2. O le Maupuepue o Kumora ma le Eria Manaseta-Palamaira

A o vaai i matu, o lenei ata o loo faaalia mai le Maupuepue o Kumora, i Manaseta, Niu Ioka. O le maupuepue o loo aliali mai le itu taumatau i lalo o le ata ma e faaloaloa atu e sili atu teisi i le faaafa seʼi tau i le tumu o le ata. O le maa faamanatu o loo aliali mai i le pito i matu o le maupuepue e faamamalu i le agelu o Moronae ma le oo mai o le Tusi a Mamona. O le Maupuepue o Kumora o loo tu e tusa ma le lima kilomita i saute i sasaʼe o le Togavao Paia. E latalata i le tumutumu o le ata e tu ai Palamaira, e ono ma le afa kilomita le mamao. O le faatoaga Samita ma le Togavao Paia o loo tu i le pito i luga tau agavale o le ata.

O Mea Taua sa Tutupu: O le aiga o le Perofeta o Iosefa Samita sa nonofo i lenei eria i le taimi o le Uluai Faaaliga Vaaia (IS—T 1:3). I 421 T.A., sa tanumia e Moronae le seti o papatusi auro i le Maupuepue o Kumora ia sa aofia ai le talafaasolopito paia o lona nuu (UaM 1:1–11; Mamona 6:6; Moro. 10:1–2). O lenei lava Moronae sa taʼua ia Iosefa Samita le mea e maua ai papatusi—agaʼi i le pito i matu o le maupuepue, i le itu i sisifo, latalata i le tumutumu. O Moronae sa avane papatusi auro ia te ia i 1827 (MF&F 27:5; 128:20; IS—T 1:33–35, 51–54, 59).