Te hōʼē haʼamaitaʼiraʼa i roto i te pāpaʼiraʼa rima a tōʼu metua vahine
Douglas Hedger
Nevada, Fenua Marite
Faʼahōho’araʼa nā Dilleen Marsh
I te hōʼē pō tē feruri ra vau e aha ra ïa te poroʼi nō te hōroʼa i te hōʼē ʼāmuiraʼa pāroita e fātata mai ra. ʼUa tuātapapa vau i te mau pāpaʼiraʼa moʼa i roto i te hepetoma, ʼe noa atu ʼua fāriʼi au i te haʼapiʼiraʼa ʼe te ʼite faʼahiahia, ʼaita ā vau i fāriʼi i te arataʼiraʼa māramarama nō te mea tā te Fatu i hinaʼaro iāʼu, ʼei peresideni titi, ’ia faʼaʼite atu i te mau melo nō te pāroita.
Ma te pure mau, ʼua ani au i te arataʼiraʼa a te Vārua nō te arata’i i tōʼu mau manaʼo. I reira ʼua ʼīriti au i tāʼu mau pāpaʼiraʼa moʼa ʼe ʼua haʼamata i te taiʼo faʼahou. ʼUa huri ʼoiʼoi noa tōʼu feruriraʼa i ni’a i te mau fā a te pāroita tā te ʼepisekōpo ʼe ʼo vau nei i tāuʼaparau ʼaita i maoro roa. Te hōʼē o taua mau fā ra ʼo te faʼaʼohiparaʼa ïa i te ʼIa Poro Haere i Tāʼu nei ʼEvanelia i roto i te faʼaʼiteraʼa i te ʼevanelia i te mau hoa.
ʼUa faʼauruhia vau i te fa’aō mai i te ʼIa Poro Haere i Tāʼu ʼEvānelia i roto i tāʼu iho taiʼoraʼa i taua pō ra. ʼUa rave mai au i te hōʼē buka ʼe ʼua ʼīriti atu i te tahi ʼapi. I niʼa i taua ʼapi ra, ʼua ʼite au e piti faʼahororaʼa pāpaʼiraʼa moʼa tei pāpaʼi-rima-hia—1 Nephi 8:8–11 ʼe 1 Nephi 11:21–22. ʼA hiʼo maitaʼi atu ai au, ʼua ʼite aʼera vau ʼua pāpaʼi-rima-hia taua mau faʼahororaʼa ra e tōʼu metua vahine. ʼUa faʼaruʼe mai tōʼu metua vahine maitaʼi e rave rahi matahiti nā mua atu, e piti ʼāvaʼe i muri aʼe i te 80raʼa o tōna matahiti. ʼUa riro ʼoia ʼei hiʼoraʼa nō te itoito ʼe te pipiri ʼore, tei ʼite noa i te maitaʼi i roto i te mau taʼata. ’E ’ua here ’oia i te mau pāpaʼiraʼa moʼa.
ʼUa ʼīriti au i te mau pāpaʼiraʼa moʼa nō taua mau ʼīrava ra nō te hiʼo e aha tei turaʼi iāna ’ia pāpaʼi i te reira. ’A taiʼo ai au i te reira, ʼua matara ihora tōʼu feruriraʼa i niʼa i te poroʼi e tiʼa iāʼu ʼia hōroʼa. E poroʼi ʼōhie roa ʼo tā te mau melo o te ʼĒkālesia, tei tāmata i te hotu monamona o te ʼevanelia ’ua haʼamoʼehia i te tahi mau taime ē e rave rahi mau taʼata e ’imi nei i taua māʼa hotu ra. Tītauhia ia tātou ’ia haere atu e faʼaʼite ia rātou i hea e ʼimi ai i te reira.
ʼUa manaʼonaʼo vau i tōʼu nei metua vahine maitaʼi ’a hiʼo haere ai au nā roto i te toeʼa o te ’Ia Poro Haere i Tāʼu Nei ʼEvanelia. ʼAore roa e iʼoa, e mau pāpaʼiraʼa, ʼaore rā te tahi mea ʼo te faʼaʼite mai e nāna hoʼi teie buka. ʼUa pārahi au ma te māere ’a feruri ai au i te tupuraʼa o te mau muhumuhu e arataʼi ra i teie nei taime. ʼUa haʼapāpū mai te Vārua iāʼu ē ʼua arataʼihia vau i roto i tōʼu mau manaʼo, mai tāʼu i pure. ʼAita roa aʼe tōʼu metua vahine i ʼite, noa atu e rave rahi mau matahiti tōna pāpaʼiraʼa i taua mau faʼahororaʼa ra, e faʼaʼohipa te Fatu i teie mau pāpaʼiraʼa moʼa ʼei pāhonoraʼa i te pure ha’ehaʼa a tāna iho tamaiti.