Te pure i roto i te ʼāfaʼa
I te matahiti i ma’iri aʼenei, ʼua haere atu vau nā muri i tōʼu pāpā ʼe tōʼu tuaʼana. ʼUa haere atu mātou i roto i te hōʼē ʼāfaʼa hōhonu. ʼAita i maoro roa ʼua haʼamata mātou i te hāhaere nā niʼa i te hōʼē arati’a. ʼUa ʼite atu mātou i te mau ana rahi ʼe te mau vāhi mātaʼitaʼiraʼa faʼahiahia. ʼUa pa’uma mātou i niʼa roa nā niʼa atu i te mau vāhi matomato.
I muri mai ʼua moʼe roa mātou. ʼAita mātou i ʼite ē nāhea i te pou atu i raro i te ʼāfaʼa. ʼUa mau mātou i roto i te mau ʼaihere meʼumeʼu ʼe ʼaita mātou i ʼite faʼahou i te tuhaʼa i ni’a ’e i raro o te ʼāfaʼa. ʼUa haʼamata vau i te riri roa. Aita vau ʼi ʼite e haere tiʼa i hea, ʼe ʼaita atoʼa tōʼu pāpā i ʼite !
Tē haʼamata ra i te haʼapōuiri ʼe i te toʼetoʼe, e mea ātea roa mātou i te vāhi nō te haere atu i rāpae’au i te ʼāfaʼa. ʼUa ʼite au ʼe ʼua ʼite te Metua i te Ao ra i te ’ē’a e nāhea ’ia haere atu.
ʼUa parau vau, « mai te mea e hinaʼaro tātou i te haere atu i rāpae’au, e tiʼa ia tātou ʼia pure ! » Nō reira ʼua tūturi mātou e toru nō te pure, ma te ani i te Metua i te Ao ra ’ia arataʼi ia mātou i rāpae’au i te ʼāfaʼa.
ʼA haʼamata ai mātou i te haere, ʼua parau mai te hōʼē manaʼo ē ’ia ʼite anaʼe au i te hōʼē tumu rāʼau teitei ʼe te ʼāfaro, e tiʼa iāʼu ’ia tīpuʼu atu i te pae ʼaui. I muri aʼe i tōʼu tīpuʼuraʼa i te pae ʼaui, ʼua ʼite atu vau i tō mātou pere’oʼo uira. ʼUa ʼite au ē ʼua tauturu te Metua i te Ao ra ia mātou ’ia haere atu i rāpae’au i te ʼāfaʼa. ʼUa pāhono te Metua i te Ao i tā mātou pure, ʼe ʼua ora mai mātou—i te taime ’a topa ai te mahana.
Tē māuruuru nei au nō te pūai o te pure ʼe nō te tariʼa faʼaroʼo o te Metua i te Ao ra.