N na kabongana mwaakau ma kaain te Ekaretia ae I tararua i aona bwa a na karaoa naba aei.
Bon akea i nanon au reirei nako nakon te Ekaretia ke n aia reirei raou ni kairiiri, i nanon te tai are e taekinaki, are e kona n rairaki ni kananonaaki bwa e uotarake ke e kaungaa ae na riaon temanna te aine buun te mwaane; ao ngkana iai te Unimwaane n te Ekaretia ae tia ni kabongana te taetae are e tara n anga aekan te reirei aei, e a tia ni kataetaeaki n te tai ae waekoa. Ao ngkai I taekinna nakon te botanaomata bwa au taeka n reirei nakoia Aomata aika Itiaki ni Boong Aika Kaitira bwa a na katoka karaoan te mare are e tabuaki n tuan te aba.
Wilford Woodruff
Beretitenti n Ana Ekaretia Iesu Kristo ibukiia
Aika Itiaki ni Boong aika Kaitira.
Beretitenti Lorenzo Snow e uotaarake ae kaotaki ikai:
I tabekia bwa, ibukina bwa ti butimwaea Wilford Woodruff bwa te Beretitenti n Ana Ekaretia Iesu Kristo ibukiia Aika Itiaki ni Boong Aika Kaitira, ao ti ngaia te aomata i aon te aonaba n te tai aei ae taui kiingin taian otenanti ni kabaebae, ti kakoaua bwa e tabwanin raoi te kariaiakaki irouna man nakoana n anga te Katanoata nakon te botanaomata are e tia ni warekaki ni kabaibaiti bwa ti na bane n ongo, ao are bonginaki n Tebetembwa 24, 1890, ao bwa ngkai te Ekaretia e botaki n te Maungatabu ni Kabuta, ti butimwaea ana katanoata bwa te bwai ae kariaiakaki ao e na iraki nanona ni kaineti ma mareakin te mwaane ma aine ae riaon temanna.
Salt Lake City, Utah, Okitobwa 6, 1890.
Mwakoro aika rineaki man teniua ana maroro
beretienti wilford woodruff
ni kaineti ma te katanoata nakon te botanaomata
Te Uea e aki kona ni kariaiakai ke te aomata riki temanna are e tei bwa te Beretitenti n te Ekaretia aei bwa e na kairingkami nakon ae kairua. Bon tiaki kanoan te baire. Bon tiaki ana kaantaninga te Atua. Ngkana I kataia ni karaoia, te Uea e na kamwaingai man nakoau, ao anne ae E na karaoia nakoia aomata riki tabeman ake a kataia ni kairiia nako natiia aomata man ana kaotioti te Atua ao man mwiokoaia. (Kaonobwi ma Teuana ni Maungatabu ni Kabuta te Ekaretia ae Uatai Taina n te Ririki, Moanibong, Okitobwa 6, 1890, Salt Lake City, Utah. E ribotinaki n te Deseret Evening News, Okitobwa 11, 1890, iteraniba 2).
E aki tabeakinaki bwa antai ae maiu ke antai ae mate, ke antai ae e weteaki bwa e na kaira te Ekaretia aei, a na riai ni kairia n ana kairiiri te Atua ae Moan te Mwaaka. Ngkana a aki karaoia n te aro anne, a na bon aki kona ni karaoia naba teutana. …
I a tia ni karekei tabeua kaotioti n te tai ae aki maan n nako, ao a rangi ni kakaawaki irou, ao N na tuangkami te bwai are e taekinna te Uea nakoiu. Kariaia bwa N na kaira ami iango nakon te bwai ae aranaki bwa te katanoata nakon te botanaomata. …
Te Uea e tuangai bwa N na titirakiniia Aomata aika Itiaki ni Boong aika Kaitira te titiraki teuana, ao E tuangai naba bwa ngkana a kakauongo nakon te bwai are I taekinna nakoia ao ni kaekaa te titiraki are I anganiia, iroun te Tamnei ao mwaakan te Atua, a na bane n titebo aia kaeka, ao a na bane n titebo are a kakoauaa ni kaineti ma te bwai aio.
