Iakwe, Kwaļo̧k, Karuwainene
Ilo ad iakwe, kwaļo̧k, im karuwainene, jej bōk koņaad ilo jerbal eo eļap im aiboojoj me ej kōpooj laļ in n̄an ro̧o̧ltok eo an Messia.
Ļōmņak ippa, ium̧win jidik iien, jutak ioon juon toļ ilo Galilee, kam̧ool kōn kabwilōn̄lōn̄ im aiboojoj eo kōn an jerkakpeje Rilo̧mo̧o̧r loļo̧k rikaļoor ro An. Ewi jon̄an an kabwilōn̄lōn̄ n̄an an juon ļōmņak an ron̄jake naan kein, eo Ekar kwaļo̧ke ippāer, kean̄ eo An ekwojarjar n̄an “kom̧win ilo̧k, im kōm̧m̧an riaelōn̄ ko otemjej bwe ren ri kaļora, im peptaij er ilo etan Jema im Nejin im Jetōb Kwōjarjar.”1 Em̧ool naan kein renaaj kōmaron̄, im̧we, im kōm̧akūt kōj kajjojo, āinwōt ekar n̄an Rijilōk ro An. Ilo m̧ool, raar wujlepļo̧ke aolepān mour ko aer n̄an kōm̧m̧an ejja kean̄ in wōt.
Ekaitoktok limo, ekar jab wōt Rijilōk ro me raar bōk naan ko an Jisōs n̄an būruweer. Membōr ro an Kabun̄ in jinoin tata, jān ro rekāāl tata n̄an ro eto tata aer membōr, raar bōk koņaer ilo kean̄ eo eļap an Rilo̧mo̧o̧r, kwaļo̧k naan eo em̧m̧an an gospel eo ippān ro rejjan̄in kar ioon er ak jeļā kajjier. Kijejeto eo n̄an kwaļo̧k naan in kam̧ool eo aer kōn Jisōs Kraist ekar jipan̄ Kabun̄ eo An ekanooj in m̧ōkaj an eddōkļo̧k ejkab tōn jutak.2
Kōj barāinwōt, āinwōt rikaļoor ro an Kraist, rej karuwaineneik er n̄an ron̄jake kean̄ in An rainin, āinwōt eļan̄n̄e jaar pād ilo toļ eo ilo Galilee ke Ekar m̧oktata kwaļo̧k e. Kean̄ in ekar ijjino bar juon alen ilo 1830 eo, ke Josep Smith kar kōjenolo̧ke ļeo jein Samuel āinwōt mijenede eo im̧aan tata an Kabun̄ eo an Jisōs Kraist.3 Jān kar iien eo, elōn̄ļo̧k jān 1.5 milien mijenede ro em̧ōj aer ito itak aolepān laļ in katakin aolep laļ ko im peptaiji ro me rej kautiej ennaan eo em̧m̧an an gospel eo kar kōjepļaaktok.
En̄in ej katak eo ad. Ad ikdeelel eļap.
Jān ajri ro nejid reddik n̄an eo erūtto tata ilubwilijid, jej jan̄nuwade kōn iien eo n̄e jemaron̄ ron̄jake kūr eo an Rilo̧mo̧o̧r im kwaļo̧k gospel eo ippān laļ ko an laļ in. Ij m̧ool likao ro im jiron̄ ro raar en̄jake ejja idajon̄jon̄ in kōkajoor in wōt jān rikanaan eo ad inne ke ekar kajjitōk ippāmi n̄an m̧aanjabpopo n̄an jerbal in jipan̄ an mijenede aolep raan ejja āinwōt an Rilo̧mo̧o̧r eo kar kōm̧m̧an ippān Rikaļoor ro An.
Āinwōt rūttōr ro ilo ļain in ijjino eo, jej kōttar kōn kōtmene kōn kūr eo jān rikanaan eo, kadedeļo̧k kōn eļtan pein rikanaan eo, kwaļo̧k n̄aat eo n̄an jino mijen eo! Ikdeelel in ej utiej im im̧we; ijo wōt ke, jen ļōmņak kōn kajjitōk in: etke jejjab aolep jino kiiō?
Kwomaron̄ kajjitōk, “Ekōjkan aō maron̄ erom juon mijenede ilo an ejjeļo̧k pāāj ewōr āt ie?” Ak jej jiron̄ kōj make, “Mijenede ro rej jerbal aolep raan kōjenolo̧k er n̄an kōm̧m̧an jerbal in. Ikōņaan jipan̄ ak bōlen tokālik n̄e eapidikļo̧k an mour in pokjaļjaļ.”
