Pag-abante

Pinalangga kong mga kauturan, daw ano ka makalilipay nga makaupod kamo sa aton pagsugod sang ika-190 Katung-an nga Tuigan nga Pangkabilogan nga Komperensya sang Ang Simbahan ni Jesucristo sang mga Santos sa Ulihing mga Adlaw. Nanamian ako nga makaupod kamo sa inyo mga puluy-an ukon sa diin man kamo sa pagpamati sing ululupod sa mga mensahe sang mga propeta, manugpanan-aw, kag manugpahayag sang rebelasyon kag iban pa nga mga lider sang Simbahan.

Daw ano ang aton kapasalamatan sa teknolohiya nga nagatugot sa aton nga mangin konektado sa dako nga pangkalibutanon nga pagtililipon bilang mga disipulo ni Jesucristo. Ang pangkabilogan nga komperensya sang nagligad nga Abril gintan-aw sang mas madamo nga tawo sangsa nagliligad kag nagalaum gid kami nga matabo ini sa liwat.

Sang nagligad nga pila ka bulan, ang pangkalibutanon nga pandemya, makahalalit nga mga sunog, kag iban pa nga natural nga mga kalamidad ang nagkibot sa aton. Nagakasubo ako upod sa tagsa sa inyo nga nagwad-an sang mahal sa kabuhi sa sining tion. Kag ginapangamuyo ko ang tanan nga nagaantos sa karon.

Samtang, ang buluhaton sang Ginuo padayon nga nagaabante. Sa tunga sang social distancing, face mask, kag mga miting sa Zoom, natun-an naton nga lainon ang pag-obra sang pila ka butang kag ang iban sing mas epektibo pa gid. Ang indi kinaandan nga tiyempo nagadala sang indi kinaandan nga mga padya.

Ang aton mga misyonero kag mga lider sa misyon nangin maalam, mabakod, kag matuod nga dalayawon. Bisan nga ang kalabanan sang mga misyonero kinahanglan magpangita sang bag-o, matugahon (creative) nga mga paagi sa paghimo sang ila buluhaton, madamo nga mga misyon ang nareport nga mas madamo na gid sang ginatudloan subong.

Kinahanglan naton isira ang mga templo sing makadali, kag pila ka proyekto sang pagpatukod ang ginpauntat sing makadali, pero sa karon nagapadayon na ini tanan. Sa tuig 2020, nakabungkag na kita sang duta para sa 20 ka bag-o nga mga templo!

Ang buluhaton sa family history nagdako kaayo. Madamo nga bag-o nga mga ward kag stake ang nahimo. Kag malipayon kami sa pagreport nga ang Simbahan naghatag sang tawhanon nga bulig sa pandemya sa 895 ka mga proyekto sa 150 ka mga pungsod.

Ang dugang nga pagtuon sang ebanghelyo sa madamo nga panimalay nagaresulta sa mas mabaskog nga mga testimonya kag mga relasyon sa pamilya. Ang isa ka iloy nagsulat: “Mas naglapit kami sa amon mga kabataan kag mga apo karon nga nagatipon kami sa Zoom kada Domingo. Ang kada isa nagabulos-bulos hatag sang ila mga panghunahuna parte sa Dali, Magsunod sa Akon. Ang mga pangamuyo para sa mga miyembro sang amon pamilya naglain tungod mas naintiendihan na namon ang ila panginahanglan.”

Kabay nga ginagamit naton bilang katawhan ining pinasahi nga tion sa pagtubo sa espirituhanon. Ari kita sa duta para tilawan, agud mahibal-an kon aton pilion nga sundon si Jesucristo, maghinulsol pirme, magtuon, kag magprogreso. Ang aton mga espiritu nagahandum nga mag-uswag. Kag ginahimo naton ina paagi sa pagtiner sing malig-on sa dalan sang kasugtanan.

Sa tunga sini tanan, ang aton Amay nga Langitnon kag ang Iya Anak nga si Jesucristo, nagapalangga sa aton! Nagaulikid Sila sa aton! Sila kag ang Ila balaan nga mga angheles nagabantay sa aton. ¹ Nakahibalo ako nga matuod ina.

Samtang nagatipon kita sa pagpamati sang mga pulong nga gin-inspirar sang Ginuo sa Iya mga alagad nga ilapta; ginaimbitar ko kamo nga binagbinagon ang isa ka pangako nga ginhimo sang Ginuo. Nagpahayag Sia nga “kon sin-o man ang buot mahimo nga makakapyot sa pulong sang Dios, nga buhi kag gamhanan, nga magapihak-pihak sang tanan nga pagkamalalangon kag mga siod sang panglimbong sang yawa, kag magatuytoy sa [disipulo] ni Cristo sa isa ka makitid kag masipot nga alagyan.” ²

Kabay nga inyo pilion ang magkapyot sa pulong sang Dios samtang ginadeklarar ini sa sining pangkabilogan nga komperensya. Kag ginapangamuyo ko nga kabay inyo mabatyagan ang perpekto nga pagpalangga sang Ginuo sa inyo, ³ sa sagrado nga ngalan ni Jesucristo, amen.