Feia ʼĀpī Paʼari
Te ta’ahira’a mātāmua e tae atu ai i te tātarahaparaʼa
Tē ora nei te ta’ata pāpa’i i Ouest, Haiti
ʼUa ʼite au i te pōuri i te pouraʼa mai i niʼa i tōʼu nei oraraʼa. ʼE i reira ʼua ʼite aʼera vau e tiʼa iāʼu ’ia paraparau i tōʼu ʼepisekōpo.
Faʼahōhoʼaraʼa nā Joshua Dennis
Tē ha’amana’o nei au i te fa’ata’ara’a i tō’u nei mahana bāpetizora’a ’e te mau misiōnare. ’Ua ui mai rātou ’ua ineine ānei au i te rave i teie fafaura’a ’e tō tātou Metua i te Ao ra. Ma te feruri ’ore i te reira ’e ma te ’ā’au tei ’ī i te ’oa’oa, ’ua parau atu vau, « ’ē ! » ’Ua hina’aro vau i te fāri’i i te hōro’ara’a ta’a ’ē tā tō’u Metua here i hōro’a mai nā’u, ’e ’ua ’ite au ē e’ita vau e ’oa’oa mai te mea ’aita te Fa’aora i roto i tō’u orara’a. ’Aita rā vau i pāpū maita’i e aha tā te ’ananahi e fa’anaho mai nō’u.
E ’inaha, ’ua tae te mahana rahi. E’ita roa e mo’ehia, ’e ’ua ’oa’oa roa vau.
Mau mahana pōuri
I muri a’e i tō’u bāpetizora’a ’e ha’amaura’a, e au ra ’ua pōuri tā’ue noa te mau mahana. Tē fifi ra vau i te mau ’ohipa nō te ’utuāfare, ’e tē fifi ra vau i te ha’apa’o i te tā’āto’ara’a o te mau ture a te Atua. ’Aita vau i ’ite e aha te rave, ’e ’ua hina’aro vau i te fa’aru’e i te mau mea ato’a. E au ra ē ’aita e ta’ata e ta’a nei i tō’u huru.
Mea au nā’u ’ia tai’o i te Buka a Moromona, i taua rā taime ra ’ua tu’u vau i te reira i te hiti. I te hō’ē mahana, ’a fa’aea ai au o vau ana’e i te fare, ’ua ’ite au i te mārū o te Vārua i te tura’ira’a iā’u ’ia tai’o i te Buka a Moromona. ’Ua pure au nā mua a’e, ma te hina’aro i te ’ite i te hō’ē pāhonora’a e nehenehe e ’āfa’i mai i te tamāhanahanara’a i tō’u māuiui. ’Ua huri ti’a atu vau i te Alama pene 5. Tē parau ra te ’īrava 27 : « I haere ānei ’outou ma te hapa ’ore i mua i te Atua ra ? E mai te mea ra, ’ua tīpapahia mai nei ’outou ’ia pohe i teie nei taime, ’ua ti’a ānei ia ’outou ’ia parau i roto ia ’outou iho ē, i nava’i tō ’outou ra ha’eha’a ? ’Ua tamāhia ’e ’ua fa’ateateahia tō ’outou ra ’ahu i te toto o te Mesia, ’o te tae mai e fa’aora i tōna ra mau ta’ata i tā rātou mau hara ? »
I te pae hope’a ’ua putapū tō’u ’ā’au i teie mau parau. ’Ua ’ite au ē e ti’a iā’u ’ia tātarahapa, nō reira ’ua ani au ’ia fārerei atu i tō’u ’episekōpo. ’Ua ri’ari’a mau ā vau, ’ua fa’ahepo rā vau iā’u iho i te haere e fārerei iāna.
Te ta’ara’a i te fafaura’a a te Atua
I tō’u taera’a atu i te piha ’ohipa a te ’episekōpo, nō tō’u ha’amā rahi ’ua hina’aro vau e ho’i mai i muri. ’Ua pure rā vau ’ia noa’a iā’u te itoito ’ia parau i te mau mea e ti’a iā’u ’ia parau. ’Ua fāri’i poupou mai te ’episekōpo iā’u i roto i tāna piha ’ohipara’a, ’e ’ua pure ’oia nō te fāri’i i te tauturu a te Atua. ’Ua paraparau mai ’oia iā’u mai te au ra ē e tamaiti au nāna ’e ’ua fa’a’ite mai i tōna here nō’u nā roto i tāna mau parau. ’Ua hōro’a mai ’oia iā’u i te a’o ’e ’ua ani mai iā’u ’ia rave i te tahi mau mea nō te fāri’i i te fa’a’orera’a hapa a te Atua ’e ’ia ho’i fa’ahou mai i muri iho e fārerei iāna.