Ro jeiū im jatū, eļem waanļo̧k jān in! Kam̧m̧oolol, kean̄ eo eļap an Rilo̧mo̧o̧r eo emaron̄ kadedeļo̧k kōn pedpd in katak ko reļem waan, pidodo meļeļe kaki kar katakin kōj kajjojo jān ke jaar ajri: iakwe, kwaļo̧k, im karuwainene.
Iakwe
Men eo m̧oktata jemaron̄ kōm̧m̧ane ej iakwe āinwōt Kraist ekar iakwe.
Būruōd rej kanooj būrom̧ōj kōn en̄taan an armej im edodo ko me jej loi ilo aolepān laļ in ilo iien kein rōkapokpok. Mekarta, jemaron̄ in barāinwōt im̧we kōn jiōbtok eo an meanwōd im kōjeraam̧m̧an eo me emōj kar kwaļo̧k jān armej ro aolep jikin kōn kijejeto ko aer n̄an pukōtļo̧k ro kajejtokjāer—ro me kar bōk er jān im̧ōko im̧weer, kar kōjepeļļo̧k er jān baam̧le ko aer, ak ioon jekjek ko jet an būromōj im ebbwer.
Kiiō epaak, jikin kōm̧m̧an nuuj ko raar riboot kōn ekōjkan an juon kumi in m̧am̧a ro ilo Poland, kōn inepata kōn baam̧le ko raar aikuj, raar ko, likūt kein wabūlbūl ko an ajri roobrak ilo ioon jikin tūrein eo ilo juon ļain ejetjet, pojak im kōttar m̧am̧a riatajinimjen ro im ajri ro me renaaj kar aikuji ilo ijo rej kijoon border eo ilo aer to jān tūrein eo. Em̧ool, Jemādwōj Ilan̄ ej mejen ettōn̄dikdik kōn jerbal ko jab ļōmņak kōn juon make āinwōt kein, bwe ilo ad ineek eddo ko an doon, jej “kajejjet kien Kraist.”4
Jabdewōt iien eo jej kwaļo̧k iakwe eo āinwōt an Kraist n̄an ro rūturiid, jej kwaļo̧k gospel eo—men̄e eļan̄n̄e jejjab kōnono juon naan.
Iakwe ro jet ej kwaļo̧k eo ewejepedik an kien eo eļap kein karuo n̄an iakwe eo rūturūm̧;5 ej kwaļo̧k jekjek in karreo eo an Jetōb Kwojarjar eo ej jerbal itulowaan jetōb ko ad make. Kōn kwaļo̧k iakwe eo an Kraist n̄an ro jet, jemaron̄ kōm̧m̧an bwe ro me rej lo jerbal ko ad rem̧m̧an n̄an “nōbar [Jemād] i lan̄.”6
Jej kōm̧m̧ane menin ilo ad jab kōtmene jabdewōt men n̄an bōke.
Kōjatdikdik eo ad, aaet em̧ool, ej bwe renaaj bōk iakwe eo ad im ennaan eo ad, kōn menin ekōjkan aer en̄jake ejjab pād ilo ad maron̄.
Ta eo jej kōm̧m̧ane im wōn kōj aaet ewōr adj maron̄ ie.
Kōn iakwe eo āinwōt an Kraist n̄an ro jet,jej kwaļo̧k men ko bwinnin gospel eo an Kraist raiboojoj, im ej ukōt mour, im eļap ad bōk koņaad ilo kakūrm̧ool kean̄ eo An eļap.
Kwaļo̧k
Men eo kein karuo jemaron̄ kōm̧m̧ane ej kwaļo̧k.
Ilo allōn̄ ko im̧aan an ajeded in COVID-19, Brother Wisan jān Thailand ekar en̄jake im̧we n̄an kwaļo̧k en̄jake ko an im im̧we ko kōn ta eo ekar ekkatak ilo ekkatak eo an kōn Bok in Mormon ilo social media akkaun eo an. Ilo baj juon iaan ennaan ko an make ekar kwaļo̧k, ekar kwaļo̧k juon bwebwenato kōn ruo mijenede ro ilo Bok in Mormon, Amulek im Alma.
