A’an li ki’ok wi’ li kamk sa’ xb’eeneb’ li winq sa’ li ruchich’och’ a’in. Naq laj Adan ut li xEva ke’xk’ux li ru che’ li xyeeman naq ink’a’ taak’uxmanq, ke’ok rub’el li kamk, a’an naraj naxye naq neke’xk’ul li maak ut li kamk. Laj Adan ki’ok choq’ “xb’een tz’ejwalej” sa’ xb’een li ruchich’och’ (Mois. 3:7). Rik’in li k’utb’esinb’il sa’ roso’jik li kutan kich’olob’aman xyaalal naq li t’ane’k a’an jun osob’tesink, ut naq tento te’nimaaq ru laj Adan ut li xEva jo’ li xb’een xna’ xyuwa’eb’ chixjunileb’ li winq.
Ki’ajman ru li t’ane’k re te’ruuq li winq chixchaab’ilob’resinkil rib’. Rik’in naq li Dios kixnaw naq taa’uxq li t’ane’k, a’an kixk’uub’ sa’ li yu’am naq maji’ nokoyo’la, naq taawanq jun aj Kolonel. Li Jesukristo kichal sa’ xjachleb’aal ru li kutan re xtojb’al rix lix t’anik laj Adan jo’ ajwi’ lix maakeb’ li junjunq chi winq, wi eb’ li winq te’xjal xk’a’uxleb’.