« Nāhea e nehenehe ai iā’u ’ia ani manihini i te Vārua i roto i tō’u ʼutuāfare mai te mea ē, e pe’ape’a ’e ’aore rā, e mārō noa te ta’ata? »
E parau ʼua hape au
’Ia vai anaʼe vau i roto i te hōʼē mārōraʼa, ʼua ʼite au ē ’ia parau anaʼe ʼoutou ē ʼua hape ʼoutou ʼe ʼua ʼite ʼoutou ē ʼua hape ʼoutou, noa atu e manaʼo ʼoutou ʼaore rā ʼua ʼite ʼoutou ē ʼua tiʼa ʼoutou, nā te reira e faʼahaere mai i te hau i roto i te piha. I muri iho, e haere ʼē atu, e faʼaea māmū noa, e taui i te tumu parau, ʼaore rā e ʼimi i te tahi atu mea e fāriʼi ʼoutou. Eʼita e maoro roa e hoʼi mai te Vārua.
Dylan M., 15 matahiti, California, Fenua Marite
E here noa
ʼUa ʼite au ē nā te faʼaʼiteraʼa i te here ateatea i tōʼu nei ʼutuāfare e faʼahaere mai i te Vārua ʼia pārahi mai i roto i tō mātou nei ʼutuāfare. ʼUa faʼahiti te peropheta i te here mai te tumu ʼo te faʼatupu i te tauiraʼa ʼe te monoʼi tāmaru ʼo te ʼāfaʼi mai i te faʼaoraraʼa i te vārua. Na te hōʼē vārua nō te here e faʼahaere mai i te pārururaʼa ʼe te hau i roto i te ʼutuāfare.
Joseph C., 18 matahiti, Arizona, Fenua Marite
E paraparau atu i to ʼoutou ʼutuāfare
Mai te mea e ʼere tō ʼoutou ʼutuāfare i te melo nō te ʼĒkālesia, e parau atu ia rātou i tō ʼoutou manaʼo ʼinoʼino ’ia mārō anaʼe rātou ʼe e ani ia rātou ʼia haʼamaitaʼi atu ā i tā rātou mau peu. Mai te mea eʼita te reira e tupu, e pure ʼe e tāmata faʼahou. Mai te mea e melo rātou rā, e faʼahaʼamanaʼo ia rātou ē e mau tamariʼi rātou nā te Atua ʼe e tiʼa ia rātou ʼia haʼapae i te mau tamaʼira’a.
Carolina S., 19 matahiti, Goiás, Berezilia
E pure nō te Vārua.
I te mau taime e mārō ra te ʼutuāfare nā pīha’i iho ia ʼoutou, e mea fifi ’ia ʼite i te Vārua, eʼita rā te reira e faʼaʼite mai e e ʼore roa ʼoutou e ʼite i te reira mai te mea e mea parau-tiʼa ʼoutou. E faʼahiti i te hōʼē pure i roto i tō ʼoutou ʼāʼau nō te tahi atu ā fāito o te Vārua o te Fatu ʼe e haʼapaʼo maitaʼi atu i te mau muhumuhu ʼo te hāponohia mai. E nehenehe tā te Metua i te Ao ra e tauturu ia ʼoutou ʼia ʼite i te hau ʼe ʼia ʼite nāhea i te tauturu maitaʼi aʼe ʼi te faʼahaere mai i taua hau ra i roto i tō ʼoutou ʼutuāfare.
Katie G., 17 matahiti, Utaha, Fenua Marite
E tāmata i te ʼimi i te tahi rāveʼa maitaʼi
E paraparau atu i tō ʼoutou ʼutuāfare nō te tātara i te fifi ʼia maitaʼi te tāʼātoʼaraʼa, ʼaore rā e faʼaʼite i te hōʼē pāpaʼiraʼa moʼa ʼaore rā e hīmene i te hōʼē hīmene. E nehenehe atoʼa ia ʼoutou ʼia ani i te Metua i te Ao ra i te tauturu nō te tātara i te fifi. Nā roto i te reira rāveʼa, e hau ïa te mau taʼata atoʼa ʼe e nehenehe ia rātou ʼia tātara i te fifi ma te tuō ʼore ʼaore ra ma te hitahita ʼore. E mea pāpū roa ʼe faʼaī te Vārua Moʼa ia ʼoutou i te hau ʼe e hōroʼa ʼoia i te mau taʼata atoʼa te hinaʼaro ʼia ʼore e mārō faʼahou.
Luis F., 14 matahiti, Playa del Carmen, Mexico