Ļeo jatin, Winai, men̄e epen ilo tōmak ko an make ilo kabun̄, ekar un̄ur e kōn ennaan eo im kar uwaak, kajjitōk ilo ejjeļo̧k kōtmene, “Imaron̄ ke bōk bok eo ilo kajin Thai?”
Wisen ekar kōm̧m̧an karōk n̄an juon kape in Bok in Mormon bwe ruo sister mijenede ren bōkļo̧k, ro raar jino katakin ļeo jatin.
Wisen ekar koba ilo katak ko kōn intōrnet, ilo iien eo ekar kwaļo̧k en̄jake ko an kōn Bok in Mormon. Winai ekar ekkatak n̄an jar im ekkatak kōn juon jetōb in kappukōt-m̧ool eo, n̄an bōk im kaorōk m̧ool eo. Ilowaan jejjo allōn̄ ko, Waini ekar peptaij!
Wisan tokālik ekar ba, “Ewōr ippād juon eddo n̄an erom juon kein jerbal ilo pein Anij, im jej aikuj iien otemjej pojak n̄an E n̄an kōm̧m̧ane jerbal eo An ilo wāween eo An kōn kōj.” Kabwilōn̄lōn̄ eo an baam̧le eo aer ekar itok kōnke Wisan ekar kwaļo̧k gospel eo ilo wāween eo jeļā kake im make waļo̧k.
Jej aolep kwaļo̧k men ko ippān ro jet. Emakijkij ad kōm̧m̧ane. Jej kwaļo̧k ta pija ko im m̧ōn̄ā ko rem̧m̧an ippād, men ko rōkam̧ōņōņō jej loi, jikin ko jej loļo̧k, jin̄a ko jej nōbari, kout ko jej im̧we kaki.
Ekōjkan ad maron̄ kakkobabatok n̄an laajrak in men ko em̧ōj kadede ad kwaļo̧k kōn ta eo jej iakwe kōn gospel eo an Jisōs Kraist?
Elder Dieter F. Uchtdorf ekar kōmeļeļeik: “Eļan̄n̄e jabdewōt ej kajjitōk kōn wiikāān eo am̧, jab aepedped n̄an kōnono kake ta eo kwaar en̄jake ilo jikin jar. Jiron̄ er kōn ajri jiddik ro me raar jutak im̧aan in jarlepju eo im al kōn ketak kōn ekōjkan aer kajjieon̄ āinwōt Jisōs. Kōnono kōn kumi in jodikdik eo me eaar joļo̧k iien jipan̄ rūtto ro ilo im̧ōn rūtto ro n̄an kōm̧m̧ane bwebwento ko aer make.”7
Kwaļo̧ke ejjab meļeļe in “wia kake” gospel eo. Kwojjab aikuj je juon naan in kwaļo̧k ak kajim̧we bōd in loļo̧kjeņ an juon.
N̄e ej itok n̄an jerbal in mijenede, Anij ejjab aikuji bwe kwon riwaje ro An, ak Ej, ijo wōt ke, ej kajjitōk bwe kwon erom An rileto letak naan.
Jān kwaļo̧ke en̄jake ko ad rem̧m̧an ilo gospel eo ippān ro jet, jej bōk koņaad ilo kakūrm̧ool kean̄ eo eļap an Rilo̧mo̧o̧r eo.
Karuwainene
Men eo kein kajilu kwomaron̄ kōm̧m̧ane ej karuwainene.
Sister Mayra ej juon rioktak ekāāl jān Ecuador. Lan̄lōn̄ eo an ilo gospel eo em̧ōkaj an eddōkļo̧k ālkin wōt peptaij eo an ilo an kar karuwaineneik ro m̧ōttan im ro rejitōnbōro kōn social media akkaun ko an. Ro uwaan baam̧le eo aō im ro m̧ōtta raar lo ennaan eo an kar uwaak kōn kajjitōk ko. Mayra ekar ekkejel ippāer, emakijkij an karuwaineneik er n̄an m̧weo im̧ōn n̄an ioon mijenede ro ippān doon.
