Hebreos, hu reheb’ laj Hebreo

Jun hu sa’ li Ak’ Chaq’rab’. Laj Pablo kixtz’iib’a li hu a’in reheb’ li komon aj Judio sa’ li Iglees, re xq’unb’esinkileb’ xch’ool chixpaab’ankil naq wankeb’ naab’al li raqal sa’ lix chaq’rab’ laj Moises li ak tz’aqob’resinb’il ru xb’aan li Kristo, ut naq lix chaq’rab’il li evangelio k’utb’il xb’aan li Kristo, li taqenaq wi’chik xwankil, ak x’ok choq’ ruuchil. Naq laj Pablo kisutq’i Jerusalen chirix li rox xtaqlanb’il k’anjel (maare 60 chihab’ xyo’lajik li Kristo), kixtaw naq naab’al reheb’ li komon aj Judio sa’ li Iglees toj k’eek’ookeb’ xch’ool rik’in lix chaq’rab’ laj Moises (Hech. 21:20). Ak numenaq chaq lajeeb’ chihab’ naq ak k’ulub’anb’il xb’aan jun li ch’utub’aj-ib’ re li Iglees sa’ Jerusalen naq junjunq reheb’ li k’ojob’anb’il k’anjel re lix chaq’rab’ laj Moises ink’a’ na’ajman ru re te’kole’q li Kristiano aj Gentil. Moko najt ta chirix a’an tana’ naq laj Pablo kitz’iib’ak rik’ineb’ laj Hebreo re xk’utb’al chiruheb’ rik’in tz’aqal lix loq’laj huheb’ ut rik’in li chaab’il na’leb’ank k’a’ut naq ink’a’ raj chik tento te’xpaab’ lix chaq’rab’ laj Moises.

Sa’ li ch’ol 1 ut 2 ch’olob’anb’il naq li Jesus q’axal nim wi’chik chiruheb’ li anjel. Sa’eb’ li ch’ol 3–7 k’utb’il xyaalal li Jesus ut laj Moises ut lix chaq’rab’ laj Moises, ut ch’olob’anb’il xyaalal naq li Jesus nim wi’chik chiru xkab’ichaleb’. Naxk’ut ajwi’ naq li Tijonelil re Melkisedek nim wi’chik chiru li Tijonelil re Aaron. Eb’ li ch’ol 8–9 neke’xye resil chanru naq eb’ li k’ojob’anb’il k’anjel re laj Moises ke’xkawresiheb’ li tenamit choq’ re lix k’anjel li Kristo, ut chan ru naq li Kristo a’an laj Aatinanel re li ak’ sumwank (Alma 37:38–45; Tz. ut S. 84:21–24). Li ch’ol 10 narelaji naq yalb’ilaqeb’ xq’e ut tiikaqeb’ chi paab’ank. Li ch’ol 11 a’an li aatin chirix li paab’aal. Li ch’ol 12 naxk’e li q’usuk ut li sahil ch’oolejil. Li ch’ol 13 naxye resil lix nimal xwankilal li sumlaak, ut k’a’ut naq na’ajman ru li ab’ink chiru li taqlahom.