Ata o le Faaolataga

Ae tatou te le’i fananau mai i le lalolagi, sa tatou nonofo faatasi ma o tatou Matua Faalelagi o ni a Laua fanau agaga (tagai Mataupu Faavae ma Feagaiga 138:55–56). I se fonotaga faatasi ma Ana fanau uma, na tuuina mai ai e le Tama Faalelagi se fuafuaga, ua ta’ua o le “fuafuaga o le olataga” po o le “fuafuaga tele o le fiafia” (Alema 42:5, 8). O le fuafuaga e aofia ai tulafono ma sauniga uma o le talalelei e alagatatau i le mauaina o le ola e faavavau, “o le meaalofa aupito silisili lea o meaalofa uma a le Atua” (Mataupu Faavae ma Feagaiga 6:13).

O le mea e faanoanoa ai, o le tasi vae tolu o fanau agaga a le Tama Faalelagi sa le’i taliaina le fuafuaga. Sa latou filifili e mulimuli ia Lusifelo, o le na avea ma tiapolo, ma sa tutuliese ai i fafo o le afioaga o le Atua (tagai Faaaliga 12:7–9).

Ua tatou i ai i le lalolagi ona sa tatou filifili e mulimuli i le fuafuaga a le Tama Faalelagi. O le tasi o faamoemoega taua o le olaga faitino o le, ia maua se tino faaletino. I le lalolagi e mafai ona tatou maua le olioli ma le filemu, ae o le a tatou feagai foi ma faaosoosoga, faafeagai, ma faigata, ma oo i tofotofoga. O tofotofoga faalelalolagi o ni vaega o le olaga faitino ma e mafai ona fesoasoani tatou te tuputupu ae ai ina ia avea atili faapei o lo tatou Tama Faalelagi.

E taua i le fuafuaga ia le Togiola a Iesu Keriso. Sa faatoilalo e Iesu le oti faaleagaga ma le faaletino ma ave i Ona lava luga o tatou puapuaga, faanoanoaga, ma agasala (tagai Alema 7:11–13). O lenei mafatiaga, maliu, ma le Toetu ua taua o le Togiola. Sa manaomia le Togiola ona “e leai se mea e lē mamā e mafai ona nofo faatasi ma le Atua” (1 Nifae 10:21). E ala i le taulaga a Keriso, ua mafai ai ona tatou salamo ma toe nonofo faatasi ma le Atua.

E taua foi i le fuafuaga a le Atua ia le faitalia, po o le mafai ona filifili. A tatou filifili e salamo i a tatou agasala, ua tatou filifili e talia le meaalofa o le Togiola a Iesu Keriso. Afai tatou te faaaoga o tatou faitalia e tausi ai poloaiga, tatou te maua le faamanuiaga o le auai i sauniga paia, o sauniga ia e aofia ai le osia o feagaiga po o folafolaga ma le Atua. O nei sauniga e aofia ai le papatisoga, faamauga, faauuga o le perisitua mo alii, ma sauniga o le malumalu.

O se vaega o le fuafuaga a lo tatou Tama Faalelagi o le, e i ai se aso o le a tatou oti uma ai. O le oti o le tuueseeseina lea o le agaga ma le tino faaletino. O o tatou agaga, lea sa i ai i le muai olaga, o le a ola pea pe a tatou oti. Afai na tatou ola amiotonu—salamo pe a manaomia—e oo i le iuga o lo tatou olaga i le tino, o le a tatou ulu atu i le parataiso o agaga. Na faamatala e le perofeta o le Tusi a Mamona, o Alema, lenei mea “o se nofoaga e malolo ai, o se nofoaga o le filemu” (Alema 40:12).

Ona o le Togiola a Keriso, o le a toetutu uma ai fanau a le Atua ma o le a toe faatasia ai o tatou tino ma agaga (tagai 1 Korinito 15:20–22; Mataupu Faavae ma Feagaiga 88:14–17). A mavae le Toetutu ona sosoo ai lea ma le Faamasinoga Mulimuli, lea o le a faamasino ai i tatou e le Atua e tusa ai ma o tatou manaoga ma lo tatou usiusitai i poloaiga (tagai 2 Nifae 9:15–17; Mataupu Faavae ma Feagaiga 137:9). Afai tatou te agavaa e ala i le salamo, o le a mafai ona tatou nonofo e faavavau faatasi ma o tatou Matua Faalelagi agalelei (tagai Alema 40; 41; Mataupu Faavae ma Feagaiga 76).

Tusifaamaumau Ou Lagona Uunai

Savali Faaopoopo

“O Loto o Tagata O Le A Faatoilaloina i Latou”

“Valaaulia Tagata Uma e O Mai ia Keriso: Faasoaina Atu o le Talalelei”

“O Le Ata o le Faaolataga”

Ata

Faailoga o le Aufaipese a le Tapeneko

O Vitio o le Aufaipese a le Tapeneko

“O le Alofa o le Tama”

“Sa Fanau Maulalo Iesu”