’Ua ’oa’oa vau nō teie rāve’a. ’Ua pe’e au i tāna a’o ’e i te pae hope’a ’ua noa’a iā’u te ’itera’a i te fafaura’a a te Atua ’ia fa’a’ore i te hara a Alama : « E ’ia fa‘i mai ’oia i tāna mau hara ia ’oe ’e iā’u ato’a, ’e ’ia tātarahapa ma tōna ’ā’au ato’a, e fa’a’ore ’oe i tāna ra mau hara ’e e nā reira ato’a ho’i au » (Mosia 26:29). I muri a’e i tō’u tātarahapa-mau-ra’a, ’ua ’ite au ē ’ua fa’a’ore mai te Atua i tā’u mau hara. ’Ua nehenehe iā’u i te pae hope’a ’ia ’ite i te here o te Metua i te Ao ra i roto i tō’u ’ā’au ’e ’ua tātara-’ē-hia atu te pōuri. ’Ua ’oa’oa vau ’e ’ua māuruuru vau iā’u iho.
Tei reira te ’episekōpo nō te tauturu
’O te ’episekōpo te mono o te Fatu nō te pāroita. Te ’itera’a ē tei reira ’oia nō te tauturu ia ’outou ’ia ’ite i te ’oa’oa mau tā te Atua i fa’aherehere nō ’outou. ’A ti’aturi iāna. Mai te mea e fifi ’aore rā e hina’aro tō ’outou ’ia tātarahapa, ’a haere e ’imi iāna. E tauturu ’oia ia ’outou.
’Ua ’ite au e ’ere te mea ’ōhie ’ia haere e fārerei iāna i te tahi mau taime. Mai tā te peresideni Lorenzo Snow (1814-1901) i ha’amāramarama nō ni’a i te ’ōpuara’a mure ’ore a tō tātou Metua i te Ao ra : « ’Aita vau i mata’u i te parau ē i roto i te ao vārua [mātāmua], i te taime ’a parauhia mai ai ia tātou ’ia …haere atu nā roto i te ’ohipa tā tātou e fa’aruru i teie nei, e ’ere ïa i te mea ’oa’oa ’e te au roa … Tera rā ’aita e fē’a’ara’a ē ’ua ’ite ’e ’ua māramarama maita’i tātou ē, nō te fa’atupu i tō tātou fa’ateiteira’a ’e tō tātou hanahana, teie te ’ohipa i tītauhia ». ’Ua parau fa’ahou ’oia, « ’ua ineine tātou i te pe’e i te hina’aro o te Atua, ’e nō reira tātou i tae mai ai i ’ōnei » (Te mau Ha’api’ira’a ’a te mau Peresideni o te ’Ēkālesia : Lorenzo Snow [2012], 110).
’Ua riro te tātarahapara’a ’ei tufa’a nō te pe’era’a i te hina’aro o te Atua. ’Eiaha tātou e ri’ari’a i te ’episekōpo, ’a fa’ariro rā iāna ’ei hoa nō ’outou. ’Ua mā’itihia ’oia e te Atua, ’e e nehenehe iāna ’ia tauturu ia ’outou ’ia tātarahapa ’e ’ia fa’aora i tō ’outou vārua nā roto i te haerera’a atu ia Iesu Mesia ra. Tē hina’aro nei te Fatu e tauturu ia tātou, e ti’a rā ia tātou ’ia rave i taua ta’ahira’a mātāmua ra e tae atu i te tātarahapara’a. Nā roto i te reira e ’ite ai tātou i te tupura’a o te fafaura’a i roto ia Isaia 1:18 : « ’Ia ’ute’ute roa tā ’outou mau hara ra, e riro ïa mai te hiona ». ’E nō te reira, tei ’ōnei te ’episekōpo nō te tauturu.
Tē fa’a’ite pāpū atu nei au ē, tē ora nei te Atua ’e ’o Iesu te Mesia tō tātou Fa’aora. Tē here rahi nei rāua to’opiti ia tātou !