Ro jinen im jemān Mayra, ro jein im jatin, eo nej jinen, ruo rilikin, im jejjo ro m̧ōttan raar peptaij kōnke kōn peran eo an ilo kar karuwainenik er n̄an “itok im loe,” “itok im jerbal,” im “itok im uwaan.” Jān karuwainene ko an rōkkā im make, elōn̄ļo̧k 20 armej ro raar bōk kūr eo an n̄an peptaij im erom membōr in Kabun̄ eo an Jisōs Kraist. Menin ekar itok kōnke Sister Mayra ekar karuwaineneik ro jet n̄an en̄jake lan̄lōn̄ eo ekar en̄jake āinwōt juon membōr in Kabun̄ in.
Ewōr buki karuwainene ko jemaron̄ liļo̧k n̄an ro jet. Jemaron̄ karuwaineneik ro jet n̄an “itok im lo” juon iien kwojkwoj, juon m̧akūtkūt an ward, juon online pija in alooj me ej kōmeļeļeik gospel eo an Jisōs Kraist. “Itok im lo” emaron̄ juon karuwainene n̄an riit Bok in Mormon ak loļo̧k juon tampeļ kāāl ilo iien kōppeļļo̧k eo an m̧okta jān aje eo. Jet iien karuwainene eo ej juon men eo jej letok n̄an kōj make—juon karuwainene n̄an kōj make, letok n̄an kōj jeļā eo im visōn eo kōn iien ko rem̧m̧an ipeļakiid n̄an kōm̧m̧ane.
Ilo tōre in digital in ad, membōr ro emakijkij aer kwaļo̧k ennaan ko kōn social media. Ewōr buki, eļan̄n̄e ejjab taujin, men ko rōkōbōkakkak kom̧ maron̄ loi ewōr tokjāer n̄an kwaļo̧k. Kadkad in ej leļo̧k karuwainene eo n̄an “itok im lo,” “itok im jerbal,” im “itok im uwaan.”
Ilo ad karuwaineneik ro jet n̄an ekkatak eļapļo̧k kōn gospel eo an Jisōs Kraist, jej bōk koņaad ilo kūr eo an Rilo̧mo̧o̧r n̄an bōk koņaad ilo jerbal in kean̄ eo An.
Jem̧ļo̧k in
Ro jeiū im jatū jitōnbōro, jaar kōnono rainin kōn jilu men ko reļem —waan—men ko repidodo—me aolep remaron̄ kōm̧m̧ani. Men ko kom̧ij maron̄ kōm̧m̧ani! Bōlen ededeļo̧k de ami kōm̧m̧ani—em̧ool ilo ami jab kanooj kile bwe kom̧ij!
Ij kajjitōk ippāmi n̄an ļōmņak kōn wāween ko kom̧ maron̄ iakwe, kwaļo̧k, im karuwainene. Ilo ami kōm̧m̧ane, kom̧ naaj en̄jake juon jon̄ak in lan̄lōn̄ jeļā bwe kom̧ij ron̄jake naan ko an Rilo̧mo̧o̧r eo ad ejitōnbōro.
Ta eo ij libūjerjere kom̧ n̄an kōm̧m̧ane ejjab juon būrookraam̧ kāāl. Kom̧ kar ron̄ kake pedped in katak kein m̧okta. Menin ejjab juon “men ekilep” Kabun̄ in ej kajjitōk ippāmi n̄an kōm̧m̧ane. Men kein jilu rej wōt juon edde kōn wōn eo kōj kadede āinwōt rikaļoor ro an Jisōs Kraist.
Ejjeļo̧k pāāj ewōr āt ie ak leta eo ej menin aikuj.
Ejjeļo̧k juon kūr eo aikuj in iminene kake.
Ilo an men kein jilu erom juon m̧ōttan wōn eo kōj im ekōjkan ad mour, renaaj make waļo̧k, en̄jake eo jab kipele an iakwe em̧ool.
Ke rikaļoor ro an Kraist ro raar koba ippān doon n̄an ekkatak jān E ilo Galilee 2,000 iiō ko remootļo̧k, jej barāinwōt maron̄ dāpij kean̄ eo an Rilo̧mo̧o̧r eo im ilo̧k n̄an aolepān laļ kwaļo̧k gospel eo.
Ilo ad iakwe, kwaļo̧k, im karuwainene, jej bōk koņaad ilo jerbal eo eļap im aiboojoj me ej kōpooj laļ in n̄an ro̧o̧ltok eo an Messia.
Bwe jen maron̄ ron̄jake kūr eo an Rilo̧mo̧o̧r im kajjieon̄ in bōk koņaad ilo kean̄ eo An eļap ej aō jar ilo etan Jisōs Kraist, amen.