1 Natiu ae ^aOrson, ongora ao kakauongo raoi ao nooria bwa tera ae Ngai, te Uea ae te Atua, N na taekinna nakoim, ae Iesu Kristo te Tia Kaboko;

2 ^aOotan ao maiun te aonaba, te oota are e oota n te roo ao te roo e aki kinaa;

3 Bwa e rangi n ^atangira te aonaba n te aro are ^bE ^canga oin maiuna, bwa aonga ni kabane ake a kakoaua n riki bwa ^dnatin te Atua. Mangaia are bon natiu ngkoe;

4 Ao ko na ^akakabwaiaaki ibukina bwa ko a tia ni kakoaua;

5 Ao ko na kakabwaiaaki riki ibukina bwa I ^aweteiko bwa ko na tataekina au euangkerio—

6 N tabekaarake bwanaam n ai aron tangin te buu, ae ananau ao n takarua naba, ao n ^atakaruaea te rairannano nakon te roro ae e baoua man aki ako, ni katauraoa kawain te Uea ibukin ^bkauaokina.

7 Bwa nooria, e koaua, e koaua, I tuangko, bwa e a roko te ^atai are N na roko n te ^bnang ma te mwaaka ao te mimitong ae korakora.

8 Ao e na riki bwa te ^abong ae kakannato n tain rokou, bwa a na ^bruru botanaomata ni kabane.

9 Ma i mwain rokon te bong ae kakannato anne, e na roo taai, ao e na bitaki namwakaina nakon te raraa; ao a na aki oota taian itoi, ao a na bwaka tabeua, ao te urubwai ae korakora e tauraoi ibukiia naake a buakaka.

10 Mangaia are, tabekaarake bwanaam ao tai ^arawa n taetae, bwa e a tia n taekinna te Uea ae te Atua; ngaia are taetae ni burabeti, ao ko na anganaki man ^bmwaakan te Tamnei ae Raoiroi.

11 Ao ngkana ko kakaonimaki, nooria, N na memena iroum ni karokoa I roko—

12 Ao e koaua, e koaua, ae I tuangko, bwa e tawe rokou. Boni Ngai am Uea ao te Tia Kaboko. Eng. Amen.