Faʼaroʼo, Tiʼaturiraʼa, ʼe Aroha—Tuhaʼa 3
Tiʼaturiraʼa i Holane
Tē ora ra te taʼata pāpa’i i New Jersey, i Marite.
E tamāhine ʼāpi 15 matahiti ʼo Grace tei ora i Holane i te tau o te Tamaʼi Rahi II. E mea maoro te tamaʼi i te tupuraʼa. Tē poʼia ra te mau taʼata i Holane ʼe ʼua tiʼaturi rātou ʼua fātata te tamaʼi i te faʼaea.
Te matahiti hopeʼa nō te Tamaʼi Rahi II ʼo te matahiti ʼino roa aʼe nō Holane. ʼUa haru te mau taʼata Nazi i te mau mea atoʼa. ʼAita i nehenehe ia Grace ʼia haere atu i te fare haʼapiʼiraʼa. ʼAita e ʼarahu nō te tamāhanahana i tō rātou fare. ʼUa ʼamu Grace ʼe tōna ʼutuāfare i te mau ’ōniani o te tiare tulipe ’ia ʼore rātou e pohehia i te poʼia. E mea au ’ore roa te mau ’ōniani ! Te mea hepohepo roa aʼe, e taʼata mau ʼāuri noa ā ʼo pāpā.
Tē vai ra rā te tiʼaturiraʼa. Tē parau nei te taʼata tē pau ra te mau Nazis i roto i te tamaʼi. ʼE i te ʼāvaʼe nō Mē 1945, ʼua pau te mau Nazis. ʼUa tiʼamā faʼahou mai te fenua Holane ! ʼUa ʼoaʼoa te nūnaʼa i roto i te mau aroā porōmu. ʼUa nehenehe ia Grace e hoʼi atu i teienei i te fare haʼapiʼiraʼa ʼAita e mataʼu-faʼahou-raʼa i te mau nuʼu faehau.
Te mea maitaʼi roa atu, ʼo te mahana ’a hoʼi mai ai ʼo Grace ʼe tōna mau taeaʼe nā te fare haʼapiʼiraʼa mai, ʼua ʼite rātou i te reva nō te fenua Holane i mua i tō rātou fare. ʼUa ʼite rātou i te auraʼa ʼo te reira noa mea.
Tei te « fare ’o pāpā ! » tuō aʼera ʼo Heber.
ʼUa horo atu Grace ʼe tōna mau taeaʼe i roto i te fare. ʼUa tauahi atu Grace i tōna pāpā ʼe ʼua ʼapa maitaʼi atura iāna. ʼUa haru mai ʼoia iāna. E mea faʼahiahia mau tei te fare pāpā.
ʼAita i maoro i muri mai, ʼua haʼamata te mau māʼa, te mau ʼahu ʼe te mau rāʼau rapaʼau i te tae mai i Holane. ʼUa hāpono atu te feiā faʼatere o te ʼĒkālesia i Roto Miti i te mau tauihaʼa nō te tauturu i te mau taʼata i muri aʼe i te tamaʼi. ʼUa fāriʼi atoʼa Grace i te hōʼē ʼahu ʼāpī ! ʼUa ʼōʼomo noa nā ʼoia i te hōʼē ā ʼahu e pae matahiti te maoro, nō reira ʼua ʼoaʼoa rahi ʼoia nō te fāriʼiraʼa i te hōʼē ʼahu ʼāpī.
Nō te taime mātāmua i roto i te mau matahiti e rave rahi, ʼua navaʼi te māʼa tā Grace hi ʼamu. ʼUa faʼaoti te peresideni misiōni ʼe te faʼatereraʼa hau i Holane ’ia haʼamata i te hōʼē ʼōpuaraʼa ʼūmara pūtete nō te faʼatupu rahi i te māʼa. ʼUa tanu te mau melo o te ʼĒkālesia i te mau ʼūmara pūtete i roto i te mau faʼaapu nā pīhaʼi iho. I te tau haʼapoheraʼa rāʼau e rave rahi tauasini ʼūmara pūtete tā rātou nō te ʼamu.
« ʼA hi’o na ! » ʼUa parau atu Grace ia pāpā, ma te toro atu i te hōʼē ʼōmou ʼūmara pūtete. « Eʼita roa tātou e pohe faʼahou i te poʼia ! »
ʼUa taʼiriʼiri pāpā i tōna upoʼo ’aita rā i ʼata’ata. ʼUa parau ʼoia, « ʼua paraparau vau i te peresideni Zappey. ʼUa parau mai ʼoia iāʼu te pohe noa ra ā te Feiā Moʼa i te mau Mahana Hopeʼa nei i te fenua Helemani i te poʼia mai ia tātou nā mua atu. ’Aita rātou e fāriʼi ra i te tauturu a te faʼatereraʼa hau mai ia tātou ». ʼUa tauahi atu pāpā i te tua o Grace. « ʼUa ani mai te peresideni Zappey, e hōroʼa ānei tātou i tā tātou mau ʼūmara pūtete nā te Feiā Moʼa i Helemani ».
« Hōroʼa i tā tātou mau ʼūmara pūtete ! » ʼUa ta’i aʼera Grace Nō te fenua Helemani mai hoʼi te mau Nazi ! « E Feiā Moʼa i te mau Mahana Hopeʼa nei paha rātou, e pāpā, e feiā purusia atoʼa rā rātou ».
« ʼUa ʼite au e ʼere i te mea ʼōhie, » parau mai ra pāpā. « E mau tamariʼi atoa rā rātou nā te Atua. ʼUa here atoʼa ʼoia ia rātou. ʼUa faʼaʼore au i tā rātou mau hara nō te faʼariroraʼa iāʼu ’ei taʼata mau ʼāuri. E nehenehe tā te Fatu e tauturu ia tātou ʼia faʼaʼore i te mau mea atoʼa.
ʼUa hiʼo atu Grace ia pāpa. ʼO ʼoia te taʼata itoito roa aʼe tāna i ʼite, ʼaita rā ʼoia i ʼite mai te mea e noaʼa iāna te itoito i te faʼaʼore i tei hapa mai iāna. I reira ʼua haʼamanaʼo ʼoia i te hōʼē o tāna mau ʼorometua haʼapiʼi i te tau tamaʼi. ʼUa parau tāna ʼorometua haʼapiʼi e ʼere te tāʼātoʼaraʼa o te mau mau taʼata purusia i te Nazi, ʼe ere te tāʼātoʼaraʼa o te mau faehau Nazi i te mea ʼino. ʼE i teienei tē pohe ra te mau tamāhine ʼe te mau tamāroa i te fenua Helemani i te poʼia, mai ia Grace i tera rā tau.
ʼUa huti maoro Grace i te aho. « Tē taʼa ra iāʼu », ʼua parau mai ʼoia. « E hōroʼa anaʼe tā tātou mau ʼūmara pūtete nā rātou ».
ʼUa tauahi atu pāpā iāna ʼe ʼua ʼataʼata. E tamāhine itoito mau ʼoe. E ʼohipa fifi teie ʼia rave. E mau pipi rā tātou nā Iesu Mesia, ʼe tō tātou atoʼa mau taeaʼe ʼe mau tuahine Purusia.
ʼUa ʼataʼata Grace. ʼUa tahe te mau manaʼo ʼīʼino e vai ra i roto i tōna ʼāʼau ʼe ua ʼite ʼoia i te hau ʼe te māhanahana. ʼUa nehenehe iāna ’ia faʼaʼore i te hapa a te mau taʼata Purusia. ʼUa nehenehe atoʼa ia Iesu ’ia tauturu iāna ’ia here ia rātou.