Bon aio te titiraki: Enga te waaki ae te kabanea ni wanawana ibukiia Aomata aika Itiaki ni Boong aika Kaitira bwa a na iria—te reitinako ni kataia ni karaoa mareakin te mwaane ma aine ae riaon temanna, ma tuan te aba ae kaitaraa ao aia kaitara aomata aika onobwi te mirion, ao boon mwiina bon anakin ao buan Tembora ni kabane, ao katokan otenanti ni kabane ake inanoia, ibukiia aika maiu ao aika mate, ao kabureakiia te Moan Beretitentii ao te Tengaun ma Uoman ao mataniwiin utu n te Ekaretia, ao anakin aia bwai aomata iroun te tautaeka (ao aikai ni kabane a na katoka karaoan te waaki aei); ke, i mwin karaona ao rawawatara n te bwai are ti karaoia rinanon ara kakaonimaki n ongeaba nakon te tua aei ni katoka karaoan te waaki ao n ira nanon te tua, ao man karaoan aei a tiku Burabeti, Abotoro ao kaaro ni mwengaia, bwa aonga ni kona n reireiniia aomata ao ni karaoi mwiokoan te Ekaretia, ao a tiku naba Tembora i nanon baia Aomata aika Itiaki, bwa a aonga ni karaoi otenanti n te Euangkerio, ibukiia aika maiu ao aika mate naba?
Te Uea e kaota nakoiu n te mii ni burabeti ao te kaotioti te bwai raoi are e na riki ngkana ti aki katoka karaoan te waaki aei. Ngke arona bwa ti aki katokia, e na bon akea manenaia iroumi … mwaane nako i nanon te tembora aei i Logan; bwa a na bane otenanti ni katokaki n aban Tion ni kabuta. E na teimatoa te mangaongao ni kabuta Iteraera, ao a mwaiti mwaane aika a na kabureaki. Te kangaanga aei e na taonaa nako te Ekaretia ae bwanin, ao ti na kairoroaki bwa ti na katoka karaoan te waaki aio. Ngkanne, te titiraki bwa, e riai ni katokaki n te aro aei, ke n te kawai are kaotia te Uea nakoira, ao ni katikuia ara Burabeti ao Abotoro ao kaaro bwa aomata aika inaomata, ao temboro i nanon baia aomata, bwa aonga ni kona ni kabooaki maate. E korakora te mwaiti are a tia ni kamaiuaki man te nne ni kaikain n te aonaba n tamnei iroun te botanaomata aei, ao e na waaki nako te mwakuri ke e na toki? Aio te titiraki are I kawenea imataia Aomata aika Itiaki ni Boong aika Kaitira. Kam riai ni motikia i bon iroumi. I tangiringkami bwa kam na kaeka i bon iroumi. N na aki kaeka; ma N na kangai nakoimi bwa bon anne raoi arora ngkai ngaira aomata are ti na mena iai ngke arona bwa ti aki karaoa are ti karaoia.
… I noora raoi te bwai are e na riki ngke arona bwa akea te bwai ae karaoaki. E a kaman mena te tamnei aei i aou n te tai ae maan. Ma I kan taekina aio: N na riai n tia ni kariaia bwa a na bane tembora n nako mai i nanon baira, N na riai n tia n rin ngai i nanon te nne ni kaikain, ao ni kariaia mwaane ni kabane bwa a nako naba ikekei, ngke arona bwa Atuan karawa e aki tuangai bwa N na karaoa te bwai are I karaoia, ao ngke e roko te aoa are I tuangaki iai bwa N na karaoa arei, e bon mataata raoi irou. I nako matan te Uea, ao I korea te bwai are E tuangai te Uea bwa N na koroia. …
N na katuka aei ma ngkami, bwa kam na kamatebwaia ao ni iangoia. Te Uea e bon mwakuri ma ngaira. (Cache Titeiki Maungatabu, Logan, Utah, Tabati, Nobembwa 1, 1891. E ribotinaki n te Deseret Weekly, Nobembwa 14, 1891.)
Ngkai N na tuangkami bwa tera are e kaotaki nakoiu ao tera are e karaoia Natin te Atua n te bwai aio. … Bwaai aikai ni kabane a na bon tia n riki, ngkai te Atua ae Moan te Mwaaka E maiu, ngke arona bwa e aki kanakoaki te Katanoata. Ngaia are, Natin te Atua e namakinna bwa e riai n anga te bwai arei nakon te Ekaretia ao nakon te aonaba ibukin taian kaantaninga n oin ana iango. Te Uea e a tia n tua katean Tion. E a tia n tua katiaan te tembora aei. E a tia n tua bwa kamaiuakiia aika maiu ao maate e riai ni karaoaki ni maruan maunga aikai. Ao te Atua ae Moan te Mwaaka E tua bwa te Riaboro e na aki kona n tuukia. Ngkana kam kona ni mataata n anne, bon anne te kiing nako iai. (Man te marooro n te kaonoua n tetere ni katabuan te Salt Lake Tembora, Eberi 1893. Te rongorongo ae taibinaki ibukin taian Botaki ni Katabu, Tabo ni Kawakin Rongorongo, Aobiti n Tararua ibukin Rongorongon te Ekaretia, Salt Lake City, Utah.)