Abraham
Jun ralal laj Teraj, li kiyo’la sa’ Ur re Kaldea (Gen. 11:26, 31; 17:5). Jun lix profeet li Qaawa’ rik’in li kixk’uub’ wi’ li Qaawa’ li sumwank re junelik, li te’osob’tesiiq wi’ chixjunileb’ li tenamit sa’ li ruchich’och’. A’ laj Abram chaq xk’ab’a’ laj Abraham sa’ xtiklajik.
Lix hu laj Abraham
Najter esil tz’iib’anb’il xb’aan laj Abraham li ki’eechaniik xb’aan li Iglees sa’ 1835. Li tz’iib’anb’il esil ut junjunq li najter chaqihob’resinb’il kamenaq aj Egipto ke’tawe’ sa’eb’ li muqleb’aal kamenaq re Egipto xb’aan laj Antonio Lebolo, ut moqon kikam a’an ut kixkanab’eb’ sa’ ruq’ laj Michael Chandler. Li Qawa’ Chandler yoo chaq chixk’utb’aleb’ sa’ li tenamit Estados Unidos sa’ 1835. Junjunq reheb’ lix komon laj Jose Smith ke’xloq’ a’an rik’in li Qawa’ Chandler ut ke’xk’e re li Profeet, li kixjaltesi ru. Junjunq re li tz’iib’anb’il hu a’in wan anajwan sa’ li Q’ol Nim Xtz’aq.
Li ch’ol 1 naxye resil li kixk’ul laj Abraham sa’ Ur reheb’ laj Kaldea, b’ar wi’ eb’ laj tij aj maak ke’xsik’ xmayejankil a’an. Li ch’ol 2 naxye resil lix b’eenik toj Kanahan. Li Qaawa’ kixk’ut rib’ chiru ut kixk’uub’ li sumwank rik’in. Li ch’ol 3 naxye resil naq laj Abraham kiril xk’ihal li choxa ut kixtz’il rix chanru naq wankeb’ li jar yo’ob’tesihom li wankeb’ sa’ choxa. Li ch’ol 4–5 neke’xye wi’chik resil li yo’ob’tesink.
Li riyajil laj Abraham
Eb’ li ani rik’in xpaab’ankil li chaq’rab’ ut li k’uub’anb’il k’anjel re lix evangelio li Jesukristo neke’k’uluk re li yeechi’ink ut li sumwank kixk’uub’ li Dios rik’in laj Abraham. Eb’ li winq ut ixq neke’ru chixk’ulb’al li osob’tesink a’in wi a’aneb’ tz’aqal ralal xk’ajol laj Abraham, malaj ut wi neke’k’ule’ sa’ lix junkab’al a’an xb’aan xk’ulub’ankil li evangelio ut xk’ulb’al li kub’iha’ (Gal. 3:26–29; 4:1–7; Tz. ut S. 84:33–34; 103:17; 132:30–32; Abr. 2:9–11). Eb’ li tz’aqal ralal xk’ajol laj Abraham naru nasach chiruheb’ li rosob’tesinkileb’ rik’in q’etok aatin (Rom. 4:13; 9:6–8).